Tani Kinreerela Aka Omutakiha?

“Okathi kaarina aka mixankiho oxikola, miyo kaanimuupuwela mutthu aatonko oviriha mixankiho simosa-ru kaarina aka. Nto kaaniimananiha omutakiha. Vaanikikhweela oxintta muxankiho aka, maana ookhala mutthu kaamutakiha aka.” — Haley.

Okhalana ntakiheryo nooloka, onimookhaliheryani oxintta mixankiho ni onimookhaliheryani ophwanya soolukama sanyu. Nto otthara ntakiheryo nooloka, ti etthu mukhanle anyu oopaka wiira mukhumele saana.

• Xeeni Vari Aya Vooloka Othanla ni Ephoole?

• Moota Woothanla Ntakiheryo Nooloka

• Ele Amiravo Akina Enihimya Aya

Xeeni Vari Aya Vooloka Othanla ni Ephoole?

• Musuweleke wiira atthu munaathanla anyu waatakiha, munrowa ottharaka mweettelo aya.

  Biibiliya onnitumererya wiira nihaana otthara matakiheryo ooloka. Owo onihimya so: “Mwaweha itthu sinikhumelela mwaha wa mweettelo aya, mutakiheke waamini waya.” — Aheeperi 13:7.

  Nwehe ela: Atthu munrowa anyu waathanla waatakiha, pooti owiirihani opaka itthu sooloka aahiiso soohiloka. Nto mwaathanleke atthu arina mikhalelo muniphavela anyu, ohiya mwaha wookhalana iyaakha simosa-ru, aahiiso mwaha wookhala atthu oovuwa.

  “Kihiixutta itthu sinceene ni ntakiheryo na munna Adam, sa moota onuupuwela awe, moota ompaka awe itthu ni mweettelo awe. Kinnuupuwela itthu aapanke awe ni aahimmye awe. Munna Adam khoreere okikhaliherya vanceene.” — Colin.

• Atthu munrowa anyu waathanla waatakiha, pooti owiirihani opacerya wuupuwela ni opaka itthu ntoko awo anipaka aya.

  Biibiliya onihimya so: “Muhiwokiwe: Apatthani oohiloka, annihonona mweettelo wooreera.” — 1 Akorinto 15:33.

  Nwehe ela: Mmutakiheke mutthu mwaha wa mikhalelo sawe, ohiya mwaha wa itthu sa ota munoona anyu, maana muhoolo nyuwo pooti omutakiha ni opaka itthu sinrowa wooriipihani murima.

  “Akhala wiira munoovirihaka okathi munceene mwiilikanyihaka ni atthu oovuwa, munrowa wiixoonaka ohikhala etthu. Eyo pooti owiirihani otepa oxankiheya ni mukhalelo anyu.” — Tamara.

  Muupuwele ela: Xeeni vari aya voowoopiha waatakiha atthu oovuwa ntoko maxokatore wala mamuusiku?

• Atthu munaathanla anyu waatakiha, pooti wookhaliheryani waakhwaniherya soolukama sanyu aahiiso nnaari.

  Biibiliya onihimya so: “Ole oneetta ni atthu arina ankhili, onookhala mutthu a ankhili.” — Miruku 13:20.

  Nwehe ela: Mwaatakiheke atthu yaawo arina mikhalelo seiyo nave muniphavela anyu okhalana. Mwiira siiso, eyo enimookhaliheryani ophwanya soolukama sanyu.

  “Ohiya okhalana yoolakela ya okhalana miritti paahi, nyuwo pooti ohimya so: kiniphavela okhalana miritti ntoko Jane. Okhala wiira owo onnimaleliha miritti onithanleliwa awe.” — Miriam.

  Etthu nniixutta ahu: Okathi munithanla anyu ntakiheryo nooloka para otthara, munoowerya osuwela etiipu ya mutthu muniphavela anyu okhala.

Moota Woothanla Ntakiheryo Nooloka

Nyuwo pooti orumeela iponto iya piili sinittharelana wiira mpake yoothanla

1. Nyuwo pooti othanla mukhalelo muniphavela anyu okhalana, nuumala-vo, mmuhaayeke mutthu orina mukhalelo owo wiira mmutakiheke.

2. Nyuwo pooti omuhaavya mutthu orina mikhalelo sinceene, nuumala-vo muthanleke mukhalelo mmosa orina awe yoowo mwaphavela anyu okhalana.

Matakiheryo ari mwaha ola pooti wookhaliheryani opaka soothanla sooloka.

Nyuwo pooti otthara matakiheryo anittharelana:

• Amiravo. “Miyo kaaphavela okhala ntoko mpatthani aka. Owo onniivaha okathi wiira aakhaliherye atthu akina. Owo mwaamukhaani, masi ookhalana mikhalelo miyo kihirina aka. Nto eyo ennikiiriha ophavela otakiha mikhalelo sawe.” — Miriam.

• Atthu Aalupale. Pooti okhala anamuyari anyu aahiiso anna ni arokora mmulokoni. “Anamuyari aka ntakiheryo nooloka para miyo. Awo aakhalana mikhalelo sooreera. Nnaamwi ikwaha sikina afalyariki, awo toororomeleya. Kiniphavela wiira kannuwa vale atthu akina akooneke siiso.” — Annette.

• Atthu Aniromoliwa Mbiibiliyani. “Miyo koothanla matakiheryo manceene a mbiibiliyani kiniphavela aka otakiha. Matakiheryo ene taala: Timootheyo, Ruti, Yoobi, Pedru ni mwaaruusi mwIsarayeli. Yookhala ekiirinhe waathanla awo. Okathi kinisoma aka matakiheryo awo, kinnitepa ophavela waatakiha. Miyo okisivela osoma myaha siri eliivuru Mutakiheke Waamini Waya ni mpantta oni Exemplo a Seguir, ori eliivuru Os Jovens Perguntam — Respostas Praticas.” — Melinda.

Nwehe ela: Muhitthareke ntakiheryo nimosa paahi. Murummwa Paulo aahaaleela makristau wiira: “Mwaatakiheke atthu yaale aneetta moovarihana ni ntakiheryo nivahale ahu.” — Afilipi 3:17.

Niireke Mwaanisuwela? Nyuwo pooti okhala ntakiheryo nooloka para atthu akina. Biibiliya onihimya so: “Mukhale ntakiheryo nooloka wa ale oowaamini mwaha wa moolumo anyu, mweettelo anyu, ophenta wanyu, waamini wanyu, ni makhalelo anyu ooreera.” — 1 Timootheyo 4:12.

“Nnaamwi mwiimananihaka okhalana mikhalelo iyo, nave-tho nyuwo pooti waakhaliherya atthu akina okhalana mikhalelo sooreera. Hiyo khaninsuwela akhala wiira atthu akina anninitakiha aahiiso akhala wiira moolumo ahu pooti waakhaliherya aahiiso oturuka okumi wa atthu awo.” — Kiana.