Ovuẹ ro Nẹ Obọ rẹ Ọghẹnẹ Rhe—Iphiẹrophiyọ Vwọ kẹ Ihwo re Djẹ Nẹ Ẹkuotọ Rayen!

Kukpe kukpe, iduduru rẹ ihwo yen djẹ nẹ iwevwin rayen. Wo hirharokuẹ ebẹnbẹn nana asaọkiephana? Ọ da dia ọtiọyen, jẹ o muwẹro nẹ ọ dia owẹ ọvo yen herọọ—Ọghẹnẹ veri vwẹ Isiesi Ọfuanfon na nẹ wo che yerin omamọ rẹ akpọ vwẹ obaro na.

Christos Stylianides, rọ dia commissioner vwẹ European Uniona tare nẹ, “Ọ dia ukẹcha rẹ ugege yena ọvo ra cha vwọ kẹ ihwo re djẹ nẹ ẹkuotọ rayen yen ayen guọnọree, ayen je guọnọ . . . iphiẹrophiyọ vwọ kẹ obaro na.”b Kidie ihwo ri vwo iphiẹrophiyọ vwo oboresorọ ayen vwọ rhẹro rọyen nẹ erọnvwọn che yovwin kẹ ayen vwẹ obaro. Vwọba iphiẹrophiyọ, ayen je guọnọ uchebro rọ cha nẹrhẹ ẹwẹn rayen totọ.

“Ọke me vwọ djẹ nẹ ẹkuotọ mẹ je yanjẹ orua mẹ vwo, ofu rẹ akpọ de ghwe dje vwe hwe. Oshọ, omaemuophiyọ, vẹ ẹnwan de mu vwe rọ.”​—Emmanuel, Haiti.

Wo hirharoku ẹdia ọtiọyen jovwo re? Ọ da dianẹ wọ djẹ nẹ uwevwin wẹn, wọ cha guọnọ uchebro kugbe iphiẹrophiyọ. Mavọ yen Ota rẹ Ọghẹnẹ rọ dia Baibol na sa vwọ cha wẹ uko?

Uchebro ro nẹ Ota rẹ Ọghẹnẹ Rhe

Baibol na tare nẹ: “Jihovac . . . vwo ẹguọnọ rẹ ọrhorha.”​—Urhi Rivẹ 10:​17, 18.

Baibol na tare nẹ: “Ọrovwohwo si kẹrẹ otu ri sere ejobi.”​—Une rẹ Ejiro 145:18.

Baibol na tare nẹ: “Ọ dia obo re se roro rẹ Ọghẹnẹ rẹ uyota na vwo ru obo re braree . . . Ọromevwẹgba na gẹrẹ orhiẹn ọsosoo.”​—Job 34:​10, 12.

Ọnana mudiaphiyọ nẹ ọ dia Ọghẹnẹ yen sua ojaẹriọ wẹẹn. Ọ dia ọ vwẹ oja re wẹẹ yẹrẹ kọ nẹrhẹ akpọ gan kẹ wẹ rere ọ vwọ davwen owẹ nii.

Iphiẹrophiyọ rẹ Baibol na kẹ Avwanre

Baibol na djunute oborẹ Ọghẹnẹ che ru kẹ avwanre vwẹ obaro na. Ni oborẹ iphiẹrophiyọ nana vwẹ ukẹcha kẹ ihwo re djẹ nẹ iwevwin rayen.

Baibol na tare nẹ: “[Ọghẹnẹ] che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a.”​—Ẹvwọphia 21:⁠4.

Ọnana mudiaphiyọ nẹ ọke cha rẹ ojaẹriọ rha cha diaa. Ọghẹnẹ veri nẹ ọyen che phioba phiyọ ebẹnbẹn eje re nẹrhẹ akpọ nẹ avwanre ọhọ nonẹna.

“Kẹrẹkpẹ, Ọghẹnẹ che phioba phiyọ oshenyẹ kugbe umiovwo eje re phia vwẹ akpọ na. Iphiẹrophiyọ yena nẹrhẹ me rhẹro rẹ ọke rẹ ojaẹriọ eje che vwo nẹ otọ.”​—Karla, El Salvador.

Baibol na tare nẹ: “Ekuakua rẹ awanre na a gbe karophihọ aye-en eyẹ iroro gbe ra-a.”​—Aizaya 65:17.

