Rhe Ruẹ Oyerinkugbe Wẹn vẹ Ọrivẹ Orọnvwe Wẹn Ganphiyọ

1. Diesorọ emamọ igbeyan vwọ dia okẹ ro nẹ obọ ri Jihova rhe?

EMAMỌ igbeyen eyen okẹ ro nẹ obọ ri Jihova rhe. (Jems 1:17) Ayen vwo ẹguọnọ rẹ Ọghẹnẹ vẹ avwanre. Oma vwerhen ayen ọke oma da vwerhen avwanre, ayen phiuduphiyọ avwanre awọ siẹrẹ ẹwẹn avwanre da kuọrọn, je vwẹ uchebro ro fo aruọke vwọ kẹ avwanre. Ayen biẹcha avwanre ọkieje, a je sa vwẹroso ayen. Igbeyan tiọyena “nẹrhẹ ubiudu rẹ ohwo ghọghọ”!​—Isẹ 27:9.

2. Diesorọ ọ vwọ ghanre aye gbe ọshare vwọ vwẹ ọkieje vwọ bọn oyerinkugbe rayen gan? (Matiu 19:6)

² Ọyen obo re ghanre aye gbe ọshare vwọ dia igbeyan re ma kẹrẹ ohwohwo. Ayen cha sa vwẹ ẹro okueku vwo nẹ oyerinkugbe rayen naa​—ofori ayen wian kugbe vwọ bọn gan ọkieje. Ayen de gbobọnyẹ oyerinkugbe na, ayen sa mrẹ oma rayen vwẹ ẹdia rẹ ọruvwohwo, ofu se dje ayen yẹrẹ tobọ muophu. Jẹ ayen da bọn oyerinkugbe rayen na gan ọkieje, orọnvwe rayen kọ cha nabọ gan. (Se Matiu 19:6.) Vwẹ uyono nana, a cha mrẹ oborẹ aye gbe ọshare sa vwọ bọn oyerinkugbe rayen gan ọkieje. Jẹ ẹsosuọ, e jẹ a ta ota kpahen oborẹ Inenikristi rehẹ ẹdia ri kpogono sa vwọ guọnọ ọrivẹ orọnvwe rọ cha dia ugbeyan rọ ma kẹrẹ ayen bẹdẹ.

OBO RA SA VWỌ GUỌNỌ OHWO RỌ CHA DIA UGBEYAN AVWANRE BẸDẸ

3-4. Die yen cha vwẹ ukẹcha kẹ ohwo vwọ mrẹ omamọ ọrivẹ orọnvwe? (Isẹ 18:22)

³ Tavwen avwanre ki brorhiẹn ọghanghanre, ofori nẹ e roro kpahen imuoshọ vẹ erhuvwu ro se nẹ obuko rọyen rhe. Ọtiọyena, ọyen obo re ghanre ra vwọ nabọ roro kpahen ayen, kidie erhiẹn re brẹ se wene akpeyeren avwanre ọke grongron.

⁴ Ọvo usun erhiẹn re ma ghanre kparobọ re che bru vwẹ akpeyeren yen a da guọnọ ọrivẹ orọnvwe. Ọ vwọ dianẹ Jihova yen ton ọrhuẹrẹphiyotọ rẹ orọnvwe phiyọ na, ọyen emu rẹ aghwanre ra vwọ nokpẹn rẹ odjekẹ rọyen siẹrẹ a da guọnọ ọrivẹ orọnvwe. Ọ guọnọre nẹ ọshare rọvwọn omamọ aye, aye me rha rọvwọn omamọ ọshare. Jihova riẹn obo ri me yovwin kẹ avwanre ọkieje. (Se Isẹ 18:22; Aiz. 48:17, 18) Odjekẹ rehẹ evunrẹ Ota rẹ Ọghẹnẹ sa vwẹ ukẹcha kẹ Onenikristi vwọ mrẹ ohwo ro fori nẹ o vwo ru ọrivẹ orọnvwe.

