Agosto

Igin-aampo naton nga tubtob nga posible damu an mamati han pahamangno ngan umupod ha aton ha putli nga pagsingba yana. Pero kumusta man adton diri namamati han pahamangno yana? Bangin kaburut-on ni Jehova nga talwason an mga tawo nga nagtikang magpakita hin pagtoo ha iya kon makita na nira an kabungkagan han Babilonya nga Gamhanan. Kon sugad, mas importante yana an padayon nga pagsumat ha ira mahitungod hito. Kon ano an aton iginsusumat yana posible nga amo an ira mahinumdoman hito nga panahon. (Ikompara an Ezekiel 33:33.) Bangin mahinumdoman nira an pahamangno nga ira nabatian tikang ha aton ngan mapagios hira nga umupod ha aton ha putli nga pagsingba antes magin urhi na an ngatanan. Pariho han gwardya ha prisohan ha Filipos nga nagbag-o la katapos ‘maglinog hin makusog,’ bangin an pipira nga diri namamati yana magbag-o la katapos han makaharadlok nga kabungkagan han Babilonya nga Gamhanan.​—Buh. 16:​25-34. w24.05 17 ¶9-10

Nahibaro kita hin importante nga leksyon tikang ha surat ni apostol Pablo ha Hebreo nga mga Kristiano. An iba waray magpadayon ha pag-uswag ha espirituwal; ngani “nagkikinahanglan na liwat [hira] han gatas, diri han matig-a nga [espirituwal nga] pagkaon.” (Heb. 5:12) Waray hira mahibaro ngan kumarawat ha bag-o nga mga butang nga hinay-hinay nga igintututdo ni Jehova pinaagi han kongregasyon. (Prob. 4:18) Pananglitan, damu nga Judio nga tumuroo an nag-aaghat la gihapon han Mosaiko nga Balaud bisan kon mga 30 ka tuig na tikang han gintapos ito pinaagi han halad han Kristo. (Tito 1:10) An bisan hin-o nga nakabasa han giniyahan nga surat ni Pablo para ha mga Hebreo makakasiring nga ini nga libro may-ada matig-a nga espirituwal nga pagkaon. An iya surat nakabulig ha ira nga makita nga mas maopay an bag-o nga paagi han pagsingba kan Jehova nga iginpapatuman pinaagi kan Jesus. Naghatag liwat ito ha ira hin kaisog nga makapadayon ha pagsangyaw.​—Heb. 10:​19-23. w24.04 6 ¶15

Tikang han hi Adan ngan Eva dinapig kan Satanas ngan nagrebelde kan Jehova nga Dios, binilyon na nga tawo an nagkamatay. Ano an mahitatabo hito ngatanan nga tawo? An limitado nga kadamu nga 144,000, nga matinumanon nga mga sumurunod han Kristo makarawat hin pagkabanhaw ngadto ha imortal nga kinabuhi ha langit. (Pah. 14:1) Ngan an daku nga ihap han matinumanon nga kalalakin-an ngan kababayin-an nga nahigugma kan Jehova magigin kaupod ha ‘babanhawon nga mga magtadong,’ ngan maukoy hira ha waray kataposan ha tuna kon magpapabilin hira nga matadong ha panahon han Usa ka Yukot ka Tuig nga Pagmando han Kristo ngan ha ultimo nga pagsari. (Dan. 12:13; Heb. 12:1) Ha panahon liwat han Milenyo, an “mga diri magtadong”—upod na adton waray gud mag-alagad kan Jehova o “nagbuhat [pa ngani] hin maraot”—tatagan hin oportunidad nga magbag-o han ira pagkinabuhi ngan magin matinumanon. (Juan 5:29; Luc. 23:​42, 43) Pero an iba nga mga tawo sobra gud karaot, salit hi Jehova nagdesisyon nga diri na gud hira babanhawon.​—Luc. 12:​4, 5. w24.05 2 ¶3; 5 ¶15; 6 ¶17

An usa nga naruruyag nga uyonan ni Jehova kinahanglan “nagyayakan han kamatuoran ha iya kasingkasing.” (Sal. 15:2) An karuyag sidngon hini labaw pa kay ha diri pagbuwa. Karuyag ni Jehova nga magin tangkod kita ha ngatanan naton nga ginyayakan ngan ginbubuhat. (Heb. 13:18) Importante ito, “kay mangil-ad kan Jehova an malimbong nga tawo, pero duok Hiya nga sangkay han magtadong.” (Prob. 3:32) Adton ‘nagyayakan han kamatuoran ha ira kasingkasing’ diri nagpapakunokuno nga masinugtanon hira kon aada ha publiko pero sekreto nga gintatalapas an mga balaud han Dios. Ginlilikyan nira an panlimbong. An malimbong nga tawo bangin maghunahuna nga an mga balaud ni Jehova diri pirme an pinakamaopay. (San. 1:​5-8) Bangin diri niya sundon hi Jehova ha mga butang nga baga hin para ha iya diri gud importante. Katapos, kon baga hin waray man la maraot nga nahitabo tungod han iya pagin diri masinugtanon, bangin magtikang hiya magbuhat hin mas maraot pa. Bisan kon naghuhunahuna hiya nga nag-aalagad hiya ha Dios, diri kakarawaton ni Jehova an iya pagsingba. (Ecles. 8:11) Pero karuyag naton nga magin tangkod ha ngatanan nga butang. w24.06 10 ¶7-8

