Obo ra sa Vwọ Fuevun kẹ Jihova Siẹrẹ e de Hirharoku Edavwini

1-2. Die yen phiare ọke rẹ Jesu vwo yono ẹko rẹ ihwo evo vwẹ Kapanọm?

Ẹdẹ ọvo rẹ Jesu vwọ ta ota kẹ ẹko rẹ ihwo evo vwẹ Kapanọm, ọ da vuẹ ayen nẹ: “Jokpanẹ kẹ ovwan re uvwo rẹ Ọmọ rẹ ohwo je da ọbara rọyen, ovwan che vwo arhọ vwẹ oma rẹ ovwa-an.” Ọ da vwọba: “Kohwo kohwo rọ re uvwo mẹ je da ọbara mẹ vwo arhọ ri bẹdi bẹdẹ, me cha kparọ vrẹn vwẹ ẹdẹ rọ koba na.” (Jọn 6:53, 54) Ọke rẹ otu na vwo nyo, ayen da ta: “Ota nana muekpahen; ono yen sa kerhọ rọyen?”​—Jọn 6:60.  

² Ihwo rẹ ota rẹ Jesu na miovwon ivun da yan jovwo. Kidie nẹ ayen vwo esegbuyota kpahọọn yen sorọ ayen vwọ yan jovwo? Uyota nẹ, tavwen Jesu ke ta ota nana, oma vwerhen idibo rọyen rẹ ayen vwọ mrẹ obo ro ruru je tanẹ: “Vwọrẹ uyota ọnana yen Ọmraro rọ cha rhe akpọ na.” (Jọn 6:14) Ọnana odjephia nẹ idibo na vwo esegbuyota kpahen Jesu. Jẹ, ọke rẹ Jesu vwọ ta ota ro je ayeen, ayen da yan jovwo.

3. Die yen iyinkọn na ruru ọke rẹ Jesu vwọ tanẹ jokpanẹ wọ re uvwo mẹ je da ọbara mẹ, kẹ diesorọ? (Ni ifoto na.)

³ Ọke rẹ Jesu vwọ nọ iyinkọn na sẹ ayen che nene ayen, Pita da kpahen: “Ọrovwori, ono yen avwanre che bru ra? Wo vwo eta rẹ arhọ ri bẹdi bẹdẹ. Avwanre segbuyota avwanre je rhe riẹn re nẹ wẹwẹ yen Ohwo Ọfuanfon rẹ Ọghẹnẹ na.” (Jọn 6:68, 69) Ọtiọyena ayen rha yan jovwoo. Noso nẹ ọ dia Pita tare nẹ te ọyen te iyinkọn ri chekọ na nabọ vwo ẹruọ rẹ oborẹ ẹda ọbara vẹ ẹriọ rẹ uvwo rọyen mudiaphiyọọ. Ọ da tobọ dianẹ ayen vwo ẹruọ rẹ obo ri Jesu ta kpahen ẹriọ rẹ uvwo kugbe ẹda rẹ ọbara rọyeen ayen ji tinkamuo. Diesorọ? Kidie ayen mu esegbuyota rayen kpahen Jesu rọ dia “Kristi rẹ Ọghẹnẹ na.”​—Luk 9:20, 35.  

4. Erọnvwọn vọ yen sa davwen esegbuyota rẹ avwanre ni?

⁴ Idjerhe buebun herọ re sa davwen evun-ẹfuọn rẹ avwanre vwọ kẹ Jihova ni. Kerẹ udje, mavọ yen oma ru avwanre siẹrẹ e de nyo nẹ e ru ewene phiyọ ẹkpo ri Baibol ọvo yẹrẹ obo re ruiruo aghwoghwo na wan? Yẹrẹ mavọ oma ruẹ avwanre a rha riẹn oboresorọ Jihova vwọ vwẹ uphẹn kẹ avwanre nẹ a rioja rẹ obo re braree? Oniọvo da ta ota rọ da avwanre yẹrẹ ru avwanre obo re brare, ọnana je sa davwen esegbuyota rẹ avwanre ni.

