Wọ Davwẹngba Wọ Vwọ Riẹn Jihova Phiyọ?

1. Mavọ yen oma ru avwanre e de roro kpahen erianriẹn, aghwanre kugbe erọnvwọn rẹ Jihova ru re?

WO RORO kpahen oborẹ erianriẹn ri Jihova kodo te vẹ oborẹ aghwanre rọyen rho te ọtiọyen ji te erọnvwọn buebun ro ru re? O gbe avwanre unu siẹrẹ avwanre de roro kpahen Ọmemama rẹ avwanre. Oma se ru we kirobo ro ru ọyinkọn Pọl rọ tare nẹ: “Gbe ni oborẹ ebruphiyọ rẹ Ọghẹnẹ bun te kugbe oborẹ aghwanre vẹ erianriẹn rọyen kodo te! A cha sa guọnọ otọ rẹ orhiẹn-ebro rọyen mrẹ-ẹ, idjerhe rọyen je vrẹ oborẹ avwanre sa hiẹ mrẹ!”​—Rom 11:33, 34.

2. Die yen djerephia nẹ avwanre sa riẹn Jihova?

² Dede nẹ ọ dia erọnvwọn eje yen avwanre cha sa riẹn kpahen Jihovaa, jẹ a sa riẹn oka rẹ ohwo rọ hepha te ẹdia evo. Ovie Devid vuẹ ọmọ rọyen Solomọn nẹ: “Wọ me riẹn Ọghẹnẹ rẹ ọsẹ wẹn je vwẹ ubiudu ọsoso ga . . . Wọ da hiẹ guọnọ, ọ cha nẹrhẹ nẹ wọ mrẹ ọyen.” (1 Ikun 28:9) Ikpe ujorin buebun vwo wan nu, ọyinkọn Jọn da karophiyọ Inenikristi rehẹ ọke rọyen nẹ avwanre vwo ẹgba rẹ “ọmrẹvughe rere avwanre se vwo vwo erianriẹn rẹ ohwo rẹ uyota na.” (1 Jọn 5:20) Jesu komobọ je tanẹ, erianriẹn rẹ Jihova herọ vwọ kẹ “kohwo kohwo rẹ Ọmọ na vwo owenvwe ro vwo dje kẹ.”​—Mat. 11:27.

3. Die yen a cha ta ota kpahen vwẹ uyono nana?

³ Kohwo kohwo rọ vwomakpahotọ kẹ Jihova yono erọnvwọn buebun kpahọn re. Dedena, o vwo ọke vuọvo avwanre che vwo jẹ Jihova ẹ “riẹn” phiyọọ. (Jọn 17:3; ni study note.) Avwanre se yono kpahen obo re vwerhen Jihova oma ọkieje kugbe oborẹ ẹroẹvwọsuọ avwanre kpahọn se vwo kodophiyọ. O toro ikpe avwanre ga Jihova cha ree, jẹ a sa vwọ riẹn phiyọ o vwo enọ erha rẹ avwanre cha ta ota kpahen: Die yen o mudiaphiyọ ra vwọ riẹn Jihova? Diesorọ o vwo fo nẹ e yono kpahọn ọkieje? Kẹ, mavọ yen a sa vwọ riẹn phiyọ?

DIE YEN O MUDIAPHIYỌ RA VWỌ RIẸN JIHOVA?

4. Die yen o churobọ si ra vwọ riẹn Jihova?

⁴ A cha mrẹ obo ra vwọ riẹn Jihova phiyọ churobọ si siẹrẹ a da fuẹrẹn obo rọ vuẹ ihwo ri Ju ri nẹ ighuvwu rhe. Jihova da ta: “Me cha vwẹ ubiudu rẹ ayen cha vwọ riẹn nẹ mẹvwẹ yen Jihova vwọ kẹ ayen.” (Jer. 24:7) Aphro herọọ nẹ, ihwo ri Ju ri nẹ Babilọn rhe riẹn erọnvwọn buebun kpahen Jihova re. Ẹkẹvuọvo ẹgbaẹdavwọn rẹ ayen vwọ riẹn Jihova churobọ si ubiudu rayen, ọtiọyen ji te iroro kugbe obo ri mu ayen vwọ ga. Ọbe ọvo rọ ta ota kpahen Baibol na tare nẹ: “A vwọ riẹn kpahen Ọghẹnẹ kugbe ra vwọ nabọ riẹn Ọghẹnẹ te ẹdia ra vẹ ọyen mi vwo uvi oyerinkugbe, ofẹnẹ rode herọ. A sa reyọ vwo dje ofẹnẹ rẹ ohwo ro se kpahen ẹguọnọ vẹ ọ ro vwo ẹguọnọ rẹ ohwo.” A de vwọ riẹn nẹ Jihova vwo odẹ, nẹ ọyen yen Ọghẹnẹ ọvo terii, o ji fo nẹ a riẹn erọnvwọn efa kpahọn. Ofori nẹ riẹn iruemu ri rhere kugbe oka rẹ Ohwo rọ hepha.