Hinigugma han katawohan ni Jehova an kamatuoran nga aada ha Pulong han Dios. Dida naton iginbasar an aton pagtoo. (Roma 10:17) Nagin kombinsido kita nga hi Jehova an nagporma han Kristiano nga kongregasyon sugad nga “usa nga harigi ngan tukod han kamatuoran.” (1 Tim. 3:15) Karuyag gud ni Satanas nga mawad-an kita hin pagsarig ha Biblia o ha instruksyon nga aton nakakarawat tikang ha organisasyon han Dios. (Efe. 4:14) Ha diri na maiha, an Yawa magamit hin gamhanan gud nga propaganda basi limbongan an bug-os nga nasud nga dumapig kontra kan Jehova. (Pah. 16:​13, 14) Makakalaom liwat kita nga mas maniningkamot pa hi Satanas nga limbongan an katawohan ni Jehova. (Pah. 12:9) Salit importante nga i-train naton an aton kalugaringon nga makilala an kaibahan han kamatuoran ngan han kabuwaan ngan magin masinugtanon ha kamatuoran. (Roma 6:17; 1 Ped. 1:22) An aton katalwasan ha panahon han daku nga kasakitan nakadepende dida hito! w24.07 8 ¶1-3

Han gin-organisar ni Jehova an mga Israelita nga magin usa nga nasud, naghimo hiya hin kasabotan ha ira, usa nga pormal nga kauyonan. Kon padayon nga susundon nira an iya mga balaud, puproteksyonan ngan bibendisyonan niya hira. Pero kon magrebelde hira ha iya—pananglitan, pinaagi ha pagsingba ha iba nga mga dios—diri na hiya magbibendisyon ha ira, ngan mag-aantos hira. Kondi bisan kon buhaton nira ito, mahimo la gihapon hira magkaada utro han pag-uyon han Dios. Puydi hira ‘bumalik kan Jehova nga ira Dios ngan mamati ha iya tingog.’ (Deut. 30:​1-3, 17-20) Karuyag sidngon, puydi hira magbasol. Kon ito an ira buhaton, hi Jehova maduok ha ira ngan magbibendisyon utro. Pauroutro nga nagrebelde kan Jehova an iya pinili nga katawohan. Salit nag-antos hira. Pero padayon nga ginbuligan ni Jehova an iya katawohan nga mag-alagad utro ha iya. Pauroutro nga nagsugo hiya hin mga propeta basi aghaton an iya katawohan nga magbasol ngan bumalik ha iya.​—2 Hadi 17:​13, 14. w24.08 9 ¶4-5

An Hebreo nga mga Kristiano nga naukoy ha Jerusalem ngan Judea nakaeksperyensya hin damu nga kakurian mga tuig katapos mamatay hi Jesus. Waray pag-iha katapos maporma an Kristiano nga kongregasyon, inatubang ito hin duro nga pagtimaraot. Ngan paglabay hin mga 20 ka tuig, an mga sumurunod han Kristo inatubang hin grabe nga kakurian ha ekonomiya, posible nga tungod han gutom nga nahitabo na hito nga lugar. (Buh. 11:​27-30) Pero han mga 61 C.E., an mga Kristiano may-ada temporaryo nga kamurayawan kon ikompara ha tiarabot. Hito nga panahon, nakakarawat hira hin giniyahan nga surat tikang kan apostol Pablo—usa nga surat nga napapanahon gud. Napapanahon an surat para ha mga Hebreo kay an kamurayawan nga naieksperyensyahan han mga Kristiano temporaryo la. Hi Pablo naghatag hin praktikal nga sagdon nga mabulig hito nga mga Kristiano basi mailob an kasakitan nga hirani na nira atubangon. w24.09 8 ¶1-2

Kon nag-aantos kita, an aton kabugtoan usa gud nga buhi nga ebidensya nga hinigugma kita ni Jehova. An aton mga igkasi-tumuroo mahimo makaliaw ha aton pinaagi ha pagpamati nga may empatiya, o bangin suportaran kita nira pinaagi han ira presensya. Mahimo kita nira dasigon pinaagi hin teksto ha Biblia o mag-ampo kaupod naton. (Roma 15:4) Usahay, bangin pahinumdoman kita han usa nga bugto mahitungod han panhunahuna ni Jehova, salit mabubuligan kita nga matipigan an aton pagin timbang. An mga igkasi-Kristiano mahimo liwat makahatag ha aton hin praktikal nga bulig, sugad han paghatag hin pagkaon kon nasusubo kita. Basi makarawat an bulig han iba, bangin kinahanglan maghangyo kita hito. (Prob. 17:17) Bangin diri hira maaram kon ano an aton inaabat o ginkikinahanglan. (Prob. 14:10) Salit magin andam nga isumat an imo mga inaabat ha hamtong nga kasangkayan. Ipahibaro ha ira kon ano an makakabulig ha imo. Mahimo ka magpili hin usa o duha nga tigurang nga komportable ka nga sumatan. Napansin han pipira nga sister nga nakakaliaw an pakiistorya ha iba nga hamtong nga sister. w24.10 10 ¶15-16

