Etthu nniixutta ahu ni axibeyoni

1-2. Xeeni vari aya vooloka wiixutta yoowiiraneya ya axibeyoni?

NUUVIRA iyaakha 40 aisarayeli akhumme ene wExiitu, awo yaahikela elapo Yehova aaleihenrye awe waavaha. Yehova aahaakhaliherya aisarayeli oxintta okhottoni, okathi yaawana aya ni atthu a epooma ya oYeriko ni a epooma ya wAyi. Atthu yaakhala mipantta sikina sa oKanaani, yaahiiwa etthu aisarayeli yaapanke aya. Nto ekurupu ya mpantta mmosa, yaahirwa olavula ni aisarayeli. Awo yaahimyale wiira yaakhuma elapo ya ottaiwene ni yaaphavela okhala apatthani ni atthu a Muluku, nto khiyaaphavela owana ekhotto naawo.

² Atthu awo, yaari axibeyoni. Ela ekwaha yoopacerya atthu a oXibeyoni anilavuliwa aya mbiibiliyani eliivuru ya Yooxuuwa. Masi soolepa sikina sa ohoolo, Biibiliya onnaaromola atthu ala. Biibiliya onnooniherya wiira atthu a oXibeyoni yaahikhala ni aisarayeli mwa iyaakha sinceene. Axibeyoni yaahooniherya mikhalelo sinceene ni sooreera nikhanle ahu ootakiha. Nave ninniixutta etthu ni moota Yehova aathokorenrye awe.

MOONIHERYEKE WAAMINI NI WIIYEVIHA

3. a) Tani yaari axibeyoni? b) Etthu xeeni yaawiirihale ophavela waataana ni aisarayeli?

³ Okathi aisarayeli yaapacenrye aya oxintta elapo ya oKanaani, axibeyoni yaakhala epooma yoolipihiwa ya oXibeyoni. Awo yaari a nloko na ahivi, nenlo niirela mpantta maloko 7 a akanaani, maloko yaawo yaari “ootepa waatta ni ooweryexa” waavikana aisarayeli. (Otum. 7:1) Axibeyoni, yaahikhalana atoropa anceene ni ootupa. (Yox. 10:2) Atthu akina a oKanaani yaaphavela owana ni aisarayeli. Masi axibeyoni khiyaaphavenle owana, okhala wiira yaahoona wiira yawana ni aisarayeli khiyaarowa owerya oxintta. Awo yaahisuwela wiira Yehova aanaakhaliherya atthu awe. Nave, yaahisuwela wiira Yehova anwoomola akanaani ni aamwaavaha elapo ele atthu awe. (Okhu. 34:11; Yox. 9:24) Tivonto, nuumala aisarayeli oxintta epooma ya oYeriko ni epooma ya wAyi, axibeyoni yaahaaruma atthu aya,a orowa okumana ni Yooxuuwa oXiligali, wiira yaataane naawo.

4. a) Ntoko onooniherya awe Yooxuuwa 9:​8-13, axibeyoni yaawonke sai aisarayeli wiira yaataane? (Nwehe eteseenyu.) b) Nuumala osuweliwa wiira axibeyoni yaamootha, exeeni yiiraneyale?

⁴ Mmusome Yooxuuwa 9:​8-13. Axibeyoni, yaahinwoka Yooxuuwa ni yaahimuleela wiira yaakhuma elapo ya ottaiwene. Awo yaahisuwela wiira Yehova aahaakhaliherya aisarayeli, waaxintta anakhotto a wExiitu ni mamwene a wAmori, Sihoni ni Oogi. Axibeyoni, yaahooniherya okhala atthu yaarina ankhili, okhala wiira khiyaahimyale wiira aisarayeli yaahixintta epooma ya oYeriko ni epooma ya wAyi. Vaakhanle wiira yaahilavula eyo, aisarayeli yaamusuwela wiira axibeyoni khiyaakhuma elapo ya ottaiwene. Okhala wiira khiwaavinre okathi munceene, waarowa waakhaliherya atthu a ottaiwene osuwela wiira aisarayeli yaahaaxintta atthu a epooma ya oYeriko ni epooma ya wAyi. Yooxuuwa ni atthu a wIsarayeli, yaahikupali etthu axibeyoni yaalavunle aya nto khiyaawanne naawo. Nave khiyaamukohale Yehova etthu yaareerela aya opaka. (Yox. 9:​14, 15) Ohivinre okathi munceene, axibeyoni yaahisuweliwa wiira khiyakhuma elapo ya ottaiwene. Masi Yooxuuwa ni aisarayeli khiyaawiivale axibeyoni, okhala wiira yaahaaleiherya ohoolo wa Yehova. (Yox. 9:​16-19) Aisarayeli yaahaaleela axibeyoni wiira yaarowa okhalaka hoothe ni yaarowa ovaraka muteko ntoko ipottha. Tivonto, axibeyoni yaahikhalihiwa atthu “oothaya ikhuni ni alipa-oorikelela maasi, yaaroihelaka aisarayeli ootheene, ni altaari a Yehova.” — Yox. 9:27.

