Outubro

Ikwaha sinceene, ninnaakhela malakiheryo mmutthenkesoni yaawo annikhaliherya omurumeela Yehova mwa enamuna yooloka. Hiyo pooti ovahiwaka malakiheryo awo, ni axitokweene a muloko ahu, axitokweene a esirkwiitu, anna a oBeteli ni anna a Nikhuuru Noolamulela. Ankhi vakhala wiira khinniiwexexa oratteene malakiheryo awo ninvahiwa ahu? Woonasa wene, pooti opacerya ohoverya vakhala wiira malakiheryo awo annivareleya muteko para hiyo. Nave pooti opacerya owehexexaka ifaalya sa anna awo annivaha malakiheryo. Vakhala wiira nnimweettela waamini, nnookupaliki wiira Yehova tonnivaha malakiheryo awo ni wiira owo onnisuwela oratteene makhalelo a khula mmosa a hiyo. Nto eyo, ti etthu enniiriha wiiwelela malakiheryo nnaakhela ahu ni moonelo wooloka. (Ahep. 13:17) Ninnisuwela wiira wiiwelela, onnikumiherya wiiraana mmulokoni. (Aef. 4:​2, 3) Hata anna awo annivaha malakiheryo ari ene oottheka, hiyo ninnikupali wiira Yehova onoonireeliha vakhala wiira nnoowiiwelela. (1 Sam. 15:22) Masi vakhala wiira vannireerela opakiwa marukunuxo mmutthenkesoni mwa Yehova, owo onoopaka eyo okathi wooreerela. w25.03 23-24 itti. 13-14

Hiyo ninkhala okathi woohakalaliha! Ninniwerya woona iprofesia sa mbiibiliyani siiraneyaka khula nihiku. Mwa ntakiheryo, ninninweha “mwené òkusini”, eyo piiyo, mwene a onorti ni “mwené ònikela epheyo”, eyo piiyo, mwene a osuuli ewana-wanaka ni yoophavela ya olamulela elapo. (Dan. 11:40) Nave ninniweha wuncerereyaka olaleiwa wa ihapari sooreera olumwenku wootheene, ovikana khalai. Nave-tho atthu imilyau sinceene annithanla omurumeela Yehova. (Yes. 60:22; Math. 24:14) Khaninliyala eyoolya nnaakhela ahu, yeeyo enlipiha waamini wahu “okathi wooreerela.” (Math. 24:​45-47) Khula okathi, Yehova onninikhaliherya wiiwexexa oratteene itthu sihinatthi wiiraneya. (Mir. 4:18) Nikupaliki wiira okathi maxakha maalupale anrowa aya opacerya, nnoosuwela etthu yoopaka wiira nihihiye ororomeleya wa Yehova ni okhala oowiiraana. Nave ti vooloka wuupuwela wiira khanisuwenle itthu sikina sinrowa wiiraneya muhoolo. w24.05 8 itti. 1-2

Davidi oolavula nuulumo noowi waapa. Onitaphulela exeeni waapa? Onitaphulela omulavula moohiloka mutthu mukina mwa enamuna nikhanle ahu oohonona mikhalelo sawe sooloka. Esaalimu 15:​3, enninuupuxerya wiira ale ari aletto a muheemani mwa Yehova, khaniwiirela akina itthu soohiloka. Nave khaniwootherya ni owuulihiha muru apatthani aya. (Esal. 15:1) Eyo entaphulela exeeni? Woonasa wene moohisuwela hiyo pooti opaceryaka owaapa atthu akina nilaleyaka itthu soohiloka sa atthu awo. Nkuupuwelani matakiheryo ala anittharelana: 1) murokora mmosa ohiyale okhala pioneera, 2) anamathelana ahiyale oorumeela oBeteli ni 3) munna ohiyale orumeela ntoko mutokweene aahiiso murumeyi ookhaliherya. Vaarowa okhala voohiloka ohimya wiira atthu awo apanke itthu soohiloka ti maana aya ayelenle aya iparakha saya. Masi pooti wiira aakhala mathowa manceene awiirinhe, hiyo nihinsuwela ahu. Tivonto, mutthu ori muletto a muheemani mwa Yehova, khoniwiirela akhwaawe sootakhala, nnakhala owaapa. w24.06 11 itti. 11-13

Wiira omuttittimiha wahu Yehova okhale woolipa, nimpirisari wuupuwelelaka moota nikhanle ahu oomuhakalaliha yena khula okathi nimphavela ahu opaka soothanla. Nto okathi munisoma anyu soowiiraneya sa mbiibiliyani, mwiikoheke so: ‘Kaarowa opaka exeeni vaakhanle wiira muxankiho ola okiphwannye miyo?’ Mwa ntakiheryo, nkuupuwelani vaakhanle wiira munaawiriyana maxeefi ale 10 okathi yaahimya aya moonelo ole woohiloka, nuumala awo ohottela elapo yeeyo Yehova aaleihenrye awe waavaha aisarayeli! Niireke mwaarowa okupali moonelo aya mwaha wa owoova atthu? Aahiiso omuttittimiha wanyu Yehova waarowa okhala wuulupale ovikana ophavelasa waahakalaliha ni owoova atthu? Masi aisarayeli khiyaakupanli wiira Yoxuwa ni Kalebi yaahimya ekeekhai. Nto eyo yaahiwiiriha ohikela Elapo Yooleiheriwa. — Mmr. 14:​10, 22, 23. w24.07 10 etti. 7

