Nwiriyaneke oratteene okathi Yehova oniwiixuttihaaweni

1-2. a) Yehova onaakhaliherya sai arumeyi awe olelo-va? (Esaalimu 23:​1, 2, 5) b) Etthu xeeni ninrowa ahu othokorerya mwaha ola?

OLELO-VA, Yehova onninivaha itthu sootheene nimpirisari ahu wiira niixutte ele Biibiliya oniixuttiha awe. Mweekeekhai, ninniwerya olavula ntoko Davidi, yoowo aahimmye wiira: “Yehova ti Makampusi aka. Khiivo etthu enrowa okithowa.” — Musome Esaalimu 23:​1, 2, 5.

² Yehova onnirumeela mithukumano sa mmulokoni wiira oniixuttihe. Ikwaha sinceene, ninniwiriyana mmithukumanoni itthu ninsuwela ahu. Hiyo ninnipirisari wuupuxeriwa, nnaamwi nisuwenle ene ni nilimpe ene mweekeekhaini. (2 Ped. 1:12) Niireke vannooxankihani ovaha ephoole mwaha mutonko anyu owiriyana ikwaha sinceene? Vakhala wiira ti siiso, mwaha ola onimookhaliheryani. Ninrowa oweha nthowa naya nimpirisari ahu owiriyana oratteene mmithukumanoni. Nave, ninrowa oweha moota ale anilavula myaha mmulokoni akhanle aya oowaakhaliherya atthu akina ovaha ephoole. Nnooweha-tho malakiheryo anrowa onikhaliherya owiriyana oratteene. Masi wanipacerya, ninrowa omusuwela ole onniixuttiha mmuthukumanoni.

YEHOVA TONNIIXUTTIHA MMITHUKUMANONI

3. Yehova onlavula sai ni hiyo, ni moota xeeni arumeyi awe animurumeela aya saana Biibiliya?

³ Yehova onnilavula ni hiyo, omurumeelaka Biibiliya, yoowo ori Nuulumo nawe. (2 Tim. 3:​16, 17) Yesu aanisuwela eyo. Tivo, aanirumeela oratteene Nuulumo na Muluku okathi aawiixuttiha awe atthu. Tivonto, atikinihiwe ene mwaha wa wiixuttiha wawe, atthu awo yaahikoha wiira: “Mulopwana ola onisuwela sai oratteene Soolempwa, ohitonko osoma ixikola sa etiini?” (Yoh. 7:15) Atthu yaari oowiiyeviha ni yaapheela wiixutta voohimya sa Yehova, yaanihakalala vanceene okathi yanwiriyana aya Yesu iixuttihaka Nuulumo na Muluku. Makristau yaakhala okathi wa arummwa, eyo piiyo, Paulo ni Apolo, yaahitthara ntakiheryo na Yesu. Mwa ntakiheryo, awo yaanirumeela saana Nuulumo na Muluku okathi yaawiixuttiha aya atthu. (Mit. 17:​2, 3; 18:​24, 28) Hiyo ninnisuwela wiira myaha sinilavuliwa mmithukumanoni, eprokaraama ya broadcasting ni iviitiyu ninweha ahu, sinipakiwa orumeeliwaka Biibiliya. Atthu anceene annixukurya, annitikinihiwa oweha moota Anamoona a Yehova animurumeela aya Biibiliya mmithukumanoni. Anna ni arokora anikhalana mipantta mmithukumanoni, annirumeela Nuulumo na Muluku okathi aniixuttiha aya. Awo khanimusoma paahi Biibiliya, masi-tho anniwooniherya alipa-oowiriyana moota woovarihela muteko etthu Biibiliya onihimya awe. — Luka 24:32.

4. Moolumo oowi “wiiwa” ni “owiriyana”, anitaphulela exeeni?

⁴ Mbiibiliyani, moolumo oowi “wiiwa” ni “owiriyana”, annirumeeliwa ikwaha sinceene aphavelaka ohimya omwiiwelela mutthu. Okathi nimmusoma ahu Biibiliya mmuthukumanoni, vanoolikana Yehova olavulaka ni hiyo. Nto ninniwerya osuwela ele oniphavela awe wiira nipakeke ni nthowa naya onnivekela awe wiira nipake eyo. Nikupaliki wiira Yehova onnihakalala okathi nninwiriyana ahu ni nneettela ahu itthu onniixuttiha awe. — Mir. 27:11.

