Daniel

10 Quando Daniel el ga savesto che el rè l’era de acordo con quela lege, l’è ndato casa. E, cole finestre del quarto de sora verte par la banda de Gerusalen, el se ga indenocià, el ga pregà e lodà el so Dio, cossita come el gavea sempre fato vanti de questo, tre volte al giorno. 11 Alora, de colpo, quei òmini i ze ndati rento e i ga catà Daniel, che l’era drio domandar e suplicar el favor del so Dio. 16 Cossita, el rè el ga dato la òrdine par ciapar Daniel e i lo ga metesto nel buso che ghen’è i leoni. El rè el ga dito a Daniel: “El to Dio, che te servi sensa fermarte, el ndarà salvarte.” 19 Quando ga sciarà el giorno, el rè el se ga levà su e l’è ndato suito al buso ndove ghen’era i leoni. 20 Quando l’è rivà darente, lu l’era pròpio triste e el ga domandà a Daniel: “Daniel, servo del Dio che el vive! Sarà che el to Dio, quel che te seiti a servir, el te ga salvà dei leoni?” 21 Daniel el ga suito rispondesto al rè: “Ò rè, che te viva par sempre! 22 Me Dio el me ga mandà el so àngelo e el ga serà su la boca dei leoni, e lori no i me ga fato mal, parché Dio el sa che no go fato gnente de sbalià contra lu gnanca contra ti, ò rè.” 23 El rè l’è restà pròpio contento e el ga mandà che i tiresse Daniel fora del buso. Quando Daniel l’è stà tirà fora del buso, lori i ga visto che i leoni no i ghe gavea fato mal, parché el se gavea fidà nel so Dio.