Nkawehani moota Yehova aawiixuttinhe awe atthu awe, orumeelaka ntakiheryo na Gomeri, mwaarawe profeta Hoseya. Owo aahimuhiya Hoseya onarowa okhala ni mulopwana mukina. Nto niireke owo khawerya-tho orukunuxa murima? Yehova, yoowo oniweha mirima, aahimuleela Hoseya wiira: “Murowe-tho, mwamphente muthiyana yoole oniphentiwa ni mulopwana mukina ni oniraruwa, ntoko siisaale Yehova onaaphenta awe atthu a wIsarayeli okathi anaatthara aya amuluku akina ni sinaasivela aya ipoolu sa ifiiku soonyakattiwa.” (Hos. 3:1; Mir. 16:2) Moone wiira nlelo mwaarawe Hoseya iira opakaka etampi yuulupale. Hata vari siiso, Yehova aahimuleela Hoseya wiira omurowele, omulevelele ni otthikele okhala mwaarawe. Siiso, Yehova aaphavela owooniherya atthu awe wiira nlelo khaanyanyanle. Nnaamwi atthu awo nlelo yaapaka itthu sootakhala, nlelo aanaaphenta. Aanaaruma maprofeta wiira aakhaliherye atthu awo ottharuwa itampi saya ni orukunuxa murima aya. Ntakiheryo nla, ninniixuttiha wiira Yehova “tonitokosa mirima sa atthu” ni onimweereya omukhaliherya mutthu nlelo onipaka etampi, wiira orukunuxe murima awe. w24.08 10 etti. 7

Ayuda yaakenle ekristau niinaano, yaahaana opaka marukunuxo maalupale, nto opaka eyo khahiyo yaari etthu yookhweya. Khalai, ayuda yaari nloko naathanliwe ni Yehova. Iyaakha sinceene, oYerusalemu waanisuweliwa okhala opuro waarina efaita yuulupale. Okathi ole, etemplo ya Yehova yaari oYerusalemu. Nave atthu yaaphavela omukokhorela Yehova mutemplo, yaahaana orowa weiwo. Tivonto, ayuda oororomeleya yaanitthara Nlamulo na Moise ni malamulo ahooleli a itiini yiixuttiha aya. Soowiixuttiha iye, saanaakhaliherya othanla etthu yoolya, okhalana moonelo wooloka voohimya sa winnuwihiwa ni waataana waya ni ale yahaakhanle ayuda. Tivonto, nuumala Yesu okhwa, Yehova kheemererya mikuttho iyo ayuda yaavaha aya. Marukunuxo awo, yaanaaxankiha ayuda yaakenle ekristau okhala wiira yaahilimalela weettela Nlamulo na Moise. (Ahep. 10:​1, 4, 10) Hata makristau ale yaarina waamini woolipa ntoko Pedru, yaahikhalana muxankiho a moota woolimalela marukunuxo ale masya. (Mit. 10:​9-14; Akal. 2:​11-14) Mwaha wa marukunuxo ale masya, makristau ale yaahipacerya olupatthiwa ni ahooleli a itiini sa ayuda. w24.09 9 etti. 4

Okathi Yehova onaaruma awe muteko arumeyi awe, owo oniphavela wiira avareke mootthokiheya. (1 Akor. 14:33) Mwa ntakiheryo, Yehova oniphavela wiira ihapari sooreera sa Omwene silaleiwe elapo yootheene. (Math. 24:14) Nave Yehova onvaha Yesu muritti wa ohoolela muteko owo. Yesu onnipaka ele oniwerya awe wiira muteko owo okhale wootthokiheya. Nave eseekulu yoopacerya, yaahithanliwa axitokweene wiira yeettiheke miloko. (Mit. 14:23) OYerusalemu, weiwo naari aya nikhuuru noolamulela, yaahikhala ekurupu ya arummwa ni axitokweene, yaawo yaakumiherya malakiheryo ni opaka soothanla seiyo miloko saakhanle aya ootthara. (Mit. 15:2; 16:4) Yookhumelela aya, okhala wiira atthu a mmulokoni “yaanitepa olipihiwa waamini waya, nave khula nihiku atthu yaanincerereya.” — Mit. 16:5. w24.04 8 etti. 1

Voosiisu ene nihiku 16 na Nisani, athiyana oororomeleya yaahirowa omahiye opuro Yesu aavithiwa awe. (Luka 24:​1, 10) Nrowe nthokorerye yoowiiraneya ya Maria Madalena. Nuumala Maria ophiya omahiye, owo khaaphwannye murutthu wa Yesu. Moottharelana, Maria aahirowa omuleela Pedru ni Yohani. Nto alopwana awo vamosa ni Maria, yaahitthimakela opuro Yesu aavithiwa awe. Nuumala oweha wiira murutthu wa Yesu khiwaakhanle, awo yaahitthikela owaani. Masi Maria aahanle omahiye iwe anlaka. Nave owo, khaasuwela wiira Yesu iira onwehaka. Okathi Maria anla awe, Yesu aahiixooniherya wa yena ni aahimpakela etthu yooreera, eyo piiyo, ommaaliha. Yesu aahilavula ni Maria Madalena ni omuleela wiira aaleele awiixutti akina wiira yena oohihimuxiwa. — Yoh. 20:​17, 18. w24.10 13 etti. 7

