Olaleerya ni ekurupu onnikumiherya mireerelo sinceene

1-2. Anna ni arokora anoonela sai ekurupu ya muteko woolaleerya athanleliwe aya?

NIIREKE munnuupuwela nihiku mweemereriwe anyu okhala namalaleerya a ihapari sooreera? Mwaahihakalala vanceene, okhala wiira mwaahipacerya wiirela mpantta ekurupu yuulupale ya atthu anivuwiha nsina na Yehova. (Esal. 148:​1, 2, 12, 13) Nave nihiku nlo, pooti wiira mwaahipacerya wiirela mpantta ekurupu yaamukhaani ya anna ni arokora, eyo piiyo, ekurupu ya muteko woolaleerya, yeeyo eniirela mpantta muloko anyu. Ekurupu ya muteko woolaleerya, yookhalana efaita yuulupale, okhala wiira ennikhaliherya olaleya ihapari sooreera sa Omwene, “elapo yootheene”. — Math. 24:14.

² Munoonela sai olaleerya ni ekurupu ya muteko woolaleerya muthanleliwe anyu mmulokoni? Murokora mmosa oniitthaniwa Wendya, onihimya so: “Ekurupu yaamukhaani kithanleliwe aka ya muteko woolaleerya, ennikikhaliherya mwa inamuna soovirikana. Kihiixutta ni anna ni arokora a ekurupu aka, inamuna isya sa olaleerya ni wiixuttiha. Nave aakikhaliherya okhalana ni ophwanya soolukama saka mmutthenkesoni mwa Yehova. Ohimya ekeekhai, ekurupu ya muteko woolaleerya yookikhaliherya waapaka apatthani eekeekhai.” Munna oniitthaniwa Rich, onihimya so: “Kinnoona okhala eparakha yuulupale, okhala muhooleli a ekurupu ya muteko woolaleerya. Anamalaleerya, aakhalana muritti wa omukhaliherya ole animusomiha aya Biibiliya mpakha opatisiwa. Masi munna onihoolela ekurupu yoolaleerya, ookhalana muritti wa waakhaliherya anna ni arokora anipatisiwa wiira atepeke olipiha waataana waya ni Yehova.” Murokora oniihaniwa Dinah, onihimya so: “Ekurupu ya muteko woolaleerya, etthu yootepa oreera! Kinniwoona anna ni arokora a ekurupu aka okhala amusi aka.”

3. Mwaha ola, ninrowa othokorerya exeeni?

³ Mwaha ola, nnooweha muritti orina awe muhooleli a ekurupu ya muteko woolaleerya ni namakhaliherya awe. Nave nnooweha moota akhanle aya oowaakhaliherya anna ni arokora a ekurupu aya. Moottharelana, nnoothokorerya moota khula mutthu okhanle awe oowaakhaliherya anna ni arokora a ekurupu awe. Nuumala-vo, nnooweha moota ekurupu ya muteko woolaleerya ennikhaliherya aya.

MUHOOLELI A EKURUPU NI NAMAKHALIHERYA AWE

4. a) Muritti xeeni orina awe muhooleli a ekurupu ya muteko woolaleerya? b) Muhooleli a ekurupu, onaakhaliherya sai anamalaleerya a ekurupu awe? (Nwehe ekaaxa eni: “Malakiheryo anivahiwa ahooleli a ikurupu.”)

