Obo Wo se Vwo Brọghọ Phiyọ Jihova Oma Vwẹ Orọnvwe Wẹn

1-2. Ẹro vọ yen Jihova vwo ni irueru rẹ orọnvwe?

O VWO ohwo ru wọ kọnphiyọ ru wọ guọnọ rọvwọn? Ọ da dia ọtiọyen, ọ vwerhoma! Ọ sa dianẹ wọ cha ghwọrọ ọke vwo muegbe kẹ orọnvwe wẹn na. Jihova vwo ọdavwẹ rẹ orọnvwe wẹn na. Ọ guọnọre nẹ wọ riavwerhen rẹ ẹdẹ yenaa ji yeren akpọ rẹ omavwerhovwẹn vwẹ obaro na.—Isẹ 5:18; Une ri Solomọn 3:11.

² O fori nẹ ovwan brọghọ phiyọ Jihova oma vwẹ ẹdẹ orọnvwe rẹ ovwan. Diesorọ? Kẹ, mavọ ovwan se vwo ru ọtiọyen? Dede nẹ a rhuẹrẹ uyovwinrota nana vwọ kẹ ihwo re guọnọ rọvwọn, odjekẹ sansan ra vwọphia sa cha avwanre eje uko vwo brọghọ phiyọ Jihova oma siẹrẹ avwanre de kpo irueru rẹ orọnvwe yẹrẹ a da nokpẹn rẹ uchebro mie avwanre kpahen ọrhuẹrẹphiyotọ na.

DIESORỌ WO VWO MUỌGHỌ KẸ JIHOVA VWẸ ẸDẸ ORỌNVWE WẸN?

3. Die yen o fori nẹ Onenikristi ro muegbe rẹ orọnvwe kọnphiyọ ẹwẹn, kẹ diesorọ?

³ O fori iniọvo eya vẹ eshare vwo nene odjekẹ ri Jihova rehẹ Baibol na siẹrẹ ayen de muegbe rẹ orọnvwe rayen. Diesorọ? Kidie Jihova yen ohwo rọ ton orọnvwe phiyọ. Ọyen ton orọnvwe rẹsosuọ phiyọ—ro ku Adam vẹ Ivi kugbe kerẹ aye gbe ọshare. (Jẹn. 1:28; 2:24) Ọtiọyena, o fori ihwo ri muegbe rẹ orọnvwe vwọ vwẹ iroro rẹ Ọghẹnẹ vwọ ka obaro.

4. Die yen iroro ọvo rọ sorọ ihwo re guọnọ rọvwọn vwo brọghọ phiyọ Jihova oma vwẹ ẹdẹ orọnvwe rayen?

⁴ O ji vwo erọnvwọn eghanghanre efa re sorọ wọ vwọ riẹn iroro ri Jihova kpahen obo ru wo che ru vwẹ ẹdẹ yena: Jihova yen Ugbeyan ro me yovwin ru wo vwori, ọ ke rha dia Ọsẹ wẹn rọhẹ obodjuvwu. (Hib. 12:9) Aphro herọọ, nẹ wọ vẹ ọyen guọnọ vwo uvi rẹ oyerinkugbe tiọyena. Wọ nama guọnọ nẹ emu vuọvo phia vwẹ ẹdẹ yena yẹrẹ ẹdẹ ọfa ro che miovwin oyerinkugbe naa. (Une 25:14) Siẹrẹ wo de roro kpahen oborẹ Jihova ru kẹ wẹ re, kugbe obo ro che ru kẹ wẹ vwẹ obaro na, o rhe fo wo vwo brọghọ phiyọ oma vwẹ ẹdẹ orọnvwe wẹn?—Une 116:12.

