Re Vwo Vwo Ẹruọ rẹ Oborẹ Omaebrophiyame Mudiaphiyọ

1. Die yen djerephia nẹ omaebrophiyame ọyen uyono ọghanghanre vwẹ Baibol na?

A MRẸ vwo dje aghọghọ rẹ avwanre siẹrẹ ihwo kpokpọ de bromaphiyamee! Wọ riẹnre nẹ ọkpọ rẹ aghọghọ nana je vwomaphia vwẹ ukoko rẹ Inenikristi ọke rẹ ihwo buebun vwo bromaphiyame vwẹ Pẹntikọst 33 C.E.? Vwẹ omẹvwa yena, a ta ota ro dje oborẹ omaebrophiyame ghanre te ji bru ihwo phiyame. (Iruo 2:38, 40, 41) Ọyinkọn Pọl siri nẹ “uyono rẹsosuọ ro shekpahen Kristi” na churobọ si ‘uyono rẹ omaebrophiyame.’ (Hib. 6:1, 2) Dede nẹ omaebrophiyame ọvo usun iyono kiriguo rọhẹ Baibol na, o fori a vwọ nabọ vwọ ẹruọ rọyen. Diesorọ?

2. Diesorọ o vwo fo a vwọ nabọ vwo ẹruọ rẹ oborẹ omaebrophiyame mudiaphiyọ?

² Kirobo rẹ uchivwo rọ ganre nẹrhẹ uwevwin sa nabọ muẹ viẹ ye, ọtiọyen ọ je hepha nẹ e de vwo ẹruọ rẹ oborẹ omaebrophiyame mudiaphiyọ, ọ sa nẹrhẹ e vwo esegbuyota rọ ganre. Ofori nẹ e vwo ẹruọ nana, owenẹ e bromaphiyame ikpe buebun re yẹrẹ e muegbe re vwo ru ọtiọyen. Vwẹ uyono nana, a cha kpahenphiyọ enọ nana: Die yen omaebrophiyame mudiaphiyọ? Die yen omaebrophiyame rẹ Onenikristi churobọ si? Kẹ, diesorọ e vwo bromaphiyame vwẹ odẹ rẹ Ọsẹ na, ọ rẹ Ọmọ na kugbe ọ rẹ ẹwẹn ọfuanfon na?

OBORẸ OMAEBROPHIYAME WẸN MUDIAPHIYỌ

3. Die yen omaebrophiyame wẹn djephia?

³ Omaebrophiyame ọyen odjephia vwọ kẹ ihwo nẹ wo kurhẹriẹ nẹ imwemwu wẹn ji rhiabọreyọ uyota ro shekpahen Jihova Ọghẹnẹ vẹ Jesu Kristi re, nẹ wo ji ru ewene vwẹ akpeyeren wọ sa vwọ vwẹ ẹga kẹ Jihova je riẹn nẹ womarẹ Jesu yen Ọghẹnẹ wan sivwin avwanre, je nẹrhovwo rhe Ọghẹnẹ nẹ otọ rẹ ubiudu rhe nẹ wo vwo owenvwe wo vwo ru ọhọre Rọyen vẹ oborẹ ukoko Rọyen guọnọre. Wo de ghwe ve ive yena yẹrẹ vwomakpahotọ ji bromaphiyame nu, kọyen wọ ton oyan rẹ arhọ ri bẹdẹ na phiyọ re.

4. Die yen o mudiaphiyọ re vwo duvwun ohwo phiyame kakare? (Ni ifoto na.)

⁴ Siẹrẹ e de bru we phiyame, e che duvwun uwe phiyame na kakare je kpare owẹ phia,a kerẹsiẹ ra da mrẹ nẹ e bru uwe phiyotọ je kparẹ owẹ phia. (Ni Kọlose 2:12.) Omaebrophiyame dje ewene sansan ru wo ruru vwẹ akpeyeren phia. Vwẹ idjerhe vọ? E de bru we phiyame na, jẹ wo djephia nẹ wo gbobọnyẹ oka rẹ akpọ ru wo yerẹn jovwo. Siẹrẹ wo de vrẹn nẹ ame na rhe, ku wọ cha ton akpọ kpokpọ phiyọ rọ dia eruo rẹ ọhọre rẹ Ọghẹnẹ.

