Oktubre

Agsob nga nakakakarawat kita hin teokratiko nga instruksyon—tikang ha aton mga tigurang ha kongregasyon, ha paramangno han sirkito, ha branch office, o ha Nagmamando nga Lawas—nga naggigiya ha aton pagsingba. Pero ano man kon diri naton nasasabtan an rason ha instruksyon nga aton nakarawat? Bangin makita la naton an negatibo nga mga epekto ha aton han instruksyon. Bangin magpokus pa ngani kita ha pagin diri perpekto han mga brother nga naghatag han instruksyon. Kon naglalakat kita pinaagi ha pagtoo, nasarig kita nga hi Jehova an naggigiya ha iya organisasyon ngan maaram hiya han aton mga kahimtang. Sugad nga resulta, namamati dayon kita, ngan ginbubuhat ito nga may positibo nga panhunahuna. (Heb. 13:17) Maaram kita nga an aton pagin masinugtanon nakakabulig ha pagkaurosa han aton kongregasyon. (Efe. 4:​2, 3) Nasarig kita nga bisan kon diri perpekto an nangunguna nga mga brother, bibendisyonan ni Jehova an aton pagin masinugtanon. (1 Sam. 15:22) Ha tama nga panahon, tatadungon niya an ngatanan nga dapat gud tadungon. w25.03 23-24 ¶13-14

Nabubuhi kita ha eksayting nga mga panahon! Kada adlaw, nakikita naton nga natutuman an tagna han Biblia. Pananglitan, nakikita naton nga “an hadi han norte” ngan “an hadi han sur” nagkukompetensyahay kon hin-o an magkukontrol han kalibotan. (Dan. 11:​40, ftn.) Nakikita naton nga iginsasangyaw ha bug-os nga kalibotan an maopay nga sumat han Ginhadian han Dios, ngan minilyon nga tawo an nagdesisyon nga mag-alagad kan Jehova. (Isa. 60:22; Mat. 24:14) Ngan nakakakarawat kita hin hura nga espirituwal nga pagkaon “ha husto nga panahon.” (Mat. 24:​45-47) Padayon kita nga ginbubuligan ni Jehova nga magkaada mas klaro nga pagsabot ha dagku nga panhitabo nga hirani na matuman. (Prob. 4:18) Makakasiguro kita nga ha panahon nga magtikang na an daku nga kasakitan, mahibabaroan naton an ngatanan nga kinahanglan ta mahibaroan basi makailob nga matinumanon ngan magpabilin nga nagkakaurosa hiton makuri nga panahon. Pero dapat naton akseptaron nga may pipira nga butang an aton diri nahibabaroan mahitungod ha hirani na nga tiarabot. w24.05 8 ¶1-2

Espisipiko nga gin-unabi han salmista an pagpakaraot. Ano an pagpakaraot? Kaurogan na nga nagtutudlok ito ha buwa nga mga pulong nga makakadaot ha reputasyon han usa nga tawo. Ginpapahinumdoman liwat kita han Salmo 15:3 nga an mga bisita ni Jehova diri nagbubuhat hin maraot ha ira amyaw ngan diri ginlilibak an ira kasangkayan. (Sal. 15:1) Ano an posible nga nahiuupod hito? Posible nga diri tinuyo nga libakon naton an usa pinaagi ha pagpasarang hin negatibo nga impormasyon. Pananglitan: (1) sister nga inundang ha iya pagpayunir, (2) mag-asawa nga diri na nag-aalagad ha Bethel, o (3) brother nga diri na tigurang o ministeryal nga surugoon. Diri maopay kon isusumat naton ha iba nga ini nga kabugtoan bangin nakabuhat hin sayop, salit waray na hira hito nga mga pribilehiyo. Posible nga ito nga pagbag-o may mga rason nga diri kita maaram. Dugang pa, an bisita ha tolda ni Jehova “diri . . . nagbubuhat hin maraot ha iya amyaw ngan diri niya ginlilibak an iya kasangkayan.” w24.06 11 ¶11-13

Basi parig-unon an aton kahadlok kan Jehova, dapat magpokus kita nga palipayon hiya ha tagsa naton nga desisyon. Samtang imo ginbabasa an mga rekord ha Biblia, pakianhi an imo kalugaringon, ‘Kon aada ako hito nga sitwasyon, ano daw la an akon magigin desisyon?’ Pananglitan, imadyina nga namamati ka samtang an napulo nga Israelita nga lider nagsusumat han ira negatibo nga balita katapos nira mag-espiya ha iginsaad ni Jehova nga tuna nga ihahatag ha mga Israelita. Matuod ka ba hito nga balita ngan mahahadlok ha tawo, o an imo ba gugma para kan Jehova ngan an imo hingyap nga lipayon hiya magigin mas makusog kay ha imo kahadlok? An bug-os nga henerasyon han mga Israelita waray tumoo nga kamatuoran an ginyayakan nira Josue ngan Caleb. Sugad nga resulta, waray tuguti ni Jehova ito nga mga Israelita nga makasulod ha Tuna nga Iginsaad.​—Num. 14:​10, 22, 23. w24.07 10 ¶7

