Obo ra sa Vwọ Sẹro rẹ Oyerinkugbe ra vẹ Iniọvo Avwanre Vwori

1. Tivọ yen a da sa mrẹ omamọ rẹ igbeyan?

WỌ JE karophiyọ eta ra ka vwọ ton uyovwinrota rẹ une nana “Omamọ Igbeyan” phiyọ? ‘Vwẹ akpọ nana, erọnvwọn sa gan dẹn, e rhe vwo ugbeyaan. Jihova riẹnre nẹ avwanre eje guọnọ omamọ rẹ igbeyan.’ Mavọ yen ọ vwerhen oma te nẹ avwanre vwo uvi rẹ igbeyan vwẹ ohri rẹ ihwo ri Jihova! (Une 119:63) Avwanre usun rẹ orua rẹ ihwo re vwẹ ẹga kẹ Jihova, rẹ ẹguọno churu kugbe.

2. Oka rẹ oyerinkugbe vọ yen avwanre vẹ iniọvo rẹ avwanre guọnọ vwo?

² Oyerinkugbe ra guọnọ mie avwanre vẹ iniọvo rẹ avwanre dia ọ rẹ ghevweghe yẹrẹ o rẹ unu ọvoo. Ẹkẹvuọvo, uvi rẹ oyerinkugbe ro kodori. Avwanre orua rẹ egẹga ri vwo ẹguọnọ ri Jihova vẹ Jesu, ẹguọnọ nana yen ku avwanre kugbe. (Jọn 13:35) Ẹkẹvuọvo, oyerinkugbe tiọyena ọ dia o di muẹ vwomaphiaa. Ọ guọnọ ẹgbaẹdavwọn. Jẹ, kerẹ ihwo re gbaree, ebẹnbẹn sa vwomaphia vwẹ oyerinkugbe rẹ avwanre vẹ ọ rẹ ohwohwo.

3. Die yen sa nẹrhẹ ọ bẹn ra vwọ sẹro rẹ oyerinkugbe ra vẹ iniọvo rẹ avwanre vwori?

³ Uyota nẹ, oyerinkugbe rẹ avwanre vẹ iniọvo evo sa kpẹkpẹ vwọ vrẹ ọ rẹ iniọvo efa. Diesorọ? Ọ sa dianẹ ọdavwẹ vẹ iruemu rẹ avwanre họhọre. Ẹkẹvuọvo a sa mrẹ bẹnbẹn ra vẹ iniọvo rẹ avwanre efa vwo vwo oyerinkugbe. Ọkievo, e se jẹ ohwohwo ẹruọ, ọnana sa nẹrhẹ ẹguọnọ rẹ avwanre vwo kpahen ohwohwo dogho obọ. Ọ jẹ sa dianẹ kidie nẹ iruemu rẹ avwanre fẹnẹre, e se no nẹ o vwo emu vuọvo avwanre vẹ ayen che se ruu. Ọkiefa, oyerinkugbe rẹ avwanre vẹ iniọvo rẹ avwanre se dogho obọ siẹrẹ ofu de dje ayen yẹrẹ ayen da muọga. Vwẹ uyono nana a cha mrẹ oborẹ udje ri Jesu sa vwọ vwẹ ukẹcha kẹ avwanre vwọ sẹro rẹ oyerinkugbe rẹ avwanre siẹrẹ ebẹnbẹn da vwomaphia. Ẹsosuọ, e jẹ a mrẹ oborẹ iruemu rẹ Onenikristi sa vwọ vwẹ ukẹcha kẹ avwanre vwọ sẹro rẹ oyerinkugbe ra vẹ iniọvo rẹ avwanre vwori.

