Nomaso Kpahen Oborẹ Wọ Kerhọ Wan

1-2. (a) Idjerhe vọ yen Jihova vwọ ghẹrẹ ihwo rọyen nonẹna? (Une rẹ Ejiro 23:1, 2, 5) (b) Die yen a cha ta ota kpahen vwẹ uyono nana?

NONẸNA, Jihova womarẹ erọnvwọn buebun vwọ ghẹrẹ avwanre. Aphro herọọ nẹ avwanre rhọnvwephiyọ oborẹ Devid tare nẹ: “Jihova yen Osuigodẹ mẹ. Emu vuọvo cha kanre ovwẹẹ.”​—Se Une rẹ Ejiro 23:1, 2, 5.

² Idjerhe ọvo rẹ Jihova vwọ ghẹrẹ avwanre nonẹna yen womarẹ emẹvwa rẹ avwanre. Ọke buebun na yen a vwọ vwanriẹn obo re yono avwanre vwẹ obuko re. Dede nẹ ‘awọ avwanre muotọ vwevunrẹ uyota’ na re, avwanre je guọnọ ẹkarophiyọ. (2 Pita. 1:12) Ẹkẹvuọvo, ọ bẹn kẹ wẹ wọ vwọ nabọ kerhọ vwẹ uyono ọ da dianẹ a vwanriẹn obo re yono na abọ buebun re? Ọ da dia ọtiọyen, uyono nana sa vwẹ ukẹcha kẹ wẹ. A cha ta ota kpahen oboresorọ o vwo fo a vwọ kerhọ vwẹ uyono kugbe oborẹ ihwo re ta ota vwẹ uyono se vwo ruo lọhọ rere ihwo rẹ ayen ta ota kẹ sa vwọ kerhọ. A je cha ta ota kpahen iroroẹjẹ evo re sa vwẹ ukẹcha kẹ avwanre vwọ dia ihwo re nabọ kerhọ. Ẹsosuọ, e jẹ avwanre ka ta ota kpahen ohwo ro yono avwanre.

KAROPHIYỌ NẸ JIHOVA YEN TA OTA KẸ AVWANRE

3. Idjerhe vọ yen Jihova wan ta ota kẹ avwanre, kẹ mavọ yen idibo rọyen reyọ Ota rọyen vwo ruiruo wan?

³ Jihova womarẹ Ota rọyen rọ dia Baibol na vwọ ta ota kẹ avwanre. (2 Tim. 3:16, 17) Jesu riẹn ọnana. Ọ nabọ reyọ ona vwọ reyọ Ota rẹ Ọghẹnẹ vwo ruiruo tẹdia rẹ ihwo re kerhọ rọyen ke ta: “Mavọ yen ọshare nana se vwo vwo erianriẹn rẹ Isiesi Ọfuanfon na ọtiọna jẹ o kpo isikuru-u?” (Jọn 7:15) Oma vwerhen ihwo ri vwo ẹwẹn esiri rẹ ayen vwo nyo oborẹ Jesu nabọ dje Ota rẹ Ọghẹnẹ fiotọ. Inenikristi rẹ ẹgbukpe ujorin rẹsosuọ, kerẹ ọyinkọn Pọl vẹ Apolọs je vwẹrokere Jesu vwọ rionbọ kpo Baibol na ọke rẹ ayen vẹ ihwo efa vwọ ta ota. (Iruo 17:2, 3; 18:24, 28) Avwanre kerẹ Iseri ri Jihova riẹnre nẹ ẹbe avwanre, broadcasts, ẹbe ra vwọ ta ota rotu, kugbe ividio sansan, Baibol na yen e mu ayen kpahen. Oma vwerhen ihwo re rhie uyono avwanre obọ rẹsosuọ siẹrẹ ayen da mrẹ oborẹ avwanre reyọ Baibol na vwo ruiruo wan vwẹ emẹvwa avwanre. Ihwo ri vwo eta vwẹ emẹvwa tiọyena mu uyono rayen kpahen Baibol na, ọ dia ayen di se ọvoo ẹkẹvuọvo ayen dje oborẹ otu na sa vwọ reyọ oborẹ Baibol na tare vwo ruiruo.​—Luk 24:32.

4. Die yen a vwẹ eta na “nyo” kugbe “kerhọ” vwo dje?

⁴ Kọke kọke ra da reyọ eta na “nyo” kugbe “kerhọ” vwo ruiruo vwẹ Baibol, a reyọ vwo dje ẹmiẹnyo. Ọtiọyena, siẹrẹ Jihova da ta ota kẹ avwanre womarẹ emẹvwa rẹ avwanre, e de ji vwo ẹruọ rẹ oborẹ ọhọre rọyen hepha, kọ lọhọ avwanre vwo nyuphọ rọyen. Oma vwerhen Jihova siẹrẹ avwanre da kerhọ rọyen ji ru nene obo rọ vuẹ avwanre.​—Isẹ 27:11.