Hi Gomer, nga asawa ni propeta Hosea, binaya ha iya kay inupod ha iba nga kalalakin-an. Posible pa ba hiya mabuligan? Hi Jehova, nga nakakabasa han mga kasingkasing, nagsiring kan Hosea: “Sige, higugmaa utro an babaye nga ginhihigugma hin iba nga lalaki ngan nag-aadulteryo, sugad han paghigugma ni Jehova ha katawohan han Israel bisan kon nadangop hira ha iba nga mga dios.” (Hos. 3:1; Prob. 16:2) Pansina nga an asawa ni Hosea nagbibinuhat la gihapon hin seryoso nga sala. Pero ginsidngan ni Jehova hi Hosea nga kadtoon hiya ngan pasayloon ngan makigbalik. Sugad man, padayon nga ginbuligan ni Jehova an iya matinalapason nga katawohan. Bisan pa kon nagbibinuhat hira hin grabe nga mga sala, nahigugma la gihapon hiya ha ira ngan padayon nga ginkadto hira ngan ginbuligan nga magbasol ngan magbag-o han ira pagkinabuhi. Iginpapakita hini nga ehemplo nga hi Jehova, “an nag-uusisa han mga kasingkasing,” makadto ha indibiduwal nga nagbibinuhat pa hin seryoso nga sala ngan maniningkamot nga buligan hiya nga magbasol. w24.08 10 ¶7

An Judio nga nagin mga Kristiano ha siyahan nga siglo inatubang hin daku nga problema. May panahon, an mga Judio nagin pinili nga katawohan ni Jehova. An Jerusalem an sentro han pagmando han Ginhadian han Dios dinhi ha tuna, ngan an templo didto amo an sentro han putli nga pagsingba. An ngatanan nga matinumanon nga Judio nagsunod han Mosaiko nga Balaud sugad han igintutdo han ira mga lider han relihiyon. Ito nga mga katutdoan nakaimpluwensya ha ira kon ano an ira kakaunon, ha ira panhunahuna ha pagturi, ngan bisan ha ira pagtratar ha mga Hentil. Pero katapos mamatay hi Jesus, waray na karawata ni Jehova an mga iginhahalad ha templo. Tungod hito, nakurian an Judio nga mga Kristiano nga nahiara ha pagsunod ha Balaud. (Heb. 10:​1, 4, 10) Bisan an hamtong nga mga Kristiano, sugad kan apostol Pedro, nakurian ha pagpahiuyon ha pipira hini nga mga pagbag-o. (Buh. 10:​9-14; Gal. 2:​11-14) Tungod han ira bag-o nga gintotoohan, ito nga mga Kristiano gintimaraot han mga Judio nga lider han relihiyon. w24.09 9 ¶4

Anoman nga toka an iginhahatag ni Jehova ha iya katawohan, naglalaom hiya nga bubuhaton nira ito ha organisado nga paagi. (1 Cor. 14:33) Pananglitan, kaburut-on han Dios nga an maopay nga sumat maisangyaw ha bug-os nga inuukyan nga tuna. (Mat. 24:14) Iginhatag ni Jehova an responsabilidad kan Jesus nga manguna hito nga buruhaton. Ginsisiguro ni Jesus nga ginbubuhat ito ha organisado nga paagi. Ha siyahan nga siglo, han an mga kongregasyon naestablisar ha iba-iba nga lugar, gintokahan an mga tigurang nga maghatag hin instruksyon ngan manguna. (Buh. 14:23) Ha Jerusalem may grupo han mga tigurang, nga ginkukompwesto han mga apostol ngan edaran nga kalalakin-an, nga naghihimo hin mga desisyon nga ginlalaoman nga susundon han ngatanan nga kongregasyon. (Buh. 15:2; 16:4) Sugad nga resulta han ira pagin masinugtanon ha mga instruksyon nga ira nakarawat, “an mga kongregasyon padayon nga nagigin marig-on ha pagtoo ngan nagtitikadamu.”​—Buh. 16:5. w24.04 8 ¶1

Temprano ha aga han Nisan 16, damu nga matinumanon nga kababayin-an an nagpakadto ha lugar kon diin iginbutang an patay nga lawas ni Jesus. (Luc. 24:​1, 10) Magpokus kita ha eksperyensya ha usa han kababayin-an, hi Maria Magdalena. Han inabot hi Maria ha lubnganan, waray ito sulod. Dinalagan hiya basi sumatan hira Pedro ngan Juan. Ini nga kalalakin-an nandadlagan ngadto ha lubnganan ngan sinunod ha ira hi Maria. Katapos makompirma nga waray didto an lawas ni Jesus, inuli hira. Pero hi Maria waray umuli. Nagpabilin hiya didto ngan nagtitinangis. Diri hiya maaram nga ginkikita hiya ni Jesus. Naobserbaran niya an pagtinangis hinin matinumanon nga babaye ngan nalooy gud hiya ha iya. Salit nagpakita hi Jesus ha iya ngan may-ada hiya ginbuhat nga simple nga nakadasig gud kan Maria. Nakiistorya hi Jesus ha iya ngan gintagan hiya hin importante nga toka—ibalita ha iya kabugtoan an pagkabanhaw ni Jesus.​—Juan 20:​17, 18. w24.10 13 ¶7