IRUEMU RẸ ONENIKRISTI VWẸ UKẸCHA KẸ AVWANRE VWỌ SẸRO RẸ OYERINKUGBE AVWANRE

4. Mavọ yen avwanre se vwo ru oyerinkugbe a vẹ iniọvo avwanre vwori ganphiyọ?

⁴ Oyerinkugbe avwanre vẹ ọ rẹ iniọvo avwanre sa vwọ ganphiyọ, ofori nẹ avwanre tẹnrovi erhuvwu rayen. E de nene iniọvo avwanre ghwọrọ ọke kugbe, ọ sa nẹrhẹ a mrẹ iruemu iyoyovwin rayen. Ọyinkọn Pọl vwo owenvwe ro vwo nene iniọvo na ghwọrọ ọke kugbe. O de si rhe iniọvo rehẹ Tẹsalonaika: ‘Avwanre davwẹngba mamọ rẹ avwanre vwọ mrẹ ovwan.’ (1 Tẹsa. 2:17) Ihwo buebun mrẹvughe nẹ idjerhe ọvo ro me yovwin re se vwo ru oyerinkugbe ra vẹ iniọvo avwanre vwori ganphiyọ yen e de nene ayen ghwọrọ ọke kuẹgbe. Avwanre vwo uphẹn buebun re vwo ru ọtiọyen siẹrẹ avwanre dahẹ iruo rẹ aghwoghwo na, uyono, isikoko, kugbe eghwẹkoko. Ẹkẹvuọvo, a je sa mrẹvughe nẹ ọ dia a de vwọ ghwọrọ ọke kugbe vẹ iniọvo avwanre yen che si ebẹnbẹn ri se miovwon oyerinkugbe avwanre noo.

5. Ọ da dianẹ o vwo erọnvwọn ri se gbowọphiyọ oyerinkugbe rẹ avwanre, die yen e se ru vwọ rhuẹrẹ ayen phiyọ? Djudje rọyen. (Kọlose 3:12)

⁵ Avwanre de vwo iruemu rẹ Onenikristi, e sa vwẹ ukẹcha kẹ avwanre vwọ sẹro rẹ avwanre nẹ erọnvwọn ri se miovwon oyerinkugbe avwanre. (Se Kọlose 3:12.) E de vwo uruemu rẹ omaevwokpotọ, edirin, erorokẹ kugbe uruemu esiri, ke se phi ebẹnbẹn ri se miovwon oyerinkugbe ra vẹ iniọvo vwori kparobọ. Kerẹ udje, kirobo rẹ evwri nẹrhẹ ejini rẹ imoto riẹn wian ye, ọtiọyen iruemu rẹ Onenikristi ji che si ebẹnbẹn ri se gbowọphiyọ oyerinkugbe avwanre kpotọ. Asaọkiephana, e jẹ a ta ota kpahen ebẹnbẹn erha ri se gbowọphiyọ oyerinkugbe rẹ avwanre. Vwọba, a cha ta ota kpahen oborẹ avwanre sa vwọ dia omamọ igbeyan vwọ kẹ ihwo efa siẹrẹ a da vwẹrokere iruemu ri Jesu nana: Omaevwokpotọ, edirin, uruemu esiri kugbe erorokẹ.

OVWAN RHA RO OHWOHWOO

6. Idjerhe vọ yen jẹ ohwohwo ẹruọ se vwo gbowọphiyọ oyerinkugbe avwanre?

⁶ Diesorọ ọ vwọ dia obẹnbẹn? Siẹrẹ ihwo ivẹ de si isiesi nẹ ọmẹ yen gbare, ọnana sa nẹrhẹ ayen jẹ ohwohwo ẹruọ. Vwẹ ẹwẹn roro iniọvo eshare ivẹ ri si isiesi kpahen ọrhuẹrẹphiyotọ rẹ aghwoghwo ro me yovwin vwẹ ẹko rayen. Ayen ọvuọvo vwo imuẹro nẹ oborẹ ọyen tare yen ma gba. Wọ sa mrẹ imuoshọ rọ herọ nẹ ẹro rẹ ayen ọvuọvo vwo no na se miovwon oyerinkugbe rayen? Ayen sa vwẹ uphẹn kẹ omaẹkparọ nẹ o gbowọphiyọ oyerinkugbe rayen na. Ayen rha ta ota kpahọn je rhuẹrẹphiyọọ, ọnana sa so eghrẹn. Ọke vwọ yanran na, oyerinkugbe rayen na se miovwinphiyọ te ẹdia rẹ ugbeyan rayen me fan​—fikirẹ orọnvwọn ro te emuọvoo.