⁴ Okhala wene, munna onihoolela ekurupu ya muteko woolaleerya onikhala mutokweeneb, yoowo onithanliwa ni axitokweene a mmulokoni wiira aakhaliheryeke anna ni arokora a ekurupu awe, okhala anamalaleerya anisuwela wiixuttiha. Munna onihoolela ekurupu, onivara sai muteko ola? Wanipacerya, owo ohaana wooniherya wiira onnimuthokorerya khula namalaleerya ori ekurupu awe. (Mir. 27:23) Muhooleli a ekurupu, onnaasuwela anna ni arokora a ekurupu awe ni okathi ti okathi onnilavulana aahiiso waalikarela ophavelaka osuwela moota ari aya. Mwaha woopaka eyo, ennimukhaliherya waalipiha anna ni arokora, waakhaliherya ni waavaha itthu anipirisari aya. (Mir. 12:25; Yes. 32:2; Yak. 2:​15-17) Ya nenli, owo onnaakhaliherya anamalaleerya a ekurupu awe okhalela nthiti muteko woolaleerya. Muhooleli onnikhalela nthiti muteko woolaleerya, otepexa wene wuumalani wa esumana. Nave-tho, onnikhuma ni anamalaleerya oovirikana a ekurupu awe, wiira aalipihe ni aakhaliherye osuwela inamuna sikina sa muteko woolaleerya. Akhala wiira khoniwerya orowa, owo onnipaka mareheryo wiira ekurupu yalaleerye ehooleliwaka ni namakhaliherya awe aahiiso munna mukina oophwanelela. Ya neeraru, owo onnaakhaliherya anna oopatisiwa wiira aweryeke ovara miteko sikina sa mmulokoni. (1 Tim. 3:1) Onnaattottopela, waavaha miruku sa mbiibiliyani ni onnaaterenari wiira aphwanelele okhala arumeyi ookhaliherya aahiiso axitokweene. Axitokweene a mmulokoni, annaathanla axitokweene akhanle oowerya ovara saana muteko ola, okhala wiira ohoolela ekurupu ya muteko woolaleerya muritti muulupale.

5. Mixankiho xeeni sinaaphwanya ahooleli akina a ikurupu?

⁵ Sookhala mixankiho sinceene sikhanle omphwanya muhooleli a ekurupu, okathi onaahoolela awe anamalaleerya a ekurupu awe. Nrowe niwehe ntakiheryo na Jordam, mutokweene yoowo onihoolela ekurupu ya muteko woolaleerya wAlemanha. Owo ookhalana miritti sinceene mmulokoni ntoko axitokweene akina arina aya. Jordam onihimya so: “Okhala muhooleli a ekurupu ni ovara miteko sikina sa mmulokoni khivanikhweya. Mwaha waivaavo, vannikixankiha omaleliha yoolukama aka ya olavulana anamalaleerya a ekurupu aka.” Abel, mutokweene yoowo orina iyaakha 70 onikhala wUganda, onihimya so: “Muloko ahu nirina axitokweene ni arumeyi ookhaliherya vakhaani paahi. Nto eyo enniiriha ikurupu sa muteko woolaleerya okhala anamalaleerya anceene. Nave ennikiiriha ohiwerya omukhaliherya khula namalaleerya ntoko kaaphavela aka.” Mutokweene mukina oniihaniwa Obed onikhala oSuriname, onihimya so: “Okisivela waaterenari anna akina. Masi para omuterenari mutthu, onivekela okathi ni wiimananiha. Nave onnivira okathi munceene wiira koone mireerelo saya. Tivonto, ikwaha sikina nkiniwerya waaterenari anna akina mwaha wa miteko sikina kinivara aka mmulokoni.” Etthu xeeni enrowa waakhaliherya axitokweene sinaaphwanya mixankiho iya ni sikina?

6. Akhala wiira ekurupu ya muteko woolaleerya erina anamalaleerya vakhaani, eyo enimukhaliherya sai muhooleli a ekurupu?

⁶ Vaaweryaneyaka, ikurupu sa muteko woolaleerya, sihaana okhalana anamalaleerya vakhaani wiira vaweryaneyeke munna onihoolela waasuwela ni waakhaliherya anamalaleerya ootheene olipiha waamini waya. Ankhi vakhala wiira muloko owo orina anamalaleerya vakhaani? Vakhala wiira ti siiso, ohiya axitokweene opaka ikurupu suulupale sinrowa omuxankiha muhooleli omaleliha muritti awe, nikhuuru na axitokweene pooti onvekela murumeyi ookhaliherya wiira ohooleleke ekurupu. Akhala wiira ikurupu sa muteko woolaleerya ti saamukhaani, eyo ennaakhaliherya ahooleli ovara saana muteko aya, eyo piiyo, waakhapelela saana anna ni arokora a ekurupu aya.

7. Miloko sirina axitokweene vakhaani, etthu xeeni ahooleli a ekurupu akhanle aya oopaka wiira yaakhaliherye anna ni arokora a ekurupu aya? (1 Pedru 5:2) (Nwehe efootu.)