Hi Moises usa nga propeta, hukom, kumander, ngan historyador. Nanguna hiya ha nasud han Israel ha paggawas tikang ha pagkauripon ha Ehipto ngan nakita niya mismo an damu han mga milagro ni Jehova. Gin-gamit hiya ni Jehova ha pagsurat han siyahan nga lima nga libro han Biblia, han Salmo 90, ngan posible han Salmo 91. Posible gud nga hiya liwat an nagsurat han libro han Job. Han hirani na hi Moises mamatay, han 120 anyos hiya, gintirok niya an ngatanan nga Israelita basi ipahinumdom ha ira an mga butang nga ira nakita ngan naeksperyensyahan. Nakita nira an damu nga tigaman ngan milagro nga ginhimo ni Jehova pati na an Iya mga paghukom kontra ha Ehipto. (Ex. 7:4) Naglakat hira ha butnga han gintunga nga katubigan han Dagat nga Pula ngan nakita nira an pagbungkag ha kasundalohan han Paraon. (Ex. 14:​29-31) Ha kamingawan, naeksperyensyahan nira an proteksyon ngan pag-ataman ni Jehova. (Deut. 8:​3, 4) Yana nga tisulod na ha Tuna nga Iginsaad, ginsalingabot ni Moises inin ultimo nga oportunidad basi dasigon an katawohan. w24.11 8-9 ¶3-4

An iginpapasabot han ginsiring ni Jesus ha iya mga apostol ha Panihapon han Ginoo iba ha iya ginsiring ha mga tawo ha Galilea. An iya ginsiring ha Panihapon han Ginoo naaplikar la ha gutiay nga grupo hin mga tawo. Han nakadto hi Jesus ha Galilea han 32 C.E., an iya gud ginsisiring amo an mga Judio nga tinapay la an karuyag ha iya. Pero nangalimbasog hi Jesus nga buligan hira nga masabtan nga may-ada mas importante kay ha literal nga pagkaon. Iginsumat niya an usa nga pagkaon nga makakahatag ha ira hin kinabuhi nga waray kataposan. Ngan hi Jesus nagsiring nga adton nagkamatay mahimo mabanhaw ha kataposan nga adlaw ngan mabubuhi ha waray kataposan. An iya iginpapasabot diri an gutiay la nga pinili, nga limitado an kadamu, sugad han iya ginbuhat ha panahon han Panihapon han Ginoo. Lugod, an iya pokus ha Galilea amo an bendisyon nga mapapahimulosan han ngatanan nga tawo. w24.12 11 ¶10-11

Nangangalas hi Jehova ha bisan hin-o nga madarahog. (Sal. 11:5) Espisipiko nga gin-unabi niya an iya diri pag-uyon ha mga bana nga nan-aabuso ha ira asawa. (Mal. 2:16) Kon diri gin-oopay han bana an iya pagtratar ha iya asawa, an iya relasyon ha Dios maaapektohan. Bangin pa ngani diri pamatian ni Jehova an iya mga pag-ampo. (1 Ped. 3:7) Gin-aabuso han pipira nga bana an ira asawa pinaagi han panyakan nga may kasina ngan nakakasakit. Pero nangangalas hi Jehova ha “kasina, kapungot, pagsinggit, ngan nakakadaot nga panyakan.” (Efe. 4:​31, 32) An maisog nga pakiistorya han bana ha iya asawa nagdadaot ha ira pag-asawa ngan pati liwat ha iya pakigsangkay ha Dios. (San. 1:26) Ito liwat an mahitatabo ha bana nga nagkikinita hin pornograpiya. Gindadaot niya an iya relasyon kan Jehova. Ngan diri niya ginrirespeto an iya asawa. Naglalaom hi Jehova nga an bana magigin maunungon ha iya asawa diri la ha mga buhat kondi pati liwat ha hunahuna. Hi Jesus nagsiring nga an usa nga lalaki nga nagkikinita ha usa nga babaye nga may malaw-ay nga hingyap nag-aadulteryo na “ha iya kasingkasing.”​—Mat. 5:​28, 29. w25.01 9 ¶6-8

Ginsisiring han Biblia nga an mga surugoon ni Jehova iginpahayag nga matadong. Nagpapasabot ini nga diri na kita niya gin-oobligar nga magbayad tungod ha sala nga aton nabuhat. Ha pagbuhat hini, ginsusunod la gihapon ni Jehova an iya kalugaringon nga mga suruklan han hustisya. Iginpapahayag kita niya nga matadong diri tungod kay takos kita hito; o diri tungod kay ginkukonsinter niya an aton mga sala. Kondi tungod han aton pagtoo ha kahikayan han pagpara han sala ngan han presyo han lukat nga iginbayad, may basihan hi Jehova nga kanselahon an aton mga utang. (Roma 3:24) Ano an karuyag sidngon hini para ha kada tagsa ha aton? Adton ginpili nga magmando kaupod ni Jesus ha langit iginpahayag na nga matadong sugad nga mga anak han Dios. (Tito 3:7; 1 Juan 3:1) Ginpasaylo na an ira mga sala. Waray na hira rekord hin pagbuhat hin krimen, siring pa, ngan tungod hito kwalipikado na hira nga magin bahin han Ginhadian. (Roma 8:​1, 2, 30) Adton may paglaom nga mabuhi hin waray kataposan ha tuna iginpahayag na nga matadong sugad nga mga sangkay han Dios, ngan an ira mga sala ginpasaylo.​—San. 2:​21-23. w25.02 5 ¶17; 7 ¶18