5. Axibeyoni yoonihenrye sai wiira yaanimwaamini Yehova?

⁵ Nuumala wiiwa wiira axibeyoni yaahaataana ni aisarayeli, mamwene 5 a wAmori, yaahithukumana ni anakhotto aya wiira yawane ni axibeyoni. Nto axibeyoni yaahipacerya woova ni yaahimuxonttela Yooxuuwa wiira aakhaliherye owana ni anakhotto a oKanaani. (Yox. 10:​3-7) Tivonto, Yooxuuwa ni anakhotto awe yaahaakhaliherya axibeyoni owana ni anakhotto a oKanaani. Nave, Yehova aahaakhaliherya aisarayeli oxintta okhottoni. (Yox. 10:​9-14) Atthu a oXibeyoni, yaahooniherya wiira yaanimwaamini Yehova, mwaha woowi yaahivekela wiira yaataane ni arumeyi awe ni yaahaaxonttela wiira yaakhaliherye. Awo, yaanikupali ni murima wootheene wiira Yehova anwoopola ni ampaka itthu sootheene aaleihenrye awe aisarayeli.

6. Moota Yehova aathokorenrye awe axibeyoni, onniixuttiha exeeni?

⁶ Yoowiiraneya ela, enniixuttiha exeeni voohimya sa Yehova? Enniixuttiha wiira Yehova, Muluku oowiiyeviha ni oomoriwa ikharari. Yehova aahaavaha malakiheryo aisarayeli oriki: “Nwoomole atthu ootheene anikhala elapo eyo”. Nto yooruma ela yaahela muhina owoomola axibeyoni. (Mmr. 33:​51, 52) Masi okathi aisarayeli yeemerenrye aya wiira khiyaarowa waapwetexa axibeyoni, mwaha wa omoriwa ikharari, Yehova aaheemererya wiira axibeyoni ekhaleke. Yehova aahiweemererya, nnaamwi aisarayeli yahaamukohale etthu yaareerela aya opaka. Muhoolo mwaya, Yehova aahirumeela owerya wawe wiira aakhaliherye aisarayeli omaleliha etthu yaaleihenrye aya axibeyoni ni aahaakhapelela. — Yox. 9:26; 11:19.

7. Ninrowa otthara sai ntakiheryo na wiiyeviha ni waamini wa axibeyoni? (Nwehe efootu.)

⁷ Ninrowa otthara sai ntakiheryo na axibeyoni? Nnoowerya otthara ntakiheryo naya, niimananihaka omwaamini vanceene Yehova. Hiyo ninnisuwela mikhalelo sinceene sa Yehova waavikana axibeyoni. Tivonto, nookhalana mathowa manceene anniiriha omukupali Yehova ni murima wootheene. (Esal. 40:​4, 5) Nave nnoowerya otthara ntakiheryo na axibeyoni, akhala wiira moowiiyeviha ninnivara miteko Yehova onnivekela awe. (Yox. 9:​23, 27) Munna mmiravo oniihaniwa Luke, onnuupuwela okathi anwehale awe munna mukina oowuuluvala a emusi ya oBeteeli, ooniheryaka mukhalelo ola wa wiiyeviha. Munna ole oowuuluvala, aahikhalana iparakha suulupale oBeteeli. Masi okathi anna ni arokora yaateka aya Empa ya Omwene, nihiku nimosa owo aahiivahererya wiira akhale kwarta ohiyu, opuro ole yaatekiwa Empa ele. Munna Luke onihimya so: “Kihiixutta wiira mutthu oowiiyeviha, khahiyo yoole onilavula paahi. Wiiyeviha onooniheriwa ni miteko ni itthu mutthu onithanla awe opaka.” Ntoko axibeyoni, nnimooniherya wiira ninnimwaamini Yehova okathi nimmukupali ahu khula nihiku wiira onoonikhaliheryaka ophuka mixankiho sahu. Nave, nnimooniherya wiira ninnaatakiha axibeyoni, okathi ninvara ahu khula muteko ninvahiwa ahu mmutthenkesoni mwa Yehova.

