Wọ “Riẹn Odjahọn rẹ Obo” re Vwo Ẹwẹn rẹ Otekẹvwẹ Re?

1. Die yen otekẹvwẹ, kẹ die yen o jẹ dia?

WẸWẸ ohwo ro vwo ẹwẹn rẹ otekẹvwẹ? Ohwo ro vwo ẹwẹn rẹ otekẹvwẹ mrẹ aghọghọ vẹ ufuoma ọ da tẹnrovi erọnvwọn rẹ Jihova vwọ kẹ. Ophu muo yẹrẹ kọ viẹ ija fikirẹ obo ro vworii. Dedena, e vwo vwo ẹwẹn rẹ otekẹvwẹ dia o mudiaphiyọ nẹ e che kuẹrofia kẹ akpeyeren avwanree. Kerẹ udje, ofori Onenikristi gbẹn idjerhe sansan ro vwo ru bunphiyọ vwẹ ẹga ri Jihova. (Rom 12:1; 1 Tim. 3:1) Jẹ, ọ da dianẹ uphẹn rẹ ẹga ro rhẹro rọyen fobọ te obọọ, ọ dia ọyen aghọghọ rọyen cha vwọ vabọọ.

2. Diesorọ jẹ ẹwẹn rẹ otekẹvwẹ evwo vwọ dia imuoshọ?

² Jẹ ẹwẹn rẹ otekẹvwẹ evwo sa so okpetu ọgangan. Ihwo ri vwo evunvọnvwẹ kpahen oborẹ ayen vworii sa wian inọke buebun rere ayen se vwo vwo ekuakua akpeyeren ra ghwa guọnọọ. Ọ da ohwo mamọ nẹ, Inenikristi evo cho igho vẹ erọnvwọn efa rẹ ayen guọnọre. Ọ sa dianẹ ayen vuẹ oma rayen nẹ, ‘O fori nẹ mi vwo,’ ‘Ọmọrhiẹ ọke me hẹrhẹ ree,’ yẹrẹ ‘Me cha hwa igho na rhivwin ẹsiẹfa.’ Jẹ, ayen riẹnre nẹ koka koka rẹ uji-echo rọ ghwa ophọphọvwẹ cha vwerhan Jihova omaa. (Isẹ 30:9) Ofu dje itu evo hwe fikirẹ uphẹn rẹ ẹga ro te ayen obọọ tẹdia rẹ ayen da dobọ ẹga ri Jihova ji. (Gal. 6:9) Die yen sa nẹrhẹ odibo ri Jihova rọ vwomakpahotọ kẹ ru emu tiọyena? Ọ sa dianẹ ẹwẹn rẹ otekẹvwẹ rhe rhe ohwo ọtiọyena ọfaa.

3. Uyota vọ yen e yono nẹ Filipae 4:11, 12?

³ Avwanre eje se vwo ẹwẹn rẹ otekẹvwẹ. Ọyinkọn Pọl siri nẹ ọyen ‘yono obo re vwo ẹwẹn rẹ otekẹvwẹ, o toro ẹdia [rọ] hephaa.’ (Se Filipae 4:11, 12.) O si eta yena ọke rọ vwọ hẹ uwodi. Dedena, aghọghọ rọyen va rọ abọọ. Ọ “riẹn odjahọn” rẹ obo re vwo otekẹvwẹ. Ọ da dianẹ a davwẹngba e vwo vwo evunvọnvwẹ, eta ri Pọl vẹ obo re phia kẹ sa kẹ avwanre imuẹro nẹ e se vwo ẹwẹn rẹ otekẹvwẹ. E jẹ e rhẹro nẹ ọ cha lọhọ e vwo vwo ẹwẹn otekẹvwẹ kpahen ẹdia avwanree. Ukpẹrẹ ọtiọyen, o fori e vwo yono obo re vwo ẹwẹn otekẹvwẹ. Idjerhe vọ? E jẹ a ta ota kpahen iruemu re cha vwẹ ukẹcha kẹ avwanre vwọ riẹn odjahọn rẹ otekẹvwẹ.