Damu nga tawo an naghihirot han ira ginkakaon ngan regular nga nag-iehersisyo basi pirme magin mahimsog. Pero diri hira naglalaom nga mabubuhi hira ha waray kataposan. An paglaom hito baga hin diri reyalistiko ngan diri makaruruyag tungod han kasakit nga resulta han kalagas. Bisan pa hito, hi Jesus nagyakan ha positibo nga paagi mahitungod han “kinabuhi nga waray kataposan,” sugad han mababasa ha Juan 3:16 ngan 5:24. Usa ka adlaw, milagroso nga nagpakaon hi Jesus hin tinapay ngan isda ha yinukot nga tawo. Nakakaimpres adto, pero mas nakakaimpres pa ngani an iya ginsiring ha sunod nga adlaw. Nagsinunod an mga tawo ha iya tubtob ha Capernaum, nga hirani ha baybayon han Galilea, diin didto ginsumatan niya hira nga magkakaada pagkabanhaw ngan mai-enjoy an kinabuhi nga waray kataposan. (Juan 6:​39, 40) Iginpapakita han mga pulong ni Jesus nga damu han nagkamatay na an babanhawon ngan ikaw ngan an imo mga hinigugma mahimo mag-enjoy han kinabuhi nga waray kataposan. w24.12 8 ¶1-2

Gin-unabi ha bag-o nga report han World Health Organization nga gin-aabuso han damu nga bana an ira asawa ha pisikal, berbal, o emosyon. An bana nga nagbubuhat hini posible nga trataron an iya asawa nga may respeto ha atubangan han iba pero ha balay, diri niya gintatratar hin maopay. Ano an mahimo magin hinungdan nga gin-aabuso han pipira nga bana an ira asawa? Bangin nagdaku hira ha pamilya nga an ira tatay bayolente, salit ginhuhunahuna nira nga normal la ito nga batasan. An iba naimpluwensyahan han kultura ha ira lugar, nga bangin nag-aaghat hin sayop nga ideya nga dapat gamiton han “tunay nga lalaki” an kusog basi ipakita ha iya asawa kon hin-o an boss. An iba naman nga lalaki waray tutdui nga kontrolon an ira emosyon pati na an ira kasina. May mga lalaki liwat nga nagkaada sayop nga panhunahuna ha babaye ngan ha sex kay pirme hira nagkikinita hin pornograpiya. Dugang pa, iginpapakita han mga report nga an epekto han COVID-19 nga pandemya nakapagrabe hini nga mga problema. Syempre, diri ito mga rason nga puydi na abusuhon han bana an iya asawa. w25.01 8 ¶2-3

Iginsaysay ni Jesus an pinakaimportante nga sugo han Dios han nagsiring hiya: “Higugmaa hi Jehova nga imo Dios ha bug-os mo nga kasingkasing ngan ha bug-os mo nga kalag ngan ha bug-os mo nga kusog ngan ha bug-os mo nga hunahuna.” (Luc. 10:27) Salit iginpapakita naton nga hinigugma naton hi Jehova pinaagi han ngatanan nga may-ada kita ngan han aton bug-os nga pagkatawo. Nag-uupod ito ha aton mga hingyap, emosyon, ngan kusog. Nag-uupod liwat ito ha paagi han aton paggamit han aton hunahuna. Syempre, diri gud naton bug-os nga masasabtan an ngatanan nga panhunahuna ni Jehova. Pero mas masasabtan naton an panhunahuna han Dios pinaagi ha pag-aram han “panhunahuna han Kristo” kay perpekto nga ginsubad ni Jesus an panhunahuna han iya Amay.​—1 Cor. 2:16. w25.03 8 ¶1