5. Die yen avwanre se yono mie Ovie Josaya kpahen obo ro mudiaphiyọ ra vwọ riẹn Jihova?

⁵ Avwanre vwọ riẹn Jihova phiyọ yẹ, jẹ e vughe obo ri je kugbe obo ro vwo utuoma kpahen. Roro kpahen udje rẹ Ovie Josaya. Baibol na da ta: “Vwẹ ukpe 8 rẹ usuon rọyen, rọ je vwọ hẹ eghene, ọ da hiẹ guọnọ Ọghẹnẹ ri Devid ọsẹ rọyen rode.” (2 Ikun 34:3) Ọ dia Josaya di yono ota rẹ Ọghẹnẹ ọvoo, o ji ru nene obo ro seri na. Womarẹ ọmraro Jerimaya, Jihova da ta nẹ Josaya ọyen ohwo ro bru “orhiẹn ọsoso kugbe ophiọnphiọn” rọ je chochọn rẹ ivwiogbere vẹ ihwo ri vwo ọchukoo. Ọ da vwọba: “Ọ dia ọyena yen obo ro mudiaphiyọ ra vwọ riẹn vwẹ?”​—Jer. 22:15, 16.

6. Vwo nene obo rọhẹ Une rẹ Ejiro 9:10, die ọfa yen avwanre che ru ra vwọ riẹn Jihova phiyọ na?

⁶ Se Une rẹ Ejiro 9:10. Avwanre vwọ riẹn Jihova phiyọ ye, jẹ ẹroẹvwọsuọ rẹ avwanre kpahọn ganphiyọ. Ẹroẹvwọsuọ tiọyena yen ji rhe ọyinkọn Pọl. Ọ vwọ mrẹ nẹ ọke rọyen vwẹ uwodi rhe te emuọvoo, nẹ o ji che kri ọyen ki ghwuu, ọ da ta: “Oma vo ovwẹ-ẹ. Kidie me riẹn Ohwo ri mi se gbuyota.” (2 Tim. 1:12) Obo ri Pọl yonori kugbe obo ro rhiẹromrẹ vwẹ akpeyeren rọyen nẹrhẹ ọ vwẹroso Jihova kakare. Pọl vwo imuẹro nẹ Jihova cha kpairoro vrẹ ọyeen, nẹ ọ cha kpare ọyen nushi.

DIESORỌ O VWO FO NẸ A RIẸN JIHOVA ỌKIEJE?

7. Die yen sa phia siẹrẹ avwanre da ga Jihova ikpe buebun cha re?

⁷ Ọke vwọ yanran na, a rha cha davwẹngba vwọ riẹn Jihova phiyọ kirobo avwanre ruru avwanre ka vwọ mrẹ uyota na vughee. Diesorọ? Kidie avwanre ọvo de se Baibol na yẹrẹ nene ihwo efa se kuẹgbe vwẹ uyono, oborẹ ovuẹ na sa vwọ vwẹ ukẹcha ro fori kẹ avwanre komobọ yẹrẹ obo ra sa vwọ reyọ vwọ cha ihwo efa uko yen avwanre ma tẹnroviẹ. Ọyena yen oborẹ Baibol na jiri kẹ avwanre nẹ e ru. (2 Tim. 3:16, 17) Ẹkẹvuọvo, Baibol na je vuẹ avwanre erọnvwọn buebun kpahen Ohwo ro vworo. (Une 25:8-10) Ukpe re vwo mu ẹwẹn kpahen erere ro che te avwanre vẹ ihwo efa ọbo, o ji fo ra vwọ nọ oma rẹ avwanre, ‘Die yen ọnana yono uvwe kpahen Jihova Ọghẹnẹ?’a

