Se akin kitekitilia Jehová xa no ueliskia ijkon kipanos. Xa tajtakolchiuas uan kinemilis ke nochi ijsiujka panok, uan ueliskia kijtos: “Amo nikmati keniuj panok”. Sayoj ke komo itech tanemilia seki taman tein achto kichiujka, kiitas ke nejon kichiuak maj tajtako. Xa kuali mouikaya iuan akin amo kitasojta Jehová, peuak moixpetania ika tein amo kuali, kiitaya tein amo kuali itech internet, oso yaya kampa amo monekia. Xa amo motataujtiayaok, amo kiixtajtoltiayaok Biblia, amo yayaok nechikolmej uan amo tanojnotsayaok. Uan ijkon kemej kipanok telpoch tein ika tajtoua Proverbios, xa achto kichiujka seki taman tein yolik kichiuak maj tajtako. ¿Toni techmachtia? Tikmatij ke amo moneki titajtakolchiuaskej, sayoj ke amo no moneki tikchiuaskej teisa tein kichiuas maj titajtakokan. Uan yejua nejon tein kijtoj Salomón (Mat. 5:​29, 30). w24.07 16 § 10, 11

Sayoj ke, ¿toni nejon tein tel patiyoj? Yejua keman tikteixmatiltiaj iTaixyekanalis Dios, porin nejon tapaleuia maj miakej momakixtikan (2 Cor. 4:1). ¿Uan akonimej kiixnextiaj sokikomit? Tejuan, tiitekitikauan Dios akin tikteixmatiltiaj kuali tanauatilmej. Keman Pablo nemia, kiuikayaj takual, vino oso tomin itech se sokikomit. Itech nejin tonalmej tejuan no tikuikaj teisa tein tel patiyoj, se kualtsin tekit tein Jehová techmakatok: maj tikteixmatiltikan kuali tanauatilmej. Jehová techpaleuis maj tichikaujkej para tiksentokaskej titanojnotsaskej. Kemansa xa timouiskej maj techixnamikikan oso maj amo kinekikan techkakiskej. ¿Toni techpaleuis maj amo ijkon timomachilikanok? Maj tiknemilikan itech tein kijtojkej tatitanilmej keman motataujtijkej satepan ke kinnauatijkej maj amo tanojnotsanijok. Yejuan amo mosenkaujkej, ta kitajtanijkej Jehová maj kinpaleuiani para “maj amo mouikan” uan maj ueli kisentokanij kiteixmatiltianij iTajtol. Uan yejua niman kinnankilij (Hech. 4:​18, 29, 31). Komo timouij maj techixnamikikan keman titanojnotsaj, maj tiktajtanikan Jehová maj techpaleui maj okachi tikintasojtakan oksekin, uan maj tiyolchikaujkej keman tikteixmatiltiskej kuali tanauatilmej. w24.04 16 § 8, 9

Kemej tiktasojtaj Jehová, tiknekij maj itokay yektik. Nejin kijtosneki ke tiknekij tikinmatiltiskej oksekin ke amo melauj tein Satanás kitakajkayauiliani Jehová (Gén. 3:​1-5; Job 2:4; Juan 8:44). Yejua ika keman tiouij titanojnotsatij, tiknekij tikiniluiskej akoni Jehová uan keniuj tamati yejuatsin. Tiknekij maj nochin kimatikan ke semi tetasojta, ke nochipa kichiua tein kuali yetok uan ke iTaixyekanalis kichiuas maj amo titajyouikanok, maj tiyolseujtokan uan maj tiyolpakikan (Sal. 37:​10, 11, 29; 1 Juan 4:8). Keman tikchiuaj nochi nejin, titapaleuiaj maj itokay Jehová yektik. Uan no tiyolpakij porin tikchiuaj tein moneki kichiuas se itaixpantijkauj Jehová. w24.05 18 § 12