7. Idjerhe vọ yen Jesu vwọ yono idibo rọyen nẹ omaevwokpotọ yen obo re ma ghanre re se vwo phi jẹ ohwohwo ẹruọ kparobọ?

⁷ Yono vwo nẹ omaevwokpotọ ri Jesu. O yono idibo rọyen nẹ omaevwokpotọ yen obo re ma ghanre re se vwo phi jẹ ohwohwo ẹruọ kparobọ. O krire rẹ idibo na vwọ phraphro kpahen ohwo rọ ma rho vwẹ usun rayen. Rere Jesu se vwo wene uruemu nana rọ vwẹ awọ muotọ vwẹ ubiudu rayen na, ọ da vuẹ ayen nẹ ofori ayen nẹ ihwo efa nẹ i yovwin nọ ayen. (Mat. 20:25-28) Vwọrẹ uyota, o yono ayen obo ra vwomakpotọ. Vwẹ ason rọ koba tavwen Jesu ki ghwu, ọ je tobọ ‘phi udje rẹ omaevwokpotọ phiyotọ’ kẹ ayen womarẹ ọ vwọ hworhẹ awọ rayen​—iruo ro fori nẹ odibo ru. (Jọn 13:3-5, 12-16) Ọ womarẹ obo ro ruru na vwo djephia kẹ ayen oborẹ ayen sa sẹro rẹ oyerinkugbe rayen. Ayen de no nẹ ihwo efa yovwin nọ ayen, ọnana sa nẹrhẹ ayen nuẹ siẹrẹ ayen rha ro ohwohwoo. Ọtiọyena ọ cha lọhọ kẹ ayen rẹ ayen vwọ dia igbeyan re kpẹkpẹre ọ da tobọ dianẹ ẹro rẹ ayen vwo nẹ emu fẹnẹre.

8. Mavọ yen omaevwokpotọ sa vwọ vwẹ ukẹcha kẹ wẹ vwọ sẹro oyerinkugbe wẹn vẹ iniọvo na siẹrẹ ẹghwọ da vwomaphia? (Kọlose 3:13) (Ni ifoto na.)

⁸ Mavọ yen wọ sa vwọ sẹro rẹ oyerinkugbe wẹn vẹ iniọvo na? Omaevwokpotọ sa nẹrhẹ wọ kpairoro vrẹ ẹghwọ ri te emuọvoo ji vwo ghovwo ihwo efa nẹ ubiudu rhe. (Se Kọlose 3:13.) Wọ da dia ohwo rọ vwomakpotọ, wo se kuẹrofia kẹ oborẹ ihwo efa ru we, rere wọ sa vwọ sẹro oyerinkugbe wẹn vẹ ayen. (Une 4:4) Ọ da tobọ dianẹ a ta obo re da wẹ, karophiyọ nẹ avwanre eje ta eta ra sa viẹ idiekpọvwẹ kpahen vwẹ obaro na. (Aghwo. 7:21, 22) Nọ oma wẹn, ‘Mi vwo si isiesi nẹ ọmẹ yen gbare ghanre vrẹ oyerinkugbe rẹ avwanre?’ Wo se rhiabọreyọ iroroẹjẹ rẹ ohwo ochekọ na, wọ kpairoro vrẹ obo re wanvrẹ re, wọ gbe rhoma ta ota kpahọn ọfaa.

9. Mavọ yen omaevwokpotọ sa vwọ vwẹ ukẹcha kẹ wẹ ọ da dianẹ ẹghwọ na jehẹ otọ? (Isẹ 17:9)

⁹ Omaevwokpotọ sa vwẹ ukẹcha kẹ wẹ ọ da dianẹ ẹghwọ na jehẹ otọ. Wọ phraphro wo vwo djephia nẹ ọwẹn yen gbaree. (Se Isẹ 17:9; 1 Kọr. 6:7) O che yovwin siẹrẹ wọ da tẹnrovi oborẹ wọ sa vwọ sẹro rẹ oyerinkugbe wẹn vẹ ihwo efa. Ihwo buebun se ru ọnana efẹrọvo womarẹ ayen vwo bru ohwo na ra je rhuẹrẹ ẹghwọ na phiyọ. (Une 34:14) Wọ sa tanẹ: ‘O kriri a dia ugbeyan re. Biko a sa ta ota kpahen obo re phiare na?’ Muegbe wọ vwọ rhọnvwe oruchọ wẹn, vuẹ ugbeyan wẹn nẹ wọ riẹnre nẹ obo re phiare na darọ, wo ji yovwunu. Je vwomakpotọ vwo ghovwo oniọvo wẹn siẹrẹ o de yovwunu kẹ wẹ. (Luk 17:3, 4) Karophiyọ nẹ ọ dia a vwọ riẹn ohwo ro ruchọ yen wọ cha tẹnrovii, ẹkẹvuọvo ọyen wọ vwọ rhuẹrẹ ẹghwọ na phiyọ je sẹro rẹ oyerinkugbe rẹ ovwan.​— Isẹ 18:24.