5. Diesorọ ọ vwọ ghanre ra vwọ rọvwọn ohwo rọ bromaphiyame re?

⁵ Avwanre vwo bromaphiyame nu, kẹ avwanre rhe dia igbeyan rẹ Ọghẹnẹ. (Une 25:14) Wọ da guọnọ rọvwọn, ofori nẹ wọ rọvwọn ohwo rọ dia ugbeyan ri Jihova. (1 Kọr. 7:39) Siẹrẹ wo de ru ọtiọyen, jẹ wo djephia nẹ wo vwo ọdavwaro kpahen iwan ri Jihova, ku wọ je cha mrẹ ọrivẹ orọnvwe wẹn kerẹ ebruphiyọ ro nẹ obọ ri Jihova rhe. (Isẹ 19:14) Wọ je cha vrabọ rẹ ebẹnbẹn ro no cha siẹrẹ e de “kuomakugbe ihwo re dia Inenikristi-i.” (2 Kọr. 6:14) Mavọ yen ọ dia emu ẹkpa te wọ vwọ kọnphiyọ ohwo rọ vwẹ ẹga kẹ Jihovaa, kidie wo ni rhe ni kpo wọ mrẹ ohwo wọ guọnọ rọvwọn vwevunrẹ ukoko naa! Je kẹnoma kẹ iroro na nẹ wọ da kọnphiyọ ohwo rọ vwẹ ẹga kẹ Jihovaa, o se kurhẹriẹ vwẹ obaro na.

6-7. Erhọ yen enọ re guọnọ ẹkpahọnphiyọ ọke ra da kọnphiyọ ohwohwo?

⁶ Uyota nẹ, ọ dia kohwo kohwo ro bromaphiyame re yen fo kẹ ọrivẹ orọnvwee. Nabọ guọnọ otọ rẹ ohwo ru wọ guọnọ rọvwọn na.a Nọ oma wẹn: ‘Mavọ yen o nene ihwo rẹ orua rọyen yerẹn wan? Ọyen ohwo ro vwo ọghọ ro ji dje erorokẹ vwọ kẹ ihwo? Amono yen igbeyan rọyen? Ọ sa rhuẹrẹ ẹghwọ phiyọ? Ọyen ohwo ro si isiesi nẹ ọrọyen ọvo yen gbare gbanẹ ọ nuẹ ọ da dianẹ obo ra ta na vwọso odjekẹ ri Baibool? Ẹro vọ yen o vwo nẹ igho?’

⁷ Wọ je sa nọ oma wẹn: ‘Oniọvo me guọnọ rọvwọn na vwo ẹguọnọ okokodo kpahen Jihova? O vwo “uruemu ọkpokpọ na”? Ọ cha vwẹ ukẹcha kẹ vwẹ vwọ nabọ vwẹ ẹga kẹ Jihova? Oborẹ avwanre vwọtua vwẹ ẹga ri Jihova ọvuọvo? Me sa mrẹ nẹ ọ dia omamọ igbeyan ọvo yen avwanre cha diaa, ẹkẹvuọvo igbeyan re ma kẹrẹ ohwohwo?’ (Kọl. 3:9, 10) Wọ da dia aye, oniọvo ọshare rọ kọnphiyọ owẹ na cha dia omamọ ugbeyan kugbe uvi rẹ ọgbuyovwin rẹ orua? (1 Kọr. 11:3) Wọ da dia ọshare, oniọvo aye wọ kọnphiyọ na che muọghọ kẹ wẹ kerẹ ọgbuyovwin rẹ orua na dede nẹ wẹwẹ ohwo rọ gbaree? A ke sa kpahenphiyọ enọ tiọyena, ọ cha reyọ ọke. Ọtiọyena, reyọ ọke rẹ ovwan vwọ kọnphiyọ ohwohwo na vwọ nabọ vughe oniọvo ru wọ guọnọ rọvwọn na.

8-9. Die yen sa vwẹ ukẹcha kẹ oniọvo rọ guọnọ rọvwọn vwo brorhiẹn rẹ aghwanre? (Ni ifoto na.)

