1925—Ẹgbukpe Ujorin re Wanre

OBO RE RHẸRO RỌYEN RO TE OHWO OBỌỌ

Emọ uyono ri Baibol na rhẹro nẹ vwẹ ukpe ri 1925, otọrakpọ na che hirhephiyọ Iparadaisi. Diesorọ? Oniọvo Albert Schroeder, rọ gare kerẹ ọvo usun Ẹko Rọvwẹrote na da ta: “Avwanre rorori nẹ uchekotọ rẹ iniọvo ri Jesu ra jẹreyọ na che kpo odjuvwu je dia ẹbẹre ọvo rẹ Uvie na, nẹ a cha kpare ihwo re fuevun kerẹ Ebraham, Devid vẹ efa vwo nushi, ayen ki che sun kerẹ emọ rẹ ovie vwẹ otọrakpọ na vwẹ ẹbẹre ọvo rẹ Uvie rẹ Ọghẹnẹ.” Ọke vwọ yanran na, ofu de rhi dje evo hwe kidie oborẹ ayen rhẹro rọyen na te ayen obọọ.—Isẹ 13:12.

Dedena, Emọ uyono ri Baibol na buebun ji muomaphiyọ iruo aghwoghwo na je mrẹvughe nẹ oghwa ro te ayen yen ayen vwo soseri kpahen Jihova. Kerẹ udje, roro kpahen iruo rẹ ayen ruru vwọ reyọ iredio vwo ghwoghwo uyota na nene asan eje.

AGHWOGHWO RẸ IREDIO DA RHE HẸREPHIYỌ

A rhe vwọ mrẹ oborẹ iredio station ri WBBR yovwin te vwẹ ukpe ri 1924, Emọ uyono ri Baibol na da rhoma bọn iredio station ọfa, ọke nana vwọ kẹrẹ Chicago, Illinois. Oka re vwo vughe iredio station kpokpọ na yen WORD. Ọwena ọvo re se Ralph Leffler rọ je wian vwẹ ebanbọn rẹ iredio station na tare nẹ, “ihwo buebun kerhọ rẹ iredio station ri WORD vwẹ ọke ekpahen vwẹ ason evo nẹ awusheri rhe.” Kerẹ udje, orua ọvo rọ dia Pilot Station, Alaska, rọ vrẹ iroko 5,000 yẹrẹ imaili 3,000 da ro iredio station na obọ rẹsosuọ. Ayen vwọ kerhọ rọyen nu, orua na de si ileta vwọ kpẹvwẹ ihwo re wian vwẹ iredio station na vwọ kẹ ọrhuẹrẹphiyotọ rẹ ayen ruru rọ vwẹ obọngan vwọ kẹ ayen, je nẹrhẹ ayen vwo ẹruọ rẹ Ota rẹ Ọghẹnẹ.

Uwevwin Orhẹrẹ ri December 1, 1925 vwo dje oborẹ iredio station na sa yan sherẹ te, ọ da ta: “Iredio station ri WORD na ọyen ọvo usun rẹ iredio station rọ ma rho vwẹ United States, rẹ ẹgba rọyen te 5,000 watts. Ihwo re dia ughwru rẹ abadi rẹ Atlantic vẹ Pacific, ọtiọyen ji te ihwo ri Cuba vẹ ihwo rehẹ obohwẹre ọnre rẹ Alaska nabọ nyo evuẹ ri nẹ iredio station na cha. Ihwo buebun ri ji rhi nyo kpahen uyota na jovwoo de rhi vwo omavwerhovwẹn rẹ ayen vwo nyo ovuẹ na vwẹ iredio station nana.”

