Die Yen Avwanre Se Vwo Ruẹse Kẹ Jihova?

JESU da ta: “Ẹrhovwo herọ kẹ ọkokẹ nọ ohwo ra kẹ.” (Iruo 20:35) Uyota ọghanghanre yena djobọte oyerinkugbe rẹ avwanre vẹ Jihova. Diesorọ? Jihova kẹ avwanre erọnvwọn buebun re nẹrhẹ oma vwerhen avwanre, ẹkẹvuọvo e se ru omavwerhovwẹn yena ganphiyọ siẹrẹ e de ruẹse kẹ Jihova. Die yen avwanre se vwo ruẹse kẹ Jihova? Isẹ 3:9 da ta: “Vwẹ emu wo vwori ejobi bru ọghọ phihọ Ọrovwohwo oma.” Oborẹ avwanre “vwori” churobọ si ọke rẹ avwanre, ona rẹ avwanre, ẹgba rẹ avwanre, kugbe ekuakua rẹ avwanre vwori. A da vwẹ enana vwo titi ẹga rẹ uyota, kọyen avwanre ruẹse kẹ Jihova. Ọyena cha kẹ avwanre omavwerhovwẹn.

Die yen cha nẹrhẹ a sa vwẹ ekuakua rẹ avwanre vwori vwo ruẹse kẹ Jihova? Ọyinkọn Pọl vuẹ iniọvo rehẹ Kọrẹnt nẹ ayen “phiẹ ememu vwọ hẹ akakọ” rẹ ayen che vwo ru itetoro. (1 Kọr. 16:⁠2) Die yen wo se ru siẹrẹ wọ da guọnọ riẹn kpobarophiyọ kpahen oborẹ wo se vwo ru itetoro tiọyena vwẹ ekogho wẹn? Biko ni ekpeti rọhẹ obotọ na.

Ọ dia ẹkuotọ na eje yen e de se ru itetoro tiọna-a. Ẹkẹvuọvo, wọ sa mrẹ evuẹ ri shekpahen idjerhe efa re se vwo ru itetoro vwẹ aruọbe re de ruẹ itetoro vwẹ wẹbsaiti rẹ avwanre na. Vwẹ ẹkuotọ evo, wọ je cha mrẹ ẹkpahọnphiyọ vwọ kẹ enọ re dje ẹnẹnọ kpahen itetoro vwẹ aruọbe na.