VWO ỌDAVWARO

4. Idjerhe vọ yen ẹwẹn rẹ ọdavwaro vwọ cha avwanre uko vwo vwo otekẹvwẹ? (1 Tẹsalonaika 5:18)

⁴ Ohwo ro vwẹ ẹwẹn rẹ otekẹvwẹ, ọyen dje ọdavwaro phia. (Se 1 Tẹsalonaika 5:18.) Kerẹ udje, e de dje ọdavwaro kpahen ekuakua rẹ akpeyeren rẹ avwanre vwori, a rha cha ro ẹnwan okamuka kpahen erọnvwọn re vworii. E de roro kpahen uphẹn rẹ ẹga rẹ avwanre riavwerhen rọyen enẹna, ka cha tẹnrovi obo re se vwo gbẹrophiyọ iruo ra vwọ kẹ avwanre ukperẹ oborẹ uphẹn ẹga kpokpọ se vwo te avwanre obọ. A gbe ta Baibol na vwo jiriro kẹ avwanre nẹ a rha kpẹvwẹ Jihova vwẹ ẹrhovwo rẹ avwanre! E de vwo ẹwẹn rẹ ọdavwaro, ọ cha nẹrhẹ e vwo “ufuoma rẹ Ọghẹnẹ rọ vrẹ ẹruọ ejobi.”—Fil. 4:6, 7.

5. Erhọ yen erọnvwọn evo ro fori nẹ ihwo rẹ Izrẹl dje ọdavwaro kpahen? (Ni uhoho na.)

⁵ Roro kpahen obo re phia kẹ ihwo rẹ Izrẹl. Ọke buebun, ayen brenu kẹ Jihova nẹ ayen rha riavwerhen rẹ emu rẹ ayen ria jovwo vwẹ Ijiptii. (Ukeri 11:4-6) Vwọrẹ uyota, oka rẹ akpọ rẹ ayen yerẹn vwẹ aton na ghwa lọhọọ. Die yen sa vwẹ ukẹcha kẹ ayen vwo vwo otekẹvwẹ? O fori nẹ ayen dje ọdavwaro kpahen oborẹ Jihova ru kẹ ayen vwẹ obuko re. Vwẹ obẹ Ijipti, a vwẹ oja ria ayen kerẹ eviẹn, ọtiọyena Jihova da reyọ etiekọ ihwe vwo gboja kẹ ivwighrẹn rayen. E vwo siobọnẹ ayen nu, ayen “de gborho” idọnọ, iro vẹ iwun vwo mie ihwo rẹ Ijipti. (Eyan. 12:35, 36) Ọke ra vwọ reyọ tua ihwo rẹ Izrẹl, je djẹ ayen mu vwẹ akọkọ rẹ Abadi Ọvwavware na nu, Jihova da hẹriẹ ame na vwọrẹ igbevwunu. Ayen vwọ yan vwevunrẹ aton na, ọ vwẹ imana vwọ ghẹrẹ ayen kẹdi kẹdẹ. Ọ da dia ọtiọyen, kẹ diesorọ ayen vwo brenu? Ọ dia fikirẹ emu rẹ ayen guọnọre rọ kanrẹ ayeen, kidie ayen vwo ọdavwaro kpahen obo rọ vwọ kẹ ayeen.

6. Erhọ yen idjerhe evo e se vwo vwo ọdavwaro?

⁶ Kẹ, mavọ yen wo se vwo vwo ọdavwaro? Ẹsosuọ, rhuẹrẹ ọke phiyọ kẹdi kẹdẹ vwo roro kpahen erọnvwọn iyoyovwin ru wọ riavwerhen rayen. Wo se si erọnvwọn ivẹ yẹrẹ erha ru wo vwo omavwerhovwẹn kpahen phiyotọ. (Uvwe. 3:22, 23) Ọrivẹ, gbe dje ọdavwaro phia. Jowọ wọ vwọ kpevwẹ ihwo efa kpahen oborẹ ayen ru kẹ wẹ. Ọ rọ ma ghanre, kpẹvwẹ Jihova ọkieje. (Une 75:1) Ọrerha, vwẹ ihwo ri vwo ẹwẹn rẹ ọdavwaro vwo mu igbeyen re ma kẹrẹ owẹ. Uruemu rẹ jẹ otekẹvwẹ evwo rẹ ihwo efa se ghworo avwanre, ọtiọyen ọdavwaro je hepha. (Urhi 1:26-28; 2 Tim. 3:1, 2, 5) E de dje ọdavwaro phia kpahen oborẹ ihwo efa ru kẹ avwanre, ivun rhe che miovwo avwanre fikirẹ oborẹ avwanre vworii.