5. Djudje oboresorọ o vwo fo e vwo vwo uchivwo rọ ganre vwọ kẹ esegbuyota rẹ avwanre. (Kọlose 1:23)

⁵ Re vwo djudje rẹ obo rọ ghanre te re vwo vwo uchivwo rọ ganre vwọ kẹ esegbuyota rẹ avwanre, roro kpahen uwevwin ra bọn phiyọ ekogho rẹ etọ de kpogho. Uwevwin tiọyena guọnọ uchivwo rọ ganre rere o vwo jẹ eshe. Ọtiọyen ọ je hepha nẹ, a je guọnọ uchivwo rọ ganre vwọ kẹ esegbuyota avwanre rere e se phi edavwini re djunute vwẹ obenu na kparobọ. Ọtiọyena, avwanre da vwẹ ọkieje ru esegbuyota rẹ avwanre gan, ke che mudia gan je fuevun kẹ Jihova ọke rẹ edavwini.​—1 Kọr. 15:58; se Kọlose 1:23.

6. Die yen vwẹ ukẹcha kẹ iyinkọn na vwọ fuevun kẹ Jesu?

⁶ Die yen vwẹ ukẹcha kẹ iyinkọn na vwọ fuevun kẹ Jesu ọke rẹ ihwo buebun vwọ yan jovwo? Iyinkọn na vwo imuẹro nẹ Jihova yen fo ohwo ra vwẹ ẹga kẹ kidie ọyen ma erọnvwọn eje; nẹ Jesu ke rha hẹ Ọmọ rẹ Ọghẹnẹ ro vwo “eta rẹ arhọ ri bẹdi bẹdẹ”; nẹ ọkieje Jihova vwo biẹcha. Jẹ, ukperẹ ra vwọ ta ota kpahen erọnvwọn sansan re sa davwen esegbuyota rẹ avwanre ni, e jẹ a ta ota kpahen erọnvwọn erha re sa vwẹ ukẹcha kẹ avwanre vwọ fuevun kẹ Jihova ọ da tobọ dianẹ e hirharoku edavwini. (1) Jihova yen Ọmemama rẹ erọnvwọn eje. (2) Ẹwẹn ọfuanfon ri Jihova yen e vwo si Baibol na. (3) Jihova yehẹ obuko rẹ ihwo rọyen nonẹna. Avwanre de vwo imuẹro kpahen erọnvwọn erha nana, avwanre cha fuevun kẹ Jihova siẹrẹ avwanre dahẹ edavwini.

JIHOVAH YEN ỌMEMAMA RẸ ERỌNVWỌN EJE

7. Die yen Ẹvwọphia 4:11 karophiyọ avwanre, jẹ die yen sa phia siẹrẹ avwanre de hirharoku edavwini?

⁷ Se Ẹvwọphia 4:11. Ẹkpo ri Baibol nana karophiyọ avwanre nẹ Jihova yen ma erọnvwọn eje. Ọnana emuọvo rọ sorọ ro vwo fo ohwo rẹ avwanre vwẹ ẹga kẹ. E de roro kpahen ẹgba ro rhere, ọnana kẹ avwanre imuẹro nẹ o che sivwin avwanre vwo nẹ kọdavwini kọdavwini. Ẹkẹvuọvo, evuẹ refian rẹ Eshu hrahra nene akpọ na eje na nẹrhẹ ihwo vwo ẹwẹn ivivẹ sẹ Ọghẹnẹ herọ. Egbaerianriẹn evo sa tobọ ta nẹ arhọ di mu va rhe kpregede. Ọ da dianẹ avwanre rhe vwo imuẹro nẹ Jihova yen ghini Ọmemama na, nẹ o ji vwo ẹguọnọ rẹ avwanree, ọnana sa nẹrhẹ e vwo ẹwẹn ivivẹ sẹ ọ ghene herọ nẹ ọ je cha vwẹ ukẹcha kẹ avwanre siẹrẹ e de hirharoku edavwini.​—Hib. 11:6.

8-9. Die yen ofori nẹ wo ru ọ da dianẹ wo vwo ẹwẹn ivivẹ sẹ Jihova yen Ọmemama na? (Ni ifoto na.)