5. Idjerhe vọ yen owian rẹ wọ wian wo vwo muegbe kẹ omaebromaphiyame vwọ họhọ owian rẹ Noa wianre rọ vwọ kare okọ na? (1 Pita 3:18-21)

⁵ Se 1 Pita 3:18-21. A sa vwẹ owian rẹ wọ wian wo vwo muegbe vwọ kẹ omaebrophiyame vwo dje owian rẹ Noa wianre rọ vwọ kare okọ na. Ọ da dianẹ wo yono kpahen Jihova obọ, wo se no nẹ owian rọhẹ obaro na pha gangan kirobo owian rẹ Noa vwọ kare okọ na hepha. Owian yena eje ghini fo? Vwọ kẹ Noa, o fori. Ọghẹnẹ komobọ yen vwẹ ona obo ra cha kare okọ na wan vwọ kẹ Noa, o de nene odjekẹ na kpẹkpẹkpẹ rere e se vwo sivwin urhuarhọ rẹ ihwo vwọ vrabọ rẹ Oghwe na. Womarẹ esegbuyota vẹ obicha rẹ Ọghẹnẹ, Noa de nyẹme, ọ da kare okọ na. Kerẹ Noa, wo se ru “erọnvwọn eje rẹ Ọghẹnẹ” vuẹ wẹ nẹ wo ru efẹrẹvo.​—Jẹn. 6:22.

6. Diesorọ a sa vwọ tanẹ omaebrophiyame sivwin uwe?

⁶ Vwẹ owọ 21, ọyinkọn Pita siri nẹ omaebrophiyame ‘sivwin uwe.’ Uyota nẹ ọ dia ame ghevweghe re bru we phiyọ na yen ghwa usivwin chaa yẹrẹ hworhẹ imwemwu wẹn noo. Ọbara ri Jesu ọvo yen sa hworhẹ imwemwu wẹn. (1 Jọn 1:7) Ẹkẹvuọvo, omaebrophiyame ọyen ọvo usun rẹ erọnvwọn eghanghanre ri Jihova vuẹ avwanre nẹ e ru, ọ je nẹrhẹ wọ sa ‘rẹ Ọghẹnẹ nẹ ọ kẹ wẹ omamọ rẹ ẹwẹn obrorhiẹn.’ Oma cha vwerhen Jihova rọ vwọ reyọ imwemwu wẹn vwo ghovwo uwe. Vwẹ idjerhe tiọyena, omaebrophiyame ‘sivwin uwe’ yẹrẹ sun we kpo usivwin.

OBORẸ OMAEBROPHIYAME RẸ ONENIKRISTI CHUROBỌ SI

7. Mavọ yen e brẹ ihwo phiyame wan?

⁷ Baibol na djunute erọnvwọn efa buebun vwọ vrẹ e vwo bru ohwo phiyame karekaree. Jẹ, Baibol na vuẹ avwanre obo ro fori nẹ e ru. Kerẹ udje, odjekẹ ri Baibol vwẹ ukẹcha kẹ ihwo ri che bromaphiyame vwọ riẹn oka rẹ iwun rẹ ayen che kuphiyọ vwo bromaphiyame kugbe oborẹ ihwo ri nughe rayen cha ghwa oma wan. (1 Kọr. 14:40; 1 Tim. 2:9) Nonẹna, ekpako yen bru ihwo phiyame, avwanre je kẹnoma kẹ a vwọ vwẹ okpẹro vwo nẹ ihwo ri vwo uphẹn nana. (1 Kọr. 1:14, 15) Omaebrophiyame pha ghanghanre o toro uchunu rẹ ihwo ri nughe rayeen.​—Iruo 8:36.