IDJERHE EVO RU WO SE VWO BRỌGHỌ PHIYỌ JIHOVA OMA

5. Mavọ yen Baibol na sa vwọ vwẹ ukẹcha kẹ ihwo re guọnọ rọvwọn vwo muegbe kẹ orọnvwe rayen?

⁵ Baibol na vwẹ irhi vwo mu kpahen irueru rẹ akpọẹriọ yẹrẹ obo re ruẹ orọnvwe rẹ Inenikristii. Ọtiọyena, ẹdia rẹ ayen hepha, obo ri je ayen kugbe ẹkuruemu se toroba oborẹ ayen che ruo wan. Inenikristi rẹ uyota muọghọ kẹ irhi rẹ igọmẹti vwo mu kẹ ihwo re guọnọ rọvwọn. (Mat. 22:21) Dedena, orọnvwe avwanre che brọghọ je ghwa omavwerhovwẹn rhe Jihova siẹrẹ e de ru ọrhuẹrẹphiyotọ na vwo nene odjekẹ ri Baibol. Ọtiọyena, erhọ yen odjekẹ evo ra guọnọre nẹ wọ kọnphiyọ ẹwẹn?

6. Diesorọ ọ vwọ ghanre ihwo re guọnọ rọvwọn vwo ru orọnvwe rayen vwo nene oborẹ igọmẹti guọnọre?

⁶ Ru orọnvwe wẹn nene urhi. (Rom 13:1, 2) Vwẹ ẹkuotọ buebun, tavwen ihwo ke rọvwọn, o vwo erọnvwọn evo rẹ igọmẹti guọnọ mie ayen nẹ ayen ru. O fori nẹ wo vwo oniso rẹ erọnvwọn nana vwẹ asan rẹ wọ dia. Ọ da dianẹ wo vwo ẹruọ rẹ obo ra guọnọ mie wee, wọ sa nọ mie ekpako na.b

7. Oka rẹ ẹwẹn vọ yen a guọnọre nẹ ọ dia asan re de che ru irueru orọnvwe?

⁷ Jẹ ẹwẹn ọfuanfon sun asan re de che ru irueru na. (1 Kọr. 10:31, 32) Jẹ irueru rẹ orọnvwe na dje omamọ rẹ ẹwẹn ọfuanfon na phia ukperẹ ẹwẹn rẹ akpọ na. (Gal. 5:19-26) Vwo nene ọrhuẹrẹphiyotọ rẹ ọgbuyovwin rẹ Baibol na vwọphia, ọshare na yen vwo oghwa rọ vwọ mrẹvughe nẹ obo re che ru vwẹ ẹdẹ yena eje cha ghwa ọghọ vẹ omavwerhovwẹn bru Jihova ra. Die yen o se ru ọ vwọ dia ọtiọyen? Ota rẹ orọnvwe re mu kpahen Baibol na ra tare sasasa, vwọrẹ ẹguọnọ vẹ ọghọ nẹrhẹ ihwo re rọvwọnre na vwo ọdavwaro kpahen ọrhuẹrẹphiyotọ rẹ orọnvwe rẹ Ọghẹnẹ vwo mu. Ọ je cha nẹrhẹ ihwo re kerhọ rẹ ota na mrẹ erere je riẹn ọghanrovwẹ rẹ orọnvwe. Ọnana kọyensorọ iniọvo buebun vwọ reyọ Ọguan Ruvie vwo ru orọnvwe na o de shephiyọ. Wọ da guọnọ reyọ Ọguan Ruvie vwo ru orọnvwe wẹn, gba fobọ si ileta vwo rhe ekpako na.

8. Die wo se ru vwo brọghọ phiyọ Jihova oma vwẹ irueru rẹ akpọẹriọ rẹ orọnvwe wẹn? (Rom 13:13)

⁸ Se Rom 13:13. Ọ da dianẹ o vwo asan wọ rhuẹrẹphiyọ wọ da guọnọ ru irueru rẹ akpọẹriọ siẹrẹ orọnvwe na de kuphiyọ nu, die yen wo se ru vwọ kẹnoma kẹ ẹwẹn rẹ akpọ na? Ota ri Grik ra fan phiyọ “akpọẹriọ re de ruẹ obo ri je ohwo” churobọ si irueru ra da da idi vrẹ oma kugbe ihwehworo re hworo ruẹ ikperivwin ason. (Ni study note “wild parties” rọhẹ Rom 13:13.) Ọ da dianẹ wọ guọnọ reyọ idi ri mu ohwo vwọ ghọ ihwo, jomaotọ rere ihwo vwo jẹ idi ẹda vroma.c Ihwehworo da herọ, sio kpotọ rere ihwo sa vwọ ta ota kugbe ji nyo ohwohwo. Frẹkotọ sane ine re che hworo, ọtiọyen ji te ibieta rẹ ine na rere i vwo jẹ ekprowọ ẹsuọ kẹ ihwo re rhere na.

