გალატელეფ
3 ოხ, უჭკუე გალატელეფ, თაშ მიქ მოირთეს ტვინ?! თქვანდა ხომ ჯგირო რდჷ ენწყუმილ, მუს ნიშნენდჷ ქრისტეშ ძელს მიკოჭკადუა?! 2 მოკო, ართ მუდგარენ რკითხათ: წმინდა შურ* თიშენ მიღითო, ნამდა კანონ ითხინსინ თი საქმეეფს ორთუდით, დოვარ თიშენ, ნამდა მორჩქილაფირ ირწმუნით? 3 გვალო თეცალ უჭკუეეფ რეთო? დუდშე წმინდა შურშა რდითჷ მენდებულ, თიშ ხელმძღვანელობას მეჸუნდით დო ასე თქვან დუდშა რეთო მენდებულ? 4 ტყურელო გაურზითო თესხი ოტანჯებელს? თენა ვადმაჯერებე. 5 იმწკუმა, მუშენ გარზენა თინა წმინდა შურს დო მუშენ ორთჷ სარკო საქმეეფს თქვან შქას? თიშენიო, ნამდა კანონ ითხინსინ თი საქმეეფს ორთუთ, დოვარ თიშენ, ნამდა რწანა მორჩქილაფირ? 6 აბრაამქ ხოლო ხომ „ირწმუნ იეჰოვა* დო ათეშენ მართალო იჸუ მერჩქინელქ“.
7 თქვა გიჩქუნა, ნამდა აბრაამიშ სქუალეფ თინეფ რენა, მიდგას რწმენა უღუნა. 8 ღორონთიქ წმინდა წერილეფს იწინასწარმეტყველ, ნამდა თინა შხვა რჯულიშ ხალხის მართალეფო ქიმირჩქინანდ მუნეფიშ რწმენაშ გურშენ. აბრაამს ხოლო წინასწარ გაუცხად სახიოლო ამბე დო უწუ: „არძა ერ სქან საშვალებათ იჸუაფ ხვამელ“. 9 თაშ ნამდა, მიდგას რწმენა უღჷ, ხვამელ რე მორწმუნე აბრაამცალო.
10 არძა, მით კანონიშ საქმეეფშა რე მენდებულ, ჭყელ რე, მუშენდა ჭარილ რე: „ჭყელ რე არძა, მით ვემეჸუნს ირფელს, მუთ კანონიშ გრაგნილს რე ინოჭარილ“. 11 არგამა რე, ღორონთიშ თოლს კანონიშ საშვალებათ მითინ ვეჸუაფ მართალო მერჩქინელ, მუშენდა ჭარილ რე: „მართალ რწმენათ იცოცხლენს“. 12 კანონ ვეთხინს რწმენაშ გიმორჩქინას, წმინდა წერილეფ ხვალე თეს იჩიებ: „არძა, მით თე ირფელს მეჸუნს, იცოცხლენს“. 13 ქრისტექ გეგშამჸიდეს, გუმათავისფალეს კანონიშ ჭყალაშე დო ჩქინ მანგიორო მუქ გინირთჷ ჭყელო, მუშენდა ჭარილ რე: „ჭყელ რე არძა, მით ძელს რე მიკობუნაფილ“. 14 თექ თიშენ მოხვად, ნამდა ქრისტე იესოშ საშვალებათ აბრაამიშ ხვამაქ ხალხეფშა გინილუკო დო თეშნერო, რწმენაშ საშვალებათ მიბღითკო დუნაპირებ წმინდა შურ.