⁸ Wọ da davwẹngba vwọ nabọ vughe ohwo ru wọ guọnọ rọvwọn na ọke rẹ ovwan da kọnphiyọ ohwohwo, ọnana sa nẹrhẹ wo brorhiẹn rẹ aghwanre. Ẹro vọ yen ihwo efa vwo ni ohwo ru wọ guọnọ rọvwọn na? Wọ sa nọ ihwo efa kpahen iruemu yẹrẹ oka rẹ ohwo rọ hepha. Kerẹ udje, a riẹnrẹ phiyọ ohwo rọ nuẹ, rọ vwomakpotọ, ro ji dje uruemu esiri kẹ ihwo? Sarah, oniọvo aye vwẹ French Guiana rọ rọvwọn oniọvo ọshare re se Daniel tare nẹ: “Me guọnọ otọ rẹ erọnvwọn buebun vwo mie oniọvo ọshare rọ vẹ Daniel gba dia uwevwin ji ruiruo rẹ ọkobaro kuẹgbe, ọkpako rọ vẹ Daniel gba hẹ ukoko ọvo, igbeyan avwanre, kugbe vwo mie iniọvo eya rehẹ ukoko rọyen.” Wọ je sa nọ ohwo ru wọ kọnphiyọ na sẹ o vwo erọnvwọn evo ro ruru vwẹ obuko re yẹrẹ o krinọọ na ro fori nẹ wọ riẹn, kidie erọnvwọn yẹrẹ iruemu evo tiọyena sa ghwa ebẹnbẹn ro orọnvwe na vwẹ obaro na.

⁹ Ọ da dianẹ wo vwo ẹwẹn ivivẹ kpahen oniọvo wọ guọnọ rọvwọn na yẹrẹ oborẹ iniọvo ta kpahọn ghwe foo, wọ jẹ ayen kuẹfiaa. Vwẹ idjerhe ọtiọyen, ku wo se brorhiẹn ro fori sẹ wọ cha kpairoro vrẹ ọyan rẹ orọnvwe na yẹrẹ wọ cha rọvwọn ohwo na.b Asaọkiephana, e jẹ a tẹnrovi ihwo re rọvwọnre vwẹ asan ro chekọ vwẹ uyono nana.

GHWỌRỌ ỌKE KUGBE VWO RU OYERINKUGBE RẸ OVWAN GANPHIYỌ

10. Diesorọ o vwo yovwin aye gbe ọshare vwo vwo ọke rẹ ohwohwo?

¹⁰ Aye gbe ọshare se ru oyerinkugbe vẹ orọnvwe rayen ganphiyọ womarẹ ayen vwo vwo ọke rẹ ohwohwo, o toro oborẹ erọnvwọn bun ayen abọ tee. Ọnana cha nẹrhẹ ayen vwo uphẹn rẹ ayen vwo dje ẹguọnọ kẹ ohwohwo, ha eha kugbe, je ta ota kpahen obo re phiare vwẹ ẹdẹ yena, ọtiọyen ji te ọdavwẹ vẹ oborẹ oma ru ayen.

11. Die yen sa so imuoshọ kẹ oyerinkugbe rẹ aye gbe ọshare?

¹¹ Aye gbe ọshare ri vwo oyerinkugbe rọ kpẹkpẹre guọnọ nẹ emu vuọvo phi ohẹriẹ phiyọ uvwre rayeen. Uyota nẹ, o vwo ọmọke evo rẹ ayen sa vwọ hẹrioma. Jẹ, ayen da hẹrioma ọke grongron, ọnana sa ghwa imuoshọ rhe. Kerẹ udje, evo ruiruo vwẹ ẹkuotọ efa, rọ nẹrhẹ ayen sherabọ vwọ kẹ orua rayen ọke grongron. Dede nẹ ọnana sa nẹrhẹ ayen vwẹ igho buebun vwo rhe orua rayen, jẹ ọ sa ghwa okpetu rhe orọnvwe rayen kidie ayen sherabọ kẹ ohwohwo nọ.

12-13. (a) Die yen Inenikristi evo re rọvwọnre ruru rẹ ayen se vwo nene ọrivẹ orọnvwe rayen ghwọrọ ọke kugbe? (Ni ifoto na.) (b) Mavọ yen ofori nẹ oyerinkugbe rọhẹ uvwre wẹn vẹ ọrivẹ orọnvwe wẹn ghanre te kẹ wẹ? (Ni ekpeti na “Ẹdia Ọrivẹ Orọnvwe Wẹn Kare Vwẹ Akpeyeren Wẹn.”)

