Rhoma Bọn Oyerinkugbe Wẹn vẹ Jihova Gan

KUKPE kukpe yen a vwọ rhoma reyọ ihwo vwọ cha ukoko na. Vwẹ ẹro roro “aghọghọ [rọ] herọ vwẹ obo odjuvwu” ọke rẹ ohwo ọvo de rhivwin rhe ukoko na. (Luk 15:7, 10) Ọ da dianẹ a reyọ owẹ rhivwin rhe ukoko na re, jẹ o mu we ẹro nẹ oma vwerhen Jesu, emekashe kugbe Jihova mamọ rẹ ayen vwọ mrẹ nẹ wọ rhoma rhe dia ẹbẹre ọvo rẹ ukoko na re. Ẹkẹvuọvo, wọ vwọ rhoma bọn oyerinkugbe wẹn vẹ Jihova gan na, wo se hirharoku egbabọse evo. Erhọ yen egbabọse na, kidie yen sa chọn wẹ uko?

ERHỌ YEN EGBABỌSE NA?

Ẹwẹn rẹ obrorhiẹn rẹ ihwo evo ji kpokpo ayen a da tobọ reyọ ayen rhivwin nu. Ọkiọvo wo se vwo ẹruọ rẹ obo re phia kẹ Ovie Devid. Ọghẹnẹ tobọ vwọ reyọ imwuemwu rọyen vwo ghovwo nu, ọ da ta: “Orukuruku mẹ re vwe phihọ.” (Une 40:12; 65:3) Ohwo de rhivwin rhe ukoko na nu, ikpe buebun da tobọ wanre dede ẹwẹn rẹ obrorhiẹn rọyen ji se rhe kpokpo, oma je sa ra vuọ. Isabelle ra djẹ ne ukoko vwẹ ẹgbukpe 20 tavwen o ki rhivwin rhe tare nẹ, “me mrẹrẹ bẹnbẹn me vwọ rhọvwen nẹ Jihova se vwo ghovwo uvwẹ.” a Siẹrẹ ẹwẹn wẹn da kuọnrọn, wọ sa rhoma kpare oyerinkugbe wẹn vi Jihova kufia. (Isẹ 24:10) Davwẹngba wẹn, wo jẹ ọyena phia-a.

Ihwo evo roro nẹ ayen rhe che se ru obo ri fori ayen sa vwọ rhoma ru oyerinkugbe rayen vi Jihova gan ọfa-a. Ra vwọ rhoma reyọ rhivwin nu, Antoine da ta: “Mi niro nẹ erọnvwọn eje ri mi ruẹ jovwo kerẹ Onenikristi chọrọ ovwẹ ẹro re.” Fikirẹ iroro tiọyena, ihwo evo ki siomauko rẹ ayen vwo vwobọ vọnvọn vwẹ irueru rẹ ẹga na.

Kerẹ udje, vwẹ ẹwẹn roro ohwo ro vwo ẹguọnọ rẹ uwevwin rọyen mamọ, ogiribo rode ro djuru da ghwọrọ uwevwin na totọ. Ofu se dje ohwo tiọyena rọ vwọ rhoma bọn uwevwin na siẹrẹ o de roro kpahen ẹgba kugbe ọke rọ cha reyọ ọ ke sa rhoma bọn uwevwin na re. Vwẹ idjerhe ọvuọvo na, siẹrẹ umwemwu ọgangan da guọghọ oyerinkugbe wẹn vi Jihova jovwore, wo se roro nẹ wọ sa vwọ rhoma rhuẹrẹ oyerinkugbe wẹn vẹ Jihova phiyọ, owian na cha gan mamọ. Ẹkẹvuọvo, ọ dia owẹ ọvo yen cha wian owian na-a.

Jihova durhie avwanre: “Mọ vwọ ọke na re avwanre jẹn iroro kugbe.” (Aiz. 1:18) Wọ davwẹngba owẹ vẹ Jihova vwọ “jẹn iroro kugbe” yẹrẹ rhuẹrẹ kugbe re. Jihova vwo ẹguọnọ wẹn fikirẹ ẹgbaẹdavwọn yena. Gbe di roro: Kidie nẹ wo rhivwin bru Jihova rhire na, kọ sa vwẹ owẹ vwo dje kẹ Idẹbono nẹ ọvwọrofian ọyen o ruẹ.—Isẹ 27:11.