9. Die yen o fori nẹ ihwo re guọnọ rọvwọn na kọnphiyọ ẹwẹn kpahen eta ra cha ta vẹ irueru efa vwẹ orọnvwe na?

⁹ Wọ cha vwẹ uphẹn kẹ ihwo re vwọ ta omota kprẹn, dje ihoho vẹ ividio rẹ ovwan vwẹ asan re de ru irueru rẹ akpọẹriọ na? Enana se toroba omavwerhovwẹn rẹ ẹdẹ yena. Ẹkẹvuọvo, davwẹngba rere obo re che ru vwẹ etiyin sa vwọ dia ọbọngan kẹ ihwo efa. (Fil. 4:8) Nọ oma wẹn: ‘O che dje ọghọ kẹ ihwo efa? O che brọghọ phiyọ ọrhuẹrẹphiyotọ rẹ orọnvwe na?’ Jẹ ọ rọ ma ghanre, nọ oma wẹn: ‘O che brọghọ phiyọ Jihova oma?’ Dede nẹ a vwọ jehwẹ braree, jẹ o fori a vwọ kẹnoma kẹ ehwẹjẹ ri shephiyọọ, kerẹ eta ra vwọ kpare urhurusivwe rẹ ehware. (Ẹfe. 5:3) Mrẹvughe nẹ ihwo orua vẹ igbeyan wẹn re cha ta omota vwẹ irueru wẹn na riẹn oborẹ wọ guọnọre, ayen ji che ru nene.

10. Diesorọ ihwo ri muegbe rẹ orọnvwe vwo ru orọnvwe rayen kekpe? (1 Jọn 2:15-17)

¹⁰ Jẹ orọnvwe wẹn dia kekpe. (Se 1 Jọn 2:15-17.) Oma vwerhen Jihova siẹrẹ idibo rọyen da davwẹngba rẹ ayen vwo brọghọ phiyọ oma ukperẹ oma rayen. Ọtiọyena Inenikristi ri yeren akpọ ri kekpe cha kẹnoma kẹ uruemu re vwo “dje oborẹ ohwo vwori phia” ra je vwọ ghwọrọ igho buebun. Erere vọ yen wọ cha mrẹ siẹrẹ orọnvwe wẹn da dia kekpe? Ẹdia wẹn je sa họhọ ọ rẹ oniọvo ọshare ọvo re se Mike ro nẹ Norway rhe. Ọ da ta: “Avwanre vrabọ rẹ esa, ọnana da nẹrhẹ avwanre se ruiruo ọkobaro ọkieje avwanre kpobarophiyọ. Dede nẹ orọnvwe avwanre na pha kekpe, avwanre je riavwerhen rọyen, ọ cha sa chọrọ avwanre ẹroo.” Oniọvo aye Tabitha ro nẹ India rhe da ta: “Kidie nẹ avwanre ru orọnvwe avwanre kekpe, ọnana da nẹrhẹ avwanre vrabọ ẹnwan ọkamuka ji muegbe rẹ emerọnvwọn evo rọ nẹrhẹ avwanre sa kẹnoma kẹ ẹghwọ rọ sa vwomaphia vwẹ uvwrẹ rẹ orua avwanre.”

11. Mavọ yen ọpha na kugbe ọshare rẹ ọpha na se vwo djephia nẹ ayen ihwo re sẹn osẹnvwe ro shephiyọ? (Ni ihoho na.)

¹¹ Wo muegbe rẹ ewun wo che kuphiyọ re? Aphro herọọ nẹ wọ ghene guọnọ nẹ osẹnvwe wẹn dia yoyovwin. Vwẹ awanre, ọpha na kugbe ọshare rẹ ọpha na nabọ sẹn omamọ rẹ osẹnvwe vwẹ ẹdẹ yena. (Aiz. 61:10) Uyota nẹ ewun wo che kuphiyọ vwẹ ẹdẹ yena sa fẹnẹ ọ rẹ wọ kuẹphiyọ vwẹ ọke efa, ẹkẹvuọvo jẹ osẹnvwe wẹn dia ọ ro shephiyọ. (1 Tim. 2:9) Wo jẹ irhuon vẹ osẹnvwe wẹn—yẹrẹ ekuakua akpeyeren dia obo re ma kenu vwẹ ẹdẹ yenaa.—1 Pita 3:3, 4.