Moise aahirumeela ntoko profeta, mukhulupale, muhooleli ni mulipa-oolepa. Owo taahoolela aisarayeli okathi yaakhuma aya weepotthani wExiitu. Nave aahiweha miiriirya sinceene saakhuma wa Yehova. Ohiya-vo, Yehova aahimurumeela wiira olepe iliivuru 5 sa mbiibiliyani, ohela muhina Esaalimu 90 ni woonasa wene, 91. Nave vanikhala wiira tolempe eliivuru ya Yoobi. Ohinatthi Moise okhwa, orina ene iyaakha 120, aahaathukumanya aisarayeli ootheene wiira owuupuxerye itthu sootheene Yehova aapakenle awe. Awo yaahiweha miiriirya sinceene Yehova aapanke awe, ni moota aahukhummu awe atthu a wExiitu. (Okhu. 7:4) Awo yaahiweha okathi Yehova aahunle awe Ephareya Yooxeerya wiira alapuwe, ni moota ampwetenxe awe Farawo ni anakhotto awe. (Okhu. 14:​29-31) Okathi yaari aya moothakoni, Yehova aahaakhaliherya ni aahaakhapelela. (Otum. 8:​3, 4) Ohalaka okathi vakhani wiira aisarayeli akele elapo yooleiheriwa, Moise aahirumeela okathi owo wiira aalipihe. w24.11 8-9 itti. 3-4

Etthu Yesu aalenle awe arummwa awe okathi wa Eyoolya ya Ohiyu ya Apwiya, ennooniherya ovirikana okhanle ni ele aahimmye awe okathi ari awe ni muttitthi ole oGalileya. Tivonto, ele Yesu aahimmye awe okathi wa Eyoolya ya Ohiyu ya Apwiya, enivareleya muteko ni ekurupu yaamukhaani paahi ya atthu. Etthu yaavaha aya efaita atthu ale Yesu aalavulanne awe oGalileya, yaari eyoolya paahi. Masi Yesu aaphavela waakhaliherya wiiwexexa etthu yaarina efaita yuulupale, ovikana eyoolya. Owo aahaaleela etthu yaarowa waakhaliherya ophwanya okumi woohimala. Nave Yesu aahimmye wiira atthu ale akhwiiye, yaamuhihimuxiwa nihiku nookiserya wiira akhaleke mahiku ootheene. Mareeliho awo, khahiyo yaarowa ophwanya atthu a ekurupu yaamukhaani paahi ntoko aahimmye awe okathi wa Eyoolya ya Ohiyu ya Apwiya. Ohiya-vo, okathi aari awe oGalileya, aalavula sa mareeliho anrowa aya ophwanya atthu ootheene. w24.12 11 itti. 10-11

Yehova onnimunyokha mutthu ootakhala. (Esal. 11:5) Nave-tho, Biibiliya onnooniherya wiira ti vootakhala mulopwana omuhasula mwaarawe. (Mal. 2:16) Akhala wiira mulopwana oothela khonimuttittimiha mwaarawe, owo onnihonona ompatthani awe ni Yehova. Nave Yehova pooti ohiwiriyana mavekelo awe. (1 Ped. 3:7) Alopwana akina oothela, anninveeha mwaaraya aahiiso omuhasula amulavulelaka itthu sikhanle onwereya. Masi Yehova onninyokha “onanariwa, oviruwa, owali, oruwana, vamosa ni sootakhala sa khula enamuna.” (Aef. 4: 31, 32) Mulopwana onimulavulela moolumo ooveeha mwaarawe, khonihonona paahi ekasamento awe, masi-tho onnihonona waataana wawe ni Yehova. (Yak. 1:26) Nave mulopwana oniweha epornokrafia onnihonona waataana wawe ni Yehova ni onnooniherya wiira khonimuttittimiha mwaarawe. Mulopwana oororomeleya ni mwaarawe, khonikhala-khala orupihanaka ni muthiyana mukina, nave khonikhala-khala uupuwelaka opaka eyo. Yesu aahimmye wiira mulopwana oninwehexexa muthiyana mpakha ophavela orupa ni yena, mutthu owo ooraruwana muthiyana owo “vamurimani.” — Math. 5:​28, 29. w25.01 9 itti. 6-8

Biibiliya onnaahimya arumeyi a Yehova okhala anaxariya. Eyo enitaphulela wiira Yehova khonaakhanyererya arumeyi awe oliva mwaha wa itampi anipaka aya. Nave okathi onipaka awe eyo, owo khonihonona exariya awe. Owo onninihimya okhala anaxariya ohiya mwaha woophwanelela. Okathi omosaru, Yehova khoneemererya itampi sahu. Masi vakhala wiira nnimooniherya waamini mukuttho Yesu ovanhe awe, Yehova ori oolikana ene wiira onilevelele soottheka sahu. (Arom. 3:24) Eyo ennaafetari sai hiyo? Ale athanliwe wiira yalamuleleke ni Yesu wiirimu, aakhalihiwa anaxariya ntoko anamwane a Muluku. (Tito 3:7; 1 Yoh. 3:1) Itampi saya, sooleveleliwa. Nto vanikhala ntoko khanattheke. Mwaha waivaavo, eyo yoowiiriha weemereriwa Moomweneni mwa Muluku. (Arom. 8:​1, 2, 30) Ale arina nlipelelo na okhala valaponi mahiku ootheene, aakhalihiwa anaxariya ntoko apatthani a Muluku. Nave soottheka saya soleveleliwa. — Yak. 2:​21-23. w25.02 5 etti. 17; 7 etti. 18