7. Die vwẹ ukẹcha kẹ Aci vwo vwo ẹwẹn rẹ otekẹvwẹ, kẹ die yen nẹ obuko rọyen rhe?

⁷ Roro kpahen obo re phia kẹ Aci, rọ dia Indonesia. Ọ da ta: “Uvwre ọke rẹ ọga ri COVID-19 na, me da reyọ ẹdia mẹ vwọ vwanvwẹ ọ rẹ iniọvo mẹ. Fikirẹ ọnana, mi rhe vwo ẹwẹn rẹ otekẹvwẹẹ.” (Gal. 6:4) Die yen vwẹ ukẹcha vwo wene iroro rọyen? Aci da ta: “Mi de rhi kere ebruphiyọ buebun re me mrẹ kẹdi kẹdẹ ji roro kpahen erhuvwu buebun ri te vwe obọ kidie me hẹ ukoko rẹ Ọghẹnẹ. Ọtiọyena, mi de dje ọdavwaro phia kẹ Jihova. Die kọyen nẹ obuko rọyen rhe, mi de ghini rhi vwo otekẹvwẹ.” Ọ da dianẹ wo vwo erharhe iroro tiọyena ri kpokpo uwe ẹwẹn, wọ sa vwẹrokere owọẹjẹ rẹ Aci na wo se vwo vwo ẹwẹn rẹ otekẹvwẹ?

GBẸROPHIYỌ OBO WO RUẸ WỌ JE VWẸ OMA KPOTỌ

8. Ufi vọ yen Baruk she ro?

⁸ Vwẹ ọmọke, osiọbe rẹ ọmraro Jerimaya re se Baruk de she ro ufi ọvo. Baruk vwo owian ọgangan ọvo, kọyen, rọ vwọ vwẹ ukẹcha kẹ Jerimaya vwo ghwoghwo ovuẹ ọgangan vwọ kẹ ẹgborho rẹ Izrẹl. Ọke vwọ yanran na, ẹwẹn ri Baruk da djẹ kpo erọnvwọn efa. Ukperẹ Baruk vwo gbẹrophiyọ oborẹ Jihova vuẹrẹ nẹ o ru, oma rọyen kọyen ọ tẹnrovi kugbe obo rọ guọnọ ruẹ. Womarẹ Jerimaya, Jihova da vuẹ Baruk nẹ: “Wọ guọnọ imu ride kẹ oma wen? Wọ guọnọ aye-en.” (Jer. 45:3-5) Obo rọ ta na kọna: “Jẹ, ẹdia ru wọ hepha da wẹ aro.” Baruk de rhiabọreyọ ọkpọvi ra vwọ kẹ na je mrẹ aroesiri ri Jihova ọkieje.

9. Vwo nene obo rehẹ 1 Kọrẹnt 4:6, 7, die yen omaevwokpotọ che mu avwanre vwọ mrẹvughe? (Ni ihoho na.)

⁹ Ọkievo, Onenikristi se roro nẹ ọyen ohwo ro fori ro vwo uphẹn rẹ ẹga ọvo. Ọ se no ọtiọyen kidie ọ tẹn ona mamọ, ọgbowian, ọ je ga krẹre—yẹrẹ vwo iruemu erha nana eje. Ẹkẹvuọvo, a sa vwẹ uphẹn rẹ ẹga rọ guọnọ na vwọ kẹ ihwo efa. Die yen sa vwẹ ukẹcha kẹ siẹrẹ ivun de miovwo? O se roro kpahen oborẹ ọyinkọn Pọl siri vwẹ 1 Kọrẹnt 4:6, 7. (Se.) Kona kona yẹrẹ kuphẹn kuphẹn rẹ avwanre vwori, obọ ri Jihova yen i nurhe. Avwanre cha sa dẹ yẹrẹ muwan rẹ ekẹ nanaa. Ayen eje odjephia rẹ ẹse ri Jihova re muwan rọyeen.—Rom 12:3, 6; Ẹfe. 2:8, 9.

