Orua ro nẹ asan rẹ oghwọrọ ri kpregede guọghọre

Die Yen Baibol na ta Kpahen Oghwọrọ ri Kpregede?

Ẹkpahọnphiyọ ri Baibol na

Ọ dia Ọghẹnẹ yen so oghwọrọ ri kpregede re phia nonẹnaa, o vwo ọdavwẹ rẹ ihwo rẹ oghwọrọ ri kpregede teri oma. Uvie rẹ Ọghẹnẹ che phioba phiyọ erọnvwọn eje re so ojaẹriọ nonẹna, ọtiọyen ji te oghwọrọ ri kpregede. Asaọkiephana, Ọghẹnẹ vwẹ uchebro vwọ kẹ ihwo rẹ oghwọrọ ri kpregede teri oma.—2 Kọrẹnt 1:3.

Diesorọ o se vwo mu avwanre ẹro nẹ ọ dia Ọghẹnẹ reyọ oghwọrọ ri kpregede vwo gboja kẹ avwanree?

Oghwọrọ ri kpregede fẹnẹ ẹgba rehẹ evunrẹ ekuakua rẹ Ọghẹnẹ mare rọ reyọ vwo ruiruo, kirobo ra niyẹnrẹn rọye vwẹ Baibol na.

Oghwọrọ ri kpregede hwe je so omaẹwan kẹ kohwo kohwo. Vwọ fẹnẹ ọyena, irumwemwu na ọvo yen ghwọrọre ọke rẹ Ọghẹnẹ vwọ vwẹ ẹdjọeguo rọyen vwọphia, kirobo ra niyẹnrẹn rọye vwẹ Baibol na. Kerẹ udje, ọke rẹ Ọghẹnẹ vwọ ghwọrọ irere ri Sodọm vẹ Gomora, ọ da sẹro ri Lọt rọ dia omamọ rẹ ohwo vẹ emetẹ rọye ivẹ. (Jẹnẹsis 19:29, 30) Ọghẹnẹ riẹn ubiudu rẹ ihwo, ọtiọyena irumwemwu na ọvo kọyen ọ ghwọrọre.—Jẹnẹsis 18:23-32; 1 Samuẹl 16:7.
Ọke buebun na oghwọrọ ri kpregede vwẹ orhọesio vwọ kẹ ohwo ọ ke phiaa. Vwọ fẹnẹ ọyena, Ọghẹnẹ vwẹ orhọesio vwọ kẹ irumwemwu na tavwen ọ ke ghwọrọ ayen. Ihwo ri nyẹme vwo uphẹn rẹ ayen vwọ vrabọ rẹ oghwọrọ yena.—Jẹnẹsis 7:1-5; Matiu 24:38, 39.
Ihworakpọ so oghwọrọ ri kpregede te ẹdia evo. Vwẹ idjerhe vọ? Womarẹ ayen vwọ miovwo akpọ na je bọn iwevwin phiyọ ekogho rẹ oghwe vẹ aruọke ri wene re je so oghwọrọ da vwomaphia mamọ, ọtiọyen ji te ekogho rẹ etọ de kpogho. (Ẹvwọphia 11:18) A cha sa hanrha Ọghẹnẹ vwọ kẹ ojẹ rayen naa.—Isẹ 19:3.

Oghwọrọ ri kpregede ọyen oka rẹ ẹdẹ re koba na?

E, aroẹmrẹ ri Baibol na jẹ avwanre riẹn nẹ oghwọrọ ri kpregede cha vwomaphia vwẹ “okuphiyọ rẹ eyeren na” yẹrẹ “ẹdẹ re koba na.” (Matiu 24:3; 2 Timoti 3:1) Kerẹ udje, vwọ kpahen ọke avwanre na, Jesu da ta: “Emu cha kanre, etọ che kpogho nẹ asan ọvo vwo kpo ọfa.” (Matiu 24:7) Kẹrẹkpẹ, Ọghẹnẹ che si kemu kemu rọ so ojaẹriọ no, ji te oghwọrọ ri kpregede.—Ẹvwọphia 21:3, 4.

Mavọ yen Ọghẹnẹ vwọ vwẹ ukẹcha kẹ ihwo rẹ oghwọrọ ri kpregede teri oma?

Ọghẹnẹ vwẹ ota rọyen rọ dia Baibol na vwọ cha ayen uko. Baibol na kẹ avwanre imuẹro nẹ Ọghẹnẹ vwo ọdavwẹ rẹ avwanre, ọ je da ọke avwanre da rioja. (Aizaya 63:9; 1 Pita 5:6, 7) O ji ve ive rẹ ọke rẹ oghwọrọ ri kpregede che vwo no karekare.—Ni “Awọreta ri Baibol ra sa reyọ vwọ vwẹ ukẹcha kẹ ihwo rẹ oghwọrọ ri kpregede teri oma.”
Ọghẹnẹ vwẹ ihwo rọyen vwọ cha ayen uko. Ihwo rẹ Ọghẹnẹ vwẹ otọrakpọ na vwẹrokere udje rẹ Jesu phi phiyotọ. A mraro rọyen phiyotọ nẹ Jesu cha vwẹ uchebro vwọ kẹ “udu ro vwirhiri” vẹ “ihwo ri muomahọ.” (Aizaya 61:1, 2) Ihwo rẹ Ọghẹnẹ davwẹngba vwọ vwẹrokere Jesu vwo ru ọtiọyen.—Jọn 13:15.