Wo de rhivwin bru Jihova rhe, ju wo sikẹre Jihova phiyọ re, Jihova veri nẹ ọyen ji che sikẹre owẹ. (Jems 4:8) Ẹkẹvuọvo, o ji vwo emu ọfa rẹ wo che ru vwọ vrẹ ihwo vwọ riẹn nẹ wo rhivwin bru Jihova rhire. Ofori nẹ wọ rha kpuriẹnphiyọ ẹguọnọ ru wo vwo kpahen Ọsẹ wẹn kugbe ugbeyan wẹn, Jihova. Mavọ wo se vwo ru ọtiọyen?

VWO OBO WỌ VWỌ TUA RU WỌ SA YANMU WỌ VWỌ RHOMA BỌN OYERINKUGBE WẸN VI JIHOVA GAN NA

Davwẹngba vwo vwo oborẹ wọ vwọ tua ru wọ sa yanmu. Ọ sa dianẹ wọ je karophiyọ iyono eghanghanre wo yono kpahen Jihova vẹ ive rẹ iparadaisi rọyen jovwo. Jẹ, enẹna, ofori nẹ wọ rhoma vwo omamọ rẹ ọrhuẹrẹphiyotọ romobọ vwọ kẹ erọnvwọn kerẹ, iruo rẹ aghwoghwo na, uyono ẹra kugbe ọke ro wẹ vẹ inọvo na ghwọrọ kuẹgbe. Fuẹrẹn obo ra vwọ tua rehẹ obotọ na.

Wẹ vẹ Jihova ta ota kugbe ọkieje. Jihova riẹnre nẹ ẹwẹn rẹ obrorhiẹn wẹn de kpokpo uwe ọkieje, ọ cha nẹrhẹ ọ bẹn vwọ kẹ wẹ ru wọ vwọ nẹrhovwo rhe. (Rom 8:26) Ẹkẹvuọvo, “wo gbe ẹdẹ rẹ ẹrhovwo-o,” vuẹ Jihova nẹ wọ ghene guọnọ dia ugbeyan rọyen. (Rom 12:12) Andrej da karophiyọ: “Ẹwẹn ro brorhiẹn mẹ kpokpo uvwe mamọ, oma je vo ovwe mamọ. Jẹ, kọke kọke me da nẹrhovwo nu ẹwẹn mẹ ko totọ. Oma ko fuvwe.” Wọ rha riẹn oborẹ wọ cha nẹrhovwo kpahe-en, gbe roro kpahen ẹrhovwo ro kurhẹriẹ rẹ Ovie Devid ra niyẹnrẹn rọyen phiyọ ọbe rẹ Une Rẹ Ejiro 51 vẹ 65.

Yono Baibol na ọkieje. Ọnana cha chọn wẹ uko vwo ru esegbuyota wẹn gan je chọn wẹn uko vwo ru ẹguọnọ ru wo vwo kpahen Jihova ganphiyọ. (Une 19:7-11) “Omamọ rẹ ọrhuẹrẹphiyotọ rẹ isese ri Baibol kugbe uyono romobọ ri mi vwori-i yen sorọ me vwo vwiẹrẹ vwẹ ẹsosuọ, mi de gbe Jihova ku. Me rha guọnọ vwariẹn oruchọ yena-a, ọtiọyena mi de brorhiẹn re me vwọ vwẹ uyono romobọ vwo ru ekpọfia mẹ. Eriyin Felipe tare.” Wo ji se ru ọtiọyen. Wọ da guọnọ ukẹcha ru wọ vwọ jẹ uyovwinrota ru wo se vwo ru uyono romobọ, wọ sa nọ mie ugbeyan ọvo ro vwo uvi rẹ oyerinkugbe vi Jihova.