⁸ Ọ da dianẹ wo vwo ẹwẹn ivivẹ sẹ Jihova yen Ọmemama na, jowọ kpakpata. Reyọ ẹbe rẹ avwanre vwo ru ehiahiẹ wọ sa vwọ mrẹ evuẹ ri djerephia nẹ Jihova yen ma erọnvwọn eje. Wọ sa mrẹ evuẹ buebun ri shekpahen uyovwinrota nana vwẹ ibroshọ rẹ Was Life Created? kugbe Ọtonphiyọ rẹ Arhọ​—Enọ Iyorin re Guọnọ Ẹkpahọnphiyọ re sa nẹrhẹ esegbuyota wẹn ghwotọ. Wọ je sa mrẹ iyovwinreta efa ri djerephia nẹ Ọmemama herọ vwẹ jw.org vwẹ ẹbere rẹ “A Marọ?” Jessica, rọ dia oniọvo aye ọvo vwẹ United States tare nẹ: “Mi vwo se ibroshọ rẹ Ọtonphiyọ rẹ Arhọ na nu, me da rhe mrẹ erọnvwọn ri djerephia nẹ Ọmemama ro vwo aghwanre herọ. Me riẹn ọnana jovwo, jẹ me vwọ fuẹrẹn iroroẹjẹ ra vwọphia vwẹ ibroshọ yena nu, imuẹro mẹ da rhe ganphiyọ.” Vwọba, ihwo buebun je mrẹ erere vwo nẹ ọbe rẹ Is There a Creator Who Cares About You? Ọ sa dianẹ wo se re jovwo re. Ẹkẹvuọvo, wọ sa rhoma se?

⁹ Ọke ọfa wọ da guọnọ rhoma ruẹ uyono ri Baibol romobọ wẹn, wọ sa fuẹrẹn erọnvwọn ri djerephia nẹ Ọghẹnẹ herọ. Ọ dia ehiahiẹ wẹn na de cha nẹrhẹ esegbuyota ru wo vwori nẹ Jihova herọ ganphiyọ ọvoo, ọ je cha nẹrhẹ wo vughe oka rẹ iruemu ri rhere. (Rom. 1:20) Vwọba, wọ sa reyọ obo wo yonori vwọ vwẹ ukẹcha kẹ ihwo efa ri vwo ẹwẹn ivivẹ sẹ Ọghẹnẹ herọ. Ẹkpo na kọna: Jihova kẹ avwanre imuẹro buebun nẹ ọyen yen Ọmemama rẹ avwanre.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

ẸWẸN ỌFUANFON RI JIHOVA YEN E VWO SI BAIBOL NA

10. Ẹro vọ yen ofori nẹ e vwo ni Baibol na? (2 Timoti 3:16, 17)

¹⁰ Se 2 Timoti 3:16, 17. Obọ ri Jihova yen ovuẹ ri Baibol na nurhe vwọ kẹ ihworakpọ. Ọ kpahenphiyọ enọ eghanghanre rẹ akpeyeren, ọtiọyen ji te oboresorọ avwanre vwọ herọ kugbe oborẹ Ọghẹnẹ guọnọre nẹ avwanre ru. O mu avwanre ẹro nẹ Jihova yen vwo Baibol na, rọ nẹrhẹ ọ dia ọbe rọ ma ghanre kparobọ vwẹ akpeyeren rẹ avwanre. Avwanre guọnọ vwo ẹruọ rẹ oborẹ avwanre se vwẹ Baibol na je davwẹngba rẹ avwanre vwọ reyọ vwo ruiruo.

11. Die yen nẹrhẹ o muwẹro nẹ ẹwẹn ọfuanfon rẹ Ọghẹnẹ yen e vwo si Baibol na?

¹¹ Diesorọ o vwo mu avwanre ẹro nẹ ẹwẹn ọfuanfon ri Jihova yen e vwo si Baibol na? O vwo iroro buebun re sorọ. Oborẹ Baibol na ta kpahen obo re phiare vwẹ awanre gbare. (Luk 3:1, 2) Obo rọ ta kpahen erọnvwọn ra mare je gba. (Job 26:7) Dede nẹ Eshu davwẹngba mamọ rọ sa vwọ ghwọrọ Baibol na, jẹ ọyen ọbe ra ma ghare vwẹ ikuegbe rẹ ihworakpọ. Omarẹ eshare 40 yen si Baibol na uvwre ikpe ri dino te 1,600; dedena, oborẹ ayen siri rhọnvwephiyọ ohwohwo. Uchebro rehẹ evun rọyen kpo awanree, ọ vwẹ ukẹcha kẹ iduduru rẹ ihwo vwẹ akpeyeren re. (Isẹ 13:20; 15:21; Mat. 7:12) Kidie nẹ aroẹmrẹ buebun rehẹ evun rọyen rugba re, ọnana odjephia nẹ Baibol na ọyen ọbe ra sa vwẹroso. (Jos. 23:14) Aphro herọọ nẹ, Baibol na ẹwẹn ọfuanfon rẹ Ọghẹnẹ yen e vwo sio!