¹² Jokaphiyọ oborẹ eya gbe eshare evo ruru rere ayen sa vwọ ghwọrọ ọke kugbe ọkieje. Leah rọ dia Guam da ta: “Oma vwerhen ovwẹ vẹ ọshare mẹ siẹrẹ avwanre de ruẹ erọnvwọn kuẹgbe. Ọ bẹn avwanre vwọ yanjẹ ohwohwo vwo siẹrẹ avwanre de kpo akpọẹriọ yẹrẹ de kpo oyan ẹyan.” Roxanne, rọ dia United States da vwọba: “Ọ vwọ dianẹ o vwo erọnvwọn buebun re reyọ ọke avwanre na, avwanre ke rhe mrẹ nẹ ọyen obo ri fori avwanre vwọ rhuẹrẹ ọke rẹ avwanre cha ghwọrọ kugbe phiyọ kirobo rẹ avwanre ji ruẹ kpahen erọnvwọn efa re pha ghanghanre.” (Ni Emọs 3:3.) Damien rọ dia France da je ta: “Avwanre je rhe mrẹvughe nẹ ọyen obo re ghanre re vwo vwo ọdavwẹ ji vwo omavwerhovwẹn kpahen obo ri je ohwo ọvuọvo.” (Mat. 7:12) Katie rọ je dia United States je tanẹ: “Ọkievo, avwanre phi ifonu avwanre phiyọ akọkọ i vwo jẹ oborẹ avwanre ruẹ e gbowọphiyọ.”

¹³ Ọ rọ ma ghanre, ovwan ghwọrọ ọke kugbe vwẹ irueru rẹ ẹga na. Myriam rọ dia France tare nẹ: “Avwanre vwẹ isese ri Baibol na vwọ ton ẹdẹ rẹ avwanre phiyọ je ta ota kpahen obo ri je avwanre kugbe oborẹ avwanre sa vwọ reyọ vwo ruiruo vwẹ akpeyeren avwanre. Ọke avwanre ghwọrọ kuẹgbe na vwerhen ovwẹ oma mamọ.” Ọ da je ta: “Oma vwerhen ovwẹ avwanre da nẹrhovwo kuẹgbe ji nyo oborẹ ọshare mẹ vwo ẹguọnọ ri Jihova te.” Katie re djunute siẹvure da ta: “Ọke avwanre ghwọrọ kuẹgbe vwẹ iruo rẹ aghwoghwo na yen me je vwe. Ọ vwerhen avwanre oma siẹrẹ avwanre de nyo oborẹ ohwo ọvuọvo ta vwo dje esegbuyota rọyen phia ji yono erọnvwọn kpokpọ mie ohwohwo.”​—Isẹ 27:17.

TINKAMU OHWOHWO EBẸNBẸN DA VWOMAPHIA

14-15. Diesorọ aye gbe ọshare vwọ davwẹngba vwo phi ebẹnbẹn re sa vwomaphia vwẹ orọnvwe rayen kparobọ? Djudje rọyen.

¹⁴ Eya gbe eshare re rọvwọnre che hirharoku ebẹnbẹn vwẹ orọnvwe rayen kidie ayen ihwo re gbaree. Baibol na tare nẹ ihwo re rọvwọnre “che vwo ukpokpogho vwẹ ugboma rayen.” (1 Kọr. 7:28) Study note rẹ owọrota nana tare nẹ eta nana mudiaphiyọ ebẹnbẹn rẹ ihwo re rọvwọnre hirharokuẹ. Siẹrẹ ebẹnbẹn tiọyena da vwomaphia, diesorọ ayen vwọ davwẹngba vwo tinkamu ohwohwo ji phio kparobọ?