Okathi omosa, murummwa Pedru aahikhalana moonelo woovirikana ni wa Yehova. Yesu aahaaleela arummwa awe wiira aarowa oYerusalemu weiwo ahooleli a itiini yaarowa aya omutthukwa, omuhaaxa ni omwiiva. (Math. 16:21) Pedru aanisuwela wiira Yesu aari Mesiya aaleiheriwe, yoowo aarowa owoopola atthu a Muluku. Owo vaaninvila okupali wiira Yehova aaheemererya wiira mwanawe ohaawe mpakha okhwa. (Math. 16:16) Pedru aahimwiitthana Yesu onamuleela so: “Pwiya, mwiireerele murima. Itthu iyo khasinrowa wookhumelelani nnakhala vakhaani.” (Math. 16:22) Yesu kheemerenrye eyo, mwaha woowi Pedru khaarina muupuwelo wa Yehova. Yesu aahikhootta miruku sa Pedru nnaamwi woonasa wene, owo aamananiha omukhaliherya. Yesu aanisuwela wiira Yehova khaaphavela wiira yena iisuupuweleke mmensawe paahi. Okathi ole, Pedru aahiixutta wiira aanipirisari okhalana muupuwelo ntoko wa Muluku. Nave eyo ti etthu hiyo nniixuttiha ahu. w25.03 9 itti. 5-6

Niireke mooriipiwa murima mwaha wa etthu yoohiloka mwiirihinwe anyu ni mutthu mwamuroromela anyu vanceene? Moohicikha enamuna atthu akina anoothokoreryayani, Tiithi anyu a wiirimu onnoophentani. Akhala wiira muhiirihiwa etthu yoohiloka ni mutthu mwamphenta anyu, moolumo a Davidi ari yoolepa ya olelo, pooti woomaalihani. Eliivuru emosa elavulaka sa “ale akhulumunwe”, enitthokiherya wiira atthu awo aniixoona ntoko mutthu ohirina nlipelelo. Yehova onaakhaliherya sai atthu aniixoona siiso? Owo “ori vakhiviru” naawo. Yehova ori ntoko paapa aahiiso maama onimmaaliha mwanawe okathi oninla awe. Okathi ninriipiwa ahu murima mwaha wa mutthu namphenta ahu oniirinhe etthu yoohiloka aahiiso oninyanyanle, Yehova onnoona owerya onniphwanya ni onninikhaliherya moowaakuveya. Tiithi ahu Yehova, onninimaaliha okathi ninriipiwa ahu murima ni vaavo nnuupuwela ahu wiira khanrina efaita. Owo onninivaha itthu sinceene ohela muhina nlipelelo nahu na muhoolo, nenlo ninnikhaliherya ovilela mixankiho. — Yes. 65:17. w24.12 23 itti. 13-14

Olelo-va, axitokweene aahaana okupali wiira Yehova onniweha miteko sootheene anivara aya ni onimwaatthuvela. Ohiya paahi waakhapelela anna ni arokora, wiixuttiha ni olaleerya, axitokweene anceene annikhaliherya muteko wooteka ni annaakhaliherya anna ni arokora sinaaphwanya ihasara sa ephattu. Axitokweene akina annithanliwa wiira yiirele mpantta Ekomisau ya Axitokweene Anaaxukurya Aretta nave akina annithanliwa wiira yiirele mpantta Ekomisau Enilavula ni Ispitaali. Nto axitokweene aniivahererya wiira avareke miteko iyo, annisuwela wiira muloko ti wa Yehova. Ti maana aya awo aniimananiha aya ovara khula etthu aniwerya aya ni annikupali wiira Muluku onimwaatthuvela. (Akol. 3:​23, 24) Khahiyo wiira atthu ootheene annikhalana eparakha eyo ya orumeela ntoko axitokweene. Masi ootheene ahu nnoowerya onvaha Yehova ele eniwerya ahu. Muluku ahu onnihakalala vanceene vaavo nniimananiha ahu ovara khula etthu eniwerya ahu wiira nimurumeeleke. Owo onniweha musurukhu ninvaha ahu wiira nikhaliherye miteko sa Omwene sinivariwa olumwenku wootheene hata ori ene vakhaani. Nave owo onnihakalala vanceene vaavo nihincala ahu soovonya sa anna ni arokora ni vaavo nnaalevelela ahu. Mukupaliki wiira owo onnisiveliwa vanceene ni ele muniwerya anyu ovara. Owo onnoophentani vanceene ni onimootthuvelani. — Luka 21:​1-4. w24.06 23 itti. 12-13

Yoowiiraneya ela ennooniherya etthu ekhanle oowiiraneya ni khula mmosa a arumeyi a Yehova. Hiyo pooti opaka etampi yuulupale ni muhoolo mwaya nnuupuwela wiira itthu sootheene siranenyale “moowaakuuveya.” Aahiiso atthu akina pooti ohimyaka wiira “kipanke moohisuwela.” Masi akhala wiira nnimuupuwelela, nnooweha wiira nipanke etampi eyo mwaha woowi soothanla sahu saari soohiloka. Nave eyo pooti wiiraneyaka mwaha woowi naathanlale moohiloka apatthani, matthekulelo ahu toohiloka aahiiso orowa mapuro oohiloka okhale nimurumeelaka interneeti wala orowa hiyo axineene. Nave eyo pooti wiiraneya vakhala wiira nnoohiya omusoma Biibiliya, orowela mithukumano aahiiso olaleya ihapari sooreera. Ntoko yiiraneyale aya ni mmiravo oniromoliwa eliivuru ya Miruku, soottheka sawe khahiyo siiraneyale moowaakuveya, masi waari mwaha wa soothanla sawe soohiloka. Exeeni nniixutta ahu? Ohiya paahi osyaka opaka etampi, masi nihaana osyaka itthu sikhanle ooniiriha opaka etampi. Eyo ti etthu Salomooni iiwanyeihale awe. Math. 5:​29, 30. w24.07 16 itti. 10-11