Pansina ha usa nga panhitabo diin waray ni apostol Pedro maipakita an panhunahuna ni Jehova. Ginsidngan ni Jesus an iya mga apostol nga kinahanglan hiya kumadto ha Jerusalem, arestuhon han mga lider han relihiyon, ilubon an pag-torture, ngan patayon. (Mat. 16:21) Posible nga nakurian hi Pedro nga karawaton nga tutugotan ni Jehova nga mamatay hi Jesus, nga amo an paglaom han Israel ngan an iginsaad nga Mesias. (Mat. 16:16) Salit gindara ni Pedro hi Jesus ha ligid ngan ginsidngan: “Magin buotan ka ha imo kalugaringon, Ginoo; diri gud ini mahitatabo ha imo.” (Mat. 16:22) Tungod kay waray maipakita ni Pedro an panhunahuna ni Jehova, an iya panhunahuna diri uyon ha panhunahuna ni Jesus. Maaram hi Jesus nga basi mabuhat an kaburut-on ni Jehova kinahanglan niya mag-antos ngan mamatay. Salit waray karawata ni Jesus an sagdon ni Pedro, bisan pa kon baga hin maopay an iya intensyon. Hito nga sitwasyon, nahibaroan ni Pedro nga kinahanglan magin pariho ha panhunahuna han Dios an iya panhunahuna. Importante ito nga leksyon nga dapat liwat naton mahibaroan. w25.03 9 ¶5-6

May nakapasubo ba ha imo o gintraydor ka han usa nga imo gintataporan? Anoman an pagtratar ha imo han mga tawo, hinigugma ka han imo Amay ha langit. Kon gintraydor ka, maliliaw ka han nagpapasarig nga mga pulong ni David nga mababasa ha aton teksto yana. Usa nga reperensya an nasiring nga adton “rumok an espiritu” mahimo magtudlok “hadton waray na ginlalaoman.” Paonan-o ginbubuligan ni Jehova adton naabat hin sugad hito? Pariho ha usa nga mahigugmaon nga kag-anak nga nakapot ngan nagliliaw ha iya anak nga nasusubo, hi Jehova “hirani” ha aton—napaid gud hiya ha aton ngan andam ha pagbulig kon naabat kita nga narumok kita tungod han kamatayi o pagtraydor. Karuyag gud niya liawon ngan pakalmahon an aton ruba nga kasingkasing ngan nasakit nga espiritu. Ngan naghahatag hiya ha aton hin damu nga butang nga pamumulaton nga mabulig ha aton nga mailob an aton mga problema yana.​—Isa. 65:17. w24.12 23 ¶13-14

An mga tigurang yana makakasiguro nga nakikita ngan gin-aapresyar ni Jehova an ira mag-opay nga buhat. Labot pa han pag-shepherding, pagtutdo, ngan pagsangyaw, damu nga tigurang an nasuporta ha mga proyekto han pagpanukod ngan nabulig kon may mga kalamidad. An iba nag-aalagad sugad nga membro han Patient Visitation Group o Hospital Liaison Committee. An mga tigurang nga andam magpagamit hini nga buruhaton naghuhunahuna ha kongregasyon sugad nga kahikayan ni Jehova. Bug-os-kalag hira ha ira mga asaynment ngan bug-os nga nasarig nga babalosan hira han Dios ha ira ginbubuhat. (Col. 3:​23, 24) Diri ngatanan mahimo magin tigurang. Pero kita ngatanan may maihahatag kan Jehova. Gin-aapresyar ito han aton Dios kon ginhihimo naton an aton pinakamaopay ha pag-alagad ha iya. Nakikita niya an aton mga igindudonar ha worldwide work, bisan kon diri gud ito daku. Ngan nalilipay hiya kon ginpapasaylo naton adton nakapasakit ha aton. Sarig nga gin-aapresyar niya kon ano la an imo makakaya. Hinigugma ka niya tungod hito, ngan babalosan ka niya.​—Luc. 21:​1-4. w24.06 23 ¶12-13

Iginpapakita hini nga rekord an puydi mahitabo ha bisan hin-o nga nagsisingba kan Jehova. Puydi hiya makahimo hin seryoso nga sala ngan ha urhi abaton nga tigda la ito nga nahitabo. O bangin hiya magsiring, “Nahitabo na la ito.” Pero kon huhunahunaon niya hin maopay kon ano gud an nahitabo, posible gud nga madiskobrehan niya nga may pipira hiya nga diri maaramon nga desisyon nga nagtugway ha seryoso nga sala. Ito nga mga desisyon bangin nag-uupod han maraot nga kaupod, diri maopay nga kaliawan, o pirme pagbisita ha kwestyonable nga mga lugar—aktuwal man o online. Posible nga diri na liwat hiya nag-aampo, nagbabasa han Biblia, natambong ha mga katirok, o nakikigbahin ha ministeryo. Pariho han batan-on nga ginhihisgotan ha Proberbios, posible nga diri man ngani niya tigda nga nabuhat an seryoso nga sala. Ano an leksyon hito para ha aton? Dapat naton likyan diri la an sala mismo kondi pati liwat an mga desisyon nga nagtutugway ha pakasala. Ito gud an punto nga iginsaysay ni Solomon.​—Mat. 5:​29, 30. w24.07 16 ¶10-11

