Diesorọ Ohwekufia ri Holocaust na Vwọ Phia? Diesorọ Ọghẹnẹ Rha Da Obọ Rọyen Ji-i?
Buebun rẹ ihwo re nọ onọ nana rioja rẹ okaroka komobọ, jẹ uchebro yen ayen guọnọre ọ dia ẹkpahọphiyọ ọvo-o. Buebun rẹ ihwo ni ohwekufia ri Holocaust na kerẹ umwemwu ro hwerhi, ọtiọyen na kọ bẹn ayen vwo se Ọghẹnẹ gbuyota.
Ororochọ evo kpahen Ọghẹnẹ kugbe Ohwekufia ri Holocaust na
Ofian: Ọ chọre ra vwọ nọ Ọghẹnẹ oboresorọ ọ vwọ vwẹ uphẹn kẹ ohwekufia ri Holocaust na nẹ ọ phia.
Uyota: Ihwo ri vwo esegbuyota je nọ oboresorọ Ọghẹnẹ vwọ vwẹ uphẹn kẹ ojaeriọ re. Kerẹ udje, ọmraro Habakọk da nọ Ọghẹnẹ: “Diesorọ wọ vwọ vwẹ uphẹn kẹ ohọnre, jẹ urhi ẹyọrọn, umiovwo, kugbe umwemwu nẹ ọ vọn asan eje?” (Habakọk 1:3, Contemporary English Version) Ukperẹ ọ vwo ghwọku Habakọk, Ọghẹnẹ da de ruo re vwo si onọ rọyen na phiyọ Baibol na rere avwanre vwọ mrẹ se.
Ofian: Ọghẹnẹ davwerhọn rẹ ojaẹriọ rẹ ihworakpọ-ọ.
Uyota: Ọghẹnẹ vwo utuoma kpahen umwemwu kugbe oja rẹ umwemwu sua. (Isẹ 6:16-19) Vwẹ ọke ri Noa, “ọ da da ọrovwohwo gangan vwẹ udu” kidie umwemwu vọn asan eje vwẹ akpọ na. (Jẹnẹsis 6:5, 6) Aphro herọ-ọ, ọ da Ọghẹnẹ mamọ fikirẹ ohwekufia ri Holocaust rọ phiare.—Malakae 3:6.
Ofian: Ọghẹnẹ reyọ ohwekufia ri Holocaust na vwo gboja kẹ ihwo ri Ju na.
Uyota: Ọghẹnẹ rhọnvwere nẹ ihwo ri Rom ghwọrọ Jerusalẹm vwẹ ẹgbukpe ujorin rẹsosuọ. (Matiu 23:37–24:2) Vwo nẹ ọke yena rhe, Ọghẹnẹ ghwa jẹ ẹko rẹ ihwo evo reyọ ji brẹba yẹrẹ gboja kẹ aye-en. Vwẹ ẹro rẹ Ọghẹnẹ, “ofẹnẹ herọ vwẹ uvwre rẹ ihwo ri Grik kugbe Ju-u.”—Rom 10:12, Good News Translation.
Ofian: Ọ da dianẹ Ọghẹnẹ ro vwo ẹguọnọ vẹ ẹgba herọ, ọ rha dobọ rẹ ohwekufia ri Holocaust rọ phiare na ji.
Uyota: Dede nẹ ọ dia Ọghẹnẹ yen sua ojaẹriọ-ọ, jẹ ọ vwẹ uphen kẹ ayen nẹ e phia ọmọke krẹn.—Jems 1:13; 5:11.
Diesorọ Ọghẹnẹ vwọ vwẹ uphẹn kẹ ohwekufia ri Holocaust na nẹ e phia?
Ọghẹnẹ vwẹ uphẹn kẹ ohwekufia ri Holocaust na nẹ ọ phia kirobo rọ je vwẹ uphẹn kẹ ojaẹriọ rẹ ihworakpọ rọ vwọ kpahenphiyọ aphro ọvo rọ vwomaphia ọke grongron rọ wanre. Baibol na djerephia phephẹn nẹ Idẹbono yen suẹn akpọ na ọ dia Ọghẹnẹ-ẹ. (Luk 4:1, 2, 6; Jọn 12:31) Uyota ivẹ kiriguo vwẹ Baibol na sa chọn avwanre uko vwo dje oboresorọ Ọghẹnẹ vwo phi uphẹn phiyotọ kẹ ohwekufia ri Holocaust na nẹ ọ phia.
Ọghẹnẹ ma ihworakpọ ayen vwo brorhiẹn romobọ. Ọghẹnẹ vuẹ ihwo rẹsosuọ na, Adam vẹ Ivi obo rọ guọnọ mie ayen, ẹkẹvuọvo ọ gba ayen vwo nyupho rọye-en. Ayen ọvo brorhiẹn ro shekpahen obo ri yovwirin vẹ obo re chọre. Orhiẹn rọ chọre rẹ ayen bruru kugbe orhiẹn rẹ ihworakpọ brẹ nonẹna yen hwarhiẹ umiovwo rhe akpọneje. (Jẹnẹsis 2:17; 3:6; Rom 5:12) Ọ ghwa họhọ obo rẹ ọbe rẹ Statement of Principles of Conservative Judaism tare: “Ojaẹriọ vọn akpọ na kidie ihworakpọ reyọ ugbomọphẹ rayen vwo ruiruo vwẹ idjerhe rọ chọre.” Ukperẹ Ọghẹnẹ vwo mie avwanre ugbomọphẹ, Ọghẹnẹ vwẹ uphẹn kẹ ihworakpọ ayen vwo sun oma rayen ababọ rẹ ukẹcha rọyen.
Ọghẹnẹ cha rhuẹrẹ ebẹnbẹn rẹ ohwekufia ri Holocaust na soro eje. Ọghẹnẹ veri nẹ ọ cha rhọvwọn iduduru rẹ ihwo ri ghwuru, kugbe ihwo ri ghwuru fikirẹ ohwekufia na. O ji che vworo ọmiaovwẹ rẹ iroro rẹ ohwekufia na soro vwọ kẹ ihwo ri sivwinrho. (Aizaya 65:17; Iruo Rẹ Iyinkọn Na 24:15) Ẹguọnọ rẹ Ọghẹnẹ vwo kẹ ihworakpọ kẹ avwanre imuẹro nẹ o che ru ive rọyen eje gba.—Jọn 3:16.
Ihwo buebun ri rhiẹromrẹ ri Holocaust na nabọ sẹro rẹ esegbuyota rayen je mrẹvughe nẹ akpọ vwo otọ womarẹ ayen vwo vwo ẹruọ rẹ oboresorọ Ọghẹnẹ vwọ vwẹ uphẹn kẹ umwemwu kugbe obo ro veri nẹ ọyen che ru vwo siono.