Nyi ngwe mutanga lusango umwe mu Mbimbiliya alioze kakulumbunukine kanawa, hengwola mu mikanda yetu ni kupukuna ha yize walilongesa hali Yehova, Mwanenyi ni ha zango lize o akwete hali yena. (Sam 119:97) Muze unatange Mbimbiliya hanji unahengwola, kanda unenganyana nyi kuwawanyine chikuma chaha. Kuhengwola chize unalingi, chili ngwe mutu yoze unayi ni kufula kamanga. Kanji-kanji atu waze akuya ni kufula kamanga, kakupalikisa maola ni matangwa anji mba awane tusenga. Chipwe chocho, ayo keshi kulitwamina. Mumu kuli ayo, kalusenga keswako mawana kali ni ndando. Kuli yetu, umwenemwene uze twakuwana mu Mbimbiliya uli ni ndando yinji kuhiana kamanga mweswawo. (Yishi. 8:10) Kashika, pwako ni kuhwima mbunge hanga uwane yikuma yaha muze unatange Mbimbiliya.—Samu 1:2. w25.01 25 ¶14-15

Yehova kanashimbwila hanga tukonekene waze akutukekuna ni kutuvwisa yikola ku mbunge. (Samu 86:5; Luka 17:4; Efwe. 4:32) Mutuhasa kwivwa yikola yinji ku mbunge mumu lia yuma yize umwe amba hanji alinga, chipi-chipi nyi mutu wacho kali sepa hanji usoko wetu. (Samu 55:12-14) Ha mashimbu amwe, yikola yize twakwivwa ku mbunge yakupwa ngwe kutuwa cha katana. (Yishi. 12:18) Mutuhasa kulengulula chize tunevu ni kusolola ngwe kwalingiwile chuma nichimwe. Alioze kulinga chino, chili ngwe kwecha katana wacho anunge ha chilonda. Chizechene nawa, kutwatambile kushimbwila ngwetu, yikola yize tunevu ku mbunge muyipalika ha kuyilengulula. Nyi umwe matulemeka ku mbunge, kanji-kanji twakuvwila mutu wacho uli. Mbimbiliya yakusolola ngwo, hi chipi ko kwivwa uli ha mashimbu amwe. Alioze, yakututoweza nawa ngwo, manyonga wano api katambile kutusongwela. (Samu 4:4; Efwe. 4:26) Mumu liaka? Mumu uli kuushi kututwala kulinga yuma yipema. (Tia. 1:20) Mutu mahasa kwivwa uli, alioze kununga ni uli chili chuma chize mwene masakula. w25.02 15 ¶4-6

Yesu katele chishima chize chinasolola ngwo, chili uhepuke kufupa chinji mbongo, chakuhona kupwa “pichi kumeso ja Zambi.” (Luka 12:16-21) Kukushi niumwe yoze unanyingika yize muyikalingiwa hamene. (Yishi. 23:4, 5; Tia. 4:13-15) Chikwo nawa, twakupalika mu kapinda mumu lia kupwa tumbaji twa Kristu. Yesu kambile ngwenyi, mba tupwe tumbaji twenyi, twatamba ‘kuhichika’ yikumba yetu yeswe. (Luka 14:33) Yino ye yalingiwile kuli Akwa-Kristu ku sekulu yitangu mu Yundeya. Ayo kanungine ni kuwahilila chipwe ngwe katokesele yikumba yo yeswe. (Hepre. 10:34) Musono, mandumbu jetu anji katokesa yikumba ni milimo yo mumu lia kulituna kulinga yuma ya mafwefwe. (Uso. 13:16, 17) Yika yaakwashile kuchilinga? Ayo kanakajikijila ha chilakenyo cha Yehova, chinambe ngwo: “Chichi kakwehuka, chichi kakumbila.” (Hepre. 13:5) Twakulinga yize mutuhasa hanga tupwe ni yize mutukafupa kulutwe lia matangwa. Alioze twakufuliela nawa ngwetu, nyi mukulingiwa yimwe susumuku, Yehova matufunga. w25.03 29 ¶13-14