Ko te tonu maʼuhiga ʼaupito ʼae ʼe feala ke fai e te tagata, ʼe ko tana foaki tona maʼuli kia Sehova pea mo tana tauhi fakatahi mo ʼana tahi ʼu kaugana kia te ia. ʼE loto e Sehova ke toʼo e te tagata fuli pe te tonu ʼaia. Kotea tona tupuʼaga? ʼE fia kaumeʼa mo natou pea ʼe ina loto ke natou maʼuʼuli ʼo heʼe gata. (Tet. 30:​19, 20; Kal. 6:​7, 8) ʼE mole fakamalohiʼi e Sehova he tahi ke tauhi age kia te ia. ʼE ina tuku ki te tagata takitokotahi ke ina filifili te meʼa ka ina fai. Kae ʼe feala ke tou fai te fehuʼi ʼaeni: Kotea ʼe hoko ki he tehina peʼe ko he tuagaʼane kua papitema ʼe mole fakalogo ki he lao ʼa te ʼAtua, ʼo ina fai he agahala mamafa? Kapau ʼe mole fakahemala, ʼe tonu anai ke ‘toʼo’ ʼi te kokelekasio. (1 Ko. 5:13) Kae logo la te faʼahi ʼaia, ʼe fakaʼamu lahi ia Sehova ke toe liliu mai kia te ia. Kapau neʼe ina foaki te totogi, ʼuhi tafito ʼae ʼe ina loto ke fakamolemole te ʼu agahala ʼo natou ʼae ʼe fakahemala. ʼE loto e totatou ʼAtua fonu ʼi te ʼofa ke fakahemala te kau agahala. Pea ʼe ina fakalotomalohiʼi natou ke natou fai te faʼahi ʼaia.—Skl. 1:3; Loma 2:4; Sakp. 4:8. w24.08 14 ¶1-2

ʼI te temi ʼae neʼe tohi e te apositolo ko Soane ia tana tolu tohi, neʼe fakamafola e te hahaʼi he ʼu akonaki loi ʼo tupu ai he ʼu mavetevete. Kae, neʼe hoko atu pe e te ʼu tehina mo tuagaʼane tanatou ‘mulimuli ki te ala ʼo te moʼoni.’ Neʼe natou fakalogo kia Sehova pea mo “mulimuli ki ʼana fakatotonu.” (2 Soa. 4, 6) ʼE lahi ʼaupito te fiafia ʼa Soane ʼuhi ko tanatou nofo agatonu. Pea neʼe natou toe fakafiafiaʼi foki mo te loto ʼo Sehova. (Taag. 27:11) Kotea te ako ʼe tou maʼu mai te meʼa ʼae neʼe tohi e Soane? Ka tou agatonu pea ʼe tou fiafia. (1 Soa. 5:3) Ohage la, ʼe tou fiafia ʼi tatatou iloʼi ʼae ʼe tou fakafiafiaʼi ia Sehova. Pea ʼe fiafia ʼaupito ia Sehova ʼi tana sio mai ʼae, ʼe tou tekeʼi te ʼu fakahala ʼo te malama ʼaeni, pea mo tali te moʼoni. Pea ʼe toe fiafia mo te kau ʼaselo ʼi selo. (Luka 15:10) ʼO toe feia pe, ʼe tou toe fiafia ka tou sisio ʼe nonofo agatonu ʼotatou tehina mo tuagaʼane. (2 Tes. 1:4) Pea hili te tau ʼo Alamaketone, ʼe tou fiafia anai ʼi te fakaha, neʼe tou nonofo agatonu kia Sehova ʼi he malama neʼe puleʼi e Satana. w24.11 12 ¶17-18

Ko temi ʼe fia ʼe tonu ai ke ke sioʼi te aga ʼa he tahi ʼi muʼa ʼo tau fakaha age kia ia ʼe ke fia fakatahi mo ia? Kapau ʼe ke fai fakavilivili te faʼahi ʼaia, pea ʼe hage anai kia ia neʼe mole ke fakakaukauʼi lelei. (Taag. 29:20) ʼI te tahi age faʼahi, kapau kua ina tokagaʼi ʼe ke fia fakatahi mo ia, kae fualoa fau leva tau alu ki ai, pea ʼe hage anai kia ia heʼeki ke iloʼi papau te meʼa ʼae ʼe ke loto ki ai. (Ekl. 11:4) Manatuʼi, ʼe mole ke alu ʼo kole ki he tahi ke kolua fakatahi he ʼe kua ke iloʼi papau ʼe kolua ʼohoana anai. Kae ʼe ke alu anai ki ai he ʼe kua ke iloʼi papau kua feala hau ʼohoana pea ʼe ke manatu ʼe liliu anai ko he ʼohoana ʼe lelei maʼa koe. Kae ʼe feafeaʼi leva moka ke tokagaʼi ʼe fia fakatahi he tahi mo koe? Kapau ʼe mole ke loto ki ai, faiga ke iloga ʼi tau aga. ʼE mole ko he agalelei mo kapau ʼe ke tuku ke manatu ʼe ke loto ki ai kae mole koia ia.—Efe. 4:25. w24.05 22-23 ¶9-10