Uvwre rẹ ọke vuọvo na, Emọ uyono ri Baibol na je davwẹngba rẹ ayen vwọ reyọ iredio vwọ hẹre iruo rẹ aghwoghwo na phiyọ vwẹ Canada. Ọtiọyena vwẹ 1924, ayen da bọn iredio station re se CHUC vwẹ Saskatoon, Saskatchewan. Ọnana ọvo usun rẹ iredio station rẹsosuọ re vwo mu vwọ kẹ irueru rẹ ẹga vwẹ Canada. Vwẹ 1925, ayen guọnọ mu iredio station otete nana vwo kpo asan ọfa kidie asan rọ hepha havwen nọ. Ọtiọyena Watch Tower Society de mu istudio rẹ iredio station nana rẹ Emọ uyono ri Baibol na vwo ruẹse kẹ ayen na kpo Regent Building, rọ dia afieha awanre vwẹ Saskatoon rẹ ayen dẹre fikirẹ iruo nana, ayen da rhoma rhuẹrẹ.

Oma rẹ iredio station nana vwerhen avwanre rọ nẹrhẹ ihwo buebun re dia ekogho ri sherabọ eje vwẹ Saskatchewan se nyo iyẹnrẹn esiri na vwẹ obọ rẹsosuọ. Kerẹ udje, vwẹ orere ọvo rọ bẹn te, aye ọvo re se Mrs. Graham da nokpẹn ẹbe rẹ ukoko rọ vwọ kerhọ rẹ aghwoghwo vwẹ iredio nu. Oniọvo George Naish da ta, “Oviẹ rọyen nẹ ovwan rhi yono avwanre, ganre mamọ te ẹdia avwanre da vwẹ ekrun rẹ ẹbe ri Studies in the Scriptures” vwọ kẹ. Okriri aye na ke vuẹ ihwo ovuẹ rẹ Uvie naa.

E RU EWENE KPOKPỌ PHIYỌ OBO RE SEGBUYOTA

Uwevwin Orhẹrẹ ri March 1, 1925, vwo uyovwirota ọghanghanre na “Birth of the Nation.” Diesorọ uyovwinrota nana vwọ ghanre mamọ? Vwẹ ọkievo rhire na, Emọ uyono ri Baibol na riẹnre nẹ Eshu vwo ukoko rẹ emekashe umwemwu re rhiẹromrẹẹ hepha vwẹ odjuvwu, ọtiọyen ji te ẹga sansan, ineki ride kugbe isun rẹ akpọ na. Jẹ, womarẹ uyovwinrota nana, “odibo rọ fuevun rọ je ghwanre na” da vwẹ ukẹcha kẹ iniọvo rẹ akpọeje vwọ riẹn nẹ Jihova ji vwo ukoko rọ fẹnẹ ọ rẹ Eshu dibidibi rọ je vwọsuọ. (Mat. 24:45) Vwọba, odibo na djere fiotọ nẹ a djẹ Eshu vẹ emekashe rọyen nẹ odjuvwu rhe otọrakpọ obonẹ fikirẹ Uvie rẹ Ọghẹnẹ ra reyọ vwo mu vwẹ ukpe ri 1914.—Ẹvwọ. 12:7-9.

Ihwo evo mrẹrẹ bẹnbẹn ayen vwo rhiabọreyọ ewene kpokpọ nana. Ọtiọyena, Uwevwin Orhẹrẹ na da ta: “Ọ da dianẹ ihwo evo herọ re rhọnvwephiyọ oborẹ ayen seri vwẹ Uwevwin Orhẹrẹ naa, e jiriro kẹ ayen nẹ ayen vwomakpotọ je frẹkotọ hẹrhẹ Ọrovwori na, je fuevun ọkieje vẹ ubiudu rọ fonro.”

Colporteur ọvo, (ra riẹn phiyọ ọkobaro enẹna) re se Tom Eyre ohwo ri Britain, gbikun oborẹ oma ruẹ Emọ uyono ri Baibol kpahen Uwevwin Orhẹrẹ yena: “Oma vwerhen iniọvo na kpahen odjefiotọ rẹ Ẹvwọphia uyovwin 12 na. Ugege avwanre ghwa vwọ riẹn nẹ a vwẹ Uvie na vwo mu vwẹ odjuvwu re, avwanre da vuẹ ihwo efa kpahen iyẹnrẹn esiri na vẹ oruru. Ọnana nẹrhẹ avwanre vwo owenvwe re vwo ru bunphiyọ vwẹ iruo aghwoghwo na je nẹrhẹ avwanre mrẹ oborẹ Jihova sun ihwo rọyen vwo ruiruo ride.”

