Diesorọ Avwanre Rhe Phiẹ Ifovwin Kirobo rẹ Ihwo rẹ Izrẹl Ruru Ọke Awanre-e?

VWẸ Ofovwin rẹ Akpọeje II, isodje ọvo vwẹ Nazi da van ku ẹko rẹ Iseri ri Jihova evo gangan rọ vwọ ta: “Ovwan da sen nẹ ovwan che phi ofovwin vwọso France yẹrẹ Englandi-i, we che je ghwo-o!” Dede nẹ isodje ri Nazi na muegbe fia re vwọ hẹrhẹ ọke rẹ Iseri na vwo sen je sa ayen hwe, jẹ iniọvo na rhọnvwe vwobọ vwẹ ofovwin na-a. Iniọvo na ghini fiudugberi dẹn! Obo re phiare na dje oka ẹro Iseri ri Jihova vwo nẹ ifovwin phia, ayen rhọnvwa vwobọ vwẹ ifovwi-in. A da tobọ djẹ uguegue rẹ ughwu muẹ avwanre dede, avwanre ka ẹbẹre vuọvo rẹ oseghe rẹ akpọ na-a.

1. IHWO RẸ ỌGHẸNẸ EJE ẸGBORHO ỌVUỌVO

Vwẹ ọke rẹ awanre, Jihova koko ihwo rọyen phiyọ ẹgborho ọvuọvo, ọyehẹ ẹgborho rẹ Izrẹl. O se ihwo rẹ Izrẹl “ughwẹ mẹ vwẹ oma rẹ ihwo na ejobi.” (Eyan. 19:5) Ọghẹnẹ je kẹ ayen etọ rẹ ayen ọvo cha dia. Ọtiọyena, Ọghẹnẹ da vuẹ ihwo rẹ Izrẹl nẹ ayen họnre vwọso ẹgborho efa, ayen hwe irivẹ rayen re vẹ ayen gba ga Jihova-a.a

Nonẹna, ihwo re ga Jihova nẹ “ẹgborho kẹgborho rhe, rẹ orua ejobi kugbe ihwo kugbe ephẹrẹ rhe.” (Ẹvwọ. 7:9) Ọ da dianẹ ihwo rẹ Ọghẹnẹ che phi ofovwin nonẹna, kọyen ayen cha họnre ji tobọ hwe iniọvo rayen re vẹ ayen gba ga Jihova.

2. JIHOVA VWẸ IJI KẸ IHWO RẸ IZRẸL RẸ AYEN VWO KPO OFOVWIN

Vwẹ ọke rẹ awanre, Jihova yen brorhiẹn rẹ ọke vẹ oboresorọ rẹ ihwo rẹ Izrẹl vwo kpo ofovwin. Kerẹ udje, Ọghẹnẹ vuẹ ihwo rẹ Izrẹl nẹ ayen ra họnre ihwo ri Kenan rẹ ọyen brorhiẹn rẹ ughwu hwe fikirẹ edjọẹgọ vẹ ọfanrhiẹn rẹ aghẹmrẹ rẹ ayen gbe ji te emọ rayen rẹ ayen vwo ze izobo. Jihova ji iji kẹ ihwo rẹ Izrẹl nẹ ayen ghwọrọ ihwo na eje ri ruẹ erharhe rẹ iruemu nana rere iruemu rayen na vwo jẹ ayen eghworo. (Liv. 18:​24, 25) Ihwo rẹ Izrẹl vwọ ro Otọ rẹ Ive na nu, Ọghẹnẹ je vuẹ ayen ọkievo nẹ ayen kpo ofovwin rere ayen chochọn rẹ Izrẹl vwo nẹ obọ ri ivwighrẹn ri shenyẹ ayen. (2 Sam. 5:​17-25) Dedena, o vwo ọke vuọvo rẹ Jihova vwọ vwẹ uphẹn kẹ ihwo rẹ Izrẹl nẹ ayen vwẹ ọhọre romobọ rayen vwo kpo ofovwi-in. Ayen da vwẹ ọhọre romobọ rayen vwọ ra, ọkieje yen e vwo phiẹ ayen kparobọ.​—Ukeri 14:​41-45; 2 Ikun 35:​20-24.