Ọnana mudiaphiyọ nẹ omiamiavwe rẹ oborẹ avwanre rhiẹromrẹ re rhe che kpokpo avwanre ẹwẹẹn. Ọghẹnẹ che ruo rere ẹwẹn wẹn vwo totọ, ọmiaovwẹ vẹ ebẹnbẹn wo rhiẹromrẹ rhe che kpokpo uwe ẹwẹẹn.

“Baibol veri nẹ avwanre rha cha karophiyọ omiamiavwe vẹ erọnvwọn ri ghwruru ọke rẹ avwanre vwọ djẹ nẹ ẹkuotọ rẹ avwanree. Iphiẹrophiyọ tiọyena cha vwẹ uko vwo yerin ghene ebẹnbẹn ọgangan nana kidie me riẹnre nẹ erọnvwọn eje che wene kẹrẹkpẹ.”​—Natalia, Ukraine.

Baibol na tare nẹ: “Ọghẹnẹ rẹ odjuvwu na cha vwẹ uvie ọvo mu . . . Ọ cha guọghọ ivie nana ejobi ibribro ọ me vwẹ ayen te oba.”​—Daniẹl 2:44.

Ọnana mudiaphiyọ nẹ omamọ usuon ọvo vwẹ odjuvwu che sun akpọ na eje. Ọghẹnẹ cha vwẹ usuon rọyen rọhẹ odjuvwu na vwo wene usuon rẹ akpọ na kẹrẹkpẹ. Usuon nana cha ghwa uvi rẹ ufuoma, ofuvwegbe, kugbe orhiẹn ọsoso rhe ihwo eje, ohwo vuọvo rha cha dia ogberee.​—Maika 4:​3, 4.

“Obo re kẹ vwẹ ẹgba yen me vwọ riẹn nẹ ebẹnbẹn kerẹ oshenyẹ, omaẹfẹnẹ, e vwo vwo ẹwẹn ivivẹ, kugbe utuoma re vwo kpahan ihwo rẹ orere ọfa cha dia bẹdẹẹ​—Uvie ri Jihova che phioba phiyọ ebẹnbẹn nana eje kẹrẹkpẹ.”​—Mustafa, Middle East.

Aghwanre rọhẹ Ota rẹ Ọghẹnẹ

Uchebro rẹ aghwanre rọhẹ Baibol na sa cha wẹ uko vwo yerin ghene ebẹnbẹn rẹ obo re phia kẹ wẹ na. Ọ je sa cha wẹ uko vwo yerin ghene egbabọse kpokpọ kugbe ekuakua re va wẹ abọ. Jokaphiyọ oborẹ uchebro rẹ aghwanre re djunute vwẹ obotọ na vwẹ ukẹcha kẹ ihwo re djẹ nẹ iwevwin rayen:

Baibol na tare nẹ: “Ohwo da tobọ vwo ekuakua buebun dede, arhọ rọyen che se nẹ evunrẹ erọnvwọn ro vwori na rhe-e.”​—Luk 12:15.

Oborẹ eta rẹ aghwanre nana sa vwọ cha wẹ uko: Ọ sa dianẹ obo re phia kẹ wẹ yẹrẹ oborẹ wọ djẹ jovwo na je nẹrhẹ wo muomaphiyọ. Jẹ wọ da karophiyọ nẹ arhọ wẹn rho vrẹ ekuakua wọ djẹ jovwo na, ekuakua na rha cha da wẹ gan nọọ.

“Arhọ ghanre vrẹ ekuakua. Vwẹ ẹdia evo, ekuakua yẹrẹ igho wo vwori cha sa cha wẹ ukoo.”​—Natalia, Ukraine.

Baibol na tare nẹ: “Wọ tanẹ, ‘Die ọke rẹ awanre vwo yovwi nọ ọke nana?’ ”​—Aghwoghwo 7:10.

Oborẹ eta rẹ aghwanre nana sa vwọ cha wẹ uko: Ọ sa dianẹ erọnvwọn nama lọhọ kẹ wẹ asaọkiephanaa, jẹ wọ vwẹ oborẹ akpeyeren wẹn hepha enẹna vwọ vwanvwa obo rọ hepha jovwoo, kidie ọ cha nẹrhẹ wọ rhoma muomaphiyọ.