15 ჯიმალეფ, ართ მაგალითის ქუმოიჸუნანთ: შეთანხმება კოჩიშ დოდვალირ რდასინ ხოლო, ძალაშა გემშურსუნ, მითინ ვართ აუქმენს დო ვართ მუთუნს გეუძინანს. 16 დუნაპირებუეფქ მიაჩ აბრაამს დო თიშ გამნარყის; წმინდა წერილეფ ვეჩიებ: „სქან გამნარყეფს“, მუშენდა თაშ ქოჸოფედუკონ, ბრელიშ გურშენ მიშუკონ იჸიდ რაგად, თეშ მანგიორო, იჩიებ, „სქან გამნარყის“, თეშნერო ხვალე ართ პიროვნებაშენ მეურს რაგად, დო თენა ქრისტე რე. 17 თეს ხოლო ქოფთქუანქ: ღორონთიქ დიო აბრაამწკუმა დოდვჷ შეთანხმება დო 430 წანაშ უკულ მეჩჷ მუშ ხალხის კანონ, მარა თე კანონს ძალა ვა უდინუაფ შეთანხმებაშა დო ვა გუუქმებ დუნაპირებ, ნამუთ ღორონთიქ აბრაამს მეჩჷ. 18 ღორონთ მემკვიდრეობას კანონიშ საშვალებათ ქირზენს-და, გიშურს, ნამდა თინა დუნაპირებუშ საშვალებათ ვა ჸოფე, მარა ღორონთიქ დუნაპირებუშ საშვალებათ უძღვინ აბრაამს მემკვიდრეობა.
19 იმწკუმა მუ საჭირო რდჷ კანონ? თინა ცოდეფს აარგამენდჷ, ონდო გამნარყ მიშუკო, ნამდგას დუნაპირებუქ მიაჩ. ღორონთიქ ანგელოზეფიშ საშვალებათ გინოჩ მოსეს კანონ, უკულ თე კანონქ ხალხშა გინოჩამილქ იჸუ მოსეშ ხეთ, ნამუთ აშმაჸვენჯ რდჷ. 20 მუჟამსით შეთანხმებას ხვალე ართ მხარე ჸუნსჷ, აშმაჸვენჯ ვა რე საჭირო; თი ართ მხარე, ნამდგაქ პირობა დოდვჷ, ღორონთ რე. 21 ოწინააღმდეგუნო კანონ ღორონთიშ დუნაპირებუეფს? მუშო ოკო რაგად, ვარ! კანონს ჩქინდა სიცოცხლეშ მოჩამა ქეშულებუდუკონ, იმწკუმა თიშ საშვალებათ იპჸიდით მართალეფო მერჩქინელ. 22 მარა წმინდა წერილეფქ ქაძირუ, ნამდა ხალხ ცოდაშ ხეს რდჷ აშალაფირ, მუშენდა არძაქ, მით იესო ქრისტეს ირწმუნენდ, თე რწმენაშ საშვალებათ მიღუკო დუნაპირებ.
23 სოიშახ ქრისტეს იბრწმუნენდით, კანონ ფთხილანდეს, თიშ ძალაუფლებაშ თუდო ვორდით დო ველუდით რწმენას, ნამუთ მალას გემკორჩქინდუდ. 24 თეშნერო კანონქ გინირთჷ ჩქინ გიმაწურაფალო დო ქრისტეშა მიმაჸუნაფალო, ნამდა რწმენაშ საშვალებათ მართალეფო პჸოფედითკო მერჩქინელ. 25 მარა ასე, მუჟამსით ქრისტე იბრწმუნით, კანონ ვა მოსაჭირუნა ეწმაჸუნალო.
26 თაშ ნამდა, რახანს ქრისტე იესო რწანა, არძა ღორონთიშ სქუალეფ რეთჷ, 27 მუშენდა არძაქ, მიდგაქ ინათით დო ქრისტეწკუმა რეთჷ ართობას, ქრისტეს ქაგურით. 28 უკვე ვა უღჷ მნიშვნელობა, იუდეველ რეთჷ დოვარ ბერძენ, მონა რეთჷ დოვარ თავისფალ, კოჩ რეთჷ დოვარ ოსურ, მუშენდა თქვა, ქრისტეშ მოწაფეეფს, არძას ართობა გიღუნა. 29 დო, რახანს ქრისტეს ოკუთვნუთ, მართალო აბრაამიშ გამნარყეფ რეთჷ დო მიღენთ აბრაამშა დუნაპირებ მემკვიდრეობას.