⁷ Akhala wiira mwa mutokweene onihoolela ekurupu nave muloko anyu orina axitokweene vakhaani, mwiimananiheke omuterenari namakhaliherya anyu wiira ookhaliheryekeni waakhapelela anna ni arokora a ekurupu anyu. (Mmusome 1 Pedru 5:2.) Munvaheke miteko sikina namakhaliherya anyu sinivarihana ni okhapelela ekurupu. Mwa ntakiheryo, okathi mukina pooti onvekela wiira ohoolele muteko woolaleerya wa ekurupu. Nave, ti vooloka ovaanela ni namakhaliherya anyu moota woomukhaliherya khula mmosa a ekurupu anyu olimalela muteko woolaleerya ni olipiha omwaamini wawe Yehova. Ikwaha sikina, muroweke ni namakhaliherya anyu waaxukurya anna ni arokora a ekurupu anyu wiira mwaalipihe. Muhinatthi orowa, pooti olavula ni namakhaliherya anyu moota munrowa anyu omulipiha munna owo aahiiso murokora. Nuumala omuxukurya, mmuleeleke namakhaliherya anyu itthu sooloka opanke awe ni iponto onireerela awe olokiherya, vaareerelaka. Nuuvira okathi, namakhaliherya anyu pooti ophwanelela okhala muhooleli a ekurupu ya muteko woolaleerya. (2 Tim. 2:2) Nave-tho, pooti onvekela munna mukina orina waamini woolipa wiira aakhaliheryeke anna ni arokora akina a ekurupu anyu. Mapioneero ni anna akina alimalenle, pooti waakhaliherya anamalaleerya asya ni ale ahilimalenle olaleerya. Anamalaleerya arina waamini woolipa, pooti owiixuttiha ale anipirisari okhaliheriwa moota woopaceriha ovaanela, otthikela waaxukurya ale yaalalenrye aya aahiiso moota woowiiriha yoosoma ya Biibiliya. Vano, nrowe nithokorerye inamuna tthaaru, khula namalaleerya okhanle awe oopaka wiira okhaliherye ekurupu awe ya muteko woolaleerya.

ETTHU NIKHANLE AHU OOPAKA WIIRA NIKHALIHERYE EKURUPU

8. Ninrowa okhaliherya sai ekurupu ahu? (Aroma 1:12)

⁸ Mulaleeryeke ni ekurupu anyu. Nyuwo munnaalipiha anna ni arokora ni awo annoolipihani okathi munilaleerya anyu hoothe. (Mmusome Aroma 1:12.) Olaleerya hoothe, onninikhaliherya ohixanka okathi ninvaanela ahu ni atthu. Nave onninikhaliherya ohoovelela olaleerya mittetthe sikina. Akhala wiira muteko munivara anyu onnooxankihani okhaliherya ekurupu anyu ya muteko woolaleerya, nyuwo pooti onvekela patarau anyu wiira omuturuke oraariyu anyu a muteko. Patarau anyu pooti oweemereryani ovara oraariyu mukina. (Neh. 2:​4-6) Akhala wiira owereyasiwa aahiiso wuuluvala onniwiirihani ohiwerya olaleerya ni ekurupu anyu, nyuwo pooti olavula ni muhooleli a ekurupu anyu. Muhooleli owo pooti opaka mareheryo wiira mulikareliwe videoconferência, olaleerya murumeelaka ikarta aahiiso telefooni. Niireke mwa mmiravo ni mookhalana okumi wooloka masi hata vari siiso vannooxankihani orowa olaleerya ikwaha sinceene? Akhala wiira ti siiso, munoonela sai opaka eprokaraama wiira khula esumana mulaleeryeke ni munna a ekurupu anyu? Nyuwo muhaana wuupuwela etthu eri ya faita mookumini mwanyu ni moota mukhanle anyu oorumeela oratteene okathi anyu. (Arom. 12:11; Akol. 4:5) Okathi muniimananiha anyu oolaleerya ni ekurupu anyu, anna ni arokora ootheene annittottela mureerelo. Nto munvekeleke Yehova wiira ookhaliheryeni. Owo onimoovahani “ophavela ni owerya ovara muteko.” — Afil. 2:13.