Rhoma bọn oyerinkugbe wẹn vẹ ọ rẹ iniọvo wẹn gan. Ihwo evo ri rhivwin rhe ukoko na no nẹ ivun rayen miovwon ihwo efa. Larissa da ta: “Oma vo ovwẹ mamọ. Ki mi no nẹ me kpare ẹroẹvwọsuọ rẹ iniọvo mẹ vwo kpahen ovwẹ jovwo kufia re. Iroro nana kpokpo uvwe vwẹ ọke grongron.” Jẹ o mu uwẹ ẹro nẹ ekpako na vẹ ihwo efa vwẹ ukoko na muegbe rẹ ayen vwọ chọn wẹ uko vwọ rhoma bọn oyerinkugbe wẹn vẹ Jihova gan. (Ni ekpeti na “Obo re Ekpako Se Ru”) Oma vwerhen ayen nẹ wo rhivwin rhe, ayen guọnọre nẹ omavwerhen owẹ.—Isẹ 17:17.

Die yen se si we kẹre ukoko na phiyọ? Wẹ vẹ iniọvo na vwobọ vwẹ iruo rẹ aghwoghwo na ọkieje, wọ me je rha vwomaba iniọvo rẹ ukoko na vwẹ uyono ọkieje. Mavọ yen ọna sa vwọ chọn wẹ uko? Felix da ta: “Iniọvo rẹ ukoko na rhẹro rẹ ọke ri mi che vwo rhivwin rhe. Me mrẹvughe nẹ ayen vwo ẹguọnọ mẹ. Ayen eje chọn vwẹ uko vwọ rhoma vwomaba ukoko na, ayen je chọn vwẹ uko vwọ riẹn nẹ Jihova vwo ghwovwo uvwẹ re, nẹ mi se muomaphiyọ ẹga ri Jihova enẹna.”—Ni ekpeti na “Die Wo Se Ru?”

WO JẸ OMA RHỌ WẸ-Ẹ!

Wọ vwọ rhoma bọn oyerinkugbe wẹn vi Jihova gan na, ọkieje yen Idẹbono cha rha vwẹ ebẹnbẹn sansan vwọ davwan owẹ rere wọ sa vwọ vwiẹrẹ. (Luk 4:13) Muegbe wọ vwọ kpuriẹnphiyọ oyerinkugbe wẹn vi Jihova enẹna.

Vwọ kpahen igodẹ rọyen, Jihova veri: “Ke me guọnọ i ri ghwruru; i ri suosuori ke me vwẹ ayen rhivwi rhe, e re awọ rayen vwirhiri ke me gba ayen, e re oma rhọ ke me kẹ ayen ogangan.” (Izi. 34:16) Jihova chọn ihwo efa buebun uko vwọ rhoma bọn oyerinkugbe rayen vẹ ọyen gan re. Jẹ o mu uwe ẹro nẹ o muegbe rọ vwọ chọn wẹ uko vwo ru oyerinkugbe wẹn vẹ ọ rọyen gan kokoroko.

Obo re Ekpako Se Ru

O vwo emu buebun rẹ ekpako na se ru vwọ chọn ihwo ri rhivwin rhe ukoko na uko vwọ rhoma bọn oyerinkugbe rayen vẹ Jihova gan. Jokaphiyọ oborẹ ayen se ru vwọ chọn ihwo tiọyena uko.

Kẹ ayen imuẹro. Ọyinkọn Pọl riẹn ọnana kpahen ohwo ro rhivwin rhe ukoko na nẹ, “oja ro rere phihọ na [se] rhe hwe.” (2 Kọr. 2:7) Ọnana sa nẹrhẹ ofu dje, je so ọkuọrọn vwọ kẹ. Pọl vwẹ uchebro vwọ kẹ ukoko na: “Ovwan ki vwo ghovwo re bro uche.” Ofori nẹ a vwẹ imuẹro vwọ kẹ ihwo ri rhivwin rhe ukoko na nẹ Jihova vẹ iniọvo rẹ ukoko na vwo ẹguọnọ rayen mamọ. E de jiri ayen ọkieje je vwẹ ukẹcha ro fori vwọ kẹ ayen, ọnana che phiuduphiyọ ayen awọ.