RE VWO SOSERI KẸ JIHOVA

Nonẹna, Iseri ri Jihova nabọ riẹn obo rehẹ Aizaya 43:10: “Ovwan iseri mẹ, eriyin Ọrovwohwo tare, kugbe odibo mẹ re me jẹreyọ na.” Jẹ, tavwen a ke ro ukpe ri 1925, ọ dia ọkieje yen e vwo djunute ẹkpo ri Baibol nana vwẹ ẹbe avwanree. Ọyena che wene. Uwevwin Orhẹrẹ na ta ota kpahen obo rehẹ Aizaya 43:10 vẹ 12 vwẹ imagazini 11 vwẹ uvwre ukpe ri 1925!

Vwẹ oba emeranvwe rẹ August 1925, Emọ uyono ri Baibol na de siomakoko vwẹ ọghwẹkoko rẹ Indianapolis, Indiana. Vwẹ ovuẹ re vwo dede ihwo na re si phiyọ ọbe ọrhuẹrẹphiyotọ na, oniọvo Joseph F. Rutherford da ta: “Avwanre rhe ọghwẹkoko na rhe reyọ . . . ẹgba mie Ọrovwori na rere avwanre sa vwọ rhoma rhivwin kpo iruo aghwoghwo na vẹ owenvwe ọgangan ra vwọ dia iseri rọyen.” Vwẹ ọsoso ẹdẹ ẹrenren re vwo ru ọghwẹkoko na, yen e vwo phiudu phiyọ ihwo re rhere awọ nẹ ayen reyọ kuphẹn kuphẹn vwo soseri kpahen Jihova.

Vwẹ Saturday rẹ August 29, Oniọvo Rutherford da ta ota ro vwo uyovwinrota na “A Call to Action.” Vwevunrẹ ota rọyen na, ọ kanrunumu obo rọ ghanre te re vwo soseri: “Jihova ta kẹ ihwo rọyen nẹ . . . : ‘Ovwan kẹ iseri . . . Mẹvwẹ Ọghẹnẹ.’ Ọtiọyena, ọ da vwẹ iji kẹ ayen, ọ jẹ ame unu taa: ‘Rhuẹrẹ idjerhe na phihọ kẹ ihwo na.’ O vwo ihwo efa vwẹ akpọ na re sa rhuẹrẹ idjerhe yẹrẹ soseri kẹ ihwo na vwọ vrẹ [ihwo rọyeen], re dia ihwo ri vwo ẹwẹn ọfuanfon rẹ Ọrovwori na, re je dia iseri rọyen.”—Aiz. 43:12; 62:10.

Oniọvo Rutherford vwo ku ota rọyen phiyọ nu, o de se ọbe ọvo ro vwo uyovwinrota na “Message of Hope” vwọ kẹ otu na, rọ rionbọ kpo Uvie rẹ Ọghẹnẹ nẹ ọyen uvi iphiẹrophiyọ rọ cha ghwa “ebruphiyọ rẹ ufuoma, efe, omakpokpọ, arhọ, ọmuvwiẹ kugbe omavwerhovwẹn ri bẹdẹ rhe,” ayen eje da ghwiabọ rhọnvwephiyọ obo rehẹ ọbe na. A fan obo re si phiyọ ọbe nana kpo ephẹrẹ sansan je teyen ayen phiyọ itrati. A ghare omarẹ itrati ri te iduduru 40 vwọ kẹ ihwo.