12. Die yen ofori nẹ e ru ọ da dianẹ e vwo ẹwẹn ivivẹ sẹ ẹwẹn ọfuanfon ri Jihova yen e vwo si Baibol na?

¹² Die yen ofori nẹ e ru ọ da dianẹ e vwo ẹwẹn ivivẹ sẹ ẹwẹn ọfuanfon ri Jihova yen e vwo si Baibol na? Ofori nẹ a nẹrhovwo kpahọn ji ru nene ẹrhovwo rẹ avwanre. Jokaphiyọ oborẹ oniọvo ọshare ra yọnre ghwanre vwẹ ukoko na re se Jordan, tare: “Ọ dia obo ra ghwa vuẹ vwẹ eje yen mi vwo imuẹro kpahaan. Me nabọ roro emu eje fiotọ tavwen. Vwọrẹ uyota, o ji vwo ọkievo mi vwo vwo ẹwẹn ivivẹ. Jẹ emu ọtiọyen da vwomaphia, ke me davwẹngba vwo ruẹ ehiahiẹ vwẹ ẹbe rẹ ukoko avwanre rere me sa vwọ mrẹ ẹkpahọnphiyọ vwọ kẹ enọ mẹ ji phi ẹwẹn ivivẹ kparobọ.” Avwanre vwo ruẹ imuẹro avwanre ganphiyọ nẹ obọ ri Jihova yen Baibol na nurhe ye, uchivwo rẹ esegbuyota rẹ avwanre kọ je cha ganphiyọ.​—1 Kọr. 3:12, 13.

JIHOVA YEHẸ OBUKO RẸ IHWO RỌYEN NONẸNA

13. Die yen ofori nẹ e ru e de vwo ẹwẹn ivivẹ sẹ Ọghẹnẹ ghini obuku rẹ Iseri ri Jihova?

¹³ Ọ da dianẹ avwanre vwo ẹwẹn ivivẹ sẹ Ọghẹnẹ yen ghini obuko Iseri ri Jihova, e jẹ a vwẹ uphẹn kẹ ẹwẹn tiọyena nẹ ọ vwẹ owọ muotọ vwẹ ubiudu rẹ avwanree. Ẹkẹvuọvo, e se phi ẹwẹn ivivẹ kparobọ siẹrẹ a da nọ oma avwanre enọ kerẹ: ‘Amono yen ghene davwẹngba rayen eje vwo yeren akpọ nene iwan ri Baibol na? Amono yen mu esegbuyota rayen kpahen oborẹ Baibol na tare?’ (2 Tim. 4:3, 4) ‘Amono yen ruẹ ọhọre ri Jihova nonẹna?’​—Mat. 7:20, 21.

14. Idjerhe vọ yen Iseri ri Jihova vwo ruẹ orugba rẹ obo rehẹ Matiu 24:14?

¹⁴ Vwọ kpahen eruo rẹ ọhọre rẹ Ọghẹnẹ nonẹna, avwanre sa nọ oma rẹ avwanre, ‘Amono yen ruiruo rẹ aghwoghwo rẹ Jesu mraro rọyen nẹ e che ru vwẹ ọke re koba na?’ (Mat. 24:14) Ẹkpahọnphiyọ na phẹnre gbonozẹ. Ọghẹnẹ reyọ ihwo rọyen re dia Iseri ri Jihova​—vwo ruiruo rẹ aghwoghwo na. Ibrotọ re vrẹ 240 yen Iseri ri Jihova de ghwoghwo iyẹnrẹn esiri rẹ Uvie rẹ Ọghẹnẹ na. Ọ vrẹ ẹgbukpe 100 avwanre ghwoghwo iyẹnrẹn esiri na vwẹ otọ rẹ usuon rẹ Uvie rẹ Ọghẹnẹ re. Vwọrẹ uyota, ọkieje yen avwanre muomaphiyọ iruo rẹ aghwoghwo vẹ eyono na kidie avwanre niro ghanghanre.​—Mat. 28:19, 20.