8. Mavọ yen oyerinkugbe rẹ avwanre vẹ Jihova cha dia siẹrẹ a da riẹn phiyọ? (Une rẹ Ejiro 73:24-28)

⁸ Avwanre vwọ riẹn Jihova phiyọ ye, oyerinkugbe rẹ avwanre vẹ ọyen jẹ ọ ganphiyọ. Kerẹ udje, mavọ yen oma ru we siẹrẹ wo de ru isese ri Baibol ri kẹdi kẹdẹ wẹn, ni broadcast, kpo osikoko yẹrẹ ọghwẹkoko ra da ota kpahen Jihova? Aphro herọọ, enana nẹrhẹ avwanre siẹkẹrẹ Ọsẹ rẹ avwanre rọhẹ obodjuvwu phiyọ. Diesorọ? Kidie avwanre yono erọnvwọn buebun kpahọn re. Fikirẹ ọnana, ẹwẹn rẹ avwanre kọ mwavwa vẹ akpẹvwẹ re vwo jiro. Oma ruẹ avwanre kirobo ro ruẹ ọbuine na ọke rọ vwọ karophiyọ oborẹ Jihova vwẹrote wan, ọ da ta: “Ọghẹnẹ yen oragha rẹ ubiudu mẹ kugbe ẹkẹn mẹ bẹdẹ.” (Se Une rẹ Ejiro 73:24-28.) Ẹgbaẹdavwọn kẹgbaẹdavwọn ra vwọ riẹn Jihova phiyọ nẹrhẹ ọdavwaro rẹ avwanre kpahen oyerinkugbe rẹ avwanre vẹ ọyen vwori ganphiyọ.

9. E de “vwo oniso” ri Jihova, die yen ọnana che mu avwanre vwo ru? Djudje rọyen.

⁹ Siẹrẹ ẹwẹn rẹ avwanre da djẹ kpo oborẹ avwanre yono kpahen Jihova, ji roro kpahen oborẹ uruemu rẹ avwanre cha nẹrhẹ oma ruo, je djephia nẹ e “vwo oniso” rọyen, ọnana kọ cha nẹrhẹ e bru omamọ erhiẹn. (Isẹ 3:5, 6) Kerẹ udje: Iniọvo eya vẹ eshare buebun phi ifoto rẹ aye yẹrẹ ọshare rayen phiyọ evunrẹ iwọlẹti, ifonu yẹrẹ enu rẹ imẹjẹ rayen. Ọnana nẹrhẹ ẹwẹn rayen djẹ kpo ọrivẹ orọnvwe rayen kọke kọke, ji bru erhiẹn rẹ ayen riẹnre nẹ e cha ghwa omavwerhovwẹn rhe ayen je kẹnoma kẹ kemu kemu ro cha nẹrhẹ ivun miovwon ayen. Ọtiọyen ọ je hepha nẹ, kọke kọke ẹwẹn rẹ avwanre da djẹ kpo Jihova, kẹ che bru erhiẹn re cha nẹrhẹ oma vwerhọn.​—Une 19:13, 14.

10. Die yen avwanre se ru siẹrẹ e de yono kpahen Jihova?

¹⁰ Kidie nẹ a ma avwanre họhọ Jihova, ọnana kọ nẹrhẹ a sa vwẹrokere iruemu rọyen. (Jẹn. 1:26) Avwanre vwo yono kpahen iruemu ri Jihova phiyọ ye, kẹ a cha nabọ vwo ẹruọ rẹ obo ra sa vwọ vwẹrokere. Jesu ghwọku isiẹbe kugbe ihwo ri Farisi na kidie ayen dje iruemu rẹ Ọghẹnẹ phiaa. Dede nẹ ayen nabọ ni erọnvwọn buebun rehẹ evunrẹ Urhi na, jẹ ayen “kpairoro vrẹ erọnvwọn ri vwo ọkpan vwevunrẹ Urhi na, kọyen orhiẹn-ebro abavo kugbe arodọnvwẹ kugbe evun-ẹfuọn.” (Mat. 23:23) Vwọ fẹnẹ ilori ẹga yena, e jẹ avwanre davwẹngba vwo ẹruọ oborẹ irhi vẹ odjekẹ rehẹ Baibol na dje iruemu ri Jihova phia. E de ru ọtiọyen, ọ cha vwẹ ukẹcha kẹ avwanre vwọ vwẹrokere iruemu ri Jihova.​—1 Jọn 4:8, 11.

MAVỌ YEN A SA VWỌ RIẸN JIHOVA PHIYỌ?