Ano ini nga bahandi? Ito an nagtatalwas hin kinabuhi nga buruhaton nga amo an pagsangyaw han mensahe han Ginhadian. (2 Cor. 4:1) Ano ini nga mga surudlan nga hinimo ha lapok? Nagrirepresentar ito han mga surugoon han Dios nga nagsasangyaw han maopay nga sumat. Ha panahon ni Pablo, gin-gamit han mga negosyante an mga tibod nga hinimo ha lapok basi butangan han importante nga mga butang sugad han pagkaon, bino, ngan kwarta kon nagbibiyahe. Sugad man, gintataporan kita ni Jehova han importante nga mensahe han maopay nga sumat. Ha bulig ni Jehova, magkakaada kita hin kusog nga ginkikinahanglan basi maipadayon naton an pagsangyaw. Usahay, bangin kita mahadlok ha tawo o mahadlok nga isalikway. Paonan-o naton ito malalamposan? Pansina an pag-ampo han mga apostol han gindid-an hira nga magsangyaw. Imbes nga magpadara ha kahadlok, naghangyo hira hin bulig kan Jehova nga padayon nga magyakan nga may kaisog. Ginbaton dayon ni Jehova an ira pag-ampo. (Buh. 4:​18, 29, 31) Kon usahay naaapektohan ka han kahadlok ha tawo, pangaro kan Jehova hin bulig nga maparig-on an imo gugma ha mga tawo basi diri ka mahadlok ha pagsangyaw ha ira. w24.04 16 ¶8-9

An aton gugma kan Jehova nagpapagios ha aton nga baraanon an iya ngaran. Nagpapasabot ito nga karuyag naton isumat ha iba nga buwa an ngatanan nga igin-akusar ni Satanas mahitungod kan Jehova. (Gen. 3:​1-5; Job 2:4; Juan 8:44) Kon nagsasangyaw kita, hingyap gud naton nga isumat ha ngatanan nga mamamati kon hin-o hi Jehova ngan kon ano hiya nga klase hin Dios. Karuyag naton mahibaro an ngatanan nga an gugma an iya pinakalabaw nga kalidad, nga an iya paagi han pagmando matadong ngan may hustisya, ngan diri na mag-iiha tatapuson han iya Ginhadian an ngatanan nga pag-antos ngan maghahatag hin kamurayawan ngan kalipay ha tawhanon nga pamilya. (Sal. 37:​10, 11, 29; 1 Juan 4:8) Kon gindidepensahan naton an reputasyon ni Jehova ha aton ministeryo, ginbabaraan naton an iya ngaran. Nalilipay liwat kita kay ginbubuhat naton an angay naton buhaton sugad nga mga Saksi ni Jehova. w24.05 18 ¶12

Mga brother, iginpapakita niyo nga “maabiabihon” kamo kon nagbubuhat kamo hin mag-opay nga butang para ha iba, upod na ha diri niyo duok nga kasangkayan. (1 Ped. 4:9) Ha usa nga reperensya, ini an pagkahulagway ha tawo nga maabiabihon: “An purtahan han iya balay—ngan han iya kasingkasing—dapat abrido ha mga estranghero.” Pakianhi an imo kalugaringon, ‘Kilala ba ako nga maabiabihon ha mga bisita?’ (Heb. 13:​2, 16) An maabiabihon nga tawo naghahatag ha mga bisita han anoman nga may-ada hiya, upod na ha mga pobre ngan ha maduruto nga mga alagad, sugad han mga paramangno han sirkito ngan bisita nga mga mamumulong.​—Gen. 18:​2-8; Prob. 3:27; Buh. 16:15; Roma 12:13. w24.11 21 ¶6

Ha parabola mahitungod ha mga birhen, nag-unabi hi Jesus hin napulo nga birhen nga ginawas basi tapoon an karaslon nga lalaki. (Mat. 25:​1-4) Ginlalaoman nira ngatanan nga uupdan nira an karaslon nga lalaki ha iya panagtawo ha kasal. Iginhulagway ni Jesus an lima ha ira sugad nga “maaramon” ngan an lima pa sugad nga “diri maaramon.” An maaramon nga mga birhen andam nga maghulat ha karaslon nga lalaki tubtob nga kinahanglan bisan kon gab-i na gud hiya umabot. Salit nagdara hira hin mga lampara basi may panlawag hira ha kasisidman. Nagdara pa ngani hira hin reserba nga lana engkaso maatrasado an karaslon nga lalaki. Salit andam hira nga tipigan nga naglalaga an ira mga lampara. (Mat. 25:​6-10) Han inabot an karaslon nga lalaki, an maaramon nga mga birhen sinulod kaupod niya ngadto ha panagtawo ha kasal. Ha pariho nga paagi, an dinihogan nga mga Kristiano nga napamatud-an nga andam pinaagi ha pagpabilin nga alerto ngan matinumanon tubtob ha pag-abot han Kristo huhukman nga angayan nga umupod ha karaslon nga lalaki, hi Jesus, ha iya Ginhadian ha langit.​—Pah. 7:​1-3. w24.09 21 ¶6