Ọghẹnẹ je reyọ ihwo rọyen vwọ vwẹ ukẹcha rẹ ugboma vwọ kẹ ihwo rẹ oghwọrọ ri kpregede teri oma.—Iruo rẹ Iyinkọn Na 11:28-30; Galesha 6:10.

Iseri ri Jihova re rhuẹrẹ uwevwin vwẹ Puerto Rico — Iseri ri Jihova re vwẹ ukẹcha kẹ ihwo rẹ odju ọgangan guọghọ uwevwin rayen vwẹ Puerto Rico

Odjekẹ ri Baibol na sa vwẹ ukẹcha kẹ avwanre vwo muegbe hẹrhẹ oghwọrọ ri kpregede?

E. Dede nẹ Baibol na dia ọbe rọ vuẹ ohwo obo re che ru ọke rẹ oghwọrọ ri kpregede da phiaa, jẹ o vwo odjekẹ re sa cha avwanre uko. Kerẹ udje:

Muegbe rẹ obo wo che ru phiyotọ tavwen oghwọrọ ri kpregede ke phia. Baibol na tare nẹ “ọvwiroro da mrẹ ukpokpogho rọ cha ko sioma rọye reyọ.” (Isẹ 22:3) Ọyen emu rẹ aghwanre re vwo muegbe phiyotọ. Egbemuo tiọyena churobọ si erọnvwọn sansan re che phi phiyọ ekpu re se mu siẹrẹ emu okpakpa da vwomaphia, a vẹ orua me je ta ota kpahen asan ra cha djẹ ra siẹrẹ oghwọrọ ri kpregede da vwomaphia.
Ni arhọ ghanghanre vrẹ ekuakua rẹ wo vwori. Baibol na jẹ avwanre riẹn nẹ “avwanre ghwa orọnvwọn ọvuọvo rhe akpọ na-a, avwanre ji che se mu orọnvwọn ọvuọvo no-o.” (1 Timoti 6:7, 8) Ofori nẹ e vwo ẹwẹn ra vwọ yanjẹ uwevwin vẹ ekuakua re vwori vwo a sa vwọ djẹ vrabọ rẹ oghwọrọ. E jẹ a karophiyọ nẹ arhọ avwanre ghanre vrẹ ekuakua re vwori.—Matiu 6:25.

Awọreta ri Baibol ra sa reyọ vwọ vwẹ ukẹcha kẹ ihwo rẹ oghwọrọ ri kpregede teri oma

Jẹnẹsis 18:25: “A gha [Ọghẹnẹ] . . . vwo hwe evwata kugbe iruimwemwu . . . Obrorhiẹ rẹ akpọ na rhe se ru obo re gbare?”

Obo ro mudiaphiyọ: Ọkieje yen Ọghẹnẹ vwo ru obo ri yovwirin; a cha sa hanrhọ siẹrẹ omamọ rẹ ihwo de ghwẹ fikirẹ oghwọrọ ri kpregedee.

Une rẹ Ejiro 46:1, 2: “Ọghẹnẹ odjahọ kugbe ẹgba rẹ avwanre, omamọ rẹ ọchuko ra mrẹ, vwẹ ọke rẹ ukpokpogho. Fiki rẹ ọtiọye na avwanre gbe djẹ oshọ-ọ ọ da tobọ dianẹ akpọ na kurhẹriẹ dede.”

Obo ro mudiaphiyọ: A sa vwẹroso Ọghẹnẹ nẹ ọ cha vwẹ ukẹcha kẹ avwanre o toro obo re phiaree.

Aizaya 63:9: “Vwẹ evun rẹ ukpokpogho rayen ejobi ọye e kpokpori.”

Obo ro mudiaphiyọ: Ọghẹnẹ vwo erorokẹ—ọ da siẹrẹ avwanre da rioja.

Jọn 5:28, 29: “Unọke na cha rẹ ihwo eje rehẹ evunrẹ ishi rẹ ẹkarophiyọ che vwo nyo urhuru [ri Jesu] kẹ ayen che vrẹn phia.”

Obo ro mudiaphiyọ: E se vwo iphiẹrophiyọ nẹ a cha rhoma mrẹ ihwo rẹ avwanre vwo ẹguọnọ kpahen ri ghwuru kidie Ọghẹnẹ cha vwẹ ẹgba kẹ Jesu vwọ kpare ayen nẹ ushi.

1 Pita 5:6, 7: “Ovwan vwomakpotọ vwẹ obotọ rẹ obọ ọgangan rẹ Ọghẹnẹ . . . ovwan vwẹ ẹnwan rẹ ovwan ejobi vwọ ya, kidie ọyen vwẹrote ovwan.”

Obo ro mudiaphiyọ: Ọghẹnẹ vwo ọdavwẹ okokodo kpahen avwanre, ọ je guọnọ nẹ a vwẹ ẹnwan rẹ avwanre vwọ ya.

Ẹvwọphia 21:4: “[Ọghẹnẹ] che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a. Erọnvwọn awanre na wanvrẹ re.”

Obo ro mudiaphiyọ: Ọghẹnẹ che si kemu kemu rọ so ojaẹriọ no, ọtiọyen ji te oghwọrọ ri kpregede.