11. Mavọ yen wọ ka vwọ mrẹ uyota vughe?

¹¹ Ono yen ke yono uwẹ kpahen Jihova? Ọ sa dianẹ ọsẹ vẹ oni wẹn yen yọnrọn owẹ ghwanre vwevunrẹ ukoko na. Ọ sa dianẹ ayen gbikun sansan vwo nẹ Baibol na rhe re nẹrhẹ wọ riẹn iruemu ri rhe Ọghẹnẹ ji yono uwe oborẹ erọnvwọn rọ mare dje oka rẹ ohwo rọ ghene hepha phia. Yẹrẹ ọ sa dianẹ ọvo usun rẹ Iseri ri Jihova yen nene uwe yono Baibol na. Ọ je sa dianẹ ọbe rẹ Vwo Omavwerhovwẹn Bẹdẹ! na yen a reyọ vwo yono uwe, ohwo ro yono uwe na da vwẹ ukẹcha kẹ wẹ vwọ nabọ vwo ẹruọ rẹ ikuegbe ri Baibol na, ọtiọyen ji te iruemu iyoyovwin ri Jihova womarẹ obo rọ mare.b (Neh. 8:8; Iruo 14:17) E jẹ a ta ota kpahen oborẹ avwanre se vwo yono ọkieje kpahen Jihova.

12-13. Die yen e se yono kpahen Jihova siẹrẹ e de se Baibol na? Djudje ọvo. (Jerimaya 39:15-18) (Ni ifoto rọhẹ na.)

¹² Ẹsosuọ, e se yono kpahen Jihova phiyọ womarẹ e vwo se Ota rọyen ji yono kpahọn. O vwo ọkievo rẹ Baibol na ghwe vwo djunute iruemu ri Jihova kiriguo. (Ẹyan. 34:6, 7) Ọke buebun na ọ je ta ota kpahen oborẹ ihworakpọ ruru kugbe erhiẹn rẹ ayen bruru. Ọke rẹ wo de se ikuegbe tiọyena, roro kpahen oborẹ ayen se yono uwe kpahen Jihova.

¹³ Jẹ a mrẹ udje ọvo. Wo vwo se Jerimaya 38:6-13, wọ da mrẹ nẹ ọghwanran rẹ Itiopia ọvo re se Ebẹdmẹlẹk yen sivwin ọmraro Jerimaya. Aphro herọ nẹ o vwo idjerhe buebun wọ sa vwọ vwẹrokere omaevwoze, uduefiogbere, ọtiọyen ji te ẹguọnọ rẹ Ebẹdmẹlẹk vwo kpahen iniọvo rọyen. Wọ je mrẹ iruemu ri Jihova efa vughe vwẹ ikuegbe nana? (Se Jerimaya 39:15-18.) Kerẹ udje, ẹkpo ri Baibol vọ yen djerephia nẹ Jihova ọyen ohwo vẹ ọdavwaro, ro brorhiẹn ọsoso ro ji nẹ ihwo ruẹẹ? Erhọ yen iruemu ri Jihova efa ru wọ mrẹre vwẹ ikuegbe nana? Kọke kọke wo de se Ota rẹ Ọghẹnẹ, jokaphiyọ iruemu ri Jihova re vwomaphia vwẹ asan ru wo se na, wo ji jiro je kpẹvwẹ fikirẹ iruemu tiọyena.

14. Die yen e se ru vwọ mrẹ erere vọnvọn vwo nẹ obo ra mare rhe?

¹⁴ Ọrivẹ, e se yono kpahen Jihova phiyọ e de roro kokodo kpahen obo rọ mare. (Une 145:9, 10) Vwọrẹ uyota, re vwo ni obo ra mare ọvo terii. O vwo ihwo evo re ghwọrọ akpeyeren rayen eje vwo yono kpahen obo ra mare, jẹ ọ dia ọyen ayen vwo vwo oniso nẹ Ọghẹne herọ yẹrẹ iruemu ri rheree! Ọyinkọn Pọl siri nẹ ‘iruemu rẹ Ọghẹnẹ re jẹmrẹ na vwomaphia gbonozẹ vwo nẹ ọtonphiyọ rẹ emama rhe, a mrẹ ayen womarẹ erọnvwọn rọ mare.’ (Rom 1:20) Efanfan ri Baibol ọvo fan ekpọ nana nẹ “avwanre de vwo iroro ro fiotọ” a sa mrẹ iruemu rẹ Ọghẹnẹ. Ọtiọyena, o fori ra vwọ fọ ji roro kpahen obo rọ mare rere a sa vwọ mrẹ iruemu rẹ Omemama avwanre.