10. Mavọ yen a sa vwọ dia ihwo re vwẹ oma kpotọ?

¹⁰ A sa dia ihwo re vwẹ oma kpotọ e de roro kokodo kpahen udje rẹ Jesu phi phiyotọ vwọ kẹ avwanre. Roro kpahen obo re phiare vwẹ ason rẹ Jesu hworhẹ awọ rẹ idibo rọyen na. Ọyinkọn Jọn de si: “Jesu vwọ riẹn nẹ Ọsẹ na phi erọnvwọn eje phiyọ obọ rọyen nure, nẹ ọyen nẹ obọ rẹ Ọghẹnẹ rhe, nẹ o ji brẹ Ọghẹnẹ ra, . . . [ọ da] hworhẹ awọ rẹ idibo na.” (Jọn 13:3-5) Jesu rhe se roro nẹ o fori idibo rọyen hworhẹ awọ rọyen. Jẹ, ọke rọ vwọ hẹ otọrakpọ na, Jesu nama vwo vwo ẹwẹn nẹ ọyen fo ohwo ro vwo igho ji yerẹn uvi rẹ akpọọ. (Luk 9:58) Jesu vwẹ oma kpotọ; o vwo ẹwẹn rẹ otekẹvwẹ. O phi uvi udje phiyotọ kẹ avwanre.—Jọn 13:15.

11. Mavọ yen omaevwokpotọ vwẹ ukẹcha kẹ Dennis vwo vwo ẹwẹn otekẹvwẹ?

¹¹ Dennis, ro nẹ Netherlands rhe, davwẹngba rọ vwọ vwẹrokere udje rẹ omaevwokpotọ ri Jesu, jẹ ọ lọhọree. Ọ da ta: “Ọkiọvo, me mrẹ omaephuo yẹrẹ ẹwẹn rẹ jẹ otekẹvwẹ evwo vwẹ oma mẹ, siẹrẹ uphẹn rẹ ẹga re me guọnọ de te ohwo ọfa obọ. Emu ọtiọyen da phia, ki mi yono kpahen uyovwinrota ro shekpahen omaevwokpotọ. Vwẹ aplikeshọni ri JW Library^® na, me jokaphiyọ ẹkpọ ri Baibol sansan re ta ota kpahen omaevwokpotọ rere me sa vwọ fobọ mrẹ ayen je vwanriẹn ayen se. Me je danlodu rẹ eta ri shekpahen omaevwokpotọ phiyọ ifonu mẹ, ọkieje me vwọ kerhọ kẹ ayen.a Mi yonori nẹ ewian eje rẹ avwanre ruẹ, e ru ayen rere a sa vwọ vwẹ urinrin kẹ Jihova, ọ dia oma rẹ avwanree. Jihova de vwẹ uphen kẹ avwanre nẹ e ru amasan krẹn, jẹ womarẹ ọyen yen e vwo ru ayen eje wiẹn.” Ọ da dianẹ ivun miovwo uwe fikirẹ uphẹn rẹ ẹga ro te we obọọ, davwẹngba wọ vwẹ oma kpotọ. Ọnana che ru oyerinkugbe wẹ vẹ ọ ri Jihova ganphiyọ je nẹrhẹ wo vwo ẹwẹn rẹ otekẹvwẹ.—Jems 4:6, 8.

RORO KPAHEN IPHIẸROPHIYỌ WẸN

12. Iphiẹrophiyọ vọ kpahen obaro na yen nẹrhẹ avwanre vwo ẹwẹn rẹ otekẹvwẹ? (Aizaya 65:21-25)

¹² E vwo ẹwẹn rẹ otekẹvwẹ siẹrẹ e de roro kpahen uvi rẹ iphiẹrophiyọ rọhẹ obaro na. Eta ri Jihova rẹ ọmraro Aizaya si phiyotọ dje oma ẹlaghọ rọhẹ akpeyeren nonẹna je vwẹ imuẹro kẹ avwanre nẹ Jihova che si ebẹnbẹn yena eje no. (Se Aizaya 65:21-25.) A cha dia iwevwin iyoyovwin kugbe asan ro fuoma. A cha wian owian rọ kẹ ohwo omavwerhovwẹn, je re omamọ emu re vwerhan re je kẹ ohwo oma kpokpọ. Avwanre rha cha ro ẹnwan kpahen erọnvwọn ebrabra ri se te avwanre oma yẹrẹ emọ avwanree. (Aiz. 32:17, 18; Izi. 34:25) Uvi rẹ akpeyeren yehẹ obaro na, akpọ rẹ ofuvwegbe.