Masi muhakhu xeeni owo? Muteko woolaleya voohimya sa Omwene wa Muluku ni onoopola ikumi sa atthu. (2 Akor. 4:1) Onitaphulela exeeni mwaapu wa oloko? Onitaphulela arumeyi a Muluku, yaawo anaalaleerya atthu akina ihapari sooreera. Okathi wa Paulo, alipa anakoso yaanirumeela mwaapu wiira ateexe aahiiso opweha itthu sa efaita ntoko eyoolya, eviinyu ni musurukhu. Moolikanasa, hiyo na mwaapu wa oloko maana Yehova onninrumeela wiira nikuxe etthu ya faita yuulupale siri ihapari sooreera. Nikhaliheriwaka ni Yehova, hiyo nnoowerya okhalana ikuru wiira nihihiye olaleerya ihapari iyo moororomeleya. Ikwaha sikina, hiyo pooti owoovaka atthu aahiiso woova ohaakheliwa saana. Ninrowa owerya sai oxintta muxankiho owo? Nwehe nivekelo yaapanke aya arummwa okathi yaaleeliwe aya wiira ahitthikele olaleerya. Ohiya oxinttiwa ni woova, awo yaahinvekela Yehova wiira aakhaliherye ‘olaleya moolumo a Muluku, ahoovaka etthu’. Nto Yehova aahaakhula nivekelo nlo moowaakuveya. (Mit. 4:​18, 29, 31) Vakhala wiira munniwoova atthu okathi munlaleerya anyu, munvekeleke Yehova wiira waaphenta wanyu atthu okhaleke wuulupale ovikana owoova atthu. w24.04 16 itti. 8-9

Omphenta wahu Yehova onniniiriha otteeliha nsina nawe. Eyo enitaphulela wiira nimphavela waaleela atthu akina wiira itthu Satana olavunle awe omuhimyaka Yehova, khahiyo ti seekeekhai. (Maph. 3:​1-5; Yoobi 2:4; Yoh. 8:44) Okathi ninlaleerya ahu, nihaana ophavela waaleela atthu ootheene aniphavela oniwiriyana, ti pani ori Yehova ni mikhalelo sawe. Nimphavela wiira khula mutthu osuwele mukhalelo muulupale wa Yehova wiira ophenta, ni wiira enamuna onilamulela awe ti yooloka ni yaxariya. Nave asuwele wiira moohipisa Omwene awe onoomaliha mixankiho sootheene ni onooruuha murettele ni ohakalala wa apinaatamu ootheene. (Esal. 37:​10, 11, 29; 1Yoh. 4:8) Vaavo nnaaleela ahu itthu iyo atthu akina, ninnitteeliha nsina na Yehova. Nave ninnihakalala vaavo nniimananiha ahu waakhaliherya atthu akina onisuwela ntoko Anamoona a Yehova. w24.05 18 etti. 12

Anna, munimooniherya wiira ‘munniwaakhela aletto’, okathi munaapakela anyu itthu sooloka atthu akina, hata ale muhinviriha anyu okathi munceene muri ene naawo. (1 Ped. 4:9) Eliivuru emosa elavulaka sa mutthu oosuwela owaakhela aletto, ehimmye so: “Ohaana owaakhela owannya awe ni murima awe wootheene, hata atthu yaale ohinaasuwela awe.” Nto mwiikoheke so: ‘Kiireke kinnisuweliwa okhala mutthu ooreera murima, ni oniwaakhela saana atthu anrwa oxukurya muloko aka?’ (Ahep. 13:​2, 16) Mutthu oniwaakhela aletto, onnaareerela murima ni onnaavaha itthu orina awe ale animuxukurya. Eyo enihela muhina, waavaha atthu oothoiwa muhilipelelaka ottikiheriwa etthu. Nihaana opaka eyo hata ni anna anilattuliwa orwa olavula myaha sa mmulokoni vamosa ni axitokweene a esirkwiitu. — Maph. 18:​2-8; Mir. 3:27; Mit. 16:15; aRom. 12:13. w24.11 21 etti. 6

Nlikanyiho na imwali, Yesu aahilavula imwali 10 seiyo saaronwe okumana ni mutheli. (Math. 25:​1-4) Imwali iye saaphavela omuhoola mutheli efesta ya ekasamento. Yesu aahihimya wiira imwali 5 “khisaarina ankhili” nave sikina 5 “saahikhalana ankhili”. Imwali saarina ankhili saari soolikana ene omulipelela mutheli, hata aarowa opisa. Iyo saahisariha makhura muxamaniiyani mwaya ohiyu ole. Awo yaahilokiherya vakhala wiira mutheli ampisa, akuxaka makhura makina. (Math. 25:​6-10) Nuumala mutheli ophiya, imwali iye saarina ankhili saahivolowa nuuwo. Mwa enamuna emosa-ru, makristau oothanliwa anrowa okhala oowehaweha ni oororomeleya mpakha okathi Yesu ontthika awe, anrowa okhala ni mutheli, eyo piiyo, Yesu moomweneni mwawe wiirimu. — Wis. 7:​1-3. w24.09 21 etti. 6

Okathi nnuupuwela ahu moota muteko woolaleerya onaakhaliherya aya atthu anceene olumwenku wootheene, eyo enniniiriha okhalela nthiti olaleerya. Khula eyaakha, imilyau sinceene sa atthu anisiveliwa ekeekhai, anniweha muthukumano wa Wuupuwelela ni annimusoma Biibiliya ni hiyo. Nave atthu anceene annipatisiwa ni anniirela mpantta muteko ola woolaleerya. Nto khaninsuwela atthu akavi anrowa owiriyana muhupi ninlaleya ahu. Masi etthu ninsuwela ahu okhala wiira Yehova onnaathukumanya atthu a muttitthi muulupale, yaawo ankela woopowa okathi wa maxakha maalupale. (Wis. 7:​9, 14) Yehova, mwaneene ematta, onnisuwela wiira atthu anceene animweemererya ihapari sooreera. Tivonto, nookhalana mathowa ooloka anniiriha ohihiya olaleerya! (Luka 10:2) Etthu emosa yaasuwanyeiha awiixutti a Yesu, waari okhalela nthiti muteko woolaleerya. Mwa ntakiheryo, arummwa yaanilaleerya moolipa murima ni moohakalala mpakha atthu osuwela wiira “yaaneetta ni Yesu.” (Mit. 4:13) Olelo-va, okathi ninlaleerya ahu nimphavela wiira atthu akupaliki wiira nimmutakiha Yesu nikhalelaka nthiti muteko woolaleerya. w25.03 18 etti. 15; 19 itti. 17-18

Biibiliya oniixuttiha wiira Yehova onnaathokorerya atthu yaale aniixoona wiira kharina efaita. Mwa ntakiheryo, Yehova aahimuruma profeta Samuweli wiira orowe etthoko ya Yese, wiira amuthanle mwene a wIsarayeli. Nto Yese aahiwiitthana anaawe 7, masi mmosa ookiseriwa, khaakhanle opuro owo. Masi anamwane ale 7, khuuvo Yehova aamuthanlale awe. (1 Sam. 16:​6, 7, 10-12) Yehova aanisuwela oratteene murima wa Davidi, eyo piiyo, okhala mmiravo amphenta vanceene Yehova. Niireke munnuupuwela moota Yehova owoonihenryaweni wiira onnoophentani? Mwa ntakiheryo, owo ori oolikana ene wiira oovaheeni miruku moovarihana ni itthu sinooxankihani. (Esal. 32:8) Eyo enitaphulela wiira Yehova onnoosuwelani oratteene ni onnisuwela itthu munipirisari anyu. (Esal. 139:1) Akhala wiira munimweettela malakiheryo a Yehova, munooweha moota owo onookhaliheryaweni ni munookupali wiira owo onnoothokoreryani. (1 Wah. 28:9; Mit. 17:​26, 27) Yehova, onniweha wiimananiha wanyu wiira mmurumeele. Owo onnisuwela mikhalelo sanyu sooloka, tivonto oniphavela awe okhala mpatthani anyu. — Yer. 17:10. w24.10 25-26 itti. 7-9

Moohaanyiherya, munnimphenta vanceene Yehova ni munniphavela waakhaliherya atthu akina. Nto munrowa wuncererya sai yoophavela anyu ya waakhaliherya atthu akina? Enamuna emosa, ori wuupuwelela ohakalala oniphwanya ahu okathi nnaakhaliherya ahu anna ni arokora. Yesu aahimmye so: “Ovaha onnitepa ohakalaliha ovikana ovahiwa.” (Mit. 20:35) Yesu aahooniherya eyo. Owo aanihakalala vanceene okhala wiira aanaarumeela atthu akina. Nwehe ntakiheryo nimosa niri Marko 6:​31-34. Okathi ola, Yesu ni arummwa awe khiyaareere okhulumuwa. Nto awo yaahirowa waavya opuro woomaaleleya wiira aphumurye. Masi muttitthi wa atthu waahipacerya ophiya ohinatthi Yesu ni awiixutti awe, maana yaaphavela owiriyana itthu Yesu aixuttiha awe. Yesu anwerya okhootta, okhala wiira owo ‘khaarina okathi woomumula, nnakhala woolya’. Aahiiso Yesu anwerya owiixuttiha itthu vakhaani paahi, nuumala-vo, aamwaryeke atthu ale. Masi Yesu aanaaphenta atthu. Mwaha waivaavo, owo “aahipacerya owiixuttiha mpakha nsuwa okela.” — Mar. 6:35. w24.11 16 itti. 9-10

Anamuyari, mmukhaliheryeke mwaninyu waaleela atthu akina ikeekhai sa mbiibiliyani. (Arom. 10:10) Nyuwo pooti olikanyiha owiixuttiha atthu akina ele enikupali anyu ni omwiipa viola. Waanipacerya, mutthu oniixutta omwiipa viola, oohaana wiipaka imelodia sookhweya. Akhala wiira onooviriha okathi munceene omoopaka, owo onoomwiixutta saana. Mwa enamuna emosa-ru, mmiravo mukristau ohaana opacerya olaleerya orumeelaka inamuna sookhweya. Mwa ntakiheryo, owo pooti omukoha mwaapara awe a oskola so: “Mwaanisuwela wiira manxinyero ikwaha sikina itthu anipaka aya, anitakiha soopattuxiwa? Kimphavela owooniheryani eviidiyu ela yoovara murima.” Nuumala omooniherya eviidiyu eri mpantta oni: Niireke siroopattuxiwa?, owo pooti omukoha so: “Nto akhala wiira sientista, onnittottopeliwa mwaha wa opaka itthu otakihaka soopattuxiwa, munoona wiira ole opattunxe khoniphwanela ottottopeliwa?” Olaleerya mwa enamuna yookhweya, pooti omukhaliherya mwaapara awe a oskola, ophavela wiixutta itthu sikina. w24.12 19 itti. 17-18

Vano wiira naakiheriwe etampi ni okhwa, Yehova oomuruma Yesu wiira onoopole. Masi vaniweryaneya sai, mukuttho wa mutthu mmosa oohittheka, owoopola atthu imilyau sinceene? Murummwa Paulo, onitthokiherya so: “Tthiri, mwaha wa ohiiwelela wa mulopwana mmosa [Adamu], atthu anceene yaahikhalihiwa anatampi, siiso-tho, mwaha wa wiiwelela wa mulopwana mmosa [Yesu], atthu anceene anookhalihiwa anaxariya.” (Arom. 5:19; 1 Tim. 2:6) Paulo aahimya wiira apinaatamu ootheene aattheka ni annookhwa, okhala wiira mulopwana oohittheka khaamwiiwelenle Muluku. Tivonto, wiira naakiheriwe etampi ni okhwa, vaapirisari mulopwana mmosa oohittheka omwiiwelela Muluku. Xeeni Yehova ohaahiyale awe anamwane a Adamu yaarowa omwiiwelela, akhalaka mahiku ootheene? Hiyo pooti woonaka wiira eyo yaarowa okhala enamuna yootepa oreera wiira ophukiwe muxankiho ole. Masi opaka eyo, khiyaarowa ovarihanaka ni exariya ya Yehova. Nave vaarowa okhalaka ntoko wiira Adamu ni anaaya, khatthenke. Masi ekeekhai ti yoowi, Adamu ni anaaya aattheka. w25.01 21 itti. 3-4

Murummwa Paulo, aanisuwela wiira moohipisa aamwiiviwa. Masi owo aanihakalala vanceene vaavo uupuwelela awe itthu sooreera aapanke awe mookumini mwawe. Owo aahimmye so: “Kootthimaka mpakha ophiya oponta, kootthara waamini.” (2 Tim. 4:​6-8) Paulo aanisuwela wiira aahihakalaliha murima wa Yehova, okhala wiira ntoko mukristau owo aahipaka soothanla sooloka mookumini mwawe. Nave-tho hiyo, nihaana opaka soothanla sooloka wiira nimuhakalalihe Yehova. Nto ninrowa opaka sai eyo? Aihimyaka mwaneene ni makristau makina oororomeleya, Paulo aahimmye so: “Hiyo nneettihiwa ni waamini, ohiya ni itthu sinoona ahu.” Mbiibiliyani, nuulumo noowi ‘weetta’, ikwaha sikina nintaphulela mweettelo mutthu onithanla awe mookumi mwawe. Mutthu oneettihiwa ni waamini, onnipaka soothanla ottharaka moonelo wa Yehova. Miteko onivara awe, sinnooniherya wiira onnikupali wiira Yehova onrowa omureeliha. Nave owo onnikupali wiira atthara miruku sa Yehova siri mbiibiliyani, onookhalana okumi woohakalaliha. — Esal. 119:66; Ahep. 11:6. w25.03 20 itti. 1-2

Atthu anceene khalai yaari ootakhala murima, oowali ni oohiroromeleya. Akhaliheriwaka ni munepa woowaarya, aapaka marukunuxo mweekumini mwaya. (Yes. 65:25) Nuumala wiimananiha vanceene, awo aawerya orula omutthu wa khalai. (Aef. 4:​22-24) Ekeekhai wiira ikwaha sikina ninnivonya mwaha wookhala atthu oottheka. Masi Yehova oowiiraaniha “atthu a mikhalelo sotheene” yaawo animphenta yena ni aniphentana mukina ni mukhwaawe. Tivonto ninwerya ahu okhalana murettele ni wiiraana. (Tito 2:11) Tthiri ola mwiiriirya onipakiwa paahi ni Muluku oowerya sootheene! Hiyo noosuwela wiira sooleiherya sa Yehova khula okathi sinniiraneya. (Yes. 55:​10, 11) Nto eyo enninikupaliha wiira eparayiisu ya nthoonyeryo, etthu yeekeekhai. Yehova ohiiraaniha emusi yeeyo enimukokhorela ni ehinlikananiwa. Hiyo arumeyi a Yehova, ninniwerya okhalana murettele nnaamwi niri ene olumwenku ola wootakhala, maana noovalaanyiwa. (Esal. 72:7) Tivonto ninreerela ahu waakhaliheryaka atthu anceene, wiira yiirele mpantta emusi ela yoowiiraana ya olumwenku wootheene. Nnoowerya opaka eyo, akhala wiira nnimwiimananiha ovara muteko wa waapaka awiixutti. — Math. 28:​19, 20. w24.04 23 etti. 13, 15