Sugad nga perpekto nga tawo, hi Jesus an katugbang han siyahan nga tawo, hi Adan, han waray pa hiya makasala. (1 Cor. 15:45) Salit pinaagi han kamatayon ni Jesus, makakapara hiya han sala ni Adan, karuyag sidngon, basi saliwnan an nawara ni Adan. (Roma 5:19) Tungod hito, hi Jesus nagin “an kataposan nga Adan.” Diri na kinahanglan hin usa pa nga perpekto nga tawo nga kumadi ngan magbayad ha kon ano an nawara ni Adan. Hi Jesus namatay hin “makausa gud la.” (Heb. 7:27; 10:12) Kon sugad, ano an kaibahan han kahikayan han pagpara han sala ngan han lukat? An kahikayan han pagpara han sala amo an ginbubuhat han Dios basi maipahiuli an maopay nga relasyon niya ngan han mga tawo. An lukat amo an presyo nga iginbayad basi magin posible an pagpara han sala han makasasala nga mga tawo. Ini nga presyo nagrirepresentar han presyoso nga dugo ni Jesus nga iginpaagay para ha aton.​—Heb. 9:14. w25.02 5 ¶12-13

Kon huhunahunaon mo hi Jehova sugad nga buhi nga Persona, magkakaada kita tama nga panhunahuna ha aton mga problema. Kay ano? Huhunahunaon naton an aton mga problema sugad nga bahin han mas daku nga isyu butnga ni Jehova ngan ni Satanas. An Yawa nasiring nga kon mag-aantos kita hin kakurian, babayaan naton hi Jehova. (Job 1:​10, 11; Prob. 27:11) Kon magpabilin kita nga maunungon kan Jehova bisan pa han aton mga problema, iginpapakita naton nga hinigugma naton hi Jehova ngan ginpapamatud-an nga buwaon an Yawa. Naatubang ka ba hin pagkontra han gobyerno, problema ha ekonomiya, kawaray-interes han mga tawo han maopay nga sumat, o iba pa nga problema? Kon oo, hinumdumi nga an imo sitwasyon naghahatag ha imo hin oportunidad nga mapalipay an kasingkasing ni Jehova. Hinumdumi liwat nga diri gud niya tutugotan nga sulayon ka labaw han imo maiilob. Tatagan ka niya hin kusog basi makailob. w24.06 22 ¶9

Maaram ka ba kon ano nga mga sitwasyon an pinakamasayon ka masulay? Delikado an pagbalewaray han aton mga kaluyahan o paghunahuna nga marig-on gud kita nga kaya malikyan an pagbuhat hin sala. (1 Juan 1:8) Ngani, hi Pablo nagsiring nga bisan adton “may espirituwal nga mga kwalipikasyon” bangin masulay kon diri hira padayon nga magbabantay. (Gal. 6:1) Kinahanglan magin tangkod kita ha aton kalugaringon ngan kilalahon kon ha ano kita maluya. (2 Cor. 13:5) Kon nahibaroan na naton an mga sitwasyon nga nakakasulay gud ha aton, ano an dapat naton buhaton? Parig-ona an aton pag-ato! Ha pag-ilustrar, ha panahon han Biblia an pinakamaluya nga bahin han syudad amo an mga ganghaan. Salit an mga ganghaan an pinakagwardyado. Ha pariho nga paagi, labi na nga dapat gud naton tagan hin atensyon kon diin kita maluya basi makaato ha pagsulay.​—1 Cor. 9:27. w24.07 15 ¶5-7

An maopay nga buhat, sugad han gin-unabi ha teksto yana nga adlaw, nag-uupod han pagsangyaw han maopay nga sumat. Salit kon ginbabasa naton an Pulong han Dios ngan ginpapamalandong ito nagigin marig-on an aton pagtoo kan Jehova ngan mas nasasabtan naton kon kay ano nga importante gud an pagsangyaw han mensahe han Ginhadian. Basi makapahimulos gud tikang ha Pulong han Dios, diri ta dapat apurahon an aton pagbasa, pag-aram, ngan pagpamalandong. Ayaw pagdali-dali. Kon may nabasa ka nga teksto nga nakukurian ka pagsabot, ayaw ito laktawi. Lugod, bilnga an esplikasyon hito nga bersikulo ha Watch Tower Publications Index o ha Tulong sa Pag-aaral ng mga Saksi ni Jehova. Kon diri ka nagdadagmit ha imo pag-aram, mapaparig-on mo an imo pagsarig nga tinuod gud an Pulong han Dios. (1 Tes. 5:21) Kon mas kombinsido ka, mas mai-enjoy mo nga isangyaw an imo nahibabaroan. w24.04 15 ¶4-5

“Maopay [hiya] ngan andam magpasaylo,” siring ni David. (Sal. 86:5) Hi Micas nagsiring: “Hin-o an Dios nga pariho ha imo, nagpapasaylo han sayop ngan nagpapasensya han pagtalapas?” (Mic. 7:18) Ngan hi Isaias nagsiring: “Bayaan han maraot nga tawo an iya dalan ngan han diri matadong nga tawo an iya mga panhunahuna; bumalik hiya kan Jehova, nga malolooy ha iya, ha aton Dios, kay hura hiya nga magpapasaylo.” (Isa. 55:7) Basi masubad hi Jehova, ginsidngan an kongregasyon ha Corinto nga i-welcome an mabinasulon nga lalaki ngan pasarigon hiya han ira gugma. Pinaagi ha pagsunod hito nga instruksyon, iginpakita han kongregasyon an ira “pagkamasinugtanon ha ngatanan nga butang.” Oo, mga bulan pa la an naglabay tikang han gintanggal ito nga lalaki, pero an disiplina malampuson nga naggiya ha iya nga magbasol. Salit waray rason nga idelatar an pagpabalik ha iya ha kongregasyon. w24.08 17-18 ¶12-13

