Mrẹ Erere Vwo nẹ Izobo ri Jesu Rhe
Obọ ọvo kukpe kukpe yen Iseri ri Jihova vẹ iduduru rẹ ihwo rẹ ayen durhieri vwẹ akpọneje vwo siomakoko ruẹ Ẹkarophiyọ rẹ ughwu ri Jesu kirobo ro jiji rọyen kẹ ayen. (Luk 22:19) Irueru nana chọn avwanre uko vwọ riẹn ọghanrovwẹ rẹ oborẹ Jesu ruru ọke rọ vwọ vwẹ arhọ rọyen vwọ kpahotọ kẹ ihworakpọ. O ji dje oborẹ ozibo rọyen na se mudiaphiyọ kẹ avwanre asaọkiephana vẹ ọke rọ cha vwẹ obaro na.—Jọn 3:16.
Ọ da dianẹ wo kpo Ẹkarophiyọ na enukpe na yẹrẹ wọ rare-e, mavọ yen wọ sa vwọ mrẹ erere vwo nẹ ughwu ri Jesu na rhe? Jesu yonori nẹ avwanre ru erọnvwọn ivẹ re pha ghanghanre:
1. Yono kpahen Ọghẹnẹ vẹ Jesu. Vwẹ ẹrhovwo ri Jesu nẹ vwo rhe Ọsẹ rọyen rọhẹ odjuvwu, ọ da ta: “Ọnana mudiaphiyọ arhọ ri bẹdi bẹdẹ, rẹ ayen vwọ rhe riẹn wẹ, Ọghẹnẹ rẹ uyota ọvuọvo na, kugbe ọ ru wo ji rhe na Jesu Kristi.”—Jọn 17:3.
2. Ru nene obo wo yono. Jesu kanrunumuo nẹ ofori avwanre vwọ reyọ iyono rọyen vwo ruiruo vwẹ akpeyeren avwanre. Kerẹ udje, vwẹ okuphiyotọ rẹ Eta rọ tare vwẹ enu rẹ Ugbenu na, o de jiri kohwo kohwo “ro nyo eta [rọyen] ji ru ayen.” (Luk 6:46-48) Vwẹ ọke ọfa, ọ da je ta eta re họhọ ọyena: “Ọ da dianẹ ovwan riẹn erọnvwọn nana, omavwerhovwẹn dia kẹ ovwan siẹrẹ ovwan de ru ayen.”—Jọn 13:17.
Wọ guọnọ yono erọnvwọn efa kpahen Ọghẹnẹ vẹ Jesu? Wọ guọnọ odjekẹ rẹ obo wọ sa vwọ reyọ oborẹ wo yonori vwo ruiruo? Enana yen erọnvwọn evo re sa vwẹ ukẹcha kẹ wẹ.
Uyono ri Baibol
Uyono ri Baibol rẹ ọphẹ rẹ avwanre ruẹ vwẹ ukẹcha kẹ ihwo buebun vwọ fuẹrẹn Baibol na je reyọ oborẹ ayen yonori vwo ruiruo.
Kpo ẹbẹre rẹ Uyono ri Baibol vẹ Oyono Romobọ, wo se vwo yono erọnvwọn efa kpahen ọrhuẹrẹphiyotọ nana.
Ni ividio na Obo re Ruẹ Uyono ri Baibol Wan, wọ mrẹ oborẹ Iseri ri Jihova ruẹ uyono ri Baibol rayen wan.
Emẹvwa rẹ Iseri ri Jihova
Abọ ivẹ vwẹ udughwrẹn yen Iseri ri Jihova vwọ vwoma vwẹ asan rẹ ayen da ga ẹga ra riẹn phiyọ Ọguan Ruvie. Vwẹ emẹvwa na, avwanre yono Baibol na vẹ obo ra sa vwọ reyọ obo re yonori vwo ruiruo vwẹ akpeyeren rẹ avwanre.
Kohwo kohwo sa rhe emẹvwa na; wọ cha dia Oseri ri Jihova tavwen wọ ke rhe-e. Vwo nene oborẹ ekogho wẹn hepha, wo se kpo asan rẹ omẹvwa na yẹrẹ vwomaba ayen womarẹ vidiokọfrẹsin.
Ni ividio na, Die Yen E Ruẹ Vwevunrẹ Ọguan Ruvie? rere wọ mrẹ obo re ruẹ vwẹ emẹvwa na.
Wọ sa vwọ guọnọ Ọguan Ruvie rọ kẹrẹ owẹ, kpo ẹbẹre rẹ Emẹvwa rẹ Iseri ri Jihova.
Iyovwinreta vẹ ividio rehẹ intanẹti
Buebun rẹ iyovwinreta vẹ ividio rehẹ evunrẹ wẹbsaiti nana cha chọn wẹ uko vwo yono erọnvwọn efa kpahen iyono ri Jesu vẹ ọghanrovwẹ rẹ ughwu rọyen.
Kerẹ udje, wo se vwo yono kpahen oborẹ ughwu rẹ ohwo ọvo se vwo fierere kẹ iduduru rẹ ihwo, se iyovwinreta na, “Idjerhe Vọ Yen Jesu Vwo Sivwin Avwanre?” kugbe “Diesorọ Jesu Vwọ Rioja, Ji Ghwu?” yẹrẹ ni ividio na, Diesorọ Jesu Vwo Ghwu?