“Kidie nẹ me guọnọ oborẹ mi se vwo yerin ghene ẹdia re me hepha na, ke me rhe tẹnrovi obaro na.”​—Eli, Rwanda.

Baibol na tare nẹ: “Avwanre de vwo emuọre kugbe obo re kuphiyọ, enana te vwọ kẹ avwanre.”​—1 Timoti 6:8.

Oborẹ eta rẹ aghwanre nana sa vwọ cha wẹ uko: E jẹ oborẹ wo vwori vwẹ akpeyeren te kẹ wẹ. Ẹwẹn rẹ otekẹvwẹ cha nẹrhẹ ẹwẹn wẹn totọ, wọ rha cha ro ẹnwan rẹ ọkamukaa.

“Baibol na vwẹ ukẹcha kẹ vwẹ vwo ni erọnvwọn vwẹ idjerhe rọ fẹnẹre, mi rhe mu ẹwẹn kpahan oborẹ avwanre djẹ jovwo naa. Oma vwerhen ovwẹ vẹ aye mẹ nẹ avwanre hẹ akpọ, asan rẹ avwanre hepha enẹna ji fun avwanre oma.”​—Ivan, Ukraine.

Baibol na tare nẹ: “Erọnvwọn eje rẹ ovwan guọnọre nẹ ihwo ru kẹ ovwan, ovwan ji ru ọtiọyen kẹ ayen.”​—Matiu 7:12.

Oborẹ eta rẹ aghwanre nana sa vwọ cha wẹ uko: Uruemu esiri vẹ edirin cha cha wẹ uko se vwo nene ihwo yerin kugbe. Ọ cha nẹrhẹ ihwo rẹ ekogho na rhiabọdede uwe, ayen rhe che vwo ẹwẹn rẹ omaẹfẹnẹ kpahen owẹẹ.

“Ihwo buebun guọnọre nẹ e muọghọ kẹ ayen ji dje ẹguọnọ vẹ uruemu esiri kẹ ayen. Ọnana cha nẹrhẹ wo vwo omamọ rẹ oyerinkugbe vẹ emotọ rẹ ekogho na.”​—Angelo, Sri Lanka.

Baibol na tare nẹ: “Ovwan rha ta ọdavwẹ rẹ ovwan kẹ Ọghẹnẹ; ufuoma rẹ Ọghẹnẹ . . . kọ sẹro rẹ ubiudu vẹ ẹgba iroro rẹ ovwan.”​—Filipae 4:​6, 7.

Oborẹ eta rẹ aghwanre nana sa vwọ cha wẹ uko: Nẹrhovwo rhe Ọghẹnẹ kpahen oborẹ oma ru we, vuẹ ọdavwẹ wẹn, obo re nẹrhẹ oshọ mu we, kugbe obo re sua ẹnwan kẹ wẹ. Ẹrhovwo tiọyena cha nẹrhẹ ẹwẹn wẹn kpotọ, wo rhe che brudu kpahen ẹdia wẹn na gan nọọ.

“Me nẹrhovwo rhe Ọghẹnẹ kọke kọke mi de vwo ebẹnbẹn, o mi nyo vwe. Aghwanre ri mi yono nẹ Baibol na rhe kẹ vwẹ obọdẹn rẹ ufuoma rẹ ẹwẹn.”​—Yol, South Sudan.

“Omamọ rẹ uchebro rọhẹ Baibol na nẹrhẹ mi vwo ufuoma rẹ ẹwẹn ọke mi de hirharoku ebẹnbẹn.”​—Valentina, Ukraine.

“Ive ri Jihova Ọghẹnẹ nẹ akpọ che yovwin vwẹ obaro na kẹ vwẹ ẹgba.”​—Emmanuel, Haiti

Wọ guọnọ yono kpahen evuẹ ri Baibol efa re nẹrhẹ ẹwẹn rẹ avwanre totọ je kẹ avwanre iphiẹrophiyọ vẹ oboresorọ wọ vwọ vwẹroso evuẹ na? Wọ da guọnọ nẹ Iseri ri Jihova kọn bru we rhe, oma cha vwerhen ayen rẹ ayen vwọ cha wẹ uko.