DIESORỌ O VWO FO A VWỌ NABỌ KERHỌ VWẸ UYONO?

5. Die yen ẹguọnọ re vwo kpahen Jihova che mu avwanre vwo ru? (Jọn 4:23, 24; 1 Jọn 5:3)

⁵ Avwanre kerhọ vwẹ uyono kidie avwanre vwo ẹguọnọ ri Jihova. (Mat. 22:37) Avwanre vwo yono kpahen Jihova phiyọ ye, jẹ ẹguọnọ rẹ avwanre vwo kpahọn ganphiyọ. Ẹguọnọ yena cha nẹrhẹ avwanre vwo owenvwe ra vwọ kerhọ, vwo nyẹme rọyen, je vwẹ ẹga kẹ vwo nene oborẹ Baibol na tare.​—Se Jọn 4:23, 24; 1 Jọn 5:3.

6. Die yen e se yono vwẹ emẹvwa avwanre kpahen ukẹcha ra vwọ kẹ ihwo efa?

⁶ Avwanre kerhọ vwẹ uyono kidie avwanre vwo ẹguọnọ rẹ ihwo. (Mat. 22:39) Vwẹ emẹvwa avwanre, Jihova yono avwanre oborẹ avwanre sa vwọ vwẹ ukẹcha kẹ iniọvo avwanre kugbe ihwo ri ji ri vughe Jihovaa. Kerẹ udje, ibroshọ na Vwo Ẹguọnọ rẹ Ihwo​—Yono Ayen Vwọ Dia Idibo cha avwanre uko vwo vwo omamọ iruemu re se djephia kẹ ihwo a dahẹ iruo rẹ aghwoghwo na. Wọ mrẹ bẹnbẹn wọ vwọ ton ota phiyọ vẹ ihwo efa? Ọ da dia ọtiọyen, gba nabọ kerhọ oborẹ iniọvo na che vwo djudje rọyen vwẹ ẹbẹre rẹ Muomaphiyọ Iruo Aghwoghwo Na vwẹ uyono rẹ uvwre rẹ udughwrẹn na.

7. Diesorọ ọ vwọ ghanre a vwọ kerhọ kẹ Jihova ọkieje?

⁷ Avwanre kerhọ vwẹ uyono kidie avwanre guọnọ yeren omamọ akpọ. Avwanre de ru nene Ota rẹ Ọghẹnẹ, o mudiaphiyọ arhọ vwọ kẹ avwanre, kirobo ro ru vwọ kẹ idibo ri Jihova vwẹ ọke awanre. (Diut. 32:44-47) A da kerhọ vwẹ emẹvwa, ọ nẹrhẹ a mrẹ ọbọngan ra guọnọre re se vwo chirakon hẹrhẹ akpọ kpokpọ rọhẹ obaro na. (Rom 8:25) A vwọ kerhọ kẹ Jihova je rhẹrẹ ọkieje ọyen obo re ghanre kidie ọke oba na yen avwanre de yerẹn na.​—Mat. 24:42-44; Ẹvwọ. 1:3.

OBO RA SA VWỌ VWẸ UKẸCHA KẸ IHWO EFA VWỌ KERHỌ VWẸ UYONO

8. Diesorọ iniọvo eshare re ta ota vwo nẹ umukpe cha vwo ru ona rẹ ota rayen yovwinphiyọ ọkieje?

⁸ Ofori nẹ iniọvo eshare re ta ota vwo nẹ umukpe cha, ma rho e re ta ota rẹ otu ru ona rẹ ota rayen yovwinphiyọ ọkieje. Ota ro nẹ Baibol rhe ra nabọ muegbe rọyen vwo ẹgba rọ vwọ vwẹ ukẹcha kẹ ihwo vwọ mrẹ uyota na vughe je nẹrhẹ iniọvo avwanre vwo ẹruọ rẹ uyota ri Baibol na vrẹ obo ri jovwo. Ọtiọyena, e jẹ iniọvo ri vwo ota vwẹ uyono vwẹ ẹro okueku vwo nẹ erhuvwu rẹ ota rayen sa ghwa rhee. Uphẹn ru wọ vwọ ta ota de rhiephiyọ kẹ wẹ, roro kpahen oborẹ wọ sa vwọ reyọ iroroẹjẹ rehẹ obotọ na vwo ruiruo. Dede nẹ iniọvo eshare re ta ota rẹ otu yen iroroẹjẹ nana me shekpahen, a je sa reyọ ayen vwo ruiruo siẹrẹ e de vwo ota vwẹ uyono.​—2 Tim. 4:2; Tai. 1:9.