13. Ẹdia vọ yen a da ma guọnọ nẹ a tẹnrovi iphiẹrophiyọ avwanre?

¹³ O fori nẹ a tẹnrovi iphiẹrophiyọ avwanre enẹna vrẹ obo ri jovwo. Diesorọ? Kidie avwanre yerẹn vwẹ “ẹdẹ re koba na,” avwanre eje vwo ebẹnbẹn re pha ‘gangan’ re che yerin ghene. (2 Tim. 3:1) Ọkieje yen Jihova vwẹ ukẹcha kẹ avwanre vwo chirakon womarẹ ọ vwọ kẹ avwanre odjekẹ, ẹgba kugbe obo ra guọnọre. (Une 145:14) Vwọba, iphiẹrophiyọ avwanre se ru avwanre gan vwẹ ọke ebẹnbẹn. Ọ sa dianẹ wọ davwẹngba wọ vwọ vwẹ oborẹ orua wẹn guọnọre vwọ kẹ ayen. Kẹ, ọnana mudiaphiyọ nẹ oma ọvo wọ cha laghe? Ọ dia ọtiọyeen! Jihova veri nẹ vwẹ Iparadaisi, ọyen cha kẹ wẹ vrẹ obo ru wọ guọnọre—abọ buebun. (Une 9:18; 72:12-14) Ọ sa dianẹ wo nene ọmiaovwẹ, ofudjevwe, yẹrẹ jẹ omakpokpọ evwo muabọ. Kẹ, enenẹ yen akpọ wẹn cha dia bẹdẹ, iphiẹrophiyọ vuọvo rha herọọ? Ẹjo kakaka. Vwẹ akpọ kpokpọ rẹ Ọghẹnẹ na, ọga vẹ ughwu che no. (Ẹvwọ. 21:3, 4) Iphiẹrophiyọ yena nẹrhẹ avwanre vwo ẹwẹn rẹ otekẹvwẹ—ọtiọyena ivun rhe miovwo yẹrẹ ophu rhe mu avwanre fikirẹ obo re phia asaọkiephanaa. E se vwo ẹwẹn ri dọe siẹrẹ e de hirharoku oshenyẹ, ohwo re vwo ẹguọnọ kpahen de ghwu, e de chirakon rẹ ọga yẹrẹ e de vwo obẹnbẹn ọfa. Diesorọ? O toro oborẹ ẹdia ra hepha na gan tee, a riẹnre nẹ ‘ukpokpogho rẹ avwanre na ọ rẹ ọmọke,’ nẹ kẹrẹkpẹ akpọ kpokpọ na che phioba phiyọ ebẹnbẹn na ejobi.—2 Kọr. 4:17, 18.