Napapagios kita nga padayon nga magsangyaw nga madasigon kon ginhuhunahuna naton an mga kalamposan yana ha pagsangyaw ha bug-os nga kalibotan. Kada tuig, minilyon nga interesado an naatender ha Memoryal ngan nagpapa-Bible study. Damu gud an nagpapabawtismo ngan naupod ha aton ha pagsangyaw nga buruhaton. Diri kita maaram kon ano kadamu an makarawat han aton pagsangyaw nga buruhaton, pero maaram kita nga gintitirok ni Jehova an daku nga grupo nga matatalwas ha tiarabot nga daku nga kasakitan. (Pah. 7:​9, 14) An Agaron han pangani padayon nga nakakakita hin potensyal ha kaumhan, salit may-ada kita maopay nga rason nga padayon nga magsangyaw. (Luc. 10:2) An mga disipulo ni Jesus kilalá gud ha ira pagin madasigon ha pagsangyaw. Han nakita han mga tawo an mga apostol nga madasigon ngan diri nahahadlok ha pagsangyaw, “nasantop nira nga kaupod hira hadto ni Jesus.” (Buh. 4:13) Samtang gin-oobserbaran kita han mga tawo ha ministeryo hinaot mapansin nira nga naimpluwensyahan liwat kita han pagin madasigon ni Jesus. w25.03 18 ¶15; 19 ¶17-18

Nahibaroan naton ha Biblia nga napapansin ni Jehova adton baga hin diri importante ha iba. Pananglitan, ginsugo ni Jehova hi propeta Samuel nga kumadto ha balay ni Jesse basi dihogan sugad nga tiarabot nga hadi han Israel an usa han iya mga anak nga lalaki. Gintawag ni Jesse an pito han iya walo nga anak nga lalaki basi makilala hi Samuel pero waray niya ig-upod hi David, an puto. Pero hi David an ginpili ni Jehova. (1 Sam. 16:​6, 7, 10-12) Nakita ni Jehova kon hin-o gud hi David—usa nga batan-on nga nahigugma gud ha espirituwal nga mga butang. Hunahunaa kon paonan-o iginpakita na ni Jehova nga napapansin ka niya. Naghahatag hiya ha imo hin sagdon nga eksakto gud ha imo mga panginahanglan. (Sal. 32:8) Paonan-o niya ito mahihimo kon diri ka niya kilala hin maopay? (Sal. 139:1) Kon igin-aaplikar mo an sagdon ni Jehova ngan ginkikita kon paonan-o ito nabulig ha imo, magigin kombinsido ka nga interesado hi Jehova ha imo. (1 Cron. 28:9; Buh. 17:​26, 27) Napapansin ni Jehova an imo mga paningkamot. Nakikita niya an imo mag-opay nga kalidad ngan karuyag niya nga magin sangkay ka niya.​—Jer. 17:10. w24.10 25-26 ¶7-9

Sigurado nga hinigugma mo hi Jehova ngan karuyag mo magserbi ha iba. Paonan-o mo mapaparig-on an imo hingyap nga magserbi? Hunahunaa an kalipay nga imo aabaton ha pagserbi ha imo kabugtoan. Hi Jesus nagsiring: “Mas daku an kalipay ha paghatag kay ha pagkarawat.” (Buh. 20:35) Nagkinabuhi hiya uyon hito nga prinsipyo. Nalipay gud hiya ha pagserbi ha iba. Pansina an usa nga ehemplo nga mababasa ha Marcos 6:​31-34. Hito nga takna, ginkapoy hi Jesus ngan an iya mga apostol. Tipakadto hira ha usa nga nahibubulag nga lugar basi pumahuway. Pero an mga tawo nahiuna pa ha ira pag-abot didto ngan naglalaom nga tututdoan hira ni Jesus. Puydi unta hiya bumaribad, kay hiya ngan an iya mga apostol ‘waray na bakante nga panahon bisan ha pagkaon.’ O puydi unta niya palakton na an mga tawo katapos niya magtutdo hin usa o duha la nga kamatuoran. Pero tungod kay ginpagios hiya han gugma, “nagtikang hiya pagtutdo ha ira” tubtob han “tikagab-i na.”​—Mar. 6:35. w24.11 16 ¶9-10