AXIBEYONI YAALIPELELA OKHALIHERIWA NI YEHOVA

8. Mwene Sawuli aathokorenrye sai moohiloka axibeyoni?

⁸ Biibiliya onnihimya etthu yaawiiranenle axibeyoni okathi aalamulela awe mwene Sawuli. Okathi ole, mwene Sawuli aahiwiiva axibeyoni anceene, yaawo yaakhala ni arumeyi a Muluku wIsarayeli ni oYuda, ophavelaka waamala-maliha ootheene aya.b (2 Sam. 21:​2, 5, 6) Etthu Sawuli aaphavela awe opaka, khiyaalonke! Owo aahihonona yooleiherya aisarayeli yaapanke aya, ya waakhapelela axibeyoni.

9. Okathi xeeni Yehova oonihenrye awe wiira aahinanariwa mwaha wa etthu yiireliwa aya axibeyoni?

⁹ Yehova khaapuninri moowaakuveya, atthu yaale yaathokorenrye moohiloka axibeyoni. Masi okathi Davidi aakhanle awe mwene a wIsarayeli, Yehova aahiiriha ohirupa epula elapo ele mwa iyaakha tthaaru. Nto eyo, yaahiwiiriha aisarayeli ohikhalana eyoolya yaaphiyerya. Tivonto, Davidi aahimukoha Yehova nthowa naya yahaakhanle aya eyoolya elapo ele. Yehova aahimuleela Davidi wiira aahinanariwa okhala wiira Sawuli ni alopwana akina a emusi awe yaahittheka, mwaha wa owiiva axibeyoni anceene. — 2 Sam. 21:1.

10. Moovarihana ni 2 Samuweli 21:​3-6, axibeyoni yoonihenrye sai wiira yaanittittimiha Nlamulo na Muluku, ni yaamulenle exeeni Davidi?

¹⁰ Mmusome 2 Samuweli 21:​3-6. Davidi aahilavula ni axibeyoni, aavekelaka wiira amuleele etthu aareerela awe owiirela. Axibeyoni khiyanvekenle Davidi wiira aalive musurukhu munceene. Axibeyoni yaanisuwela saana Nlamulo na Muluku. Nlamulo naahimya wiira mutthu oniiva ohaana wiiviwa. Tivonto, Davidi khaapirisari oliva musurukhu munceene wiira oopole okumi awe mwaha wa etampi yaapakiwe ni Sawuli. (Mmr. 35:​30, 31) Nave-tho, axibeyoni yaanisuwela wiira, yaaneemereriwa omwiiva mutthu, aakhala wiira mwene aaniruma opaka eyo. Tivonto, Davidi aahaaleela axibeyoni owiiva alopwana 7 a emusi ya Sawuli, yaawo yaamukhalihenrye Sawuli owiiva axibeyoni anceene. Nuumala-vo, epula yaahipacerya orupa wIsarayeli ni atthu yaahipacerya okhalana eyoolya yaaphiyerya. Eyo yaahooniherya wiira Yehova aahimaliha onanariwa wawe, mwaha wa aisarayeli waathokorerya voohiloka axibeyoni. — 2 Sam. 21:​9, 10, 14.

11. Yoowiiraneya ela enniixuttiha exeeni voohimya sa Yehova?

¹¹ Yoowiiraneya ela enniixuttiha exeeni voohimya sa Yehova? Ninniixutta wiira okathi wootheene Yehova onipaka itthu mwa xariya. (Esal. 37:28) Atthu anceene olelo-va, khanaathokorerya saana ale anikhuma elapo ekina aahiiso ale avirikanne aya eraasa wala makhalelo. Nave, arumeyi anceene a Muluku annilupatthiwa ni khanithokoreriwa saana. Masi Yehova oniphavela wiira atthu ootheene athokoreriweke saana. Owo ooleiherya wiira muhoolo onimwaatthuvela arumeyi awe ni khanrowa ohaaxiwaka. Nave-tho, nniixutta wiira nihaana opakaka etthu ninleiherya ahu, ntoko siisaale Yehova aaphavela awe wiira aisarayeli, ahihiye waakhapelela axibeyoni ntoko yaaleihenrye aya. — Mulikanyihe ni Amoosi 1:9.