IRUEMU RẸ OVWAN DA FẸNẸ OHWOHWO

10. Die yen sa nẹrhẹ ọ bẹn ra vwọ sẹro rẹ oyerinkugbe rẹ avwanre vẹ ihwo efa?

¹⁰ Diesorọ ọ vwọ dia obẹnbẹn? Avwanre sa mrẹ bẹnbẹn ra vwọ sẹro rẹ oyerinkugbe rọ kpẹkpẹre vẹ iniọvo rẹ avwanre rẹ iruemu rayen fẹnẹ ọ rẹ avwanre. Evo se vwo iruemu ri tuẹn avwanre oma. Ọ sa dianẹ ihwo evo riẹn obo re nene ihwo efa yerẹn kuẹgbee fikirẹ oborẹ ihwo ru ayen vwẹ obuko re, ọ je sa dianẹ ayen pha fuefu yẹrẹ ayen sasare mamọ fikirẹ asan rẹ ayen nurhe. Yẹrẹ avwanre sa fẹnẹ ohwohwo​—ọ sa dianẹ oma vua ayen, jẹ avwanre ta ota mamọ.

11. Mavọ yen Jesu se vwo nene ihwo rẹ iruemu rayen vẹ ọrọyen fẹnẹre yerin?

¹¹ Yono vwo nẹ edirin ri Jesu. Jesu nene ihwo rẹ iruemu rayen vẹ ọrọyen fẹnẹre yerin vwọrẹ ufuoma. Kerẹ udje, Jems vẹ Jọn dje uruemu rẹ omaẹkparọ phia ọke rẹ ayen vwọ vuẹ nẹ ọ vwẹ ayen mu ẹdia rode vwẹ Uvie na. (Mak 10:35-37) Vwọ fẹnẹ ayen, Jesu vwomakpotọ yanjẹ iruo kugbe ẹdia rode ro vwori vwẹ obodjuvwu vwo, ọ da rhe otọrakpọ na. (Fil. 2:5-8) Roro kpahen oborẹ uruemu rayen fẹnẹ ohwohwo wan. Dedena, Jesu vwẹ edirin vwo nene Jems kugbe Jọn yerin, ọtiọyen ji te ihwo efa.

12. Die yen vwẹ ukẹcha kẹ Jesu vwo vwo edirin rẹ idibo rọyen?

¹² O gbe Jesu unu idibo rọyen vwo dje iruemu ri rhe ayen phiaa. Ọ riẹnre nẹ uruemu rẹ omaẹkparọ ro rhe Jems vẹ Jọn yen ji rhe idibo ri chekọ. (Mak 9:34) Oka rẹ asan tiọyen yen Jesu je dia ghwanre. Ayen vwẹ ẹro ọghanghanre vwo nẹ ẹdia rode kugbe otitivwe, ọtiọyena ọ riẹn oboresorọ ayen vwo vwo ẹwẹn ọtiọyen. Dedena, o vwo edirin rayen, je vwẹ ọke kẹ ayen rere ayen se vwo si iruemu tiọyen re vwẹ awọ muotọ ikpe buebun re vwevunrẹ ubiudu rayen na no.​—Mak 10:42-45.

13. Mavọ yen edirin sa vwẹ ukẹcha kẹ avwanre vwo nene iniọvo rẹ avwanre yerinkugbe? (Ẹfesọs 4:2)

¹³ Mavọ yen wọ sa vwọ sẹro rẹ oyerinkugbe wẹn vẹ iniọvo na? Davwẹngba vwo vwo edirin siẹrẹ wo de no nẹ ihwo evo vwo iruemu ri ghwe je wee. (Isẹ 14:29) Dohwo dẹ uruemu ro rhere, jẹ iruemu nana evo ghwa braa, ẹkẹvuọvo eyen ghwa oka rẹ ohwo rẹ avwanre hepha. Ọtiọyena, oma vwerhen avwanre siẹrẹ iniọvo avwanre da vwẹ edirin vwo nene avwanre yerẹn. (Se Ẹfesọs 4:2.) Ọyen obo re ghanre ra vwọ vwẹ ẹro abavo vwo ni ihwo efa je vwẹ edirin vwo nene ayen yerin. Kerẹ udje, roro kpahen oborẹ ohwo rẹ oma vua rọ je fobọ ta otaa cha davwẹngba te ọ ke sa vwomaba ihwo ji nene ayen ta ota. Ẹkẹvuọvo, o ji fo ra vwọ fọ siẹrẹ ohwo rọ sasare rọ je ta ota mamọ da ta ota. Ọ dia ihwo eje yen avwanre se vwo mu igbeyan re kpẹkpẹree, jẹ ofori nẹ a karophiyọ nẹ o toro ẹkuruemu rẹ avwanree, a sa wian kugbe vwọrẹ ufuoma.

