Oborẹ wo se Vwo si Ẹnwan Kpotọ
Wọ da ro ẹnwan kpahen orọnvwọn gan nọ, ọ sa so imuoshọ kẹ ugboma na ji djobọte iroro wẹn. Ọ sa tobọ so ebẹnbẹn ri rho vrẹ ọ rẹ wọ ro ẹnwan kpahan na.
Iroroẹjẹ re cha nẹrhẹ wo si ẹnwan kpotọ
Siobọ rẹ erharhe rẹ iyẹnrẹn ru wọ kerhọ kẹ kpotọ. Ọ dia erọnvwọn eje yen ofori nẹ a riẹn kpahen iyẹnrẹn rọ ghwa oshọ phiyọ omaa. Wo de ni, se yẹrẹ kerhọ rẹ oka iyẹnrẹn tiọyen gan nọ, ọ cha nẹrhẹ wo no nẹ iphiẹrophiyọ herọọ ji ru oshọ na ganphiyọ.
Odjekẹ ri Baibol: “Erhi ro muomaphihọ nẹrhẹ ibeku rẹ oma ya muẹ.”—Isẹ 17:22.
“Uruemu re vwo nenesi rẹ evuẹ kpokpọ vẹ evuẹ re ghwa oshọ phiyọ oma re vwomaphia ọkpọkpahọ vwẹ intanẹti sa fobọ mu ohwo obọ, ẹkẹvuọvo ọyena yovwin kẹ wẹẹ. Ẹnwan mẹ kpotọ mamọ mi vwo siobọ rẹ iyẹnrẹn re me kerhọ kẹ kpotọ.”—John.
Obo re roro kpahen: Bro abọ yen wọ ghene guọnọ iyẹnrẹn na?
Vwo omamọ rẹ ọrhuẹrẹphiyotọ. Davwẹngba vwo vrẹn nẹ ehwa, re emu, wian owian rẹ uwevwin ji sherhẹ vwẹ ọke wọ rhuẹrẹ phiyọ. Ọrhuẹrẹphiyotọ cha nẹrhẹ akpeyeren wẹn vwotọ ji si ẹnwan kpotọ.
Odjekẹ ri Baibol: “Iroro rẹ ohwo rọ vwẹ ẹro te otọ je yovwo-o.”—Isẹ 21:5.
“Kidie nẹ me kpairoro vrẹ ọrhuẹrẹphiyotọ mẹ karekare vwẹ ọke rẹ ọga ri COVID-19 vwọ tonphiyọ, ọ da nẹrhẹ me ghwọrọ ọke buebun phiyọ ekuakua ra vwọ dia otọ. Me guọnọ reyọ ọke mẹ vwo ruiruo vwẹ idjerhe rẹ aghwanre, ọtiọyena mi de ru ọrhuẹrẹphiyotọ rẹ erọnvwọn mi che rhe ruẹ kẹdẹ kẹdẹ.”—Joseph.
Obo re roro kpahen: Wo vwo ọrhuẹrẹphiyotọ rọ kẹ wẹ evunvọnvwẹ kẹdi kẹdẹ nẹ wo ru emuọvo wiẹn?
Tẹnrovi erhuvwu rẹ akpeyeren. Ẹnwan wẹn cha ganphiyọ wọ da vwẹ ọkieje roro kpahen oborẹ wo rhe ru shephiyọ vwẹ obuko yẹrẹ erọnvwọn ebrabra re sa vwomaphia vwẹ obaro na. Ukperẹ ọyena, roro kpahen erọnvwọn re sa nẹrhẹ oma vwerhen owẹ.
Odjekẹ ri Baibol: “Ovwan me rha kpẹvwẹ.”—Kọlose 3:15.
“Isese ri Baibol na cha vwẹ uko vwọ kẹnoma kẹ erharhe rẹ iyẹnrẹn, je tẹnrovi obo ri yovwirin. E se no nẹ ọ wiaan, ẹkẹvuọvo ọ wian!”—Lisa.
Obo re roro kpahen: Erọnvwọn ebrabra re phiare vwẹ akpeyeren wẹn ọvo yen wo roro kpahan, wọ me kpairoro vrẹ i ri yovwirin?
Roro kpahen ihwo efa. Ukperẹ wo vwo sioma nẹ ihwo—rọ dia obo re lọhọ eruo siẹrẹ ẹnwan de mu ohwo rọ—gbe roro kpahen oborẹ wọ sa vwọ vwẹ ukẹcha kẹ ihwo re guọnọ ukẹcha.
Odjekẹ ri Baibol: “Ovwan guọnọ erhuvwu romobọ rẹ ovwan ọvo-o, ẹkẹvuọvo ovwan je guọnọ erhuvwu rẹ ihwo efa.”—Filipae 2:4.
“Oma vwerhen ovwẹ mi de ruẹ erọnvwọn kẹ ihwo efa. Kidie nẹ mi ruẹ obo re cha nẹrhẹ oma vwerhen ihwo, ko si ẹnwan mẹ kpotọ. Ọnana mi ruẹ na rha nẹrhẹ mi vwo ọke kẹ ẹnwaan.”—Maria.
Obo re roro kpahen: Vwẹ usun rẹ ihwo rẹ wo vugheri na, evọ yen guọnọ ukẹcha rẹ oghẹresan, kẹ die yen wo se ru vwọ cha ayen uko?
Sẹro rẹ omakpokpọ wẹn. Nabọ sasa oma wo ji rovwoma. Re omamọ emu. Wọ da vwẹrote ugboma wẹn, oma na cha sasa, ku wọ je kẹnoma kẹ ẹnwan.
Odjekẹ ri Baibol: “Omaẹsasọ rẹ ugboma vwo erere.”—1 Timoti 4:8, eta rehẹ obotọ na
“Mẹvwẹ vẹ ọmọ mẹ sa sasa oma vwẹ otafe kirobọ rẹ avwanre guọnọree, ọtiọyena avwanre de ru ọrhuẹrẹphiyotọ rẹ avwanre vwọ sasa oma vwevunrẹ uwevwin. Ọnana nẹrhẹ oma vwerhen avwanre, je nabọ yerẹnkuẹgbe.”—Catherine.
Obo re roro kpahen: Ofori nẹ wọ re omamọ rẹ emu je nabọ sasa oma vrẹ obo ri jovwo rere ẹdia rẹ omakpokpọ wẹn vwo yovwinphiyọ?
Vwọba iroroẹjẹ nana eje vwọ kpahen obo re se vwo si ẹnwan kpotọ na, ihwo buebun mrẹ erere rẹ ayen vwo yono kpahen ive ri Baibol na ro shekpahen omamọ akpọ vwẹ obaro na. Ni uyovwinrota na “What Will God’s Kingdom Accomplish?”