8. Enọ vọ yen a nọ ihwo re che bru phiyame, kẹ diesorọ? (Iruo 2:38-42) (Ni ifoto na.)

⁸ Baibol na tare nẹ avwanre dje esegbuyota avwanre phia womarẹ e vwo ‘ghwoghwo vwẹ azagba rere e se vwo vwo usivwin.’ (Rom 10:9, 10; ni study note rẹ “publicly declare.”) Ọyen obo re ghanre mamọ re vwo ru ọtiọyen ọke re de bromaphiyame rọ dia obo ra ma guọnọ e se vwo vwo usivwin. Fikirẹ ọyena, a nọ ihwo ri che bromaphiyame na enọ ivẹ. Ọrẹsosuọ yen, “Wo kurhẹriẹ nẹ imwemwu wẹn re, wọ da vwẹ oma wẹn kpahotọ kẹ Jihova, ji rhiabọreyọ idjerhe usivwin rọyen womarẹ Jesu Kristi?” Onọ nana nẹrhẹ a riẹn oborẹ ohwo na muegbe te vwọ kẹ omaebrophiyame, kọ ghwa họhọ oborẹ Pita vuẹ otu na vwẹ Pẹntikọst. Onọ rivẹ yen, “Wọ riẹnre nẹ omaebrophiyame wẹn dje we phia kerẹ Oseri ri Jihova ro kuomakugbe ukoko rọyen?” Onọ nana karophiyọ avwanre nẹ a cha yanmu omaẹvwọkpahotọ rẹ avwanre womarẹ e vwo nene odjekẹ rẹ ukoko ri Jihova vwọphia ji nene iniọvo avwanre ga kuẹgbe kirobo rẹ Inenikristi rẹ ẹgbukpe ujorin rẹsosuọ ruru. (Se Iruo 2:38-42.) Ihwo re sa kpahenphiyọ enọ yena gorigori nẹ e, vwo nẹ otọ rẹ ubiudu rhe yen muwan rẹ omaebrophiyame.

9. Erhọ yen owọẹjẹ evo ra guọnọ mie avwanre e se vwo vwo aroesiri rẹ Ọghẹnẹ?

⁹ Ọ sa dianẹ wọ ke rhe ton uyota na eyono phiyọ, wo ji rhi ru umwemwu ọgangan vuọvo vwẹ akpeyeren wẹẹn. Yẹrẹ ọ sa dianẹ ọsẹ vẹ oni re dia Inenikristi yen yọnrọn owẹ ghwanre je vwẹ ukẹcha kẹ wẹ vwo vwo ẹguọnọ ri Jihova. O ji fo wo vwo kurhẹriẹ ji bromaphiyame wo se vwo vwo aroesiri rẹ Ọghẹnẹ? E. O toro ẹkuruemu yẹrẹ asan re nurhee, avwanre eje riuku rẹ umwemwu rọ nẹrhẹ avwanre sherabọ kẹ Ọghẹnẹ. (Une 51:5) Dedena, avwanre vwo vughe Jihova phiyọ ye, ka sa vwẹ eruo rẹ ọhọre rọyen vwọ ka obaro kẹ ọ rẹ avwanre. E de ru ọyena nu, ke se kurhẹriẹ ji wene idjerhe rẹ avwanre ji yeren akpọ nene oborẹ Ọsẹ avwanre rọhẹ odjuvwu guọnọre. Ọtiọyena avwanre ki se bromaphiyame.​—Iruo 3:19.