14. Mavọ yen e se vwo ru iphiẹrophiyọ rẹ avwanre ganphiyọ?

¹⁴ Rọ vwọ dianẹ iphiẹrophiyọ nẹrhẹ e vwo ẹwẹn rẹ otekẹvwẹ na, mavọ yen e se vwo ruo ganphiyọ? Kirobo ohwo ku ughana phiyọ rere ọ sa vwọ mrẹ erọnvwọn ri sherabọ phephẹn fiotọ ye, ọtiọyen o ji fo nẹ a jowọ sansan vwo ru iphiẹrophiyọ rẹ avwanre ganphiyọ rere a sa vwọ mrẹ oma avwanre vwẹ Iparadaisi rọhẹ obaro na. A da ro ẹnwan kpahen igho, e se roro kpahen oborẹ akpọ avwanre cha dia siẹrẹ igho, esa kugbe uweren ọgangan de no nu. Ẹwẹn de kpokpo avwanre fikirẹ uphẹn rẹ ẹga ro ji te avwanre obọọ, e se roro kpahen oborẹ akpeyeren cha dia a da rhe ga Jihova ikpe urhiorin buebun re je dia ihwo re gbare, ọke yena e rhe che nẹ iroro tiọyena fiemu ọvoo. (1 Tim. 6:19) Ẹsosuọ, ẹnwan rẹ oborẹ akpeyeren hepha enẹna sa nẹrhẹ a mrẹ bẹnbẹn e vwo roro kpahen oborẹ obaro na cha dia. Ẹkẹvuọvo, ọke vwọ yanran na, e de ni kpo obaro kpahen oborẹ Jihova veri, kọ cha lọhọ e vwo roro kpahọn.

15. Die wo yono nẹ eta ri Christa rhe?

¹⁵ Roro kpahen oborẹ iphiẹrophiyọ vwẹ ukẹcha kẹ Christa, rọ rovwọn Dennis, ra ta ota kpahen siẹvure na. Ọ da ta: “Mi vwo ọga ọvo rọ nẹrhẹ iriẹn oma mẹ dia lọlọhọ tẹdia agbara rẹ ukpono kọyen mi chidia, ọke buebun ehwa yen mi sherhẹn. Kẹdi kẹdẹ oma vwọ miavwo ovwẹ. Ọbo ro sivwin uvwe tare nẹ o vwo ọke vuọvo ẹdia mẹ na che vwo yovwinphiyọọ. Ugege yena me da ta, ‘Ẹro ro vwo nẹ obaro na fẹnẹ ọ mẹ.’ Iphiẹrophiyọ mẹ yen me tenrovi, rọ nẹrhẹ mi vwo ẹwẹn ri dọe. Nonẹna, ọmọrhiẹ ebẹnbẹn yen mi chirakon rayen re vwẹ eyeren nanaa, jẹ me cha riavwerhen rẹ akpeyeren vwẹ akpọ kpokpọ na!”

“IHWO RE DJẸ OSHỌ RỌYE SA MRẸ ỌKAROVWẸ-Ẹ”

16. Diesorọ Ovie Devid se vwo si nẹ ihwo re djoshọ ri Jihova “sa mrẹ ọkarovwẹ-ẹ”?

¹⁶ Odibo ri Jihova ro vwo otekẹvwẹ ji che hirharoku ebẹnbẹn. Ọ da hanvwe emọ rẹ Ovie Devid erha yen ghwuru. E mu efian banrọ ekueku, e ku ro phiyotọ, ọke ro vwo siomanu ikpe buebun, ovie ọvo je guọnọ rere o se vwo hwe. Dede nẹ ọ hẹ evunrẹ edavwini nana eje, ọ da ta kpahen Jihova nẹ: “Ihwo re djẹ oshọ rọye sa mrẹ ọkarovwẹ-ẹ.” (Une 34:9, 10) Diesorọ ọ sa vwọ ta ọtiọyen? Kidie, kerẹ idibo ri Jihova, dede nẹ ọ dia e rhẹro akpọ rẹ ebẹnbẹn kanree, jẹ e vwo imuẹro nẹ o vwo obo ra ghene guọnọ rọ cha kanre avwanree. (Une 145:16) A sa vwẹroso Jihova nẹ ọ cha vwẹrote avwanre vwẹ edavwini rẹ avwanre eje. E se vwo ẹwẹn ri dọe.

17. Diesorọ wọ vwọ jowọ wọ vwọ riẹn odjahọn rẹ obo re vwo ẹwẹn rẹ otekẹvwẹ?

¹⁷ Jihova guọnọre nẹ wo vwo otekẹvwẹ. (Une 131:1, 2) Ọtiọyena, davwẹngba wọ riẹn odjahọn rẹ obo re vwo otekẹvwẹ. Wọ da wian gangan vwo vwo ọdavwaro, gbẹrophiyọ obo wo ruẹ je vwẹ oma kpotọ, je tẹnrovi iphiẹrophiyọ wẹn, ku wọ sa tanẹ: “E, [o] te kẹ vwẹ.”—Une 16:5, 6.