12. Diesorọ o vwo fo ihwo re guọnọ rọvwọn vwọ sen ẹkuruemu re vwọso Baibol na vwẹ ekogho rayen?

¹² Sen ẹkuruemu re vwọso Baibol na. (Ẹvwọ. 18:4) Orọnvwe rẹ ọke nana vwo ẹkuruemu sansan ri churobọ si edjọẹgọ, iruemu rẹ orhan kugbe esegbuyota ri vwo otọọ. Jihova si avwanre orhọ nẹ a kẹnoma kẹ erọnvwọn tiọyen ri jẹfuọn na. (2 Kọr. 6:14-17) Ọ da dianẹ irueru yẹrẹ ẹkuruemu evo herọ vwẹ ekogho wẹn ri shephiyọọ, guọnọ otọ rẹ asan ri nurhe kugbe ẹkpo ri Baibol re ta ota kpahen ayen tavwen wọ ke vwẹ ayen vwọba irueru rẹ orọnvwe wẹn.

13. Mavọ yen ihwo re guọnọ rọvwọn sa vwọ vwẹrokere ẹro ri Jihova vwo nẹ ẹse-eruo?

¹³ Vwẹ asan ru wọ dia, ihwo vwo ẹkuruemu rẹ ayen vwo ruẹse kẹ ihwo re guọnọ rọvwọn na? Oborẹ ihwo re durhie rhe orọnvwe na vwo igho te se toroba oka rẹ ẹse rẹ ayen che ru kẹ ihwo re rọvwọn na. Vwọrẹ uyota, e jiriro kẹ Inenikristi nẹ ayen kokẹ, oma je vwerhen ayen siẹrẹ ayen de ruẹ ọtiọyen. (Isẹ 11:25; Iruo 20:35) Ẹkẹvuọvo, e jẹ ihwo re guọnọ rọvwọn na ru obo re cha nẹrhẹ ihwo re durhieri na roro nẹ a gba ayen vwo ruẹse yẹrẹ oborẹ ayen phi phiyotọ fi emuọvoo. A da vwẹ ẹro ri Jihova vwo nẹ ẹse-eruo vwo no, je vwẹ uphẹn kẹ ihwo vwo ruẹse ro nẹ otọ ubiudu rhe, jẹ a vwẹrokere Jihova.—2 Kọr. 9:7.

OBO WỌ SA VWỌ KẸNOMA KẸ EBẸNBẸN JI PHI AYEN KPAROBỌ

14. Erhọ yen ebẹnbẹn evo rẹ ihwo re guọnọ rọvwọn hirharokuẹ?

¹⁴ Wo vwo muegbe rẹ orọnvwe ro che brọghọ phiyọ Jihova oma na, wo se hirharoku ebẹnbẹn buebun. Kerẹ udje, wọ sa mrẹ bẹnbẹn wo vwo ru ọrhuẹrẹphiyotọ rẹ orọnvwe rọ pha kekpe. Charlie, ro nẹ Solomon Islands rhe tare nẹ: “Avwanre mrẹrẹ bẹnbẹn ra vwọ riẹn uche ihwo re che durhie kpo irueru rẹ akpọẹriọ na. Avwanre vwo igbeyan buebun, jẹ vwo nene ẹkuruemu rẹ avwanre, ihwo eje rhẹro nẹ wo che durhie ayen!” Tabitha re djunute siẹvure tare nẹ: “Irueru rẹ akpọẹriọ re pha rhuarho titiri vwẹ ekogho rẹ avwanre dia mamọ. Ọtiọyena, ọ reyọ ọke esẹ vẹ ini rẹ avwanre ke rhọnvwe nẹ avwanre durhie omarẹ ihwo 100 ọvo.” Oniọvo ọfa re se Sarah, ro nẹ India rhe tare nẹ: “Ihwo evo ni oma rayen nẹ ayen vwo igho nẹ ayen titiri mamọ. Orọnvwe ọmọ oniọvo mẹ rhoro mamọ, ọtiọyena, owenvwe mi vwo ru ọ rọ rho vrẹ ọtiọyen da rhe kọn ro vwẹ ẹwẹn.” Die yen sa cha wẹ uko vwo phi ebẹnbẹn tiọna vẹ efa kparobọ?

