48 SITEEFANO
Aahikhalana waamini wuulupale ni aahisareya ikuru soowaarya
SITEEFANO aahootheriwa opaka ekrime yuulupale nto aahiroihiwa oSineedrio yeeyo yaari etripunaali yuulupale ya ayuda. Etripunaali ele ti yeele yaarumme wiiviwa Yesu miyeeri vakhaani saavinre. Nto okumi wa Siteefano waari mmaxakhani! Hata aasuwela wiira aamwiiviwa, Siteefano aahimaaleleya vanceene. Biibiliya onihimya wiira “owiitho wawe waalikana ni owiitho wa nlaikha.” Exeeni yaamukhalihenrye Siteefano hata aari oottheka okhala oomaaleleya osuwelaka wiira aarowa wiiviwa? Olipa murima ti waamukhalihenrye.
Biibiliya onihimya wiira Siteefano aari mulopwana aarina “waamini wuulupale ni aasareyale ikuru soowaarya”. Tivonto arummwa yaanimuroromela vanceene. Nto Siteefano aari mulopwana mmosa waale yaathanliwe wiira avare muteko wa efaita yinceene muloko wa oYerusalemu. Nihiku nimosa, ayuda akina yaahinanariwa vanceene anapacerya onyakulihana ni Siteefano. Masi owo aahiwaakhula aarumeelaka ankhili mpakha alopwana awo ohoona yoohimya. Ananariwe ene vanceene, alopwana ale yaahimootherya itthu sinceene oSineedrio. Eyo ti etthu yamwiirihale Siteefano, ophukeliwa ni olamuliwa wiiviwa.
Pooti wiira Siteefano aanuupuwela yooleiherya ya Yesu, yeeyo aaleelale awe awiixutti awe wiira okathi saarowa aya waaphwanyaka mixankiho, yaahaana wuupuwela masu ani: “Muhixanke ni etthu munrowa anyu ohimya. Masi mulavule ele ikuru soowaarya siniwiirihaayani olavula okathi ene yoowo, maana khahiyo ti nyuwo munilavula, masi ikuru soowaarya sinilavula.” (Mar. 13:11) Moohaanyiherya yooleiherya ele yaahimulipiha vanceene Siteefano. Okhaliheriwaka ni ikuru soowaarya sa Yehova, okathi Siteefano aari awe etripunaali ele ya oSineedrio, owo aari oomaaleleya onakhala ntoko nlaikha.
Etripunaali ele yaahikhala aphuki 71, awo yaari makhulupale a itiini yaattittimihiwa vanceene ni ayuda. Aphuki awo yaakilaathi ikhatera soowaarumariwa iliinya tthaaru seiyo saapakeya nimeya na esirkulu. Alopwana anli yaanilepa itthu sootheene siiraneya. Siteefano aahootheriwa oveeha nlamulo na Moise ni etemplo, ikirime seiyo saarowa omwiiriha wiiviwa. Mukhulupale aanamukuttho Kaifa, aahimuhimeerya Siteefano, wiira aakhule itthu ootheriwa awe.
Nto Siteefano aahipaka ele namukuttho muulupale aahimyale awe. Owo aahilavula iponto suulupale sa soowiiraneya sa aisarayeli, opaceryaka ni Moise. Nave-tho aahilavula sa Yosefe, yoowo aalupatthiwe ni axinnawe anamwane a Isarayeli. Nave Siteefano aahilavula mwa nttittimiho sa Moise ni itthu murumeyi owo aapanke awe. Owo aahihimya itthu sikina voohimya sa Moise seiyo sihiniphwanyaneya Soolempwa sa Eheeperi. Masi Siteefano aahooniherya wiira hata vari siiso, aisarayeli khiyaamwiiwelenle Moise.
Moolumo a Siteefano annooniherya wiira owo aanittittimiha nlamulo, etapernaakulu ni etemplo. Okathi omosa-ru, moolumo ale yaanooniherya wiira aisarayeli khiyaawiiwelela atthu Yehova aathanlale awe wiira yaahooleleke.
Siteefano aahaana waakiherya waamini wawe ohoolo wa makhulupale a nthalu, yaawo yaaphavela omutthukwela
Siteefano aahiweha wiira alopwana ale khiyaarowa oturuka moonelo aya, nave khiyaarowa omphukela mwa exariya. Nto vanooneya wiira Yehova tanvanhe owerya Siteefano wiira omalihe olavula ni moolumo ale oowereya. Owo aahilavula moolipa murima wiira alopwana ale yaari “oowiisoona ni ahiniphavela wiiwa.” Nave owo aahihimya wiira awo “yaanikhootta ikuru soowaarya”, ntoko yiira aya amuhavinre aya. Nto otakhala iwe, waahiwiiriha omwiiva Yesu yoowo ori Mesiya! Eyo enooniherya wiira awo yaahinvariha ni yaahimwiiva Yesu, profeta yoowo Moise aahimyale awe wiira aamoorwa ni aarowa okhala muulupale onvikana yena.
