The story of this young man, na example of wetin fit happen to any servant of Jehovah for this our time. E fit commit serious sin, and later feel say everything just happen at once or say e no expect-am. But if e take time think-am, e go see say e don make some foolish decision wey make-am commit the sin. Some of this things fit be bad friends wey e de follow, to de go where no good for servant of Jehovah even for Internet, or to de use things wey no good for servant of Jehovah to enjoy imself, like book, film, and music wey no good. E fit still be say e no de pray again, read Bible, go meeting, or no de preach again. Just like the young man wey Proverbs talk about, the temptation no come at once, but na im bad decisions cause the temptation and make-am fall for the sin. Wetin this story teach us? E teach us say no be only the sin we go run from, but we go still run from things wey fit make us sin. Na so Solomon talk after e explain wetin happen.—Matt. 5:​29, 30. w24.07 16 ¶10-11

Wetin be this thing wey get value? Na the preaching work wey de save people life. (2 Cor. 4:1) And wetin be the clay containers? Na Jehovah servants wey de carry the message go preach to people. For the time of apostle Paul, business people de use clay pot carry things wey get value, like food, wine, and money. For the same way, Jehovah de use us carry better message wey get value well-well, make we go preach-am to people. With Jehovah help, we fit get the power wey we need to continue to preach. Sometimes, we too fit de fear people or fear say people no go want listen to the good news. Wetin fit help us stop to de fear? Make we see wetin help the apostles when leaders for Jew people religion tell them say make them stop to preach. Instead make them de fear, them pray to Jehovah say make e help them, so that them go “really get strong heart to continue to talk about [im] word.” Jehovah answer their prayer quick-quick. (Acts 4:​18, 29, 31) If you de fear to preach sometimes, beg Jehovah make e help you fit love people more, so that you no go fear to preach to them. w24.04 16 ¶8-9

The love wey we get for Jehovah de move us to make im name holy. We de do this one when we tell people say all the things wey Satan talk about Jehovah na lie. (Gen. 3:​1-5; Job 2:4; John 8:44) When we de preach, e de hungry us to tell everybody wey want listen about Jehovah and the kind God wey e really be. We want make everybody know say im number one character na love, e de rule for the correct way and e no de do partial, and say small time, im Kingdom go end suffer-suffer, make peace dey everywhere for this earth, and make all of us de happy. (Ps. 37:​10, 11, 29; 1 John 4:8) When we de tell people this things about Jehovah, we de make im name holy. Another thing be say, e de make us happy because we know say we de do wetin we suppose do as Jehovah Witness people. w24.05 18 ¶12