Nonẹna, Jihova rha vuẹ ihwo nẹ ayen kpo ofovwi-in. Ẹgborho sansan ri phi ofovwin nonẹna ruo ọtiọyen fikirẹ ọdavwẹ romobọ rayen, ọ dia ọhọre rẹ Ọghẹnẹ-ẹ. Ayen phi ofovwin kidie ayen guọnọ vwo etọ buebun, fe phiyọ yẹrẹ nẹrhẹ usuon rayen titi. Kẹ ihwo re tanẹ ayen reyọ odẹ rẹ Ọghẹnẹ vwo phi ofovwin rere ayen sa vwọ sẹro rẹ ẹga rayen yẹrẹ hwe ivwighrẹn rẹ Ọghẹnẹ vwo? Jihova cha sẹro rẹ idibo rọyen je ghwọrọ ivwighrẹn rọyen vwẹ ofovwin rọ cha vwẹ obaro na, rọ dia ofovwin rẹ Amagidọn. (Ẹvwọ. 16:​14, 16) Ituofovwin rẹ Ọghẹnẹ re dia emekashe rọyen vwẹ odjuvwu yen che phi ofovwin yena, ọ dia idibo rọyen rehẹ otọrakpọ na-a.​—Ẹvwọ. 19:​11-15.

3. IHWO RẸ IZRẸL SIVWIN ARHỌ RẸ IHWO RI VWO ESEGBUYOTA KPAHEN JIHOVA

Vwẹ ọke rẹ awanre, ọkieje yen ituofovwin rẹ izrẹl vwo gbe arodọnvwẹ kẹ ihwo ri se Ọghẹnẹ gbuyota, ayen mi rhe hwe ihwo rẹ Jihova brorhiẹn rẹ ughwu hwe. Jokaphiyọ idje ivẹ nana. Dede nẹ Jihova tare nẹ a ghwọrọ Jeriko, jẹ ihwo rẹ Izrẹl sivwin arhọ ri Rehab vẹ orua rọyen fikirẹ esegbuyota rẹ Rehab djephia. (Josh. 2:​9-16; 6:​16, 17) Ọyena vwọ wan nu, ihwo rẹ Izrẹl de ji sivwin ihwo ri Gibeọn eje kidie nẹ ayen djoshọ rẹ Ọghẹnẹ.​—Josh. 9:​3-9, 17-19.

Nonẹna, ẹgborho de phi ofovwin, kohwo kohwo yen ayen hwe. Ọkievo dede, e ji hwe ihwo ri riẹn emuọvo-o ba vwẹ ofovwin na.

4. IHWO RẸ IZRẸL PHI IFOVWIN NENE ODJEKẸ RẸ ỌGHẸNẸ

Vwẹ ọke rẹ awanre, Jihova guọnọre nẹ isodje rẹ Izrẹl phi ofovwin nene odjekẹ rọyen. Kerẹ udje, ọkievo, Ọghẹnẹ vuẹ ihwo rẹ Izrẹl nẹ ayen guọnọ idjerhe rẹ ayen vẹ ivwighrẹn na vwọ “rhuẹrẹ kugbe” tavwen. (Urhi 20:10) Jihova je guọnọ nẹ isodje rẹ Izrẹl sẹro rẹ oma rayen ji ru asan rẹ ayen de mu erhọn na fon, ayen mi ji yerin nene iwan ri Jihova ri shekpahen ẹfuọn. (Urhi 23:​9-14) Ọke buebun yen ituofovwin rehẹ ẹgborho re riariẹ ayen phiyọ vwo gbe eya rẹ irere rẹ ayen phikparobọ na ẹgua, ẹkẹvuọvo Jihova rhọnvwe kẹ ihwo rẹ Izrẹl nẹ ayen ruẹ orharhe rẹ uruemu nana-a. Vwọrẹ uyota, ihwo rẹ Izrẹl cha sa rọvwọn aye rẹ ayen mu rhe ighuvwu-u, jokpanẹ ko te emeranvwe ọvo ayen vwo phi orere na kua nu.​—Urhi 21:​10-13.

Nonẹna, ẹkuotọ buebun rhọnvwa nẹ ayen che phi ofovwin nene irhi re vwo mu. Dede nẹ e ji irhi nana e vwọ sẹro rẹ ihwo ri dia isodje-e, jẹ ọ da ohwo mamọ nẹ ọke buebun na ayen yọnrọn irhi na-a.