XEENI NINREERELA AHU OWIRIYANAKA NI EPHOOLE MMITHUKUMANONI?

5. Omphenta wahu Yehova, onniiriha opaka exeeni? (Yohani 4:​23, 24; 1 Yohani 5:3)

⁵ Hiyo ninniwiriyana ni ephoole mmithukumanoni, mwaha woowi ninnimphenta Yehova. (Math. 22:37) Vaavo nintepa ahu omusuwela Yehova, omphenta wahu onnincerereya. Ophenta iwo, onniniiriha onwiriyana, omwiiwelela ni omukokhorela ntoko oniphavela awe. — Mmusome Yohani 4:​23, 24; 1 Yohani 5:3.

6. Exeeni Yehova onniixuttiha awe mmithukumanoni?

⁶ Ninniwiriyana ni ephoole mmithukumanoni, okhala wiira ninnaaphenta atthu. (Math. 22:39) Okathi wa mithukumano, Yehova onniniixuttiha moota woowaakhaliherya anna ni arokora ni ale ahinimusuwela yena. Mwa ntakiheryo, eproxuura Waaphenta Atthu — Onimookhaliheryani Waapaka Awiixutti, ennooniherya mikhalelo ninreerela ahu okhalana naalaleeryaka. Okathi wa mithukumano sa eriyari ya esumana, ninniixutta moota woovarihela muteko malakiheryo ari eproxuura ela. Niireke vannooxankihani moota woopaceriha ovaanela ni atthu? Akhala wiira ti siiso, nvaheke ephoole moota anna ni arokora anivaanela aya, okathi anipaka aya mipantta saya mithukumano sa eriyari ya esumana.

7. Xeeni vari aya vooloka ohihiya onwiriyana Yehova?

⁷ Ninninivaha ephoole okathi wa mithukumano, okhala wiira nimphavela okhalana okumi wooloka vano ni muhoolo. Wiiwelela Nuulumo na Muluku, ninninikhaliherya mookumini mwahu, ntoko naakhalihenrye aya arumeyi a Yehova a khalai. (Otum. 32:​44-47) Vaavo ninvaha ahu ephoole okathi wa mithukumano, ninnilipihiwa ni anna ni arokora ni ninniixutta moota woovilela mixankiho moopixa murima, nilipelelaka elapo esya. (Arom. 8:25) Mahiku ala ookiserya, ti vooloka omwiiwelela Yehova ni okhalela nthiti miteko sawe. — Math. 24:​42-44; Wis. 1:3.

MWAAKHALIHERYEKE ATTHU AKINA OVAHA EPHOOLE OKATHI WA MITHUKUMANO

8. Xeeni anna anilavula myaha otripuuna, anireerela aya ohihiya olokiherya moota aniixuttiha aya?

⁸ Anna anikhalana mipantta otripuuna, otepexa wene ale anilavula myaha sa atthu ootheene, ahaana ohihiya olokiherya moota aniixuttiha aya. Vaavo munna onilokiherya awe saana mwaha awe ni onaakhaliherya awe alipa-oowiriyana woona wiira itthu siniixuttiha awe sinikhuma mbiibiliyani, onniwiiriha ale ahikhanle Anamoona a Yehova osuwela itthu sooreera Biibiliya oniixuttiha awe. Nave-tho, onnaakhaliherya ale ahikhanle Anamoona a Yehova wiiwexexa saana ikeekhai sa mbiibiliyani ni ovarihela muteko mookumini mwaya. Okathi munivahiwa anyu mwaha, muhiliyale wiira mpantta anyu pooti waakhaliherya vanceene atthu anrowa owiriyanaka. Nwehe moota woovarihela muteko malakiheryo anittharelana, okathi munikhalana anyu mpantta. Nnaamwi malakiheryo ala aroiheliwaka ale anilavula myaha para atthu ootheene, masi annivareleya muteko para atthu ootheene anikhalana mpantta mmithukumanoni. — 2 Tim. 4:2; Tito 1:9.

