Mavọ Ovwan Vwọ Mrẹ Igho vwo Ruiruo rẹ Ovwan?

Itetoro ro wonhwo rẹ Iseri ri Jihova torori yẹn avwanre vwo ruiruo rẹ aghwoghwo ravwanre vwẹ akpọneje.a Ekpeti re vwo ruẹ itetoro hẹ evunrẹ asan avwanre da wonma, idjerhe efa re se vwo ru itetoro hẹ ẹbẹre re se Donate vwẹ wẹbsaiti avwanre. Ekpeti na vwo ẹbẹre sansan rere ohwo na sa vwọ jẹ sẹ iruo akpọeje, eghwaghwọrọ rẹ ukoko na yẹrẹ ivẹ na yen ọ guọnọ ruẹ itetoro vwọ kẹ.

Iseri ri Jihova hwa ẹkẹn ihwe-e, yẹrẹ toro ẹkẹn ọvo re igho ra hwa kẹ ayen vwẹ obo iruo-o. (2 Kọrẹnt 9:7) Avwanre mie arọghọ yẹrẹ bru igho kẹ ihwo tavwen ayen ke sa rhe omẹvwa avwanre-e, avwanre ji mie ihwo igho fikirẹ omaebrophiyame, orivwin-esho, orọnvwe, yẹrẹ irueru ẹga efa-a. Avwanre vwobọ vwẹ bake sales, bazaars, bingo games, carnivals, dinners, raffles yẹrẹ erọnvwọn efa tiọyen rere avwanre sa vwọ mrẹ igho-o, avwanre ji yare ihwo igho-o. E ghwoghwo odẹ rẹ ihwo ri toro itetoro na-a. (Matiu 6:2-4) E ghwoghwo eki yẹrẹ irueru rẹ ihwo efa vwẹ wẹbsaiti yẹrẹ ẹbe rẹ avwanre rere a sa vwọ mrẹ igho-o.

Ukoko rẹ Iseri ri Jihova ọvuọvo se iyẹnrẹn rẹ obo ra ghwọrọ igho rẹ ukoko na phia kemeranvwe kemeranvwe vwẹ omẹvwa rayen re ruẹ vwẹ azagba. A fuẹrẹn ọbe rẹ igho rẹ ukoko ọvuọvo nọke ra ruọke rere e se vwo vwo imuẹro nẹ a nabọ vwẹrote igho re torori na.—2 Kọrẹnt 8:20, 21.

Obo wo se vwo ru itetoro

• Ekpeti rẹ itetoro: Wo se phi igho yẹrẹ ishẹki wọ guọnọ vwo ru itetoro phiyọ ekpeti re vwo ruẹ itetoro vwẹ Ọguan Ruvie, Ọguan Romẹvwa, yẹrẹ vwẹ asan efa avwanre de ru omẹvwa.

• Itetoro re ruẹ vwẹ itanẹti: Vwẹ ẹkuotọ buebun, wọ sa reyọ ẹbẹre re se “Donate to Jehovah’s Witnesses” vwo ruẹ itetoro womarẹ credit cards, debit cards, bank transfers, yẹrẹ ona efa.b Iseri ri Jihova evo brorhiẹn ayen vwo “phiẹ ememu vwọ hẹ akakọ” kemeranvwe kemeranvwe womare ayen vwọ reyọ ọvo usun rẹ ena nana vwo ruẹ itetoro na.—1 Kọrẹnt 16:2.

  

• Itetoro re muegbe rọyen phiyotọ: O vwo ena rẹ itetoro evo re muegbe rọyen phiyotọ yẹrẹ guọnọ ukẹcha rẹ ilọya. Ọrhuẹrẹphiyotọ tiọyena sa nẹrhẹ wọ reyọ erere wọ mrẹ nẹ osa rẹ uyovwin rẹ ẹkuotọ wẹn vwo ruiruo. Ihwo buebun mrẹ erere norhe, rẹ ayen vwọ nabọ rhe riẹn kpahen okẹ ra sa vwọ kpahotọ ọke ra je vwọ hẹ akpọ yẹrẹ ọke re de ghwu nu. Biko si rhe oghọn ukoko rẹ Iseri ri Jihova wọ da guọnọ riẹn evuẹ efa kpahen obo wo se vwo ruẹ itetoro womarẹ:

  • bank wẹn

  • inshọransi vẹ ọrhuẹrẹphiyotọ rẹ ritayamẹnt wẹn

  • iwevwin yẹrẹ etọ

  • istọku vẹ bọnd

  • iwili vẹ uturhi re vwo vwo emu

Wọ da guọnọ riẹn evuẹ efa kpahen ona re vwo ruẹ itetoro vwẹ ekogho wẹn, ni aruọbe rẹ “Donate to Jehovah’s Witnesses.”