15. Diesorọ ẹrhovwo vwọ ghanre siẹrẹ e de muegbe kẹ orọnvwe?

¹⁵ Nẹrhovwo rhe Jihova wo de muegbe orọnvwe. Wọ sa vuẹ Jihova vwẹ ẹrhovwo kpahen oborẹ oma ru we kugbe kemu kemu ro kpokpo uwe ẹwẹn. (Fil. 4:6, 7 kugbe study note rẹ “in everything”) Wọ sa rẹ nẹ ọ kẹ wẹ ẹwẹn ri doe ọke wọ da ro ẹnwan rere wo se vwo fiudugberi bru emamọ erhiẹn vwẹ ọke ro fori. (1 Pita 5:7) Wọ da mrẹ oborẹ Jihova kpahenphiyọ ẹrhovwo wẹn, ẹroẹvwọsuọ wẹn kpahọn kọ cha rha ganphiyọ. Tabitha ra ta ota kpahen siẹvure da ta: “Oshọ mu avwanre ihwo ivẹ na nẹ ẹghwọ cha vwomaphia vwẹ uvwre avwanre, ọtiọyen ji te orua rẹ avwanre. Ọtiọyena avwanre ke ka nẹrhovwo kọke kọke avwanre da cha ta ota kpahen ọrhuẹrẹphiyotọ rẹ orọnvwe na. Avwanre ghene mrẹ ukẹcha ri Jihova, je riavwerhen rẹ ufuoma vwẹ irueru na eje.”

16-17. Ukẹcha vọ yen ihwo ri muegbe rẹ orọnvwe vẹ orua rayen sa mrẹ siẹrẹ ayen de nene ohwohwo rhievun ta ota?

¹⁶ Rhievun ta ota vẹ ọghọ. (Isẹ 15:22) Kerẹ ihwo re guọnọ rọvwọn, ovwan vwo erhiẹn buebun rẹ ovwan che bru kpahen irueru na. Ọnana churobọ si ẹdẹ rẹ ovwan che vwo ru orọnvwe na, uche igho ra cha ghwọrọ, uche ihwo re che durhie vẹ erọnvwọn efa. Tavwen ovwan ki brorhiẹn, ofori nẹ ovwan ta ota kpahọn ji nene odjekẹ ri Baibol ro shekpahen irueru na, ovwan je sa nokpẹn uchebro mie iniọvo ri tedje. Ọke rẹ ovwan ọvuọvo da ta ota kpahen oborẹ ovwan guọnọre, ta vẹ ọghọ ji dje uruemu ra vwọ nuẹ phia. Ọ da dianẹ esẹ vẹ ini rẹ ovwan guọnọ emuọvo rọ vwọso ọrhuẹrẹphiyotọ naa, ru oborẹ ayen guọnọre kẹ ayen. Orọnvwe rẹ ovwan pha ghanghanre kẹ ayen. Jẹ, ọ da dianẹ wo che se ru oborẹ ayen nokpẹn rọyen naa, gba vuẹ ayen oboresorọ. (Kọl. 4:6) Dje phephẹn kẹ ihwo orua wẹn nẹ obo re ma ghanre kẹ wẹ yen wo vwo ru irueru orọnvwe ro che brọghọ phiyọ Jihova oma.

¹⁷ Ọ da dianẹ ọsẹ vẹ oni wẹn hẹ evunrẹ ukoko naa, wọ sa mrẹ bẹnbẹn wọ vwọ vuẹ ayen kpahen obo ru wọ guọnọre, ẹkẹvuọvo wọ je sa vuẹ ayen ghene. Oniọvo ọshare ọvo vwẹ India re se Santhosh da ta: “Ihwo rẹ orua guọnọre nẹ avwanre vwẹ irueru ri Hindu vwọba orọnvwe avwanre. Ọ dia ọmọrhiẹ ọke yen ọ reyọre avwanre ki se djefiotọ kẹ ayen oborẹ avwanre guọnọree. Avwanre ru ewene vwẹ asan evo rẹ avwanre niri nẹ e vwọso obo ri Jihova guọnọree. Kerẹ udje, avwanre ru ewene phiyọ emuọre ra cha vwọ ghọ erhorha vwo nene obo ri che je ayen, je kẹnoma kẹ koka koka ine ẹsuọ vẹ eha egbe kidie e riẹnriẹn ayen omaa.”