9. Ninrowa okhaliherya sai ekurupu yoolaleerya wiira ekhale nipuro noophentana ni noowiiraana? (Aroma 12:13)

⁹ Mwaathokoreryeke anna ni arokora a ekurupu anyu okhala amusi anyu. Nnoowerya waakhaliherya anna ni arokora a ekurupu ahu, naaphentaka ni owaakhela saana. (Mmusome Aroma 12:13.) Mwa ntakiheryo, nyuwo pooti weemererya wiira ekurupu ya muteko woolaleerya ethukumaneke vatthokoni vanyu. Miloko sikina, ikurupu sinnipaka mareheryo wiira simwaakhele munna onirwa olavula mwaha onikhuma muloko mukina wiira alye hoothe. Nave, hata mulipa-oolavula mwaha ohirowaka okhala, ikurupu sikina sinnikhala hoothe para olya ni olipihana nuumala muthukumano. Pioneera a vameekhaaya oniihaniwa Sara onihimya so: “Okathi kinisuwela aka wiira atthu animoorwa vatthokoni vaka, miyo kinnixanka. Tivonto, nkinaattiha itthu. Kinnimananiha waasuwela anna ni arokora, ohiya oxanka kuupuwelaka olokiherya yoolya yinceene.” Okathi nnaaphenta ahu ni owaakhela anna ni arokora a ekurupu ahu ya muteko woolaleerya, ninnitepa omwaattamela Yehova ni wiiraana mukina ni mukhwaawe. — Neh. 8:10; Mit. 20:35.

10. Exeeni nikhanle ahu oopaka naaphavelaka osuwela olaleerya ni wiixuttiha saana? (Miruku 1:5; 27:17) (Nwehe efootu.)

¹⁰ Mwiimananiheke wiira mukhale mutthu oosuwela olaleerya ni wiixuttiha. Akhala wiira nnoolimalela olaleerya ni wiixuttiha, vanrowa onisivelaka orowa olaleerya ni ekurupu ahu. Niireke yookhala enamuna emosa ya olaleerya mwaaphavela anyu wiixutta saana? Munoonela sai onvekela pioneero aahiiso namalaleerya a ekurupu anyu olimalenle wiira ookhaliheryeni? (Musome Miruku 1:5; 27:17.) Mmuleele muhooleli a ekurupu anyu wiira muniphavela osuwela wiixuttiha saana okathi woolaleerya. Owo onimookhaliheryani. Nave-tho, nyuwo pooti onvekela munna mukina aahiiso murokora, yoowo opacenrye khalai olaleerya wiira ookhaliheryeni. Murokora oniihaniwa Heather aahipaka eyo, nnaamwi vahaakhweyale waavekela nikhaliheryo atthu akina. Owo onihimya so: “Kaahinvekela pioneera mmosa wiira okikhaliherye osuwela moota wootthikela ovaanela ni atthu kaalalenrye aka. Pioneera owo, aari oophenta ni ooreera murima. Tivo, aahipaka mareheryo wiira nilaleeryeke hoothe. Nave aahikikhaliherya opaceriha yoosoma ya Biibiliya ni muthiyana mmosa naamuxukunrye ahu. Kinnihakalala mwaha woovekela nikhaliheryo, okhala wiira vano onnitepa okisivela muteko woolaleerya.” Mweekeekhai, nnoowerya okhaliherya ekurupu ahu ya muteko woolaleerya mwa inamuna soovirikana.

EKURUPU AHU YA MUTEKO WOOLALEERYA ENROWA ONIKHALIHERYA SAI?

11-12. Ekurupu anyu ya muteko woolaleerya enookhaliheryani sai ohihiya omwaattamela Yehova ni okhala mukristau orina waamini woolipa? Muhimye yoowiiraneya emosa.

¹¹ Wiirela mpantta ekurupu ahu ya muteko woolaleerya, enninikhaliherya ohihiya omwaattamela Yehova. Nrowe niwehe inamuna sikina nikhanle ahu oottottela mureerelo, ekurupu ahu ya muteko woolaleerya. Mwa ntakiheryo, Yehova onnaarumeela ahooleli a ekurupu wiira yaakhaliheryeke anaamukhweli, ikwaasuni ni anna ni arokora oowuuluvala. (1 Ates. 2:8; Yak. 1:27) Nave, olaleerya ni ekurupu ahu onoonikhaliherya osuwela olaleerya saana ni wiixuttiha. Nave-tho, anna oopatisiwa anniterenariwa wiira avahiweke miritti sikina mmulokoni. — 1 Tim. 3:10.