Nagkikinabuhi kita ha panahon nga may daku nga mga pagbag-o nga mahitatabo! Diri na maiha, huhukman ni Jesus an tagsa nga tawo. Iginhulagway ni Jesus an mahitatabo antes hiya maghukom. Gintagan niya an iya mga disipulo hin matagnaon nga “tigaman” han iya diri nakikita nga presensya ngan “han ikatarapos han sistema han mga butang.” (Mat. 24:3) Ini nga tagna nakarekord ha Mateo kapitulo 24 ngan 25 ngan ha Marcos kapitulo 13 ngan Lucas kapitulo 21. Nagtagana hi Jesus hin mapulsanon nga mga pahamangno pinaagi han tulo nga parabola. Ini nga mga parabola mahitungod ha mga karnero ngan ha mga kanding, ha maaramon ngan ha diri maaramon nga mga birhen, ngan ha mga talanton. An tagsa nga parabola mabulig ha aton nga masabtan kon kay ano nga an panggawi han usa nga tawo makakaapekto ha kon paonan-o hiya huhukman. w24.09 20 ¶1-2

An aton pinakamaopay nga ehemplo, hi Jesu-Kristo, ginpagios han gugma—gugma ha iya Amay ngan gugma ha mga tawo. Ito nga gugma an nagpagios ha iya nga magin maduruto ngan himoon an mga buruhaton nga minos para ha iba. (Mat. 20:28; Juan 13:​5, 14, 15) Mga brother, kon gugma an nagpapagios ha iyo, bibendisyonan kamo ni Jehova ngan bubuligan nga makab-ot an iyo espirituwal nga mga tumong, sugad han pagin ministeryal nga surugoon. (1 Ped. 5:5) An mga tawo ha kalibotan kaurogan na nga nabilib hadton naniningkamot nga magin importante pagkit-on. Pero diri sugad hito ha organisasyon ni Jehova. An brother nga ginpapagios han gugma, pariho kan Jesus, diri naghihingyap hin gahum, awtoridad ha iba, o pagin prominente. Kon tagan hin pribilehiyo ha kongregasyon an usa nga ambisyoso nga tawo, posible nga diri gud hiya magbubuhat han pipira nga ubos nga buruhaton nga ginkikinahanglan para maataman an presyoso nga mga karnero ni Jehova. Bangin maghunahuna hiya nga diri naangay ha iya ito nga mga buruhaton.​—Juan 10:12. w24.11 15 ¶6-7

Ha bug-os nga kalibotan, kinahanglan naton hin mas damu pa nga brother nga mag-aalagad sugad nga “mga regalo nga mga lalaki.” (Efe. 4:8) Kon bawtismado ka nga brother, ‘kaya mo ba bumulig’? (Prob. 3:27) Karuyag mo ba magin kwalipikado ha pagin ministeryal nga surugoon? Kon ministeryal nga surugoon ka na, puydi mo ba magin goal an pagin tigurang? Kaya mo ba maghimo hin mga pagbag-o basi makag-aplay ha School for Kingdom Evangelizers? Ito nga eskwelahan magti-train ha imo ngan mabulig basi mas magamit ka pa gud hin bug-os ni Jesus. Kon inaabat mo nga diri ka kwalipikado, pag-ampo kan Jehova. Hangyoa hiya nga buligan ka pinaagi han iya baraan nga espiritu nga matuman mo hin malampuson an bisan ano nga asaynment nga iginhatag ha imo. (Luc. 11:13) An mga brother nga ginpili ni Jesus nga “mga regalo nga mga lalaki” ebidensya nga iya kita ginpapangunahan hinin kataposan nga mga adlaw. (Mat. 28:20) Diri ka ba mapasalamaton nga may-ada kita Hadi nga mahigugmaon, mahinatagon, ngan atentibo ngan naghahatag hin kwalipikado nga mga brother ha pag-ataman ha aton mga panginahanglan? w24.10 23 ¶16-17

