Imadyin mo pa ya inikdan moy regalo so sakey ya kaarom. Pinili-pilim may regalo ya talagan nagustoan tan nausar to. Pero anto kasi naliknam no inyatol to labat tan nilingwanan to la? Seguradon nadismaya ka! Pero no nanengneng mo ya talagan uusaren to tan misatsalamat ed sika, seguradon malikeliket ka! Natan, isip mo pa met si Jehova. Inter toy Anak to pian ompatey parad sikatayo. Inregalo to so dondon ta inar-aro to tayo. Seguradon makakaliket ya maong si Jehova no nanenengneng to ya papablien tayo itan ya espisyal ya regalo to tan no misatsalamat tayod panangaro to! (Juan 3:16; Roma 5:7, 8) Pero diad ilalabas na panaon, ompan naibabaliwala tayo la so dondon. Tua, maliket tayo ta inregalo itan nen Jehova ed sikatayo, pero ompan singa tayo labat inyatol tan nilingwanan tayo la. Agtayo labay ya nagawa itan. Lanang tayo sirin ya nonoten no antoy ginawa nen Jehova tan Jesus parad sikatayo pian agnabalang so panamabli tayo ed dondon. w25.01 26 ¶1-2

Pian onkualipikan magmaliw ya elder so sakey ya brother, dapat aliwan balobalo a mananisia. Agto labay ya ibaga ya dapat et abaybayag ka lan abautismoan. Pero siempre, linmabas met lay magenap ya panaon kanian matatken ka lad espiritual. Antis kan magmaliw ya elder, nepeg ya nanengneng ya talagan mapaabeba ka ya singa si Jesus tan maanos mo met ya aalagaren so antokaman ya asainmin ya iter ed sika nen Jehova. (Mat. 20:23; Fil. 2:5-8) Importante met ya matoor ka. Labay ton ibaga, talagan iyaaplikam ed bilay mo iray prinsipyo tan ganggan nen Jehova. Tan uunoren moy amin ya instruksion ya iiter to panamegley na organisasyon to. Malinlinew ya ibabaga na Biblia ya say sakey ya elder et nepeg ya kualipikadon manbangat. Pero labay to kasin ibaga ya dapat et nayaryari kan manpaliwawa? Andi. Dakel pay elder ya aliwa met ya marundunong ya manpaliwawa ed kongregasyon. Pero marundunong dan uusaren so Biblia diad ministeryo tan no papasesegen da ray agagi. w24.11 23-24 ¶14-15

No walay teksto ed Biblia ya agmo masyadon natatalosan, i-research mo. Insan no walay balon punto ya naaralan mo, dalepdep mo itan ya sanagew tan isip mo no antoy naaralan mod satan nipaakar ed si Jehova, si Jesus, tan ed panangaro dad sika. (Sal. 119:97, paimanod leksab) Agka komon nadidismaya no anggapoy naromog mon makapainteres o balon punto kada no manbabasa kay Biblia o kada no manre-research ka. Tandaan mo ya say panaral na Biblia et singa pananap na ankablin bato. Isip mo pa iramay say trabaho da et mananap na gold. Maan-anos ira. No maminsan, nasabi day pigaran oras o pigaran agew ni ingen antis iran makalmo na angkekelag ya piraso na gold. Akin et ontan lay inkaanos da? On ta amta ra ya kada pirason naromog da, anggano melmelag, et mabmabli. Pero siempre, mas mabli ni nen say gold so kada kayamanan ya naromog tayod Biblia! (Pro. 8:10) Kanian anosan mo labat so manbasay Biblia tan ituloy mo labat ya anggad walay naromog mon balon kayamanan.—Sal. 1:2. w25.01 25 ¶14-15