14. Die yen edirin avwanre cha vwẹ ukẹcha kẹ avwanre vwọ tẹnrovi?

¹⁴ Edirin cha vwẹ ukẹcha kẹ avwanre vwọ tẹnrovi iruemu iyoyovwin rẹ iniọvo avwanre. E de ru ọnana, avwanre rhe che nẹ iruemu rayen re fẹnẹ ọ rẹ avwanre phiyọ obo ri che miovwon oyerinkugbe avwanree. Kerẹ udje, dede nẹ Jems kugbe Jọn guọnọ ẹdia rode, jẹ uruemu rayen djerephia nẹ Uvie na mu ayen ẹro. Jesu vwo oniso rẹ esegbuyota rayen na. Ọtiọyena, a vwẹrokere Jesu vẹ Ọsẹ rọyen siẹrẹ a da tẹnrovi iruemu iyoyovwin rẹ iniọvo avwanre.

15. Ono yen sa vwẹ ukẹcha kẹ avwanre vwọ sẹro rẹ oyerinkugbe vẹ ihwo rẹ iruemu rayen fẹnẹ ọ rẹ avwanre?

¹⁵ Ọ rọ ma ghanre, a sa nẹrhovwo rhe Jihova nẹ ọ vwẹ ukẹcha kẹ avwanre rere a sa vwọ sẹro rẹ oyerinkugbe vẹ ihwo rẹ iruemu rayen fẹnẹ ọ rẹ avwanre. Davwẹngba vwọ vwẹ ẹwẹn roro ebẹnbẹn re sa vwomaphia, wọ je nẹrhovwo vwọ kẹ ẹwẹn ri dọe. Karophiyọ nẹ Ọmemama avwanre Jihova riẹnre nẹ avwanre eje fẹnẹre. Ọtiọyena wọ da nẹrhovwo, jẹ o muwẹro nẹ Jihova riẹn obo wọ guọnọre rere wo se vwo chirakon ọkieje. Jẹ wọ da mrẹ bẹnbẹn wo vwo chirakon, gba rẹ Jihova nẹ ọ vwẹ ẹwẹn ọfuanfon rọyen vwọ vwẹ ukẹcha kẹ wẹ se vwo sun ophu wẹn.​—Luk 11:13; Gal. 5:22, 23.

ỌKE RẸ INIỌVO AVWANRE DE HIRHAROKUẸ EBẸNBẸN

16. Die yen sa phia siẹrẹ iniọvo avwanre de hirharokuẹ ebẹnbẹn?

¹⁶ Diesorọ ọ vwọ dia obẹnbẹn? Siẹrẹ ofu de dje iniọvo avwanre yẹrẹ ayen da muọga, eta yẹrẹ iruemu rayen se miovwo avwanre ivun. Kerẹ udje, ayen se sioma nẹ ohri rẹ ihwo, ivun sa fobọ miovwo ayen yẹrẹ tobọ ru erọnvwọn re rhẹro rọyeen. Ọkievo ayen sa ta eta yẹrẹ ru erọnvwọn re cha da avwanre. (Job 6:2, 3) Iniọvo avwanre se ru erọnvwọn evo rẹ avwanre niri nẹ o fori nẹ ayen ruu fikire ebẹnbẹn rẹ ayen hirharokuẹ, ọnana me nẹrhẹ avwanre vwẹ ẹro ọchọchọ vwo nẹ ayen.