10. Wo de bromaphiyame vwẹ ẹga ọfa jovwo re, die yen o fori nẹ wo ru?

¹⁰ Ọ da dianẹ wo bromaphiyame vwẹ ẹga rẹ wọ ra jovwo, o ji fo nẹ wo bromaphiyame kerẹ Oseri ri Jihova. Diesorọ? Kidie ọke yena wo ji rhi vwo ẹruọ rẹ uyota ro shekpahen Jihova Ọghẹnẹ vẹ Jesuu. Jẹ ọ da tobọ dianẹ wọ vwomakpahotọ kẹ Ọghẹnẹ vwẹ ẹrhovwo re, ọ dia wo ruẹ ọtiọyen kidie nẹ wo vwo ẹruọ rẹ ọhọre rẹ Ọghẹnẹẹ. Ọke rẹ ọyinkọn Pọl vwọ mrẹ eshare evo vwẹ Ẹfesọs ri bromaphiyame dede nẹ ayen vwo ẹruọ rẹ uyota ro shekpahen Jesuu, o de ru ọrhuẹrẹphiyotọ rẹ ayen vwọ rhoma bromaphiyame.b (Iruo 19:1-5) Ọtiọyen ọ je hepha nonẹna nẹ Jihova ki se rhiabọreyọ omaebrophiyame rẹ avwanre, ke che vwo erianriẹn ọgbagba rẹ ọhọre rẹ Ọghẹnẹ.

“VWẸ ODẸ RẸ ỌSẸ NA, Ọ RẸ ỌMỌ NA KUGBE Ọ RẸ ẸWẸN ỌFUANFON NA”

11. Die yen o mudiaphiyọ ra vwọ “vwẹ odẹ rẹ Ọsẹ na, ọ rẹ Ọmọ na kugbe ọ rẹ ẹwẹn ọfuanfon na” vwo bromaphiyame? (Matiu 28:18-20)

¹¹ Jesu tare nẹ a “vwẹ odẹ rẹ Ọsẹ na, ọ rẹ Ọmọ na kugbe ọ rẹ ẹwẹn ọfuanfon na” vwo bru idibo kpokpọ phiyame. (Se Matiu 28:18-20.) Die yen otọ rẹ ota rọyen na? Ọkieje vwẹ Baibol na, e de djisẹ rẹ ota na “odẹ,” o mudiaphiyọ oka rẹ ohwo ra hepha. O ji se mudiaphiyọ ẹdia kugbe ogangan rẹ odẹ na mudia kẹ. Ọtiọyena avwanre da “vwẹ odẹ rẹ” orọnvwọn yẹrẹ ohwo vwo ru emuọvo, jẹ avwanre rhọnvwephiyọ ogangan ro rhe ohwo rọhẹ obuko rẹ odẹ na. (Ni Matiu 10:41; ni study note rẹ “because he is a prophet.”) E jẹ a mrẹ obo re se vwo vughe ẹdia vẹ ogangan rẹ Ọsẹ na vẹ Ọmọ na vwori, ọtiọyen ji te ẹdia rẹ ẹwẹn ọfuanfon na kare.

12. Idjerhe vọ yen avwanre vwọ vwẹ odẹ rẹ Ọsẹ na vwo bromaphiyame? (Ẹvwọphia 4:11) (Ni ifoto na.)

¹² Vwẹ odẹ rẹ Ọsẹ na. Avwanre riẹnre nẹ Jihova yen Ọsẹ rẹ avwanre rọhẹ odjuvwu yẹrẹ ohwo rọ kẹ avwanre Arhọ. Ọyen Ọghẹnẹ ro me vwo ẹgba na, rọ ma erọnvwọn ejobi. (Se Ẹvwọphia 4:11.) Avwanre riẹnre nẹ ọyen Ohwo ro nyo ẹrhovwo, avwanre brọghọ phiyọ odẹ rọyen je reyọ vwo ruiruo odedede siẹrẹ a da nẹrhovwo rhe je vuẹ ihwo efa kpahọn. (Une 65:2) Jẹ, re vwo bromaphiyame vwẹ odẹ rẹ Ọsẹ na churobọ si erọnvwọn buebun. Ihwo rẹ Pita ta ota kẹ vwẹ Pẹntikọst vughe Jihova jovwo re, ẹkẹvuọvo ofori nẹ ayen mrẹvughe nẹ Ọyen kẹ ayen usivwin ri bẹdẹ womarẹ Jesu Kristi.​—Rom 5:8.

