Ẹkpahọnphiyọ rẹ Enọ ri Baibol Na / Ọghẹnẹ / Die Yen Baibol na Ta Kpahen Ugbomọphẹ? Ọghẹnẹ Rhuẹrẹ Oborẹ Akpeyeren Wẹn Cha Dia Phiyotọ?
Ẹkpahọnphiyọ ri Baibol na
Ọghẹnẹ brọghọphiyọ avwanre oma rọ vwọ kẹ avwanre ugbomọphẹ, rọ dia ẹgba re vwo brorhiẹn komobọ ukperẹ Ọghẹnẹ vwọ rhuẹrẹ oborẹ akpeyeren avwanre cha dia phiyotọ. E jẹ a mrẹ oborẹ Baibol na tare.
Ọghẹnẹ ma ohworakpọ họhọ oma rọyen. (Jẹnẹsis 1:26) Vwọ fẹnẹ eranvwe rẹ eroma vuẹ oborẹ ayen che ru, avwanre họhọ Ọmemama avwanre kidie e dje iruemu kerẹ ẹguọnọ kugbe orhiẹn ọsoso phia. Avwanre vwo ugbomọphẹ kerẹ Ọmemama rẹ avwanre.
Vwẹ ẹdia buebun, avwanre se brorhiẹn oborẹ akpeyeren rẹ avwanre cha dia vwẹ obaro. Baibol na jiriro kẹ avwanre nẹ a ‘jẹ arhọ . . . womarẹ a vwọ kerhọ rẹ urhuru [Ọghẹnẹ],’ kọyen a vwọ yọnrọn irhi rọyen. (Urhi Rivẹ 30:19, 20) Ọ da dianẹ avwanre vwo ugbomọphẹ jovwoo, okẹ nana rhe fiemuu, o rhe ji dje Ọghẹnẹ phiyọ ohwo vẹ ọkon. Ukperẹ Ọghẹnẹ vwọ gba avwanre vwo ru obo rọ guọnọre, ọ da bọrọ avwanre nẹ: “E ọ dianẹ kẹ wọ kerhọ rẹ irhi mẹ! Mane ufuoma wẹn kọ dia kerẹ urhie.”—Aizaya 48:18.
Ọ dia Ọghẹnẹ rhuẹrẹphiyotọ nẹ akpọ che yovwin avwanre yẹrẹ a cha riojaa. Ọtiọyena a da guọnọ yeren omamọ rẹ akpọ, ofori nẹ a dia egbowian. Baibol na da ta: “Kemu kemu rẹ obọ wẹn se ru, vwẹ ogangan wẹn ruo.” (Aghwoghwo 9:10) Ọ je tanẹ: “Iroro rẹ ohwo rọ vwẹ ẹro te otọ je yovwo-o.”—Isẹ 21:5.
Ugbomọphẹ ọyen okẹ ọghanghanre ro nẹ obọ rẹ Ọghẹnẹ rhe, ọ nẹrhẹ avwanre se vwo ẹguọnọ rọyen “vẹ ubiudu” rẹ avwanre eje, kidie ọyen oborẹ avwanre guọnọ ru.—Matiu 22:37.
Ọghẹnẹ yen suẹn erọnvwọn eje?
Baibol na yonori nẹ Ọghẹnẹ yen Ọromevwẹgba, kọyen ẹgba rọyen basaan. (Job 37:23; Aizaya 40:26) Ẹkẹvuọvo, ọ dia ọyen o vwo mudiaphiyọ nẹ erọnvwọn eje kọyen ọ vwẹ ẹgba rọyen vwo suẹẹn. Kerẹ udje, Baibol na tare nẹ Ọghẹnẹ ‘kpahen ota’ kẹ ihwo ri Babilọn awanre re dia ivwighrẹn rẹ ihwo rọyeen. (Aizaya 42:14) Nonẹna, ọtiọyen ọ je fọ vwọ kẹ ihwo re vwẹ ugbomọphẹ rayen vwọ wan ihwo oma. Ẹkẹvuọvo, ọ cha fọ bẹdẹẹ.—Une rẹ Ejiro 37:10, 11.