12. Ninrowa otthara sai ntakiheryo na axibeyoni okathi ninthokoreriwa ahu moohixariya?

¹² Ninrowa otthara sai ntakiheryo na axibeyoni? Okathi ninthokoreriwa ahu moohixariya ni anna ni arokora, moopixa murima nihaana omulipelela Yehova wiira ophuke muxankiho owo. Niira siiso, nnimooniherya wiira ninnikupali wiira Yehova onoomaliha itthu sootheene soohiloka okathi othanlale awe. Nrowe niwehe ntakiheryo na murokora Laura French, yoowo oniirela mpantta anna ni arokora anilipelela orowa wiirimu. Owo aapacenrye orumeela eBeteeli ya oCanadá mwaakha wa 1926. Nuuvira iyaakha 10, aahootheriwa etthu yoohiloka. Atthu akina yaahimyale wiira owo iirela mpantta ekurupu ya anamavirikanya. Nnaamwi eyo yahaakhanle ekeekhai, murokora Laura aahoomoliwa oBeteeli. Nuumala omwiiraneela ele, murokora ole oonenle sai? Nnaamwi aariipiwe murima, masi khaatonko olavula etthu yootakhala aahimyaka anna aahiiso mutthenkeso wa Yehova. Muhoolo mwaya, aahiviriha iyaakha 4 orumeelaka ntoko pioneera, aakhalela nthiti miteko sa Muluku. Mwaakha wa 1940, owo aahihakalala okathi anna yaahoolela, yaamulattunle aya wiira otthikele orumeela oBeteeli. Murokora French, aahirumeela oBeteeli mwa iyaakha soowiiraka 50 ni khaahiyale omuroromela Yehova mpakha okhwa. Nimutakihaka murokora French, okathi ninthokoreriwa ahu moohixariya, nnoowerya ohihiya opaka itthu sooloka, nimulipelelaka Yehova ophuka mixankiho okathi othanlale awe. — Yes. 26:​3, 4.

MUHIHIYE OMURUMEELA YEHOVA MOOROROMELEYA

13. a) Tani yaari “Anetinimi”? b) Muteko xeeni yaavara aya nuumala okhuma oBabiloonia yaakhalihiwe aya ipottha?

¹³ Biibiliya onnitthikela waalavula axibeyoni ni etthu yaawiiranenle, nuumala olamulelo wa mwene Davidi, sivinre ene iyaakha 500. Ayuda yiira ari ene ipottha oBabiloonia mwa iyaakha 70. Vano ekurupu yoopacerya ya ayuda yaatthikenle oYerusalemu, yaahooliwe ni kuvernatoro Zorobabeli. (Eezi. 2:​1, 2, 58) Mwaakha wa 468 Ohinatthi Kristu Orwa, ekurupu ekina yaatthikenle oYerusalemu, yaahooliwe ni mulipa-oolepa iihaniwa Eezira. (Eezi. 7:​1-7) Atthu yaakhumme oBabiloonia ahooliwaka ni Zorobabeli aahiiso ni Eezira, khahiyo yaari atthu anceene. Masi ikurupu soopiili, yaahikhala atthu yiirela mpantta emusi ya “Anetinimi”. (Nwehe enoota eri Eezira 2:58 ni 7:7.) Tani yaari Anetinimi? Awo yaari “arumeyi yaavara muteko mutemplo, yaawo yahaakhanle aisarayeli.” Nave anceene a yaawo yaari a osuulu wa axibeyoni. — Nwehe moolumo ootthokiheriwa ani: “Anetinimi.”

14. Axibeyoni yoonihenrye sai wiira yaanimuroromela Yehova? (1 Wahala 9:2 ni enoota)

¹⁴ Mmusome 1 Wahala 9:2 ni enoota. “Arumeyi yaavara muteko mutemplo”, yiirela mpantta ekurupu yoopacerya yaatthikenle oYerusalemu. Eyo enitaphulela wiira awo yaahooniherya waamini wuulupale waavikana ayuda akina yaari oBabiloonia. Ayuda anceene yaahikhalana ipa sooloka oBabiloonia ni yaahikhalana musurukhu munceene. Tivonto, khiyaaphavenle ohiya mireerelo saya wiira atthikele oYerusalemu ni yakhaliheryeke muteko ole. Masi amusi akina a axibeyoni vamosa ni ayuda oororomeleya, yaahirowa oteka etemplo wiira amukokhoreleke Yehova. Tivonto, awo yaaheemererya otthikela oYerusalemu nnaamwi vahaakhweyale. Ayuda yaahikhalana etereno oYerusalemu, masi imusi sa axibeyoni khisaarina etereno. Hata vari siiso, awo yaaheemererya otthikela oYerusalemu wiira akhaliheryeke miteko mutemplo mwa Yehova. Nave-tho, yaahikhaliherya otekiwa wa ixiri sa oYerusalemu. — Neh. 3:26.