9. Die yen wo se ru ihwo ru wọ ta ota kẹ sa vwọ kerhọ?

⁹ Nabọ muegbe rere ẹkpo na vwomaphia. Kerẹ ọtota, wọ guọnọre nẹ ihwo ru wọ ta ota kẹ nabọ vwo ẹruọ rẹ obo wọ ta. Ọ bẹn rẹ ihwo ru wọ ta ota kẹ vwọ kerhọ siẹrẹ ẹkpo na de bun nọ. Die yen wo se ru ẹkpo na sa vwọ teyenphia? Ena yen iroroẹjẹ evo: (1) Ẹsosuọ, dje ẹkpo na phia phephẹn wọ da tuẹn ota na phiyọ. (2) Reyọ ẹkpo na ọvuọvo vwọphia, dunuji emerha je ghwọrọ ọmọke vwọ ta ota kpahen ẹkpo ọvo tavwen wo ki kpo ọfa. (3) Wo de kun ota na phiyọ, vwanriẹ ẹkpo ọvuọvo kprẹn.

10. Diesorọ ọ vwo ghanre, e vwo vwo omavwerhovwẹn kpahen ota ra vwọ kẹ avwanre?

¹⁰ Jẹ oma rẹ ota na vwerhen owẹ. Wọ cha ta ota vẹ oruru siẹrẹ wo de vwo omavwerhovwẹn kpahen ẹkpo ru wọ guọnọ ta ota kpahan na. (Isẹ 2:4, 5; Iruo 4:20) Wo de roro kokodo kpahen ota wẹn na vẹ ẹkpo ri Baibol rehẹ evun rọyen, e cha vwẹ ukẹcha kẹ wẹ vwo vwo omavwerhovwẹn kpahen ẹkpo na. Oniọvo oshare ro nẹ United States rhe, rọ vrẹ ẹgbukpe 70 re, je karophiyọ ota ro nyori rọ vwọ hẹ eghene: “Me je karophiyọ oborẹ otota na jiriro kẹ avwanre nẹ e roro kokodo siẹrẹ e de se Baibol na. Ọ ta ota vẹ imuẹro ji dje obo re ruo wan phephẹn. Ota yena wene akpeyeren mẹ je nẹrhẹ me riẹn Baibol na phiyọ mi de se, ọtiọyen ji te oyerinkugbe mẹ vẹ ọ ri Jihova.”

11. Diesorọ o vwo fo a vwọ reyọ oborẹ ihwo ghene guọnọ vwọphia vwevunrẹ ota? (1 Timoti 4:13-16)

¹¹ Roro kpahen oborẹ ihwo ru wọ ta ota kẹ na guọnọre kugbe oborẹ ayen sa vwọ reyọ obo ru wọ ta na vwo ruiruo. Ukpe ru wọ vwọ ta eta ghevweghe, reyọ Baibol na vwo phiuduphiyọ ayen awọ wọ je vuẹ ayen oborẹ ayen sa vwọ reyọ obo wọ ta na vwo ruiruo vwẹ akpeyeren. Kerẹ udje, ọyinkọn Pọl vwẹ iroroẹjẹ sansan vwọ kẹ Timoti re cha vwẹ ukẹcha kẹ vwo ru oyerinkugbe rọyen vẹ ọ ri Jihova gan vwẹ iruo rọyen vwẹ Ẹfesọs. (Se 1 Timoti 4:13-16.) Roro kpahen obo re sa vwẹ ukẹcha kẹ ihwo ru wọ ta ota kẹ na kugbe oborẹ ayen se ru vwọ reyọ vwo ruiruo vwẹ akpeyeren.

12. Diesorọ o vwo yovwin ra vwọ ta ota kerẹ ohwo ro gbikun?

¹² Wo de muegbe, ta ota na phia gorigori abọ buebun rere wọ sa vwọ ta kerẹ ohwo ro gbikun. Ọ cha lọhọ kẹ ihwo ru wọ ta ota kẹ e vwo nabọ kerhọ ji vwo ẹruọ rẹ obo ru wọ ta ukperẹ wo vwo si ota wẹn phiyotọ ji se ubiota ọvuọvo. Ibroshọ ri Muomaphiyọ Isese vẹ Eyono tare nẹ: “Ta ota kirobo wọ ta ota wan dẹn vẹ imuẹro kokoroko, rere a vwọ riẹn ẹwẹn wo vwo kpahen obo wọ ta na vẹ ihwo re kerhọ wẹ.” Wọ da ta ota nẹ ubiudu rhe, ihwo ru wọ ta ota kẹ na cha riẹn nẹ ota wẹn na sasare, ọnana cha nẹrhẹ oma vwerhen ayen vwo ru nene obo ru wọ tare na.