Emọ uyono ri Baibol na re odẹ na Iseri ri Jihova vwẹ ikpe buebun re vwọ kpahọọn. Dedena, ayen da rhe mrẹvughe nẹ ayen vwo oghwa rẹ ayen vwọ dia iseri rọyen.

RE VWO RHIVWIN BRU IHWO RI DJE OMAVWERHOVWẸN PHIA

Rẹ Emọ uyono ri Baibol na vwo buẹnphiyọ vwẹ akpọ na eje na, ukoko na jiriro kẹ ayen nẹ ayen rhivwin bru ihwo na ra, rhoma ra ta ota kẹ ihwo ri dje omavwerhovwẹn phia kpahen iyẹnrẹn esiri na vwẹ obuko re. Vwo nene egbadaẹdjẹ re ruru ra vwọ ghare itrati ri Message of Hope na, Bulletina na da vwẹ odjekẹ phia nẹ: “E ru ọrhuẹrẹphiyotọ re vwo rhivwin kpo iwevwin rẹ ihwo rẹ iniọvo na de phi ẹbe phiyọ adaa, rẹ ayen da yanjẹ itrati ri Message of Hope na vwo.”

Bulletin ri January 1925 ta ota kpahen iyẹnrẹn ro nẹ obọ rẹ ọvo usun Emọ uyono ri Baibol na rhe vwẹ Plano, Texas nẹ: “Ọ vwerhoma nẹ ekogho rẹ avwanre da wian vwẹ obuko re yen a da ma mrẹ ihwo re kẹrho vrẹ ekogho kpokpọ. O vwo orere ọvo vwẹ ekogho rẹ avwanre, avwanre rhivwin ra de re ghwoghwo abọ iyorin uvwre ẹgbukpe ihwe re wanre na. . . . O krinọ naa, oniọvo aye Hendrix vẹ oni mẹ da rhoma re ghwoghwo vwẹ etiyin ji phi ẹbe buebun phiyọ ada vrẹ [obo] ri jovwo.”

Vwẹ ẹkuotọ ri Panama, colporteur ọvo de si: “Ihwo buebun re djẹ vwẹ nẹ anurhoro rayen rhoma wene ẹwẹn mi vwo bru ayen ra vwẹ obọ rivẹ yẹrẹ obọ rerha. Iruo rẹ aghwoghwo mẹ vwẹ enukpe nana yen mi vwo rhivwin bru ihwo ri mi ghwoghwo ota kẹ ọkiọvo vwẹ obuko re; obo mi rhiẹromrẹ mi vwo bru evo rayen ra vwerhoma dẹn.”

RE VWO NẸ OBARO NA KIỌKIỌKIỌ

Vwẹ ileta rẹ ukpe na ro si vwo rhe colporteur eje, Oniọvo Rutherford de ru ọdjẹkoko iruo re ruru vwẹ ukpe na je rionbọ kpo iruo rehẹ obaro rẹ ayen che ru. Ọ da ta: “Vwẹ ukpe rọ wanre na ovwan vwo uphẹn rẹ ovwan vwọ vwẹ ọbọngan kẹ ihwo buebun ri muomaphiyọ. Iruo nana nẹrhẹ ubiudu rẹ ovwan vọn vẹ omavwerhovwẹn . . . Vwẹ ukpe rọ cha na, ovwan che vwo uphẹn buebun rẹ ovwan vwo soseri kpahen Ọghẹnẹ vẹ Uvie rọyen je rhuẹrẹ idjerhe rọyen phiyọ vwọ kẹ ihwo na. . . . E jẹ avwanre eje kuenu so une vwo jiri Ọghẹnẹ vẹ Ovie rẹ avwanre ọkieje.”

Ukpe ri 1925 vwọ joma re re, iniọvo na ki muegbe ayen vwọ bọn iwevwin efa phiyọ Brooklyn. Ukpe ri 1926 yen ukoko na je vwọ tuẹn iruo rẹ ebanbọn rọ ma rho kparobọ vwẹ ọke yena phiyọ.