Kumusta man an ngatanan nga butang nga hinungdan han kasakit ngan pag-antos han katawohan han Dios? Ha urhi, ito nga mga butang ‘mahingangalimtan [ngan] itatago ito tikang ha mga mata [han Dios].’ (Isa. 65:16) Wawad-on ni Jehova an aton mga problema, ngan ha urhi diri na gud naton mahinunumdoman an mga epekto hito ha aton. Bisan yana, mahimo kita magin kalmado kon aadto kita ha aton Kristiano nga mga katirok, diin puydi kita marelaks ngan diri magpokus ha mga butang hinin maraot nga kalibotan nga nakakapaistres ha aton. Nabubuligan liwat naton an aton kabugtoan nga magin kalmado kon iginpapakita naton an gugma, kalipay, kamurayawan, pagkabuotan, ngan pagin malumo nga mga bahin han bunga han espiritu han Dios. (Gal. 5:​22, 23) Bendisyon gud para ha aton nga makaapi ha organisasyon han Dios! Adton magpapabilin ha espirituwal nga paraiso makakakita han bug-os nga katumanan han saad han Dios nga “bag-o nga mga langit ngan hin bag-o nga tuna.” w24.04 22 ¶9-10

Bisan kon makalilipay an pakig-uyab, seryoso liwat ito nga relasyon nga mahimo magresulta ha pag-asawa. Ha adlaw han ira kasal, hira nga duha nagsasaad kan Jehova nga ira hihigugmaon ngan rirespetuhon an kada tagsa tubtob nga nabubuhi hira. Dapat hunahunaon ito hin maopay antes maghimo hin bisan ano nga saad. Totoo gud ito ha panumpa ha kasal. Tungod han pakig-uyab nagkakaada higayon an duha nga makilala an kada tagsa ngan makahimo hin maopay nga desisyon. Danay, an desisyon amo an pagpakasal; danay naman an desisyon amo an pakigbulag. Kon magbulag an mag-uyab, diri ini nagpapasabot nga nagsayop hira ha ira desisyon. Lugod, natuman an katuyoan han pakig-uyab—nabuligan hira nga makahimo hin maopay nga desisyon. Kay ano nga importante an pagkaada tama nga panhunahuna ha pakig-uyab? Kon an mga solo may-ada tama nga panhunahuna, diri hira makikig-date kon waray hira intensyon ha pag-asawa. w24.05 26-27 ¶3-4

Usahay, bangin an batan-on nga mga Kristiano nahahadlok nga depensahan an ira mga gintotoohan. Bangin nahahadlok hira nga isaysay kon kay ano nga diri hira natoo ha teoriya han ebolusyon. Kay ano? An ira mga titser bangin magsiring nga totoo an ebolusyon, ngan diri usa nga teoriya. Kon usa ka nga kag-anak, paonan-o mo mabubuligan an imo anak nga magin kombinsido gud nga tinuod an iya gintotoohan? Pasariga hiya nga diri hiya dapat maawod kay maaram hiya han kamatuoran mahitungod ha paglarang. Ngani, nasabtan liwat han damu nga syentista nga an kinabuhi diri kay basta la nga tigda nga inulpot o aksidente la. Nasabtan nira nga may baltok gud nga naglarang ha komplikado nga disenyo han kinabuhi. Salit diri nira ginkakarawat an teoriya han ebolusyon. Mapaparig-on han imo anak an iya pagtoo pinaagi ha pag-usisa han mga rason nga nakakombinse ha iba nga kabugtoan nga tumoo nga ginlarang an kinabuhi. w24.12 18 ¶14-15

Gintipigan ni Jesus an positibo nga panhunahuna ha pagsangyaw nga buruhaton. Nakabulig ito ha iya nga magpabilin nga madasigon ha iya ministeryo. Pananglitan, ha ikatarapos han 30 C.E., nakita ni Jesus nga damu an andam na mamati ha iya pagsangyaw, ngan iginpariho niya hira ha kaumhan nga andam na anihon. (Juan 4:35) Paglabay hin mga usa ka tuig, ginsidngan niya an iya mga disipulo: “Damu an aranihon.” (Mat. 9:​37, 38) Ngan ha urhi, ginpabug-atan na liwat niya: “Damu an aranihon . . . Pakimalooy kamo ha Agaron han pangani nga magpadara hin mga mag-arani ha iya aranihon.” (Luc. 10:2) May kompyansa hi Jesus nga may mga tawo nga mamamati han maopay nga sumat, ngan nalipay gud hiya han ginkarawat nira ito. Ginbuligan ni Jesus an iya mga disipulo nga magpabilin nga madasigon pinaagi ha pagpahinumdom ha ira nga an mensahe nga ira iginsasangyaw magkakaada mag-opay gud nga resulta. w25.03 18-19 ¶15-16

