Aapirisari olipa murima wiira okhale oororomeleya

ALOPWANA anli oolipa murima yaaniwela mwaako moowaakuveya aakunxe ene ikaruma sa ekhotto. Awo yaarowa otuphela ekurupu yuulupale ya afilisti. Mmosa a alopwana awo aari Yonathani, mwaana a mwene oopacerya a wIsarayeli, Sawuli. Owo aari ni murumeyi awe, yoowo Yonathani aamulipinhe awe orowaka owana ni afilisti oriki: “Maana khiivo etthu enimukhoottiherya Yehova woopola, hata aarumeelaka atthu anceene, wala atthu vakhaani”. Yehova aahooniherya wiira etthu Yonathani aahimya awe yaari yeekeekhai, okhala wiira alopwana ale anli yaahiwiiva anakhotto 20! Iwo waari wanipacerya paahi, okhala wiira Yehova aahaakhaliherya-tho aisarayeli waaxintta afilisti.

Yoowiiraneya ela, ennooniherya wiira Yonathani ari mulopwana oolipa murima. Okumi awe wootheene, Yonathani aahooniherya olipa murima, owo aari mulopwana oororomeleya. Nave ikwaha sinceene vannipirisari olipa murima wiira nikhale oororomeleya. Mwa ntakiheryo, nnaamwi Yonathani aari oororomeleya wa paapa awe, owo aanipirisari olipa murima wiira ohele nipuro noopacerya ororomeleya wawe wa Yehova, vaavo paapa awe aapacenrye awe okhala mutthu ootakhala ni aahiyale awe omwiiwelela Yehova.

Nuuvira okathi, Yonathani ohalaka ophiyeriha iyaakha 50, owo aahikhala mpatthani a mmiravo mmosa aitthaniwa Davidi. Mmiravo owo iira omwiivale ene nfilisti a ikuru aitthaniwa Goliyati. Moohaanyiherya Sawuli ni atthu anceene yaanimuttottopela Davidi. Niireke Yonathani aanimukhalela nrima? Nnakhala vakhaani! Ohiya omukhalela nrima, owo aahinvaha Davidi ikuwo sawe sa ekhotto, ohela muhina muura awe. Tthiri Davidi ahivahiwa itthu sa efaita, mwaha woowi Yonathani aahisuweliwa okhala mulopwana aasuwela ovonya saana nreetthe. Nnaamwi Yonathani aari muulupale onvikana Davidi, awo yaahipaka nivarihano na okhala apatthani eekeekhai ni yaahimaleliherya okumi aya wootheene.

Wanipacerya, Sawuli aanimphenta Davidi. Nuuvira okathi, Sawuli aahipacerya omunyokha Davidi ni omukhalela nrima onaphavela omwiiva. Nave-tho, owo uupuwela wiira mwanawe Yonathani ammunyokhaka Davidi. Masi Yonathani khaahiyale okhala mpatthani oororomeleya a Davidi, nnaamwi Yehova aamuthanlale Davidi wiira muhoolo okhale mwene a wIsarayeli. Okathi Sawuli aahimmye awe wiira aaphavela omwiiva Davidi, Yonathani aahimukhaliherya mpatthani awe. Ohimya ekeekhai vaanipirisari olipa murima. Nnaamwi Sawuli uuluvanle, nlelo owo aari nakhotto oowerya. Ekwaha emosa, okathi Yonathani aamukhalihenrye awe mpatthani awe Davidi, Sawuli aahinvonya nivaka mwanawe, Yonathani! Nivaka nle khinaamphwannye Yonathani, masi hata vari siiso, owo aahiriipiwa murima mwaha wa etthu ele paapa awe aaphavela awe opaka. Mwaha wa ororomeleya, Yonathani aahimuleela Davidi wiira Sawuli aaphavela omwiiva. Yonathani aanimuroromela vanceene mpatthani awe ni aahinvekela wiira okhapelele emusi awe, akhala wiira nihiku nlo aamurowa wiiviwa okhottoni.