Makhulupale a eSineedrio ele yaahinanariwa vanceene. Yehova aahimwiiriha Siteefano oweha etthu yeeyo yaamulipinhe vanceene. Owo “aahiweha wiirimu ni aahoona ovuwa wa Muluku, nave aahimoona Yesu eemenle ene moono woolopwana wa Muluku.” Nuumala wiiwa moolumo awo, aphuki ale yaahitepa onanariwa! Mwaha wa xeeni? Okhala wiira moolumo ale yaamulikana ni masu Yesu aahimyale awe miyeeri vakhaani okathi aaphukeliwe awe, oriki: “Munonweha Mwaana a Mutthu okilanthi ene wiirimu moono woolopwana wa Muluku Oowerya ni munonweha orwaaka mmeekuni”. (Math. 26:64) Etthu Siteefano aahimyale awe ennooniherya wiira masu a Yesu yaahiiraneya. Mweekeekhai Yesu iira ori ene moono woolopwana wa Yehova!
Makhulupale ale ananariwe ene vanceene, yaahinvara Siteefano khimukumiherya ota wa esitati enanvonyakasa maluku wiira amwiive. Woonasa wene nlelo onwehaka Yesu, Siteefano aahivekela ikuru soowaarya. Nuumala-vo, owo aahivekela ekwaha yookiserya oriki: “Yehova, muhaavahe nthowa mwaha wa etampi ela”. Nto Siteefano aakhwiiye ohirina nthowa! Owo mukristau oopacerya oniromoliwa mbiibiliyani aiviwe mwaha wa waamini wawe. Nihiku nle, aahikhala mmiravo mmosa aarumme wiiviwa Siteefano, yoowo ahaaliyanle masu ookiserya Siteefano aalavunle awe. Nnoorowa omulavula mmiravo owo ikapiitulu 50, 51 ni 53.
Musome yoowiiraneya ela mbiibiliyani, soolepa sinttharelana:
Nikoho para ovaanela:
Siteefano oonihenrye sai olipa murima?
Mutokose itthu sikina
1. Xeeni arummwa yaamuthanlale aya Siteefano ni alopwana akina “oosareya ikuru soowaarya ni ankhili,” wiira akaweke eyoolya? (Mit. 6:3-5; Mulaleyeke oratteene omwene wa Muluku ipaax. 41-42 itti. 17-18) A
Efootu A
2. Itthu xeeni Siteefano aalavunle awe sa Moise sihiniphwanyaneya mapuro makina mbiibiliyani? (Mulaleyeke oratteene omwene wa Muluku epaax. 48 etti. 13, enoota)
3. Siteefano aawenrye sai okhala oomaaleleya okathi aaphukeliwa awe? (Owehaweha 10/2018 epaax. 32)
4. Niireke Miteko 7:59 onnooniherya wiira Siteefano aahinvekela Yesu? (Owehaweha 01/01/2005 epaax. 31)
Muupuwelele itthu mwiixuntte anyu
Siteefano aari mulopwana “aarina waamini wuulupale ni aasareyale ikuru soowaarya”. Nave “aamusiveliha Muluku ni aavahiwe owerya wuulupale ni Muluku”. Hata vari siiso, owo aari oolikana ene wiira akawe yoolya. (Mit. 6:2, 5, 8) Anna arina iparakha aahiiso miteko sinceene mmulokoni, anrowa otthara sai ntakiheryo na Siteefano? B
Efootu B
Siteefano aahaavekelela atthu ale yaamulupattha. Ninrowa wooniherya sai wiira ninnaaphenta ale annilupattha? (Math. 5:44-48)
Enamuna xeeni mukhanle anyu ootakiha olipa murima wa Siteefano?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni yoolakela ya Yehova?
Xeeni munixukhurela anyu mwaha wa Siteefano othanliwa wiira alamuleleke ni Kristu wiirimu?
Mwiixutte itthu sikina
Mwiixutteke waakiherya waamini wanyu mwa nttittimiho ni moolipa murima ntoko iirale awe Siteefano. Musome mwaha oni:
“Siteefano — aamusiveliha Muluku ni aavahiwe owerya wuulupale ni Muluku” (Mulaleyeke oratteene omwene wa Muluku ipaax. 47-50 itti. 9-19)
Okathi ninlupatthiwa ahu mwaha wookhala arumeyi a Yehova, ninrowa wooniherya sai olipa murima ntoko Siteefano? Nwehe eviitiyu eni: