Wahala a Nenli

27 Yotami+ aarina iyaakha 25 okathi aakhanle awe mwene, nave aahilamulela iyaakha 16 oYerusalemu. Maama awe aihaniwa Yeruxa, mwaana mwaamuthiyana a Sadoki.+ 2 Yotami aanipaka itthu sooloka vamaithoni va Yehova, ntoko iira awe paapa awe, Oziya.+ Masi moovirikana ni paapa awe, owo khaakenle mutemplo mwa Yehova.+ Nlelo atthu yaanipaka itthu sootakhala. 3 Owo aahipaka mukhora muulupale wa empa ya Yehova,+ nave aahipaka itthu sinceene exiri ya wOfeli.+ 4 Aahiteka ipooma+ muttetthe wa omiyakoni wa oYuda,+ ni aahipaka mapuro oolipihiwa+ ni ipa soorakamela osulu+ mutakhwani. 5 Owo aahiwana ni mwene a atthu a wAmoni,+ ni aahaawerya. Siiso atthu a wAmoni yaahinvaha eyaakha ele italento* 100 sa eparatha, ikooro* 10.000 sa etiriku, ni ikooro 10.000 sa esevaata. Nave atthu a wAmoni yaahimuliva etthu emosa-ru eyaakha ya nenli ni ya neeraru.+ 6 Yotami aamutepa okhala oolipa, okhala wiira aahilakela otthara ephiro ya Yehova, Muluku awe.

7 Itthu sikina siiraneyale ni Yotami, ikhotto aawanne awe ni miteko sawe sootheene, soolempwa Muliivuruni ya Mamwene a wIsarayeli ni a oYuda.+ 8 Owo aarina iyaakha 25 okathi aakhanle awe mwene, nave aahilamulela iyaakha 16 oYerusalemu.+ 9 Wanikisa waya, Yotami aahirowa omumula ni amuhavinre awe, ovithiwa epooma ya Davidi.+ Vano, mwanawe, Akhazi, aahikhala mwene nipuro nawe.+