Okhala wiira Sawuli aaphavela omwiiva Davidi, nto owo aahaana otthyawa. Hata vaari siiso, Sawuli aahaaruma anakhotto awe wiira amutthimakele Davidi! Nto Davidi aanitthyawa orowaka wiipitha makhuku oovirikana. Niireke Yonathani aakhala hoothe ni anakhotto ale yaaphavela omwiiva Davidi? Biibiliya khonihimya akhala wiira Yonathani aahipaka eyo. Moohaanyiherya owo khaakhalihenrye. Nuuvira okathi, Yonathani aahisuwela opuro Davidi iipinthe awe ni aahirowa okumana ni mpatthani awe. Masi exeeni yaamwiiriha orowa? Biibiliya onihimya wiira Yonathani “aahimulipiha Davidi ni nsina na Yehova.” Owo aamulenle so: “Muhoove, paapa aka Sawuli khonrowa woophwanyani, nyuwo munoorowa okhala mwene a wIsarayeli, nto miyo kinrowa okhala mwene a nenli nuumala nyuwo”. Yonathani ni Davidi yaahilaxeryana ni ele yaari ekwaha yookiserya yaawehanne aya.

Nuuvira okathi, Sawuli aahimuhiya Yehova, onapacerya waakokhorela amuluku eethiru. Okathi owo, Yehova aahihiya omukhaliherya Sawuli. Vaavo Sawuli ni Yonathani yaawana aya ekhotto ni awanani a Muluku, eyo piiyo, afilisti, Sawuli aahivulalihiwa vanceene, nuumala-vo owo aahiixiiva. Nave-tho anaawe araru, omuhela muhina Yonathani, yaahikhwa nihiku nle.

Davidi khaareere oriipiwa murima. Owo aahiipa nsipo nooniherya oriipiwa murima ni moota amphenta awe mpatthani awe, Yonathani. Owo aahiihana nsipo nlo okhala “Nsipo na Muura”, woonasa wene nsipo nlo naamuupuxerya eperesenti Yonathani anvanhe awe Davidi. Iyaakha saavinre Davidi aalempe so: “Kooriipiwa murima vanceene mwaha wa nyuwo, munnaka Yonathani, nyuwo mwaanikiphenta vanceene.” Nuumala okhala mwene, owo aahiphavelasa emusi awe Yonathani ni aahimphwanya mwanawe yoowo ari oorakala. Davidi aahimukuxa mwaana a Yonathani, aitthaniwa Mefiboxeti, wiira akhaleke hoothe oYerusalemu. Nuumala-vo, aahimaliherya ele aamuleihenrye awe mpatthani awe, Yonathani.

Musome yoowiiraneya ela mbiibiliyani, soolepa sinittharelana:

• 1 Samuweli 13:​2, 19-23; 14:​1-15; 16:21; 18:​1-9; 19:​4-6; 20:​1-42; 23:​16-18; 28:​6-8; 31:​1-6

• 2 Samuweli 1:​17-27; 9:​1-7

Nikoho para ovaanela:

Yonathani oonihenrye sai olipa murima?

Mutokose itthu sikina

1. 1. Afilisti yaari aani? (Owehaweha, 01/02/1995 epaax. 31)

   Mwaakhule va

2. 2. Nuulumo noowi “epiimi” eniromoliwa 1 Samuweli 13:​21, nnooniherya sai wiira yoowiiraneya ela ti yeekeekhai? (Owehaweha, 15/03/2005 epaax. 29) A

   Mwaakhule va

   

Todd Bolen/BiblePlaces.com

1. 4. Exeeni Davidi aapanke awe wiira omaliherye yooleiherya awe ya okhapelela emusi ya Yonathani? (Perspicaz vol. 2 “Mefiboxeti” n.^o 2 etti. 1)

   Mwaakhule va

Muupuwelele itthu mwiixuntte anyu

• Yonathani aahihela opuro woopacerya omuroromela Yehova, ovikana omuroromela paapa awe, Sawuli. Okathi xeeni mukristau onireerela awe wooniherya wiira onnihela nipuro noopacerya ororomeleya wa Yehova? C

  Mwaakhule va

  

• Yoowiiraneya ya Davidi ni Yonathani, enniixuttiha exeeni sa . . .

  • apatthani?

    Mwaakhule va

  • wiiyeviha?

    Mwaakhule va

  • ororomeleya?

    Mwaakhule va

• Munrowa otakiha sai olipa murima wa Yonathani?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Yonathani nuumala ohihimuxiwa?

  Mwaakhule va

Mwiixutte itthu sikina

Exeeni yaamukhalihenrye Yonathani ni Davidi okhala apatthani eekeekhai? Nave olelo-va, ninrowa okhalana sai apatthani eekeekhai ntoko Yonathani ni Davidi?

“Mwaaphenteke anninyu ni murima wootheene” (Owehaweha 01/2021 ipaax. 20-25)

Mwaakhaliherye aniinyu wiiwexexa etthu aniixutta aya voohimya sa okumi wa Yonathani.

“Yonathani” (Ekartau ya Biibiliya eri va jw.org)