15. Yoowiiraneya ya axibeyoni, enniixuttiha exeeni voohimya sa Yehova?

¹⁵ Yoowiiraneya ela, enniixuttiha exeeni voohimya sa Yehova? Nniixutta wiira, Muluku ahu omusivela vanceene arumeyi awe oororomeleya ni khula okathi onnaakhapelela. Nuumala Yehova owoopola axibeyoni, okathi Yooxuuwa aahoolela awe aisarayeli, owo khaahiyale oreeliha imusi sa axibeyoni mwa iyaakha sinceene. Nave, okathi ababiloonia yaapwetexale aya oYerusalemu, Yehova aahoopola imusi sa axibeyoni. Nave-tho, nuumala awo otthikela oYerusalemu, Yehova khaahiyale orumeela imusi sa axibeyoni wiira sivareke muteko mutemplo. Vanikhala ntoko wiira akina a yaawo, yaakhala waattamela otemplo. (Eezi. 2:70; Neh. 11:21) Mwaha wa muteko yaavara aya mutemplo, mwene a oPersia aahihimya wiira awo khiyaapirisari oliva mpoosito. — Eezi. 7:24.

16. Nilavulaka sa omukokhorela Yehova, ninrowa otthara sai ntakiheryo na axibeyoni?

¹⁶ Ninrowa otthara sai ntakiheryo na axibeyoni? Naatakihaka axibeyoni, nihaana wiimananiha wiira nimukokhoreleke Yehova ni waakhaliherya atthu akina opaka etthu emosa-ru. Wiira niwerye opaka eyo, ikwaha sikina nihaana opaka marukunuxo mookumini mwahu. Masi ninnihakalala opaka eyo mwaha woowi ninnimphenta Yehova. Eyo ti etthu aapanke awe munna Alwin a elapo ya oFilipina. Owo aavara muteko empereesa aaliviwa awe musurukhu munceene. Masi aaniphavela wuncererya muteko anvarela awe Yehova. Khula okathi mutokweene a esirkwiitu aaxukurya awe muloko awe, Alwin aanikumiha ifeeriya wiira okhaliherye vanceene muteko woolaleerya, esumana ele ya vameekhaaya, nto eyo yaanimuhakalaliha vanceene. Nuuvira okathi ni ovekela vanceene, Alwin aahithanla ohiya muteko awe. Nto aahaavya muteko mukina waarowa omukhaliheryaka orumeela ntoko pioneero rekulaari. Alwin aanisuwela wiira aturuka muteko awe, khaarowa waakhelaka musurukhu munceene. Masi owo aahihakalala okathi aaphwanyale awe muteko mukina ni opacerya orumeela ntoko pioneero. Nave mwaarawe aahikhala pioneera. Nto oowanli aya, ahaakhaliherya atthu 21 omusuwela Yehova ni opatisiwa. Nikupaliki wiira Yehova oohakalala vanceene ni wiimananiha wa Alwin ni mwaarawe. Nave hiyo nikupaliki wiira Yehova onnihakalala vanceene aawehaka wiimananiha nimpaka ahu wiira nimurumeele. Nto okathi wootheene, onrowa onivahaka itthu nimpirisari ahu. — Math. 6:33.

17. Nuumala othokorerya yoowiiraneya ela ya axibeyoni, niixuntte exeeni?

¹⁷ Moota Yehova aathokorenrye awe axibeyoni, onniniixuttiha mikhalelo sawe sooreera. Yehova, Muluku oowiiyeviha, oomoriwa ikharari, a xariya ni oororomeleya. Okathi wootheene, owo onnaatthuvela arumeyi awe oororomeleya. Nave-tho, ntakiheryo na axibeyoni, ninniniixuttiha itthu sirina efaita yuulupale. Ntoko axibeyoni, nihaana omuroromelaka vanceene Yehova, nikupaliki wiira onoonikhaliheryaka, hata okathi sinniphwanya aya mixankiho suulupale. Waamini iwo, onoonikhaliherya moowiiyeviha ovara khula muteko ninvahiwa ahu mmutthenkesoni mwa Yehova. Okathi ninthokoreriwa ahu moohixariya, moopixa murima nihaana omulipelela Yehova wiira onoorowa ophuka mixankiho ni onitthuvela okathi othanlale awe. Nave, nihaana wiimananiha omurumeela Yehova moororomeleya. Niira siiso, nnimooniherya wiira ntakiheryo na axibeyoni, noonikhaliherya vanceene.