13. Diesorọ iniọvo ri vwo ota vwọ nokpẹn rẹ ukẹcha mie e re tẹn ona vwẹ ukoko na? (Ni ifoto na.)

¹³ Nokpẹn rẹ uchebro mie oniọvo rọ tẹn ona rẹ obo ra ta ota. Idjerhe vọ wo se vwo ru ọnana? Wo vwo muegbe rẹ ota wẹn na, wo se dje obo wo si phiyotọ kẹ oniọvo rọ tẹn rẹ obo ra ta ota na rere wọ sa vwọ vwẹ iroroẹjẹ rọ vwọphia vwoba ota wẹn na. Vwọba, vuẹ nẹ ọ kerhọ kẹ ota wẹn na, ọ je vwẹ iroroẹjẹ phia kpahen asan wo de se ru yovwinphiyọ kerẹ oyono. (Isẹ 1:5) Ọ dia eta eje yen avwanre se vwo “ẹruọ rayeen,” ọtiọyena avwanre cha sa riẹn sẹ a nabọ vwẹ ẹkpo phia fiotọ ro de se fierere kẹ ihwoo. Avwanre guọnọ ru yovwinphiyọ kerẹ etota vẹ iyono rere avwanre sa vwẹ ukẹcha kẹ ihwo rẹ avwanre ta ota kẹ vwọ mrẹ erere nẹ Ota rẹ Ọghẹnẹ rhe.a

OBO RA SA VWỌ DIA OHWO RỌ NABỌ KERHỌ

14. Diesorọ o vwo fo e vwo vwo uruemu ro rhe ohwo ro si Une rẹ Ejiro 119? (Une rẹ Ejiro 119:24, 111, 167)

¹⁴ Avwanre de vwo ọdavwaro kpahen ẹkarophiyọ ri Jihova, ka cha nabọ kerhọ vwẹ uyono. Avwanre guọnọ ẹkarophiyọ rẹ Ọghẹnẹ rere e se vwo yerin ghene “ọke ọgangan rọ bẹn eyeren” na. (2 Tim. 3:1) Ọ da dianẹ avwanre niro nẹ obo re yono na avwanre nyoro abọ buebun re, o fori e vwo roro kpahen uruemu rẹ ohwo ro si Une rẹ Ejiro 119 vwo kpahen ẹkarophiyọ rẹ Ọghẹnẹ.​—Se Une rẹ Ejiro 119:24, 111, 167.

15. Mavọ yen e se vwo dje ọdavwaro kpahen obo re yono avwanre vwẹ uyono?

¹⁵ Ofori avwanre vwọ vwẹ ẹro rẹ abavo vwo ni obo re yono vwẹ uyono kirobo ra guọnọre nẹ ihwo rẹ Izrẹl vwẹ ẹro abavo vwo ni imana rẹ Jihova reyọ vwọ ghẹrẹ ayen vwevunrẹ aton na. (Ẹyan. 16:15, 31) Aphro herọọ nẹ ayen ke vwo omavwerhovwẹn kpahen imana na kidie obọ ri Jihova yen o nurhe, ọ ke rha vwerhen mamọ je nẹrhẹ urhuarhọ rayen te odẹ. Ọke vwọ yanran na, imana ri kẹdi kẹdẹ na de rhi nẹ ayen ọhọ. (Ukeri 21:5) Die yen e yono no rhe? E jẹ a nama vwẹ ẹro okueku vwo nẹ eta na kidie e dje ayen ẹvwẹvwariẹẹn. Ukperẹ ọtiọyen, ofori e vwo ọmrẹvughe nẹ obọ ri Jihova yen i nurhe. E jẹ a karophiyọ nẹ ukoko ri Jihova yen nabọ frẹkotọ muegbe rayen. O ji fo ra vwọ mrẹvughe nẹ aghwanre rẹ avwanre mrẹ vwo nẹ iyono nana cha se sivwin urhuarhọ rẹ avwanre.​—Isẹ 3:13, 16-18; Jọn 17:3.

16. Die yen vwẹ ukẹcha kẹ idibo ri Jihova evo re ga krẹ re vwọ nabọ kerhọ vwẹ uyono? (Ni ekpeti na “Iroroẹjẹ rẹ Obo ra Sa Vwọ Nabọ Kerhọ.”)