17. Die yen oborẹ Jesu ru kẹ orhuẹro re se Batimiọs yono uwe?

¹⁷ Yono uruemuesiri vẹ arodọnvwẹ mie Jesu. Jesu dje uruemuesiri vẹ arodọnvwẹ kẹ ihwo re guọnọ ukẹcha, tobọ te ihwo rọ je mrẹ dẹvoo. Kerẹ udje, roro kpahen obo ro ru vwọ kẹ ọsharẹ ọvo ro rhuẹro re se Batimiọs. Ọke ro vwo nyo nẹ Jesu wanvrẹ, ko muẹ kperẹ rere Jesu se vwo noso. Ihwo evo vwevunrẹ otu na ke vuẹrẹ nẹ ọ fọ. Kidie nẹ ọ guọnọre nẹ Jesu ghini sivwin ọyen, kọ rhoma kperi ganphiyọ. Uruemu rọyen na nẹrhẹ ivun miovwo ihwo evo? Ọ sa dia ọtiọyen. Ẹkẹvuọvo, kidie nẹ Jesu re ehrọre, o de dje “arodọnvwẹ” phia. (Mat. 20:34; Mak 10:46-52) Kidie nẹ o vwo oniso rẹ esegbuyota ri Batimiọs, ọ da ta ota kẹ bọrọbọrọ. Jesu de rhie ẹro rọyen.

18. Die yen wo se ru vwọ kẹ igbeyan wẹn re guọnọ ukẹcha? (1 Tẹsalonaika 5:14)

¹⁸ Mavọ wọ sa vwọ sẹro rẹ oyerinkugbe vẹ igbeyan wẹn? Dje uruemuesiri vẹ arodọnvwẹ kẹ ayen. Iruemu nana cha vwẹ ukẹcha kẹ wẹ vwọ “vwẹ uchebro kẹ” iniọvo avwanre re muọga yẹrẹ rẹ ofu dje. (Se 1 Tẹsalonaika 5:14.) Karophiyọ nẹ ọkieje yen uvi rẹ ugbeyan vwọ vwẹ ukẹcha phia, ma rho “ọke rẹ ukpokpogho.” (Isẹ 17:17) Ọ dia ugbeyan tiọyena de re ehrọre rẹ ihwo re guọnọ ukẹcha ọvoo, ẹkẹvuọvo o ji ru obo ro se ru eje vwo biẹcha ayen, vwẹ ọbọngan kẹ ayen je vwẹ ukẹcha efa rẹ ayen guọnọre vwọ kẹ ayen.

19. Mavọ yen e se vwo dje arodọnvwẹ vẹ uruemuesiri vwọ kẹ iniọvo avwanre? (Ni ifoto na.)

¹⁹ Erhọ yen idjerhe evo avwanre se vwo dje arodọnvwẹ vẹ uruemuesiri phia vwọ kẹ iniọvo avwanre? Uyota nẹ wo che se si ọmiaovwẹ rẹ oniọvo wẹn vwo noo. Jẹ, wọ sa davwẹngba wẹn eje vwo dje erorokẹ vwọ kpahen ẹdia rọ hepha na. (Mat. 7:12; 1 Pita 3:8) Nabọ kerhọ siẹrẹ ọ da ta ota kpahen obo ri kpokpo ẹwẹn. Ọ da dia obo ri fori, ta eta re sa bọn gan. (Isẹ 12:25) Wo gbe ota phiyọ unuu, roro te tavwen wọ ke ta ota. (Isẹ 18:13) Vwẹ ọke kẹ vwọ ta ẹwẹn rọyen, wọ reyọ vwo guẹdjọọ.​—Ẹfe. 4:32.

20. Oka rẹ ugbeyan vọ wọ guọnọ dia?

²⁰ Avwanre nẹ oyerinkugbe rẹ avwanre vẹ iniọvo rẹ avwanre vwori ghanghanre. Jẹ ofori nẹ a karophiyọ nẹ ọkievo avwanre se ru erọnvwọn evo ri forii kidie avwanre ihwo re gbaree. Erọnvwọn ebrabra re phiare vwẹ obuko re wene oka rẹ ohwo rẹ buebun avwanre hepha. Ọtiọyena oma vwerhen avwanre siẹrẹ avwanre da mrẹ iniọvo re vwomakpotọ, ri vwo edirin, ri dje arodọnvwe vẹ uruemuesiri phia rere ayen sa vwọ sẹro oyerinkugbe rayen vẹ iniọvo vwori. E jẹ a davwẹngba vwọ dia oka rẹ ugbeyan tiọyena.