15. Idjerhe vọ yen Iseri ri Jihova vwo toroba orufon rẹ odẹ rẹ Ọghẹnẹ nonẹna? (Matiu 6:9; Aizaya 43:10)

¹⁵ Se Matiu 6:9 kugbe Aizaya 43:10. Oderhi rẹ Ọghẹnẹ, Jihova yen a reyọ vwo se avwanre, ọghọ rode yen e bru phiyọ avwanre oma re vwo se avwanre Iseri ri Jihova. Ihwo buebun herọ vwẹ akpọ na nonẹna re riẹn odẹ rẹ Ọghẹnẹẹ, ẹkẹvuọvo avwanre wianre gangan vwo phi odẹ na phiyọ ẹdia ro foro vwẹ Baibol na. Odẹ na vwomaphia vrẹ abọ 7,000 vwẹ Efanfan rẹ Akpọ Kpokpọ rẹ Isiesi Ọfuanfon Na.

16. Diesorọ a sa vwọ tanẹ Iseri ri Jihova nene iji rọhẹ Jọn 13:34, 35? (Ni ifoto na.)

¹⁶ Se Jọn 13:34, 35. Ẹguọnọ vẹ okugbe rọhẹ uvwre re avwanre vwẹ akpọ rẹ ohẹriẹ vẹ utuoma vọnre nonẹna, ọyen igbunu rode. Dede nẹ ẹkuruemu vẹ asan sansan yen avwanre nurhe vwẹ akpọ na; avwanre davwẹngba vwo dje ẹguọnọ kẹ ohwohwo ji yerẹn kuẹgbe vwọrẹ ufuoma. O vwo ọke wo vwo kpo asan, wo de kpo uyono vwẹ ukoko ọfa jovwo re? Ọ da dianẹ wọ ra re, aphro herọọ nẹ wo vwo oniso rẹ ẹguọnọ vẹ okugbe rọhẹ uvwre rẹ iniọvo na. Ọnana odjephia nẹ Jihova reyọ Iseri rọyen vwo ruẹ ọhọre rọyen nonẹna. Avwanre da karophiyọ ọnana, aphro herọọ nẹ avwanre cha fuevun kẹ siẹrẹ e de hirharokuẹ koka koka rẹ edavwini.

WỌ VWẸ ỌKE VUỌVO YANJẸ JIHOVA VWOO

17-18. Erhọ yen ebẹnbẹn evo rẹ avwanre se hirharoku, kẹ die yen avwanre se fiudugberi ta?

¹⁷ Ọke ọgangan rọ bẹn eyeren yen avwanre hepha na, ọtiọyena ẹdẹ re koba na cha bẹn vwọ kẹ avwanre ejobi. (2 Tim. 3:1, 13) Avwanre se hirharoku ẹdia efa re pha gangan. Ukoko ri Jihova se bru erhiẹn evo rẹ avwanre nabọ vwo ẹruọ rayeen. Yẹrẹ ọ sa dianẹ e vwo ẹruọ rẹ avwanree yẹrẹ oniọvo ọvo ru obo re da avwanre. Ọ je sa dianẹ o vwo emu vuọvo rẹ avwanre che se ru kpahen obẹnbẹn avwanre ugugege yenaa yẹrẹ mrẹ ẹkpahọnphiyọ vwọ kẹ obo ri kpokpo avwanre naa.

¹⁸ Dede nẹ obo re phia kẹ avwanre na sa so ẹnwan yẹrẹ nẹrhẹ e muomaphiyọ, avwanre sa fuevun kẹ Jihova ọkieje e de vwo imuẹro nẹ ọyen yen Ọmemama na, nẹ obọ rọyen yen Baibol na nurhe, nẹ Iseri ri Jihova eyen ihwo rọyen. Kirobo rẹ Pita vuẹ Jesu, avwanre je sa vuẹ Jihova nẹ: “Ọrovwori, ono yen avwanre che bru ra? Wo vwo eta rẹ arhọ ri bẹdi bẹdẹ.”