¹² Nrowe niwehe moota murokora Wendy, nimulavunle ahu ittima sivinre, aattottenle awe mureerelo ekurupu ya muteko woolaleerya. Owo onihimya so: “Okhala wiira paapa aka khaaphavela wiira nimurumeeleke Yehova, eyo yaanimwiiriha maama aka ohilaleerya ni ekurupu wuumalani wa esumana. Masi miyo kaanirowa okhala wiira kaaneemereriwa. Murokora mmosa pioneera oowuuluvala, aahikhala mpatthani aka ni ikwaha sinceene naanilaleerya hoothe. Owo aahikikhaliherya olaleerya saana ni wiixutta itthu sikina mmulokoni. Ikwaha sinceene, kinnuupuwela wiira muhooleli a ekurupu oophenta aanikivaha miruku sinikhuma mbiibiliyani, seiyo sinikikhaliherya mpakha olelo-va.”

13. Ekurupu ahu ya muteko woolaleerya ennikhaliherya sai? (Nwehe vakaapani.)

¹³ Ekurupu ya muteko woolaleerya, enninikhaliherya okhalana apatthani yaawo anniphenta ni annikhaliherya. Okathi ninlaleerya ahu moohihiyererya ni anna ni arokora a ekurupu ahu, ninnikhala apatthani eekeekhai. (Afil. 1:27) Ikurupu saamukhaani sa muteko woolaleerya, sinnaakhaliherya anamalaleerya oowuuliwa muru wiira awerye waapaka apatthani. Nave sinnaakhaliherya ale anixankiheya okhala nipuro ari atthu anceene. (2 Akor. 6:13) Anna a ekurupu ahu, anninikhaliherya okathi ninwereiwa ahu, ninxanka ahu aahiiso onikhwa awe ole namphenta ahu. (1 Ates. 5:14) Ohimya ekeekhai, okathi wa maxakha maalupale, nnimwaapirisari apatthani eekeekhai. (Math. 24:21) Masi osuwela wiira aakhala anna ni arokora anniphenta, eyo enoonikhaliherya ovilela mixankiho iyo. — Mir. 17:17.

14. Okathi enikhumelela aya ehasara aahiiso etthu ekina mootutuxerya, anna ni arokora a ekurupu ahu annikhaliherya sai?

¹⁴ Anna ni arokora a ekurupu ya muteko woolaleerya, anninikhaliherya okathi wa mixankiho. Awo anninikhaliherya okathi sinniphwanya aya ihasara sa ephattu, olupatthiwa, iretta sootutuxerya aahiiso asitenti. Mwa ntakiheryo, okathi enikhumelela aya ehasara, ahooleli a ikurupu, anniphavela osuwela khula emusi opuro eri aya ni ophavela osuwela etthu anipirisari aya, ntoko ovahiwa mirette, eyoolya, maasi, opuro wookhala aahiiso ikuwo. Okathi muhooleli a ekurupu onisuwela awe eyo, owo onneererya opaka mareheryo wiira akhaliheriwe ale anipirisari. Nave-tho, muhooleli a ekurupu, onnilavula ni ekomisau ya muteko ya muloko, wiira awehiwe ale anipirisari okhaliheriwa ni itthu sikina nave onnipakiwa prokaraama wiira akhaliheriwe. Tthiri anna ni arokora a ekurupu anyu, animookhaliheryani okathi enikhumelela aya ehasara aahiiso etthu ekina mootutuxerya!

15. Muteko xeeni arumeyi ootheene a Yehova anivara aya?

¹⁵ Ntoko ninsuwela ahu, Yehova ookhalana arumeyi awe anceene wiirimu ni valaponi. Mpantta wa wiirimu wa emusi ya Yehova, wookhalana arumeyi imilyau sinceene, niire so, ibilyau sinceene sa malaikha oororomeleya. Mpantta wa valaponi wa emusi ya Yehova, wookhalana arumeyi anivikana imilyau 9, yaawo anincerereya khula nihiku. (Zak. 8:23; Wis. 5:11) Arumeyi ootheene a Yehova, ahiiraana wiira alaleye ihapari sooreera sa Omwene wa Muluku! (Wis. 14:​6, 7) Tivonto, nihaana ottottela mureerelo ekurupu ya muteko woolaleerya. Ekurupu ya muteko woolaleerya, enninikhaliherya mwa inamuna sinceene, otepexa wene, enninikhaliherya onvuwiha Yehova Muluku ahu! — Esal. 111:1.