Yesu aanimphenta Yehova ni muupuwelo awe wootheene. Owo aanisuwela etthu Muluku aaphavela awe wiira opakeke, ni aari oolikana ene opaka eyo hata saarowa omphwanya mixankiho. Etthu Yesu aaphavela awe, yaari omuhakalaliha Tiithi awe. Tivonto, owo kheemerenrye etthu nnakhala mutthu omukhoottiheryaka opaka eyo. Pedru ni arummwa akina, yaahikhalana eparakha ya oviriha okathi munceene ari ene ni Yesu, yiixuttaka enamuna Yesu uupuwela awe. Okathi Pedru aalempe awe ekarta awe yoopacerya, owo aahaatumererya makristau olokiherya muupuwelo aya ntoko Kristu, eyo piiyo, wuupuwela ntoko Yesu. (1 Ped. 4:1) Pedru aahirumeela nuulumo naarumeeliwa ni atoropa vaavo aahimmye awe so: “Mwiilokiherye.” Nto vakhala wiira makristau anookhalana muupuwelo ntoko wa Yesu, anoowerya oxintta soophavela soohiloka ni anooxintta olumwenku wa Satana. — 2 Akor. 10:​3-5; Aef. 6:12. w25.03 8-9 itti. 1-3

Itthu xeeni munireerela anyu ovarerya okathi muninamorari anyu? Muhinatthi okhummwa murima mootepana, vaamuloka ovaanela itthu sa faita ntoko apalano oniwuupuwela awe mutthu owo muhoolo. Munrowa owerya sai osuwela mikhalelo sa mutthu owo? Enamuna emosa mukhanle anyu oosuwela, ori omukohaka itthu muniphavela anyu osuwela ni owiriyana ni ephoole moota onaakhula awe. (Yak. 1:19) Wiira eyo yiiraneye, nyuwo muhaana ohaavya miteko mukhanle anyu oovaraka hoothe, sinrowa wookhaliheryani ovaanela, ntoko olya hoothe, opasiyari mapuro oowaatta atthu ni okhuma hoothe muteko woolaleerya. Nave etthu ekina enrowa wookhaliheryani osuwelana, ori oviriha okathi muri ene ni amusi ni apatthani. Nave nyuwo pooti ompaka palano a ovara etthu enrowa omukhaliherya ole oninamorari ni nyuwo, opaka itthu mwa inamuna soovirikana ni atthu a makhalelo oovirikana. w24.05 27-28 itti. 6-7

Moohipisa, sinooniphwanya mixankiho sinceene. Nto okathi owo ninrowa opirisariki omuroromela Yehova ovikana khalai. Soowiiraneya sa mbiibiliyani ni soowiiraneya sa anna ni arokora a mahiku ahu ala, sinoonikhaliherya wuupuwelela moota Yehova aakhaliherye awe arumeyi awe. Nave mwiivaheke okathi wiira muupuwelele soowiiraneya iyo. Akhala wiira munoopaka eyo, munooweha wiira Yehova ori ntoko mwala anyu. Nave, nyuwo munoowerya waalipiha anna ni arokora a mmulokoni. Mwa ntakiheryo, Yesu aahinvaha Simoni nsina noowi Keefa, (nuulumo nenlo nintaphulela, “Pedru”.) Nsina nlo, nintaphulela “epetaaso ya mwala.” (Yoh. 1:42) Ni moolumo ala, Yesu aaphavela ohimya wiira Pedru anwerya waalipiha anna ni arokora ni olipiha waamini waya. Nave axitokweene a mmulokoni, annilikanyihiwa ni “muuttutthi worirya nihiku novihexa.” Eyo entaphulela wiira axitokweene annaakhapelela anna ni arokora a mmulokoni. (Yes. 32:2) Ohiya paahi axitokweene, masi ootheene ahu nnoowerya otakiha mikhalelo sa Yehova ni waalipiha anna ni arokora. w24.06 28 itti. 10-11

Mamwene a wIsarayeli Yehova aathokorerya awe okhala oororomeleya, ti yaale yaamukokhorela yena mwa enamuna yooloka. Mamwene manceene yaaphukela yaari oohiroromeleya, yaahihiya otthara nlamulo nawe ni yaahipacerya waakokhorela amuluku a ethiru. (1 Mam. 21:​25, 26; 2 Wah. 12:1) Xeeni Yehova aavaha awe efaita yuulupale okokhorela weekeekhai? Nthowa noopacerya, okhala wiira mamwene ti yaarina muritti wa waakhaliherya arumeyi a Yehova, wiira amukokhoreleke mwa enamuna yooloka. Ohiya-vo, waakokhorela amuluku a ethiru waaniwiiriha opaka itampi suulupale ni itthu sikina soohiloka. (Hos. 4:​1, 2) Etthu ekina, okhala wiira atthu ootheene a nloko nle yaahiivahererya wa Yehova. Ti maana aya Biibiliya onlikanyiha awe waakokhorela amuluku a ethiru ni oraruwa aahiiso onamuttompe. (Yer. 3:​8, 9) Nto akhala wiira mutthu onniraruwa, owo onnooniherya ohiroromeleya wa ole aamuleihenrye awe, okhale mwaarawe aahiiso iyawe. Oraruweliwe etthu yoowereya vanceene. Mwa enamuna emosa-ru, okathi mutthu iivaherenrye wa Yehova onaakokhorela awe amuluku a ethiru, owo onnimutthekela Yehova ni onninwereiha murima. — Otum. 4:​23, 24. w24.07 22-23 itti. 12-15