¹⁵ Vwẹ ẹwẹn roro nẹ asan ọvo vwẹ uwevwin ro kperusi yẹrẹ oma ọghanghanre guọghọre, aphro herọọ nẹ ihwo ri vwo ayen cha davwẹngba vwọ rhuẹrẹ asan rọ guọghọre na phiyọ. Ọ sa dianẹ ọ cha reyọ ikpe evo, ọtiọyen ji te igho buebun vẹ erọnvwọn efa ayen ke sa rhuẹrẹ asan ro miovwirin na phiyọ. Diesorọ? Kidie uwevwin yẹrẹ oma tiọyena pha ghanghanre vwẹ ẹro rayen. Eriyin orọnvwe eje je hepha. Vwẹ orọnvwe evo re nabọ ghwotọ dede, ẹghwọ sa vwomaphia. Kirobo ra sa rhuẹrẹ uwevwin yẹrẹ oma rọ guọghọre phiyọ ye, a je sa rhuẹrẹ ebẹnbẹn rẹ orọnvwe phiyọ. A guọnọ ẹgbaẹdavwọn vẹ ọke a ke sa rhuẹrẹ ebẹnbẹn tiọyena phiyọ, ẹkẹvuọvo oma cha vwerhen Jihova siẹrẹ aye gbe ọshare na da davwẹngba vwọ dia kugbe je rhuẹrẹ ebẹnbẹn rayen phiyọ. (Mal. 2:16) Ayen vwo ruẹ ọtiọyen ye, ọ dia ayen di djephia nẹ ayen vwo ẹguọnọ ji brọghọ phiyọ ohwohwo oma ọvoo, ẹkẹvuọvo ayen ji muọghọ kẹ Jihova rọ dia ohwo rọ ton orọnvwe phiyọ.

16. Vwo nene obo rehẹ 1 Kọrẹnt 13:4-8a, die yen sa vwẹ ukẹcha kẹ aye gbe ọshare ri hirharokuẹ ebẹnbẹn egangan vwẹ orọnvwe rayen? (Ni ifoto kugbe ekpeti na “Ukẹcha Oborẹ Ovwan se Vwo ru Oyerinkugbe rẹ Ovwan Ganphiyọ.”)

¹⁶ Ebẹnbẹn da vwomaphia vwẹ orọnvwe wẹn, wo brokpakpa hẹriomaa. (1 Kọr. 7:10, 11) Ukperẹ ọtiọyen nọ oma wẹn, ‘O vwo orọnvwọn ọfa mi se ru vwo ru oyerinkugbe na ganphiyọ?’ Fuẹrẹn oborẹ Baibol na ta kpahen re vwo dje ẹguọnọ phia, wo ji roro kpahen oborẹ wo se vwo dje ẹguọnọ phia vwọ vrẹ obo ri jovwo vwo nene obo rehẹ 1 Kọrẹnt 13:4-8a. (Se.) Ukperẹ wọ vwọ guọnọ oborẹ wọ sa vwọ yanjẹ ọrivẹ orọnvwe wẹn vwo, davwẹngba vwọ guọnọ oborẹ ovwan sa vwọ rhoma vwo ẹguọnọ rẹ ohwohwo. Tẹnrovi oborẹ wo se ru vwo ru oyerinkugbe na gan. Nẹrhovwo rhe Jihova nẹ o sun we. Hiẹ guọnọ ukẹcha vwo nẹ ẹbe vẹ ividio rẹ ukoko na, wọ je nokpẹn rẹ uchebro vwo mie ekpako vẹ iniọvo ri tedje efa. Wọ da vwẹroso Jihova rọ dia ohwo rerha rọ je ma gan kparobọ vwẹ “ufi rẹ ogẹ” erha na, orọnvwe wẹn kọ cha gan kokoroko.​—Aghwo. 4:12.

17. Mavọ yen ihwo re guọnọ rọvwọn vẹ e re rọvwọn nure sa vwọ mrẹ omavwerhovwẹn?

¹⁷ Jihova guọnọre nẹ oma vwerhen idibo rọyen eje, ọtiọyen ji te e re guọnọ rọvwọn vẹ e re rọvwọn nure. Ọtiọyena ọ da dianẹ wọ guọnọ rọvwọn, gba jomaotọ guọnọ ohwo wọ cha rọvwọn. Jẹ ọ da dianẹ wọ rọvwọnre, vwẹ ọkieje vwo ru oyerinkugbe wẹn vẹ ọrivẹ orọnvwe wẹn gan. Vwẹroso ukẹcha ri Jihova, wọ wian kpahen obo wo se vwo yerin ghene ebẹnbẹn re sa vwomaphia vwẹ orọnvwe wẹn. Wo de ru erọnvwọn nana, wẹ vẹ ọrivẹ wẹn kọ cha riavwerhen rẹ akpeyeren!​—Aghwo. 9:9.