13. Idjerhe vọ yen avwanre vwọ vwẹ odẹ rẹ Ọmọ na vwo bromaphiyame? (Ni ifoto na.)

¹³ Vwẹ odẹ rẹ Ọmọ na. Avwanre vwo ọmrẹvughe nẹ Jesu yen Ọmọ ọvuọvo rẹ Ọghẹnẹ. Jesu yen “idjerhe na,” ọyen ọvo yen avwanre sa wan oma rọyen vwo vwo uvi rẹ oyerinkugbe vẹ Jihova. (Jọn 14:6) Jesu yen Tan avwanre hirhe, ohwo ro ghwu kẹ avwanre rere avwanre se vwo vwo arhọ. Fikirẹ ọyena, kẹ avwanre yan nene udje rọyen vwẹ akpeyeren avwanre eje, ọ dia ọke avwanre vwo bromaphiyame ọvoo. (1 Jọn 2:6) Ọtiọyena, kẹ avwanre ghwoghwo vẹ oruru kirobo ro ruru, avwanre cha vwẹ uphẹn kẹ emuọvo nẹ ọ dobọ rẹ avwanre jii. (Luk 4:43) Avwanre tobọ vwẹ owenvwe re vwo chirakon rẹ omukpahen rere a sa vwọ fuevun ga Jihova. (2 Tim. 3:12) Avwanre muọghọ kẹ Jesu je vwomakpotọ kẹ ihwo re ka obaro re je vwẹrote idibo rọyen, kidie ọyen yen “uyovwin rẹ ukoko na.”​—Ẹfe. 4:8, 11, 12; 5:23.

14. (a) Idjerhe vọ yen avwanre vwọ vwẹ odẹ rẹ ẹwẹn ọfuanfon na vwo bromaphiyame? (Ni ifoto na.) (b) Erhọ yen omaebrophiyame efa ra je vwọ kẹ ihwo ra jẹreyọ na? (Ni ekpeti na “Omaebrophiyame Efa re je Herọ kẹ Ihwo ra Jẹreyọ Na.”)

¹⁴ Vwẹ odẹ rẹ ẹwẹn ọfuanfon na. Avwanre rhiabọreyọ uyota ro shekpahen ẹwẹn ọfuanfon na. Ọ dia ohwoo yẹrẹ ẹbẹre ọvo rẹ eghẹnẹ erha ri kuomakugbe dia ọvoo, ẹkẹvuọvo ẹgba rẹ Ọghẹnẹ vwo ruiruo. Avwanre vwo ọmrẹvughe nẹ ẹwẹn ọfuanfon na yen sun emraro kugbe ihwo ri si Baibol na, ọtiọyena kẹ avwanre se Baibol na kọke kọke je yan nene odjekẹ rọyen. (2 Pita 1:20, 21) Avwanre je kẹnoma kẹ imwemwu egangan, kidie i se gbowọphiyọ ẹwẹn ọfuanfon rẹ Ọghẹnẹ o de je avwanre e te, ọ je sa dobọ rẹ ẹwẹn ọfuanfon rọyen ji o de jẹ ukoko na ẹruọ odedede.​—Ẹfe. 4:30.

15. Die yen o fori nẹ e vwo owenvwe re vwo ru?

¹⁵ Ọ da dianẹ wo bromaphiyame kerẹ Onenikristi re, vwo owenvwe wo vwo vwo ẹruọ rẹ ẹdia sansan ri churobọ si “uyono ro shekpahen omaebrophiyame,”c wo ji ru nene ive rẹ omaẹvwọkpahotọ vẹ omaebrophiyame wẹn vwọ kẹ Jihova. Kẹ, ọ da rha dianẹ wo ji bromaphiyame kerẹ Onenikristii vwo? O vwo emu ọvo ro si we kpuko? Uyono rọ vwọ kpahen ọnana cha ta ota kpahen obo wo se ru vwo muegbe kẹ omaebrophiyame.