Wọ vẹ ayen nẹrhovwo kugbe. “Ẹrhovwo rẹ ọvwata sẹ nọ umuesia.” (Jems 5:16) Larissa ra ta ota kpahen siẹvure da ta: “Me vuẹ ekpako na kpahen ẹwẹn ivivẹ ro rhe vwe kugbe oshọ ro mu vwe. Ayen nene uvwe nẹrhovwo kugbe. Me da rhe mrẹvughe nẹ ọ dia ivun mẹ miovwo ekpako na-a. Ayen guọnọ chọn vwẹ uko vwọ rhoma vwo omamọ rẹ oyerinkugbe vẹ Jihova.” Theo da ta: “Ẹrhovwo rẹ ekpako na nene uvwe nẹ kugbe na kẹvwẹ imuẹro nẹ, Jihova ghini vwo ẹguọnọ mẹ, ọ je mrẹ asan mi de ruẹ yovwẹn ọ dia asan ri mi de ruẹ chọ ọvo-o.”

Vwẹ ayen vwo mu igbeyan. Ofori nẹ a vwẹ ugbeyan vwo mu ihwo ri rhivwin rhe ukoko na. Ọkpako ọvo re se Justin da ta: “Reyọ kuphẹn kuphẹn ro rhiephiyọ eje vwo nene ayen wian vwẹ iruo rẹ aghwoghwo na, je kọn bru ayen ra. Ra vwọ vwẹ ugbeyan vwo mu ayen ghanre mamọ.” Ọkpako ọfa re se Henry da je ta: “Iniọvo efa da mrẹ oborẹ ekpako na nene ihwo ri rhivwin rhe ukoko na yerẹn wan, ọnana ko ji che mu ayen vwo ru ọtiọyen.”

Chọn ayen uko vwo ru uyono. Oniọvo ro tedje sa vwẹ ukẹcha vwọ kẹ ohwo ro rhivwin rhe ukoko na vwo vwo ọrhuẹrẹphiyotọ rẹ uyono romobọ rọ ghwotọ. Ọkpako ọvo re se Darko da ta: “Ọkieje yen mi vwọ vuẹ ayen kpahen efe eghanghanre re me mrẹ vwẹ uyono romobọ mẹ rere mi se vwo dje kẹ ayen nẹ erere no cha siẹrẹ ohwo de ruẹ uyono romobọ. Mi ji nene ayen yono ẹbe ukoko na evo kuẹgbe.” Ọkpako ọfa re se Clayton da je ta: “Mi jiro kẹ ayen nẹ ayen yono kpahen ikuegbe ri ihwo evo vwẹ Baibol na ri rhiẹromrẹ oborẹ ayen ji hirharokuẹ na.”

Dia omamọ rẹ osuigodẹ. Ihwo ri rhivwin rhe ukoko na mrẹ ekpako na kerẹ Iguẹdjọ. Enẹna ofori nẹ ayen mrẹ ayen kerẹ isuigodẹ vwọ vrẹ obo ri jovwo. (Jer. 23:4) Nabọ kerhọ rayen wo ji jiri ayen. Nene ayen ta ota ọkieje. Jokaphiyọ oborẹ ọkpako ọvo re se Marcus ruẹ ọke rẹ ayen da kọn bru iniọvo na ra: “Avwanre vẹ ayen roro kpahen ẹdia evo vwẹ Baibol na, jiri ayen, je vwẹ imuẹro vwọ kẹ ayen nẹ kidie nẹ ayen wian gan rere ayen se vwo rhivwin bru Jihova rhe na, oma rayen vwerhan avwanre ọtiọyen ji te Jihova. Tavwen avwanre ki kpo, avwanre vẹ ayen rhuẹrẹ ẹdẹ ọfa phiyọ rẹ avwanre cha vwọ rhoma kọn bru ayen ra.”

a E wene edẹ evo vwẹ uyovwinrota na.