UKẸCHA VWỌ KẸ ORUA
Oborẹ Wọ Sa Vwọ Chọn Ọmọ Wẹn Uko Vwọ Yan Obaro Vwẹ Isikuru
Ọmọ wẹn vwẹ omavwerhovwẹn kpahen isikuru-u, ọ rhọvwan ruiruo ra vwọ kẹ vwẹ isikuru siẹvo kẹ ẹbe ese-e. Die yen se nẹ obuko rọyen rhe? Ọnana cha nẹrhẹ o she ọdavwini, uruemu rọyen ko che miovwin phiyọ. Mavọ yen wọ sa vwọ chọn ọmọ wẹn uko vwọ yan obaro vwẹ isikuru?
Oborẹ ofori nẹ wọ riẹn
Okeke rẹ esẹ vẹ ini so ebẹnbẹn kẹ emọ. Siẹrẹ wo de kpokpo emọ wẹn ọkieje kpahen iruo rẹ isikuru rayen, ọ sa so ẹwan kẹ ayen vwẹ isikuru ji te ọke ayen da hẹ uwevwin! Ọnana sa nẹrhẹ ọmọ na gun efian, si irezọtu rọyen nu, wene obọ re si phiyọ, yẹrẹ dobọ rẹ isikuru ẹra ji. Ọnana cha nẹrhẹ erọnvwọn rhoma miovwinphiyọ.
Ẹse re ruẹ kẹ emọ siẹrẹ ayen da wan sa so okpetu. Ọsẹ ọvo re se Andrew da ta: “Ọmọtẹ avwanre se vwo ru yovwinphiyọ vwẹ isikuru, avwanre ki ruẹse vwọ kẹ siẹrẹ ọ da wan ọdavwini, ẹkẹvuọvo ọnana da nẹrhẹ ọ tẹnrovi ẹse re ruẹ kẹ na. Ọke o de she ọdavwini, ofu ko dje kidie ọ riẹnre nẹ a cha dẹ emu vuọvo kẹ-ẹ ukperẹ o vwo roro kpahen obo ro se vwo ru yovwinphiyọ.”
A vwọ harhan iyono na che fierere-e. Ọmọ wẹn se roro nẹ a guọnọ ẹgbaẹdavwọn vuọvo a ke sa wan vwẹ isikuru-u. Siẹrẹ o de ru chọ ko guon nyẹ ihwo efa, kọ je guọnọ nẹ ihwo efa rhuẹrẹ ebẹnbẹn rọyen phiyọ. Kọyen, ọmọ wẹn rhe che vwo uruemu ra vwọ rhọnvwa phiyọ oruchọ romobọ-ọ, rọ dia uruemu ro fori nẹ omiragua vwo.
Obo wo se ru
Sun ophu wẹn. Ophu de mu we, wo nene ọmọ wẹn ta ota kpahen irhezọtu rọye-en. Ọsẹ ọvo re se Brett da ta: “Siẹrẹ mẹ vẹ aye mẹ da vwẹ ẹwẹn kpotọ nene ọmọ avwanre tota, erhuvwu no cha.”
Odjekẹ ri Baibol: “Fobọ nyo ẹme, ọ fobọ, kpahe ota-a, ọ fobọ mu ophu-u.”—Jems 1:19.
Riẹn obo re so ebẹnbẹn na. Erọnvwọn evo re nẹrhẹ emọ she ọdavwini yen: ọnyẹ rẹ otu, ewewene rẹ isikuru, oshọ rẹ ọdavwini, ebẹnbẹn rẹ orua, jẹ oma erovwon, ehẹha yẹrẹ jẹ ọrhuẹrẹphiyotọ evwo. Wo roro nẹ ọmọ wẹn ọvwiẹrẹ-ẹ.
Odjekẹ ri Baibol: “Ohwo rọ kerhọn rẹ ota ko yovwi ke.”—Isẹ 16:20.
Guọnọ omamọ asan ro fo vwọ kẹ uyono. Rhuẹrẹ ọke rẹ ayen vwo se ẹbe, ji ruiruo ra vwọ kẹ ayen vwẹ isikuru. Jẹ ayen ru ọnana vwẹ asan ro fuoma rẹ erọnvwọn efa vwo jẹ ẹwẹn rayen e muo reyọ (kerẹ itẹlivishọni vẹ ifonu). Ghare iruo ra vwo kẹ ayen vwẹ isikuru ẹkuẹko rere ayen se vwo muomaphiyọ. Ọsẹ ọvo re se Hector vwẹ Germany da ta: “Ọdavwini de siẹkẹrẹ, kẹdẹ kẹdẹ yen avwanre vwo muegbe, ukperẹ a vwọ hẹrhẹ te ẹdẹ ọdavwini na.”
Odjekẹ ri Baibol: “O vwo . . . ọkẹ kẹ kemu kemu.”—Aghwoghwo 3:1.
Jiri ẹbe ese kẹ ọmọ wẹn. Ọmọ wẹn da mrẹ erere rọ herọ siẹrẹ o dẹ kpo isikuru asaọkiephana, o che muo vwo muomaphiyọ ẹbe eyono. Kerẹ udje, imasi sa chọn uko vwọ riẹn obo rọ ghwọrọ igho rọyen wan.
Odjekẹ: Vwẹ ukẹcha kẹ ọmọ wẹn vwọ riẹn obo ro che ruiruo ra vwọ kẹ vwẹ isikuru, ẹkẹvuọvo wo ruo vwọ kẹ-ẹ. Andrew da ta: “Ọmọte avwanre rhọvwan ruiruo ra vwọ kẹ vwẹ isikuru-u, ọ guọnọre nẹ avwanre ruo vwọ kẹ.” Yono ọmọ wẹn oborẹ ọyen ọvo se vwo ruiruo ra vwọ kẹ vwẹ isikuru.