Emu ra Vwọ kẹ Eranko Mẹ

“Ọ dia ihwo re wanvrẹ ọvo yen Iseri na yerẹn sasasa-a ji te eranko mẹ ivẹ. Vwẹ ẹdẹ ọvo, Elaine ro mudia kẹrẹ imikpekpa re ghorie na da vwẹ emu vwọ kẹ eranko mẹ ivẹ. Ọyena ghwa vwọ wan nu, o rhe kri tavwen, eranko ivẹ na ki siẹ ufi re me gba phiyọ ohọre rayen na rere ayen se vwo kpo ‘asan rẹ emu na hepha-a.’

“Emeranvwe evo da rhe wan. Emu ra vwọ kẹ eranko na re vwerhen ayen, ota re me vẹ Iseri na tare je vwerhen ovwẹ oma. Ẹkẹvuọvo, mi di sioma uko kidie me guọnọ nene ayen ta eta ibuebu-un. Me vrẹ ẹgbukpe 70 re, jẹ me ghwa riẹn oborẹ Iseri na segbuyota-a. Kidie nẹ ishọshi ri Protestant buebun fa vwẹ djotọ re, mi de brorhiẹn nẹ mẹvwẹ ọvo de yono Baibol na komobọ ọyen me yovwin.

“Vwẹ uvwre rẹ ọke nana, me je mrẹ Iseri efa vwẹ asan sansan vwẹ orere na ri mudia kẹrẹ imikpekpa rayen. Ayen je pha sasasa. Ayen nabọ vwo owenvwe rẹ ayen vwọ reyọ Baibol na vwọ kpahenphiyọ enọ mẹ. Fikirẹ ọnana, ẹroẹvwọsuọ mẹ kpahen ayen da rhe ganphiyọ.

“Ẹdẹ ọvo, Elaine da nọ, ‘Wo vwo imuẹro nẹ eranvwe eyen okẹ ri nẹ obọ rẹ Ọghẹnẹ rhe?’ Me da kpahen, ‘E, o muvwẹro dẹn!’ Elaine de se Aizaya 11:6-9 vwọ kẹ vwẹ. Nọke yena yanran, mi de rhi vwo owenvwe mi vwo yono Baibol na jẹ me guọnọ reyọ ẹbe vuọvo mie ayen se-e.

“Ẹdẹ re vwọ kpahọn, Elaine kugbe ọshare rọyen Brent de nene uvwe ta omota kprẹn rọ nẹrhẹ oma vwerhen ovwẹ. Ayen de jiro kẹ vwẹ nẹ mi se ọbe rẹ Matiu re te Iruo Rẹ Iyinkọn Na rere me sa vwọ riẹn obo ra guọnọ mie Onenikristi rẹ uyota. Mi de ghini se. Ọmọke vwọ wan nu, Brent kugbe Elaine da vwẹ uyono ri Baibol vwo mu kẹ vwẹ. Ọke yena jẹ ukpe ri 2016 te ubro re.

“Mi nẹ kiọkiọkiọ hẹrhẹ uyono ri Baibol mẹ kudughwrẹn kudughwrẹn kugbe emẹvwa re ruẹ vwẹ Ọguan Ruvie. Oma vwerhen ovwẹ gangan nẹ mi yono oborẹ Baibol na ghene ta. Ẹgbukpe ọvo gbẹ ghwa vwọ wan nu, mi de bromaphiyame kerẹ Oseri ri Jihova. Enẹna mi te ẹgbukpe 79 re, oma vwerhen ovwẹ nẹ me mrẹ ẹga rẹ uyota na vughe re. Jihova nabọ bruba kẹ vwẹ rọ vwọ reyọ ovwẹ vwọba orua rọyen rọhẹ akpọeje.”