Ono Yen Jọn ro Bru Ihwo Phiyame?
Ẹkpahọnphiyọ ri Baibol na
Jọn ro bru ihwo phiyame ọyen ọmraro rẹ Ọghẹnẹ. (Luk 1:76) E vwiẹrẹ vwẹ ukpe ri 2 B.C.E. o de rhe ghwu vwẹ ukpe ri 32 C.E. Ọghẹnẹ kẹrẹ iruo rọ vwọ rhuẹrẹ idjerhe phiyọ hẹrhẹ Mesaya yẹrẹ Kristi na. Jọn ru ọnana ro vwo ghwoghwo ovuẹ rẹ Ọghẹnẹ kẹ ihwo ri Ju rere ọ sa vwọ rhẹriẹ ubiudu rayen vwo bru Ọghẹnẹ rhe.—Mak 1:1-4; Luk 1:13, 16, 17.
Ovuẹ ri Jọn ghwoghwori na vwẹ ukẹcha kẹ ihwo re nabọ kerhọ rọyen vwọ riẹn nẹ Jesu ri Nazarẹt na, yen Mesaya re veri na. (Matiu 11:10) Jọn jiriro kẹ ihwo re kerhọ kẹ nẹ ayen kurhẹriẹ nẹ imwemwu rayen ji djephia womarẹ omaebrophiyame. (Luk 3:3-6) E sere Jọn ro bru ihwo phiyame kidie o bru ihwo buebun phiyame. Omaebrophiyame rọ ma ghanre kparobọ rẹ Jọn ruru yen, o vwo bru Jesua phiyame.—Mak 1:9.
Vwẹ uyovwinrota nana
Die yen nẹrhẹ Jọn ro bru ihwo phiyame dia ohwo rẹ oghẹresan?
A mraro kpahen iruo ro che ru: Jọn womarẹ iruo rẹ aghwoghwo rọyen vwo ru orugba rẹ aroẹmrẹ ro shekpahen ikọn ri Jihova che ji rhe. (Malakae 3:1; Matiu 3:1-3) Ọ da rhe dia ohwo rọ “rhuẹrẹ ihwo phihọ otọ kẹ Ọrovwohwo,”—kọyen ọ vwẹ ukẹcha kẹ ihwo ri Ju rere ayen se vwo rhiabọreyọ ovuẹ ri Jesu Kristi rọ dia ohwo ri Jihova che ji rhe na.—Luk 1:17.
Ẹdia rẹ Jọn kare: Jesu tare nẹ “o ji vwo ọ rọ rho te Jọn ri Baptist na-a, ẹkẹvuọvo ọ rọ ma hanvwe vwẹ Uvie rẹ odjuvwu rho nọ.” (Matiu 11:11) Jọn ọyen ọmraro kugbe “ikọn” ra mraro rọyen phiyotọ. Ọtiọyena, tavwen a ke mrẹ Jọn, o vwo odibo rẹ Ọghẹnẹ vuọvo ro yerin vwẹ akpọ na rọ rho te-e. Eta ri Jesu na ji djephia nẹ Jọn cha dia Uvieb rẹ Ọghẹnẹ vwẹ odjuvwu-u. Jọn ghwunu tavwen Jesu ki rhie uphẹn re vwo kpo odjuvwu phiyọ. (Hibru 10:19, 20) Ẹkẹvuọvo, Jọn cha dia Iparadaisi vwẹ otọrakpọ na bẹdẹ.—Une rẹ Ejiro 37:29; Luk 23:43.
Amono yen oni vẹ ọse ri Jọn ro bru ihwo phiyame?
Ẹlizabẹt vẹ Zakaraya re dia aye gbẹ ọshare yen oni vẹ ọsẹ ri Jọn. Zakaraya ọyen ohwo rẹ Ju rọ dia orherẹn. Idjerhe rẹ igbevwunu yen a wan vwiẹ Jọn, kidie oni rọyen ẹgan. Vwọba, “ayen ivẹ na je kpako re.”—Luk 1:5-7, 13.
Ono yen so ughwu ri Jọn ro bru ihwo phiyame?
Ovie Hẹrọd Antipas yen tare nẹ e bru uyovwin nẹ Jọn. O ru ọnana vwo nene oborẹ aye rọyen Hẹrọdias vuẹrẹ. Aye na vwo utuoma kpahen Jọn kidie ọ vuẹ Hẹrọd ro se oma rọyen ohwo ri Ju nẹ ofori rọ vwọ rọvwọn Hẹrọdias rọ dia aye rẹ oniọvo rọye-en, kidie uruemu yena vwọso urhi rẹ ihwo rẹ Ju.—Matiu 14:1-12; Mak 6:16-19.
Jọn ro bru ihwo phiyame vẹ Jesu vwanvwan oma?
O vwo asan vuọvo vwẹ Baibol na rọ rhọnvwe phiyọ iroro nana nẹ ayen ihwo ivẹ na vwanvwan oma-a. (Jọn 3:25-30) Vwọrẹ uyota, Jọn tobọ ta phephẹn nẹ ọyen iruo ro te ọyen rọ vwọ rhuẹrẹ idjerhe phiyotọ hẹrhẹ Mesaya na, ọ dia ọ rẹ ọyen vwọ vwẹ oma vwanvwọ-ọn. Jọn da ta: “Me . . . rhe rhe vwẹ ame kẹ, rere a mrasan vwọ phia kẹ Izrẹl.” Ọ da je vwọba: “Ọnana hẹ Ọmọ rẹ Ọghẹnẹ na.” (Jọn 1:26-34) Ọtiọyena, oma vwerhen Jọn mamọ ro vwo nyo kpahen iruo rẹ aghwoghwo ri Jesu rọ yanphiaro.
a Jesu “ru umwemwu ọvuọvo-o.” (1 Pita 2:21, 22) Ọtiọyena, ọ dia o bromaphiyame ro vwo kurhẹriẹ-ẹ, ẹkẹvuọvo ọ vwọ vwẹ oma rọyen kpahotọ vwo ru ọhọre rẹ Ọghẹnẹ. Ọnana ji churobọ si arhọ rọyen rọ cha vwọ kpahotọ vwọ kẹ avwanre.—Hibru 10:7-10.
b Ni uyovwinrota na “Amono Yen Che Kpo Odjuvwu?”