15. Die yen Patrick ruru ọ sa vwọ riẹn Jihova phiyọ, kẹ mavọ yen wọ sa vwọ vwẹrokere? (Ni ifoto na.)

¹⁵ Buebun avwanre dia irere ride ri sherabọ kẹ asan ra da sa mrẹ obo ra mare. Ọ da dianẹ asan tiọyen wọ dia, o vwo erọnvwọn ru wo ji se yono vwo nẹ emama rhe? Mrẹ oborẹ Patrick, rọ dia orere ri Brazzaville, vwẹ Republic of the Congo tare: “Me davwẹngba ni obo ra mare vwẹ ugana rẹ uwevwin mẹ. Me mrẹ emerọnvwọn re rhan, ọtiọyen ji te emephran re guọnọ emu yẹrẹ asan rẹ ayen cha dia. O vwo ọke ọvo me vwọ mrẹ ephran re bọn ẹho rayen. Ayen mrẹ erọnvwọn re pha lọlọhọ vwẹ ekogho rẹ ayen hepha na ri fo vwọ kẹ ẹho rẹ ayen sa rọghọ ikẹn phiyọ je sa emọ rayen vwẹ etiyin.” Ẹkẹvuọvo, ọ dia ephran na ọvo yen Patrick nirii; o ji roro kokodo kpahen Ọmemama na. Ọ da ta: “Me mrẹre nẹ Jihova vwo ọdavwẹ rẹ erọnvwọn eje rọ mare, tobọ te e rẹ e ni fiemuu. Ọnana kẹ vwẹ imuẹro nẹ ọ je cha vwẹrote vwe je vwẹ obo re me guọnọre vwọ kẹ vwẹ.”

16. Die yen vwẹ ukẹcha kẹ oni ri Jesu, Meri vwọ riẹn Jihova phiyọ, kẹ mavọ avwanre sa vwọ vwẹrokere? (Ni ifoto na.)

¹⁶ Idjerhe rerha ra sa vwọ riẹn Jihova phiyọ yen e vwo roro kpahen obo ro ru kẹ avwanre. Ọyen ghwa hẹ oborẹ Meri, oni ri Jesu ruru. Ọ nabọ riẹn Jihova jovwo re, kidie o “vwo ẹroesiri [rọyen].” (Luk 1:30) Ọnana yensorọ a vwọ kẹ owian ọghanghanre ọvo​—rọ vwọ dia oni rẹ omọ rẹ Ọghẹnẹ. Jihova da vwẹ ọbọngan vẹ imuẹro vwọ kẹ Meri womarẹ amakashe re se Gebrẹl kugbe ohwo rẹ orua rọyen re se Ẹlizabẹt. Ọke vwọ yanran na, o de roro kokodo kpahen oborẹ Jihova ru kẹ vwo dje arodọnvwẹ, ẹgba rọyen, nẹ o ji ọdavwẹ rẹ ihwo re ni fie emuọvoo, nẹ ọ dia ohwo ro nẹ ihwo ruẹẹ. (Luk 1:46-55) Kirobo rẹ Meri vwo ọdavwaro kpahen oborẹ Jihova ru vwọ kẹ na, ọtiọyen avwanre ji dje ọdavwaro phia siẹrẹ Jihova da vwẹ ukẹcha kẹ avwanre “vwẹ ọke ro fori.” (Hib. 4:16) Ukẹcha tiọyena de te we obọ, nọ oma wẹn: ‘Die yen ọnana yono uvwe kpahen Jihova? Iruemu ri Jihova yen vọ yen ọnana djephia?’

AVWANRE CHA DOBỌ RẸ EYONO JII

17-18. Diesorọ a sa vwọ tanẹ ọkieje yen e che vwo yono kpahen Jihova?

¹⁷ Roro kpahen erọnvwọn efa buebun re che yono kpahen Jihova vwẹ akpọ kpokpọ na. Avwanre che vwo ikpirhin ẹbe kpokpọ ri che dje oborẹ Jihova guọnọre nẹ avwanre ru. (Ẹvwọ. 20:12) O vwo erọnvwọn buebun rẹ avwanre che yono kpahọn siẹrẹ avwanre da riavwerhen rẹ obo rọ mare. (Aiz. 11:6-9) E ji che vwo ẹruọ rẹ Ọsẹ rẹ avwanre kodo phiyọ siẹrẹ a da mrẹ erọnvwọn kpokpọ, kerẹ udje ihwo re vwo ẹguọnọ kpahen rọ kpare nushi kugbe obo ro ruẹ avwanre vwọ dia ihwo re gbare.

¹⁸ A cha sa ‘riẹn oborẹ ẹruọ ri Jihova kodo tee’ kidie rhirin rhirin yen ọ vwọ herọ re. (Une 90:2; 147:5) Dedena, e ji se yono kpahọn je riẹn phiyọ. A “cha sa riẹn iruo rẹ Ọghẹnẹ rẹ uyota na ruru vwo nẹ ọtnphiyọ re te obaa.” (Aghwo. 3:11) Ọtiọyena, o toro ikpe avwanre hẹ uyota ree, e ja reyọ kuphẹn kuphẹn vwo yono kpobarophiyọ kpahen Ọsẹ rẹ avwanre ro vwo ẹguọnọ na.