Mga kag-anak, dasiga an iyo anak nga mamiling hin mga oportunidad basi maisumat ha iba an kamatuoran ha Biblia. (Roma 10:10) An iya mga paningkamot ha pakiistorya mahitungod ha iya pagtoo puydi mo ikompara ha mga paningkamot ha pagtokar hin instrumento ha musika. Ha siyahan, an usa nga nag-aaram nagpapraktis hin mga kanta nga masayon la tokaron. Paglabay han panahon, an pagtokar nagigin mas masayon na. Sugad man, an usa nga batan-on nga Kristiano ha siyahan posible gumamit hin simple nga paagi ha pagsangyaw. Pananglitan, mahimo hiya magpakiana ha usa nga kaeskwela: “Maaram ka ba nga agsob nga ginsusubad han mga endyinir an mga disenyo nga makikita ha palibot? Karuyag ko ipakita ha imo inin maopay nga video.” Katapos ipakita an video tikang ha serye nga May-ada ba Nagdisenyo Hito? mahimo hiya sumiring: “Kon gindadayaw an syentista tungod han disenyo nga iya la ginkopya ha usa nga linarang, hin-o an angay dayawon han orihinal nga disenyo?” An sugad nga simple nga pakiistorya bangin igo na basi magkaada interes an usa nga batan-on ngan maruyag nga mahibaro pa mahitungod kan Jehova. w24.12 19 ¶17-18

Basi kita magkaada kagawasan ha sala ngan kamatayon, ginpadara ni Jehova hi Jesus basi itagana an lukat. Pero paonan-o an halad han usa nga perpekto nga tawo makakatubos ha minilyon nga tawo? Hi apostol Pablo nagsaysay: “Sugad la nga pinaagi han pagkadiri-masinugtanon han usa nga tawo [hi Adan] damu an nagin makasasala, sugad man liwat pinaagi han pagkamasinugtanon han usa nga tawo [hi Jesus] damu an magigin matadong.” (Roma 5:19; 1 Tim. 2:6) Ha iba nga pagkayakan, tungod han pagin diri masinugtanon han usa nga perpekto nga tawo nagin uripon kita han sala ngan kamatayon. Salit kinahanglan hin usa nga masinugtanon nga perpekto nga tawo basi magkaada kita kagawasan. Kay ano nga waray na la pabay-i ni Jehova nga mabuhi ha waray kataposan an mga anak ni Adan nga tangkod an kasingkasing? Para ha diri perpekto nga mga tawo, baga hin ito an maopay ngan makatadunganon nga himoon. Pero diri ito nagpapakita han perpekto nga hustisya ni Jehova. Tungod kay matadong hi Jehova, diri gud niya igbabalewaray an seryoso nga pagtalapas ni Adan. w25.01 21 ¶3-4

Maaram hi apostol Pablo nga hirani na hiya patayon, pero may-ada hiya rason nga kontento na hiya ha iya kinabuhi. Kon ginhihinumdom niya an naglabay, siring niya: “Natapos ko an rumba, natipigan ko an pagtoo.” (2 Tim. 4:​6-8) Hi Pablo may ginhimo nga mga desisyon ha iya pagministeryo, ngan sigurado hiya nga nalilipay ha iya hi Jehova. Karuyag liwat naton maghimo hin mag-opay nga desisyon ngan magkaada pag-uyon han Dios. Paonan-o naton ito mahihimo? Hi Pablo nagsiring mahitungod ha iya kalugaringon ngan ha iba nga magtinumanon nga Kristiano: “Naglalakat kita pinaagi ha pagtoo, diri pinaagi ha pagkita.” Ha Biblia, an “naglalakat” usahay nagpapasabot han paagi han pagkinabuhi nga ginpili han usa. Kon an usa nga naglalakat pinaagi ha pagtoo, naghihimo hiya hin mga desisyon nga iginbasar ha iya pagsarig kan Jehova nga Dios. An iya mga buhat nagpapakita nga kombinsido hiya nga babalosan hiya han Dios, nga bug-os nga magpapahimulos hiya han pagsunod ha sagdon ni Jehova nga mababasa ha Iya Pulong.​—Sal. 119:66; Heb. 11:6. w25.03 20 ¶1-2

Ha bulig han espiritu han Dios, damu nga bayolente, agresibo, o diri tangkod hadto an naghimo hin dagku nga pagbag-o ha ira kinabuhi. (Isa. 65:25) Naningkamot hira nga wad-on an ira diri mag-opay nga kalidad. (Efe. 4:​22-24) Syempre, an katawohan han Dios diri la gihapon perpekto, salit padayon kita nga makakasayop. Pero gin-urosa ni Jehova an “ngatanan nga klase hin tawo” ha diri nabubungkag nga bugkos han gugma ngan kamurayawan. (Tito 2:11) Milagro ini nga an makakahimo la an Dios nga makagarahum-ha-ngatanan! An iya mga pulong pirme natutuman. (Isa. 55:​10, 11) May-ada na yana espirituwal nga paraiso. Naglarang hi Jehova hin usa nga pamilya han mga magsiringba nga naiiba gud. Naieksperyensyahan naton an kamurayawan ngan an pag-abat han pagin talwas hinin bayolente nga kalibotan kay bahin kita hini nga pamilya. (Sal. 72:7) Tungod hini nga mga rason, karuyag naton buligan an damu nga tawo tubtob nga posible nga magin kaapi han aton Kristiano nga pagminagburugto. Mabubuhat naton ini pinaagi ha pagpokus ha panhimo hin mga disipulo.​—Mat. 28:​19, 20. w24.04 23 ¶13, 15