18. Die yen sa vwẹ ukẹcha kẹ wẹ erọnvwọn eje sa vwọ dia ghwraghwraghwra vwẹ ẹdẹ yena? (1 Kọrẹnt 14:40) (Ni uhoho na.)

¹⁸ Frẹkotọ muegbe. Wo de ru erọnvwọn eje nene ọrhuẹrẹphiyotọ, oma rha cha ghwọrọ owẹ ọtiọyen vwẹ ẹdẹ rẹ orọnvwe naa. (Se 1 Kọrẹnt 14:40.) Wayne, ro nẹ Taiwan rhe da ta: “Uvwre ẹdẹ evo avwanre ki ru orọnvwe avwanre, avwanre vẹ ihwo re guọnọ vwẹ ukẹcha kẹ avwanre da vwoma. Avwanre da ta ota kpahen oborẹ erọnvwọn cha yan wan vwẹ ẹdẹ yena je vwanriẹn ẹbẹre sansan rẹ obo re che ru vwẹ ẹdẹ rẹ orọnvwe na phiyotọ rere erọnvwọn eje sa vwọ dia ghwraghwraghwra.” Kidie nẹ wọ guọnọ brọghọ phiyọ ihwo re cha rhe oma, gba davwẹngba vwo muegbe erọnvwọn eje phiyotọ.

19. Die yen sa vwẹ ukẹcha kẹ wẹ vwo sun oborẹ erọnvwọn cha yan wan vwẹ irueru rẹ akpọẹriọ na?

¹⁹ Ẹwẹn da djẹ kpo obo re sa vwomaphia vwẹ ẹdẹ yena, ọnana sa nẹrhẹ ovwan kẹnoma kẹ ebẹnbẹn buebun. (Isẹ 22:3) Kerẹ udje, wọ da dia ekogho rẹ ihwo re durhie kpo irueru rẹ orọnvwee da je ra, gbẹn idjerhe obo wo che ru vwọ kẹnoma ke emu ọtiọyen. Davwẹngba rere ihwo rẹ orua rehẹ ukoko naa vwọ riẹn obo re sa phia vẹ ẹro ru wo vwo nẹ iruemu etiọyen. Wo se dje uyovwinrota na “What Happens at a Wedding of Jehovah’s Witnesses?” kẹ ayen vwẹ jw.org. Wọ sa vwọ nabọ sun oborẹ erọnvwọn cha yan wan vwẹ irueru rẹ akpọẹriọ na, o yovwin wọ da vuẹ oniọvo ọshare ro tedje nẹ ọ ‘vwẹrote’ ẹbẹre nana. (Jọn 2:8) Wọ da nabọ rhievun nene ta ota kpahen obo wọ guọnọre nẹ e ru vwẹ ẹdẹ yena, ọ sa cha wẹ uko vwo ru erọnvwọn eje nene obo ru wọ guọnọre ri de brọghọ phiyọ Jihova oma.

20. Die yen ofori nẹ ihwo re guọnọ rọvwọn karophiyọ kpahen irueru orọnvwe rayen?

²⁰ Ẹnwan se mu we rọ siẹrẹ wo de roro kpahen erọnvwọn eje ra guọnọre vwẹ orọnvwe wẹn na. Ẹkẹvuọvo, karophiyọ nẹ ẹdẹ ọvo yen e che vwo ruẹ irueru rẹ orọnvwe na. Ẹdẹ yena yen ọtonphiyọ akpeyeren orua rẹ ovwan kerẹ idibo ri Jihova. Davwẹngba vwo ru orọnvwe wẹn kekpe, o ji brọghọ phiyọ Jihova oma. Vwẹroso Jihova. Wo de nene odjekẹ rọyen, ku wo se ni kpuko vẹ omavwerhovwẹn nẹ wo ru ọrhuẹrẹphiyotọ orọnvwe rọ ghwa ekan rhe odẹ ri Jihovaa.—Une 37:3, 4.