Jehová kineki maj tikintapojpoluikan akin techyolkokouaj (Sal. 86:5; Luc. 17:4). Xa aksa kijtos oso kichiuas teisa tein semi techyolkokos, uan okachiok techyolkokos komo techchiuilia se totasojikniuj oso se tochankauj (Sal. 55:​12-14). Kemansa semi tikualaniskej oso timoyolkokoskej uan tikmachiliskej kemej yeskia techtsoponiskiaj ika se tepos (Prov. 12:18). Uan xa tiknekiskej ijkon tikauaskej oso amo tikijtoskej tein tikmachiliaj. Sayoj ke komo ijkon tikchiuaskiaj kemej yeskia tikauaskiaj maj totech tokto se cuchillo uan amo tikixtiskiaj. Komo amo teyi tikchiuaj para tiyolseuiskej tiksentokaskej fiero timomachiliskej. Keman aksa techyolkokoua xa niman tikualantikisaj. Biblia kijtoua ke kemansa ipa ijkon techpanos. Sayoj ke no technejmachtia ke amo moneki uejkauak tikualantoskej (Sal. 4:4; Efes. 4:26). ¿Keyej? Porin keman tikualanij ueliskia tikchiuaskej tein amo kuali (Sant. 1:20). Xikonelnamiki ke keman aksa techchiuilia teisa xa ipa tikualanij, sayoj ke tejuan tikmatij ox tiksentokaskej tikualantoskej oso amo. w25.02 15 § 4-6

Jesús ika tajtoj se taman para kinextis ke amo tapaleuia komo aksa kisentilia tomin sayoj ke “iixpan Dios amo teyi kipia” (Luc. 12:​16-21). Amo tikmatij toni techpanos satepan (Prov. 23:​4, 5; Sant. 4:​13-15). Uan no, Jesús kijtoj ke nochin akin kitojtokaskiaj amo monekia kinyolkokos kikauaskej nochi tein kipiaj (Luc. 14:33). Uan yejua nejon tein kinpanok tokniuan de Judea keman nemiaj tatitanilmej, yejuan kikaujkej nochi tein kipiayaj (Heb. 10:34). Axkan miakej tokniuan amo kipiajok tekit oso kinkuilianij tein kipiayaj porin amo tavotarouaj (Apoc. 13:​16, 17). Yejuan kinextianij ke takuaujtamatij itech nejin tein Jehová motenkaua: “Amo keman nimitskauas uan nochipa nimitspaleuis” (Heb. 13:5). Yejua ika timochikauaj tiksentiliskej tepitsin tomin para ika timopaleuiskej keman tiyeskij tixiuejkejya uan titakuaujtamatij ke Jehová techpaleuis komo techpanoua teisa tein amo tikchiayaj. w25.03 29 § 13, 14

Jehová techpaleuia maj kuali titaixejekokan, yejua ika kiixtalij maj seki tokniuan techixyekanakan itech nechikol “hasta maj timoskaltikan kemej se akin ueyiya uan titamatikan kemej Cristo itech nochi” (Efes. 4:​11-13). No techpaleuia ika ichikaualis para maj ‘titanemilikan kemej Cristo’ (1 Cor. 2:​14-16). Uan no, kichiuak maj moijkuilo naui Evangelios tein techpaleuiaj maj tikmatikan toni kichiuako Jesús keman yetoya nikan taltikpak. Komo titanemiliaj, titajtouaj uan tikchiuaj kemej yejua, uelis kuali titaixejekoskej. Sayoj ke komo tiknekij kuali titaixejekoskej, amo moneki sayoj tikitaskej “tein yekinika timomachtijkej de Cristo”. w24.04 4, 5 § 11, 12