Hinigugma ni Jesus hi Jehova ha iya bug-os nga hunahuna. Maaram hi Jesus kon ano an karuyag han Dios nga buhaton niya, ngan determinado hiya nga buhaton ito bisan pa kon mag-antos hiya. Tungod kay nakapokus hi Jesus ha pagbuhat han kaburut-on han iya Amay, waray niya tuguti nga makaulang an bisan ano ha pagbuhat hito. Nakapribilehiyo hi Pedro ngan an iya mga igkasi-apostol nga makaupod hi Jesus ngan mahibaro mismo kon paonan-o hiya naghuhunahuna. Han ginhimo ni Pedro an iya siyahan nga giniyahan nga surat, gin-aghat niya an mga Kristiano nga sangkapan an ira kalugaringon hin pariho nga mental nga disposisyon han Kristo. (1 Ped. 4:1) Ha orihinal nga linggwahe han ginsurat ni Pedro an: “Sangkapi . . . an iyo kalugaringon,” gin-gamit niya an mga pulong nga nagpapakita hin mga sundalo nga nagdadara hin mga armas basi magin andam ha pakiggirra. Salit kon subaron han mga Kristiano an mental nga disposisyon ni Jesus, o an paagi han iya paghunahuna, sugad hira hin nagdadara hin makusog nga armas ha ira pakiggirra kontra ha ira mga hingyap ha pagbuhat hin mga sayop ngan kontra ha kalibotan nga ginmamandoan ni Satanas.​—2 Cor. 10:​3-5; Efe. 6:12. w25.03 8-9 ¶1-3

Ano an kinahanglan mo mahibaroan mahitungod ha imo uyab ha panahon nga mag-uyab kamo? Antes ka magkaada hilarom nga romantiko nga pagkaruyag ha iya, bangin karuyag mo ipakiistorya ha iya an importante nga mga butang, sugad han iya mga goal. Paonan-o mo mahibabaroan an iya totoo nga pagkatawo? Mahihimo mo ini pinaagi ha pagpakiana ngan pagpamati, ngan isumat kon ano gud an imo inaabat ngan magin tangkod. (San. 1:19) Salit bangin makabulig an mga activity nga makakag-istorya kamo, sugad han pagkaon nga magkaupod, pamasyada ha panpubliko nga lugar, ngan pagsangyaw nga magkaupod. Mahimo liwat kamo mahibaro ha kada tagsa kon maggagahin kamo hin panahon kaupod an kasangkayan ngan pamilya. Dugang pa, an plinano nga mga activity mabulig ha imo nga mahibaroan kon paonan-o nagawi hiya ha iba-iba nga kahimtang ngan ha iba-iba nga mga tawo. w24.05 27-28 ¶6-7

Ha diri na maiha, makakaeksperyensya kita hin magkuri gud nga kahimtang, salit labi na gud nga kinahanglan naton sumarig kan Jehova hito nga panahon. An mga rekord ha Biblia ngan an mga eksperyensya han mga Saksi ha moderno nga panahon mabulig ha aton nga mahibaroan kon paonan-o iginpakita han Dios an sugad-bato nga mga kalidad basi buligan an iya mga surugoon. Hunahunaa hin maopay ito nga mga rekord. An pagbuhat hito makakabulig ha imo nga himoon nga imo Bato hi Jehova. Mas mapaparig-on liwat naton an aton kabugtoan. Pananglitan, gintagan ni Jesus hi Simon hin ngaran nga Cefas (iginhubad nga “Pedro”), nga nangangahulogan hin “Usa ka Pidaso nga Bato.” (Juan 1:42) Nagpapakita ini nga liliawon ni Pedro ngan paparig-unon an pagtoo han kongregasyon. An mga tigurang ha kongregasyon iginhulagway sugad nga “lambong han daku gud nga bato.” Nag-iilustrar ini kon paonan-o nira ginpuproteksyonan an aada ha kongregasyon. (Isa. 32:2) Syempre, an kongregasyon nagpapahimulos kon an ngatanan—brother ngan sister—nagsusubad han sugad-bato nga mga kalidad ni Jehova. w24.06 28 ¶10-11

An mga hadi han Israel nga gintratar ni Jehova nga matinumanon nagsunod ha tinuod nga pagsingba. An kadam-an han mga hadi nga ginhukman ni Jehova sugad nga diri matinumanon ginbayaan an iya Balaud ngan nagtikang ha pagsingba ha buwa nga mga dios. (1 Hadi 21:​25, 26; 2 Cron. 12:1) Kay ano nga an pagsingba importante gud kan Jehova? An usa nga rason, kay may responsabilidad an mga hadi ha paggiya ha katawohan han Dios ha tinuod nga pagsingba. An buwa nga pagsingba liwat nagtutugway ha iba nga seryoso nga mga sala ngan kawaray-hustisya. (Hos. 4:​1, 2) Dugang pa, an mga hadi ngan an ira mga sakop mga dedikado kan Jehova. Salit iginpapariho han Biblia an ira pakigbahin ha buwa nga pagsingba ha pag-adulteryo. (Jer. 3:​8, 9) An usa nga nagbubuhat hin literal nga pag-adulteryo nakakasala kontra ha iya padis ha personal gud nga paagi. Sugad man, an usa nga dedikado nga surugoon ni Jehova nga nakikigbahin ha buwa nga pagsingba nakakasala kontra ha Iya ha personal ngan ha direkta nga paagi.​—Deut. 4:23. w24.07 22-23 ¶12-15