5. ỌGHẸNẸ HỌNRE VWỌ KẸ ẸGBORHO RỌYEN

Vwẹ ọke rẹ awanre, Jihova họnre kẹ ihwo rẹ izrẹl, ọke buebun yen ọ vwọ nẹrhẹ ayen phikparobọ vwẹ idjerhe rẹ igbevwunu. Kerẹ udje, idjerhe vọ yen Jihova vwọ chọn ihwo rẹ Izrẹl uko vwo phi orere ri Jeriko kparobọ? Kirobo rẹ Jihova tare, ọke rẹ ihwo rẹ Izrẹl vwo “kuvwie ghwrọrọrọ, igbẹhẹ na de ghwe ghwie she re kpae,” ọnana da nẹrhẹ ayen se phi orere na kparobọ ẹfẹrẹ ọvo. (Josh. 6:20) Kẹ, mavọ yen ayen se vwo phi ihwo rẹ Amọn kparobọ? “Ọrovwohwo de si eragha ride nẹ enu rhe ri she teye ayen . . . e rẹ osio rẹ ibieragha na hweri bu vrẹn e rẹ ihwo rẹ Izrẹl na vwẹ ọlọkọ hwe.” ​—Josh. 10:​6-11.

INENIKRISTI RẸ UYOTA VẸ IHWO EFA YERẸNKUẸGBE VWỌRẸ UFUOMA

Kirobo ra fuẹrẹn cha re na, ẹdia rẹ avwanre hepha nonẹna fẹnẹ ọ rẹ ihwo rẹ Izrẹl rẹ ọke rẹ awanre dibidibi. Ẹkẹvuọvo, ọ dia ofẹnẹ nana re djunute re na ọvo ọyen sorọ avwanre rhe vwobọ vwẹ ifovwi-in. Iroro efa je herọ. Kerẹ udje, Ọghẹnẹ tarophiyotọ nẹ vwẹ oba rẹ ẹdẹ na, ihwo rẹ ọyen yonori “gbe cha kpare ofovwi ọfa-a,” yẹrẹ tobọ vwobọ vwẹ ifovwin vwẹ idjerhe vuọvuo-o. (Aiz. 2:​2-4) Vwọba, Kristi tare nẹ idibo rọyen cha dia ẹbẹre vuọvo rẹ “akpọ na-a.” Kọyen ayen che phioma phiyọ oseghe rẹ akpọ na-a.​—Jọn 15:19.

Kristi ji jiro vwọ kẹ idibo rọyen nẹ ayen ru vrẹ obo rẹ ọyen ruru. O yono ayen nẹ ayen kẹnoma kẹ iruemu re sa nẹrhẹ ayen phi eta phiyọ evun, muophu yẹrẹ vwobọ vwẹ ofovwin. (Mat. 5:​21, 22) O ji yono ayen nẹ ayen dia “ihwo rẹ ufuoma” ji tobọ dje ẹguọnọ phia kẹ ivwighrẹn rayen.​—Mat. 5:​9, 44.

Kẹ avwanre ohwo ọvuọvo vwo? Ọ sa dianẹ e ghini vwo ẹwẹn re vwo phi ofovwi-in, ekẹvuọvo, wo vwo ohwọvo vwẹ ẹwẹn ru wo vwo ru ọvweghrẹn rọ sa ghwa eghwọ yẹrẹ ohẹriẹ rhe ukoko na? E jẹ a davwẹngba vwo si oka rẹ iroro tiọyen nẹ ẹwẹn rẹ avwanre karekare.​—Jems 4:​1, 11.

Ukpẹrẹ a vwọ vwomaba ẹghwọ rẹ ẹgborho na, avwanre toroba ufuoma vẹ ẹguọnọ rọ herọ vwẹ ohri rẹ iniọvo na. (Jọn 13:​34, 35) E jẹ avwanre brorhiẹn re vwo jẹ ẹbẹre vuọvuọ rẹ akpọ na ẹka re vwo rhẹro rẹ ọke rẹ Jihova cha vwọ nẹrhẹ ifovwin fuen re te oba rẹ akpọ na.​—Une 46:9.