9. Etthu xeeni mukhanle anyu oopaka wiira mwaha anyu otthareyeke?

⁹ Mulokiheryeke mwa enamuna yootthokiheya, itthu munrowa anyu olavula. Okathi munilavula anyu mwaha, muniphavela wiira itthu munilavula anyu sitthareyeke. Vakhala wiira itthu munilavula anyu khasinitthareya, atthu aniwiriyana vanimwaaxankiha ovaha ephoole. Exeeni mukhanle anyu oopaka wiira mwaha anyu otthareyeke. Iponto sinittharelana pooti wookhaliheryani. Yoopacerya, okathi munipacerya anyu olavula mwaha, mwaakhaliheryeke alipa-oowiriyana osuwela iponto suulupale munrowa anyu olavula. Ya nenli, mulavuleke khula eponto waphiya okathi aya. Muhinatthi orowa eponto enittharelana, mmaaleke vakhaani wiira mwaakhaliherye alipa-oowiriyana, osuwela wiira munrowa eponto ekina. Ya neeraru, muhinatthi omaliha mwaha anyu, muuluuleke iponto suulupale.

10. Xeeni vari aya vooloka osiveliwa ni etthu munrowa anyu olavula?

¹⁰ Soosivelekeni itthu munrowa anyu olavula. Akhala wiira itthu munilavula anyu sinnoosivelani, munrowa olavulaka ni murima wootheene, nto alipa-oowiriyana sinaamwaasivela. (Mir. 2:​4, 5; Mit. 4:20) Wuupuwelela soolepa ni itthu munrowa anyu olavula mwaha owo, eyo enimookhaliheryani osiveliwa ni mwaha anyu. Munna onikhala wEstados Unidos, orina iyaakha 70, onnuupuwela mwaha aawiriyanne awe ori ene mmiravo. Owo onihimya so: “Nlelo kinnuupuwela moota mulipa-oolavula mwaha aanitumerenrye awe wuupuwela oratteene etthu ninsoma ahu mbiibiliyani. Owo aahilavula olipiheryaka ni aahitthokiherya moota nikhanle ahu oopaka eyo. Mwaha ole, waahikikhaliherya vanceene. Nave waahikikhaliherya okhala mpatthani a Yehova ni wiixutta itthu sikina okathi kinimusoma aka Biibiliya.”

11. Ohiya olavula paahi, xeeni vari aya vooloka waakhaliherya alipa-oowiriyana osuwela moota woovarihela muteko? (1 Timootheyo 4:​13-16)

¹¹ Muupuweleke itthu sikhanle oowaakhaliherya alipa-oowiriyana ni mwaakhaliheryeke osuwela moota akhanle aya ovarihela muteko itthu muniixuttiha anyu. Ohiya olavula paahi myaha sa mbiibiliyani, musomeke iversiikulu sa mbiibiliyani wiira mwaalipihe alipa-oowiriyana ni waakhaliherya woona moota akhanle aya oovarihela muteko mookumini mwaya itthu aniixutta aya. Mwa ntakiheryo, murummwa Paulo aahinvaha Timootheyo malakiheryo, yaawo yaamukhalihenrye okhalana waamini woolipa ni wiimananiha waakhaliherya anna ni arokora a wEefeso. (Mmusome 1 Timootheyo 4:​13-16.) Muupuweleke itthu alipa-oowiriyana anipirisari aya ni mwaakhaliheryeke woona moota woovarihela muteko itthu mwaha anyu oniixuttiha aya.

12. Okathi munilavula anyu mwaha, xeeni vari aya vooloka olavula ntoko munilavula anyu okhala wene?

¹² Munsayariki moowiiwanyeya ikwaha sinceene wiira mwalavuleke ntoko munilavula anyu okhala wene. Akhala wiira munoolavulaka mwaha anyu ntoko munilavula anyu okhala wene, ohiya osomaka nuulumo ti nuulumo, vanookhweya alipa-oowiriyana ottottela mureerelo itthu munrowa anyu wiixuttihaka. Eproxuura eni: Mwiilipiheryeke Osoma ni Wiixuttiha, enihimya so: “Mulavuleke ntoko munilavula anyu okhala wene, mwa enamuna enooniherya moota munoonela anyu mwaha owo ni moota muniwoonela anyu alipa-oowiriyana.” Akhala wiira munoolavulaka ni murima wootheene, alipa-oowiriyana anoowehaka wiira mwaha anyu ti wooreera, woovara murima ni woolipiha.