Hi Jehova usa nga arayopan. Sugad la nga an daku nga bato mahimo magin tagoan han usa tikang ha peligroso nga bagyo, hi Jehova nagpapanalipod ha aton kon naatubang kita hin mga sitwasyon nga naninelikado kita. Iya kita ginpuproteksyonan tikang ha permanente nga kadaot. Ngan nagsasaad pa ngani hiya: Ha tiarabot iya wawad-on an bisan ano nga nakakapabaraka o nakakapaantos ha aton. (Ezek. 34:​25, 26) An usa nga paagi nga ginhihimo naton nga sugad-bato nga Arayopan hi Jehova amo an pag-ampo ha iya. Kon nag-aampo kita kan Jehova, iginhahatag niya ha aton “an kamurayawan han Dios” nga nagbabantay ha aton kasingkasing ngan hunahuna. (Fil. 4:​6, 7) Hi Jehova pirme aada para ha aton. Makakasarig kita ha iya kay hiya an “Bato ha kadayonan.” (Isa. 26:​3, 4) Pirme hiya buhi basi tumanon an iya mga saad, pamatian an aton mga pag-ampo, ngan ihatag an bulig nga aton kinahanglan. Makakasarig liwat kita kan Jehova kay maunungon hiya ha mga nag-aalagad ha iya. (2 Sam. 22:26) Diri gud niya hingangalimtan an aton ginbubuhat, ngan pirme hiya magbabalos ha aton.​—Heb. 6:10; 11:6. w24.06 27 ¶4-6

An maraot nga kaliawan makakabahin han aton kasingkasing. Sugad man an maraot nga kaupod ngan materyalistiko nga panhunahuna. Kon may mapansin kita nga nakakapaluya ha aton gugma kan Jehova, gios dayon nga tanggalon ito. (Mat. 5:​29, 30) Dapat diri naton tugotan nga mabahin an aton kasingkasing. Bangin hunahunaon naton nga tungod kay busy kita ha pag-alagad kan Jehova, an magraot nga impluwensya diri makakadaot ha aton. Ha pag-ilustrar, imadyina nga aada ka ha gawas ha panahon nga duro gud kahagkot ngan mahangin. Pag-uli mo ha balay, nag-jacket ka o nag-sweater. Pero ano man kon diri mo isasara an purtahan? Makakasulod ha imo bug-os nga balay an mahagkot nga hangin. Ano an leksyon? Diri la kay basta makaon kita hin espirituwal nga pagkaon para magpabilin nga mapaso an aton relasyon kan Jehova. Dapat liwat naton isara an purtahan pinaagi ha pagsalikway han diri maopay nga mga impluwensya para diri makasulod ha aton kasingkasing an mahagkot nga “hangin” hini nga kalibotan, o an diri diosnon nga panhunahuna, kay makakabahin ito han aton kasingkasing.​—Efe. 2:2. w24.07 21 ¶6-7

Diri naton bug-os nga masasabtan an kasakit nga gin-abat ni Jesus sugad man an kaarawdan ngan an kawaray-hustisya nga iya gin-ilob. Pero waray hiya madaog han kawaray-hustisya nga iya gin-antos. Imbes nga panhimarauton an mga sundalo nga nagraysang ha iya ha pasakitan nga kahoy, nag-ampo lugod hiya: “Amay, pasayloa hira, kay diri hira maaram han ira ginbubuhat.” (Luc. 23:34) Kon igin-aampo naton an mga tawo nga maraot an pagtratar ha aton, makakabulig ito ha aton nga magin kalmado, makakaiban han aton kasina, ngan makakabag-o pa ngani han aton panhunahuna ha ira. Diri kita maaram kon ano pa nga kawaray-hustisya an mahimo naton atubangon antes matapos ini nga sistema. Anoman an aton maeksperyensyahan, ayaw gud kita pag-undang ha pag-ampo kan Jehova basi mangaro ha iya hin bulig. Hinaot subaron liwat naton an reaksyon ni Jesus ha maraot nga pagtratar ngan padayon nga iaplikar an mga prinsipyo ha Biblia. Kon hihimoon naton ini, makakasiguro kita nga bibendisyonan kita ni Jehova.​—1 Ped. 3:​8, 9. w24.11 6 ¶16; 7 ¶17, 19

Hi Jehova diri konsintidor nga Dios; diri niya ginbabalewaray an sala. (Sal. 5:​4-6) Naglalaom hiya nga rirespetuhon naton an iya magtadong nga suruklan, nga iya iginhatag ha aton pinaagi han iya Pulong. Syempre, hi Jehova diri naglalaom hin pagin perpekto ha diri perpekto nga mga tawo. (Sal. 130:​3, 4) Ha pariho nga paagi, diri niya ginbabalewaray an ‘diri diosnon nga mga tawo, nga ginhihimo nga pasangil an iya diri matupngan nga pagkabuotan para ha mapasiparahon nga panggawi.’ (Jud. 4) Lugod, an Biblia nagsusumat han ‘kabungkagan han mga diri diosnon’ ha girra han Dios ha Armagedon. (2 Ped. 3:7; Pah. 16:16) Pero diri karuyag ni Jehova nga mabungkag an bisan hin-o. An Biblia klaro nga nagsusumat nga “karuyag niya nga magbasol an ngatanan.” (2 Ped. 3:9) Ginsusubad han Kristiano nga mga tigurang hi Jehova samtang pasensyoso nga ginbubuligan nira an mga nagbubuhat hin sala nga bag-uhon an ira mga paagi ngan maibalik an pag-uyon ni Jehova. w24.08 26 ¶1-2