¹⁶ A sa nabọ kerhọ siẹrẹ e de ru nene iroroẹjẹ rehẹ obotọ na. Vwo oniso rẹ obo re vwẹ ukẹcha kẹ idibo ri Jihova evo re ga krẹ re vwọ nabọ kerhọ vwẹ uyono. Ashley, rọ ga Jihova cha vwẹ ikpe re vrẹ 30 re da ta: “Egbemuo ọyen orọnvwọn ọvo kiriguo rọ nẹrhẹ me kerhọ. Mi rhe muegbee, ẹwẹn mẹ kọ kọn cha kọn kpo, kọ je bẹn kẹ vwẹ me vwọ kpahenphiyọ onọ.” József, rọ ga Jihova cha vwẹ ikpe ri te 52 re da ta: “Oma vwerhen ovwẹ me da kerhọ kẹ iyovwinreta ra vwọphia jovwore kidie me da kerhọ kẹ oborẹ iniọvo sansan vwẹ ayen phia wan, ọ nẹrhẹ mi vwo ẹruọ rayen kodophiyọ.” Ọ da je ta: “Ọ da dianẹ oniọvo ọshare ghwa dia ohwo rọ tẹn ona rẹ obo ra ta otaa, ke me tẹnroviẹ ovuẹ rọ vwọphia vwo nẹ Ota rẹ Ọghẹnẹ cha ukperẹ obo rọ ta ota na wan.”

17. Die yen wo se ru vwọ nabọ kerhọ vwẹ emẹvwa avwanre? (Ni ifoto na.)

¹⁷ Wọ da reyọ iroroẹjẹ rehẹ obotọ na ruiruo, ọ sa vwẹ ukẹcha kẹ wẹ vwọ nabọ kerhọ vwẹ emẹvwa avwanre. (1) Ọ da dianẹ wọ cha re emu wo ki kpo uyono, kẹnoma kẹ okpọre rere wọ sa vwọ nabọ kerhọ. (2) Fobọ te etiyin wọ guọnọ asan wo che chidia uyono ke tonphiyọ. (3) Phi ifonu wẹn phiyọ ẹdia o de ju we ekpokpo vwevunrẹ uyono. (4) Roro kpahen obo ra cha ta ota kpahen. (5) Tẹnrovi oniọvo rọ ta ota na. (6) Si erọnvwọn phiyọ otọ, yẹrẹ ihoho ri dje ẹkpo eghanghanre phia. (7) Roro kpahen ẹkpo ri Baibol na vẹ oborẹ ayen vwo churobọ si ohwohwo. (8) Nọ oma wẹn, ‘Mavọ yen me sa vwọ reyọ oborẹ mi yono na vwọ vwẹ ukẹcha kẹ ohwo ọvo vwẹ ukoko na yẹrẹ vwẹ iruo rẹ aghwoghwo na?’ (9) Tavwen wo ki kpo osikoko vẹ ọghwẹkoko, fuẹrẹn uyovwinrota rẹ osikoko yẹrẹ ọghwẹkoko na, eta ra cha vwọphia, kugbe ẹkpo ri Baibol eghanghanre re mu eta na kpahen. (10) Muegbe rẹ ubiudu wẹn womarẹ wo vwo chidia gbiẹi vwọ kerhọ kẹ ihwehworo vẹ ividio ra cha vwọphia vwẹ ọtonphiyọ rẹ ọrhuẹrẹphiyotọ na.

KERHỌ RI JIHOVA ỌKIEJE

18. Diesorọ avwanre vwọ kerhọ vwẹ uyono ọkieje?

¹⁸ E jẹ a rha kerhọ vwẹ emẹvwa avwanre kidie e de ru ọtiọyen, jẹ a vwẹ uphẹn kẹ Jihova nẹ o ‘sun avwanre vwẹ idjerhe rẹ ophiọnphiọn’ na. (Une 23:3; 31:3) Avwanre guọnọ odjekẹ ri Jihova ọ kpọ avwanre vi rere e vwo jẹ dia kerẹ okọ ro bo rẹ odju muẹ cha muẹ kpo. Ọtiọyena, ‘nomaso kpahen oborẹ wọ kerhọ wan’ wọ je reyọ oborẹ wo yono vwẹ emẹvwa vwo ruiruo. (Luk 8:18) Ihwo re kerhọ ri Jihova vwẹ uyono che vwo omavwerhovwẹn enẹna ji vwo arhọ ri bẹdẹ vwẹ obaro na.​—Une 119:2, 14.