13. Xeeni anna anilavula myaha mmulokoni, anireerela aya waavekela miruku ale alimalenle olavula myaha? (Nwehe efootu.)

¹³ Mmukoheke munna olimalenle olavula myaha wiira ookhaliheryeni. Mwa ntakiheryo, muhinatthi olavula mwaha anyu, mmooniherye inoota sanyu munna onisuwela olavula myaha saana ni mweererye orumeela muupuwelo onrowa awe woovahani wiira mulokiherye mwaha anyu. Nave, munvekele wiira oowiriyaneni okathi muninsayari anyu ni oovaheeni malakiheryo anrowa wookhaliheryani olokiherya moota muniixuttiha anyu. (Mir. 1:5) Khahiyo wiira okathi wootheene ninnisuwela itthu ninreerela ahu olokiherya. Tivonto, munna owo onimoovahani malakiheryo anrowa okhaliherya mwaha anyu wiiwanyeya saana ni owiiriha alipa-oowiriyana woona moota woovarihela muteko. Ootheene ahu, nimphavela olokiherya moota ninlavula ahu ni wiixuttiha wiira naakhaliherye alipa-oowiriyana ottottela mureerelo ikeekhai sa mbiibiliyani.a

MOOTA WOOVAHA EPHOOLE MMITHUKUMANONI

14. Xeeni ninreerela ahu okhalana moonelo aarina awe mulipa-oolepa Esaalimu 119? (Esaalimu 119:​24, 111, 167)

¹⁴ Nnoowerya ovaha ephoole yinceene mmithukumanoni, akhala wiira ninnivaha efaita yinceene itthu Yehova onnuupuxerya awe. Ninnipirisari itthu Yehova onnuupuxerya awe wiira niweryeke ovilela mahiku ala ookiserya, ooxankiha ni oowoopiha. (2 Tim. 3:1) Akhala wiira ikwaha sikina nnoona wiira itthu ninwiriyana ahu mmithukumanoni nihiiwa ikwaha sinceene, vanooreera wuupuwelela moota oonela awe mulipa-oolepa Esaalimu 119, itthu Muluku onnuupuxerya awe. — Musome Esaalimu 119:​24, 111, 167.

15. Etthu xeeni enrowa onikhaliherya ohihiya ovaha efaita itthu nniixutta ahu mmithukumanoni?

¹⁵ Nihaana okhalana moonelo wooloka voohimya sa itthu Yehova onnivaha awe wiira silipihe waamini wahu, ntoko siisaale aisarayeli yaareerela aya okhalana moonelo wooloka voohimya sa emana, Yehova aavaha awe ari ene moothakoni. (Okhu. 16:​15, 31) Okathi aisarayeli yaapacenrye aya wakhela emana, awo yaahihakalala vanceene. Emana ele, yaakhuma wa Yehova ni yaanisiva vanceene ni yaanaakhaliherya. Masi nuuvira okathi, atthu akina yaahipacerya ohaasivela olya emana khula nihiku. (Mmr. 21:5) Exeeni nniixutta ahu? Nniixutta wiira nihikhala-khale noonaka itthu Yehova onnuupuxerya awe, ntoko itthu sihirina efaita, mwaha woowi noowiriyana ikwaha sinceene mmithukumanoni. Masi hiyo nihaana wuupuwela wiira mithukumano, yoovaha enikhuma wa Yehova. Nave, nihaana wuupuwela wiira murumeyi oororomeleya ni a ankhili, tonithanla itthu ninrowa ahu wiixutta mmithukumanoni. Itthu nniixutta ahu, sinoonikhaliherya opaka soothanla sooloka ni okhalana okumi woohimala. — Mir. 3:​13, 16-18; Yoh. 17:3.