Pariho kan Jehova, kita liwat mahimo maghatag hin materyal tungod han gugma. Pananglitan, may kilala ka ba nga bugto nga nagkikinahanglan hin pagkaon o bado? Puydi ka gamiton ni Jehova nga ihatag ito nga iya ginkikinahanglan. An katawohan ni Jehova kilala gud nga nabulig kon may mga kalamidad. Pananglitan, ha panahon han COVID-19 nga pandemya, an kabugtoan naghatag hin pagkaon, bado, ngan iba pa nga mga suplay ha mga nanginginahanglan hito. Damu liwat an nagdudonar ha worldwide work. Nakabulig ito nga mapundohan an panhatag hin mga ayuda ha bug-os nga kalibotan. Igin-aplikar nira an mga pulong nga mababasa ha Hebreo 13:16: “Ayaw hingalimot ha pagbuhat han maopay ngan ha pagpaangbit ha iba han anoman nga may-ada ka, kay nalilipay gud an Dios ha sugad nga mga halad.” w24.09 27 ¶6-7

Imadyina ini nga sitwasyon. Nagbibiling ka hin trabaho basi masuportaran an imo pamilya. May duha nga trabaho nga puydi mo sudlan. Katapos, ginkonsiderar mo an ngatanan nga impormasyon, sugad han klase han trabaho, eskedyol, kahirayo, ngan iba pa. Ito nga duha nga trabaho pariho waray natatalapas nga mga prinsipyo ha Biblia. Bangin pilion mo an usa nga trabaho kay karuyag mo ito o tungod kay mas daku an sweldo. Pero may iba pa nga butang nga angay ikonsiderar antes magdesisyon. Pananglitan, hain hito nga trabaho an makakaulang han imo pag-atender ha mga katirok han kongregasyon? Hain hito nga trabaho an makakaiban han panahon nga imo kinahanglan basi an imo pamilya maataman ha emosyon ngan espirituwal? An paghunahuna hito nga mga pakiana mabulig ha imo nga unahon “an mas importante nga mga butang”—an imo pagsingba ngan an mga panginahanglan han imo pamilya—imbes nga an pagkaada damu nga kwarta. Katapos, makakahimo ka hin desisyon nga bibendisyonan ni Jehova. w25.01 17 ¶11-13

Bisan kon trataron ka hin diri maopay han iba, makakasarig ka nga hinigugma ngan presyoso ka kan Jehova. Kon naabat ka nga “rumok an [imo] espiritu,” hinumdumi nga may nakikita hi Jehova ha imo nga mag-opay nga butang ngan iginpapahirani ka niya ha iya. (Juan 6:44) Pirme hiya andam nga buligan ka kay presyoso ka ha iya. May mahibabaroan kita han mga inaabat ni Jehova pinaagi ha paghisgot han ehemplo ni Jesus. Ha panahon han ministeryo ni Jesus ha tuna, nakita niya an mga ginmiminos han iba, ngan gintratar niya hira nga may pagpaid. (Mat. 9:​9-12) Han an usa nga babaye nga naglalaom nga matatambal ha iya grabe nga sakit kinapot ha bado ni Jesus, ginliaw ngan ginkumendasyonan niya hiya tungod han iya pagtoo. (Mar. 5:​25-34) Perpekto nga iginpakita ni Jesus an personalidad han iya Amay. (Juan 14:9) Salit makakasiguro ka nga presyoso ka kan Jehova ngan napapansin niya an imo mag-opay nga kalidad, pati na an imo pagtoo ngan gugma ha iya. w24.10 7 ¶4-5

Ha kinabuhi ni David kinahanglan niya ilubon an pipira nga magkuri nga sitwasyon nga nakapatangis ha iya. Inatubang hiya hin pagkontra ngan hin pagtraydor pa ngani hadton iya mga gintataporan. (1 Sam. 19:​10, 11; 2 Sam. 15:​10-14, 30) Ha usa han iya makuri nga kahimtang, nagsurat hiya: “Nanluya ako tungod han akon panhayhay; ha bug-os nga gab-i ginhulos ko an akon higdaan hin mga luha; an akon katre nagbaha han akon pagtinangis.” (Sal. 6:6) Bisan pa han mga kakurian nga gin-atubang ni David, kombinsido hiya nga hinigugma hiya ni Jehova. Hiya nagsurat: “Pamamatian ni Jehova an akon pagtinangis.” (Sal. 6:8) An mga pulong ha aton teksto yana naghuhulagway han mahigugmaon nga pag-ataman ni Jehova. Gin-abat ni David nga sugad hin gintitirok ni Jehova an iya mga luha ha usa nga surudlan o iginrirekord ito ha usa nga libro. Sigurado hi David nga nakita ni Jehova ngan ginhinumdom an iya kasakit. Kombinsido hi David nga an iya mahigugmaon nga Amay ha langit diri la basta maaram han iya gin-aagian kondi pati liwat han nagin epekto hito ha iya. w24.12 22 ¶11-12