Wọ Riẹnre Jovwo?

Diesorọ ẹwẹn rẹ Stivin sa vwọ dia dọe ọke ro vwo hirharoku omukpahen?

STIVIN mudia obaro rẹ eshare 71 rẹ ophu muẹ. Eshare nana iguẹdjọ vwẹ aguare rẹ Sanhedrin, rọ dia aguare rọ ma kenu vwẹ ẹgborho rẹ Izrẹl. Eriyina, ayen jẹ evo usun rẹ ihwo ri me vwo ogangan vwẹ ẹgborho na. Orherẹn Rode Kaifas rọ dia osun rẹ aguare na ọke re vwo brorhiẹn rẹ ughwu hwe Jesu vwẹ emeranvwe evo re wanre na, yen se aguare na koko. (Mat. 26:57, 59; Iruo 6:8-12) Rẹ iguẹdjọ na vwo djunute erọnvwọn sansan ra vwẹ fiki rọyen muo rhe aguare na, opharo rẹ Stivin da rhe dia “kerẹ opharo rẹ amakashe.”—Iruo 6:13-15.

Die nẹrhẹ ẹwẹn rẹ Stivin dia dọe vwẹ ọke rẹ omukpahen ọgangan nana? Tavwen e ki muo kpo aguare rẹ Sanhedrin na, ẹwẹn ọfuanfon chọn rọ uko vwo muomaphiyọ iruo rẹ Uvie na. (Iruo 6:3-7) Ẹwẹn ọfuanfon vuọvo yena yen je chọn uko vwọ karophiyọ ẹkpo rẹ Baibol sansan ọke rọ vwọ hẹ aguare na, ọ da je dia obruche kẹ. (Jọn 14:16) Wọ sa mrẹ eta rẹ uduoyivwin rọ vwọ chochọn rẹ oma rọyen vwẹ aguare na, vwẹ uyovwin 7 rẹ ọbe rẹ Iruo Rẹ Iyinkọn Na. Ẹwẹn ọfuanfon na chọn rọ uko vwọ karophiyọ omarẹ ẹkpo rẹ Baibol 20 vwẹ ẹbẹre ra vwẹ Hibru si vwẹ Baibol na. (Jọn 14:26) Emu ọfa rọ je chọn Stivin uko vwo vwo esegbuyota ọgangan, kẹ emramrẹ ra vwọ nẹ kpahen Jesu ro mudia obọrhen rẹ Ọghẹnẹ.​—Iruo 7:54-56, 59, 60.

Avwanre se hirharoku uguegue vẹ omukpahen ẹdẹ ọvo. (Jọn 15:20) Ẹkẹvuọvo, ẹwẹn ọfuanfon rẹ Ọghẹnẹ sa chọn avwanre uko siẹrẹ e de yono Ota rẹ Ọghẹnẹ ji vwobọ vwẹ iruo rẹ aghwoghwo na ọkieje. Ẹwẹn ọfuanfon na cha kẹ avwanre ẹgba re se vwo chirakon rẹ ẹvwọsuọ, je sẹro rẹ ufuoma rẹ ubiudu.​—1 Pita 4:12-14.