16. Etthu xeeni enaakhaliherya ovaha ephoole mmithukumanoni, atthu apacenrye khalai omurumeela Yehova? (Nwehe ekaaxa eni: “Malakiheryo a moota woowiriyana oratteene.”)

¹⁶ Nnoowerya ovaha ephoole mmithukumanoni, akhala wiira ninnivarihela muteko itthu nniixutta ahu. Nwehe etthu yaakhalihenrye ovaha ephoole mmithukumanoni, atthu apacenrye khalai omurumeela Yehova. Murokora Ashley, yoowo onimurumeela Yehova mwa iyaakha 30, onihimya so: “Olokiherya mithukumano, onnikhaliherya ovaha ephoole yinceene. Akhala wiira nkinilokiherya mithukumano, vannikixankiha ovaha ikomentaario nave kinuupuwela itthu sikina okathi wa mithukumano.” Munna József, yoowo onimurumeela Yehova mwa iyaakha 52, onihimya so: “Okisivela owiriyana mwaha mmosa ikwaha sinceene mmithukumanoni. Okathi kiniiwa aka myaha soovirikana ni atthu akina akomentariki myaha iyo, kinniixutta itthu kahaasuwela aka.” Nave onihimya-tho wiira: “Okathi munna ohilimalenle olavula myaha saana, onilavula awe mwaha, miyo kinuupuwela etthu onihimya awe, ohiya moota onilavula awe, okhala wiira etthu onihimya awe enikhuma mbiibiliyani ni ti ya Yehova.”

17. Etthu xeeni mukhanle anyu oopaka wiira nvaheke ephoole mmithukumanoni? (Nwehe efootu.)

¹⁷ Sookhala itthu sikina sinrowa wookhaliheryani ovaha ephoole okathi wa mithukumano. 1) Muhilyeeke vanceene mwaarowaka omithukumanoni wiira muhirupe okathi wa mithukumano. 2) Mphiyeke ni mphwanyeke opuro wookilaathi, mithukumano sihinatthi opacerya. 3) Mmuheleke telefooni anyu silensiyu wiira ohinyakule okathi wa mithukumano. 4) Muupuweleke iponto sinrowa olavuliwa omithukumanoni. 5) Ohiya owehexexaka itthu siniiraneya opuro owo, munweheke mulipa-onilavula. 6) Mulepeke mukaternuni mwanyu iponto suulupale muniixutta anyu. 7) Nwiriyaneke soolepa sinisommwa ni moota mulipa-oolavula mwaha onitthokiherya awe. 8) Mwiikoheke so: Kinrowa orumeela sai itthu kiniixutta aka wiira kimukhaliherye mutthu a muloko aka aahiiso mutthu mukina okathi woolaleerya? 9) Muhinatthi orowa asempeleeya aahiiso konkereesu, mwiivaheke okathi wiira nwehe muru wa nihiku nno, myaha sinrowa othokoreriwa ni soolepa sinrowa osommwa khula mwaha. 10) Ehinatthi opacerya eprokaraama, mukilaathiki opuro anyu ni nvaheke ephoole muusika aahiiso eviitiyu yoopacerya ya isipo, yeeyo enirumihiwa.

MUHIHIYE ONWIRIYANA YEHOVA OKATHI ONIWIIXUTTIHAAWENI

18. Xeeni ninreerela ahu ohihiya owiriyana ni ephoole okathi wa mithukumano?

¹⁸ Nihihiye owiriyana ni ephoole okathi wa mithukumano, okhala wiira niira siiso, nnoomweemererya Yehova oneettiha “ephiro ya xariya”. (Esal. 23:3; 31:3) Etthu enrowa onikhaliherya ohihiya opaka itthu sooloka, otthara malakiheryo a Yehova. Tivonto, “nwiriyaneke oratteene” ni nvariheleke muteko malakiheryo munaakhela anyu mmithukumanoni. (Luka 8:18) Biibiliya onihimya wiira ale aninwiriyana Yehova, anoohakalala nave muhoolo, anoophwanya okumi woohimala. — Esal. 119:​2, 14.