Wo Hwọke Wo Ki Bromaphiyamee

1. Erhọ yen iroro evo re sorọ e vwo bromaphiyame?

WO VWO ẹguọnọ ri Jihova Ọghẹnẹ, rọ dia ohwo rọ kẹ wẹ emu esiri ejobi, ji te arhọ komobọ? Wọ guọnọ dje ẹguọnọ wẹn vwọ kẹ? Idjerhe ro me yovwin wo se vwo ru ọtiọyen yen wọ vwọ vwẹ oma wẹn kpahotọ kẹ ji djephia womarẹ omaebrophiyame. Owọẹjẹ nana cha nẹrhẹ wọ dia ọvo usun ihwo rẹ orua ri Jihova. Fikirẹ ọnana, kọ cha dia Ọsẹ kugbe Ugbeyan wẹn ro che sun we je vwẹrote we kidie ọyen vwo we. (Une 73:24; Aiz. 43:1, 2) Vwọba, omaevwọkpahotọ kugbe omaebrophiyame je cha nẹrhẹ wo vwo iphiẹrophiyọ rẹ arho ri bẹdẹ.—1 Pita 3:21.

2. Die yen a cha ta ota kpahen vwẹ uyono nana?

² O vwo orọnvwọn ọvo rọ nẹrhẹ wo siomauko wo vwo bromaphiyame? Ọ da dia ọtiọyen, ọ dia owẹ ọvo yen herọọ. Iduduru rẹ ihwo vwẹ obuko re tavwen a ke mrẹ ọke wẹn na ru ewene buebun vwẹ iruemu kugbe iroro rayen rere ayen se vwo muwan kẹ omaebrophiyame. Enẹna ayen ga Jihova sasasa vẹ aghọghọ. Die yen wo se yono mie ihwo evo ri bromaphiyame vwẹ ẹgbukpe ujorin rẹsosuọ? E jẹ a ta ota kpahen ebẹnbẹn evo ayen hirharoku kugbe obo re se yono vwo nẹ udje rayen rhe.

IHWO RI SAMERIA BROMAPHIYAME

3. Ebẹnbẹn omaebrophiyame vọ yen ihwo ri Sameria evo vwori?

³ Ihwo ri Sameria rẹ ọke ri Jesu, ayen hẹ ẹko rẹ ẹga re dia otorere ri Shikẹm rẹ awanre kugbe Sameria, vwẹ obohwẹre ọnre ri Judia. Tavwen ihwo ri Sameria na ki se bromaphiyame, ayen che vwo erianriẹn ọgbagba rẹ Ota rẹ Ọghẹnẹ. Ẹbe iyorin rẹsosuọ ri Baibol na, Jẹnẹsis rhi te Urhi Rivẹ—ọkiọvo ji te ọbe ri Joshua, yen ihwo ri Sameria rhọnvwephiyọ nẹ i nẹ obọ rẹ Ọghẹnẹ rhe. Dedena, ihwo ri Sameria je rhẹro rẹ Mesaya na, vwo nene oborẹ ive rẹ Ọghẹnẹ tare vwẹ Urhi Rivẹ 18:18, 19. (Jọn 4:25) Rere ayen se vwo bromaphiyame, kẹ ayen che rhiabọreyọ Jesu kerẹ Mesaya re veri na. Ọyena ghwa hẹ oborẹ “ihwo ri Sameria buebun” ruru. (Jọn 4:39) Efa cha davwẹngba vwo yerin ghene utuoma rọhẹ uvwre rẹ ihwo ri Sameria vẹ ihwo ri Ju.—Luk 9:52-54.

4. Vwo nene obo rehẹ Iruo rẹ Iyinkọn Na 8:5, 6, 14, die yen ihwo ri Sameria evo ruru ọke rẹ Filip vwo ghwoghwo ota kẹ ayen?

⁴ Die yen vwẹ ukẹcha kẹ ihwo ri Sameria vwo bromaphiyame? Ọke rẹ oghwoghwota re se Filip vwo “ghwoghwo Kristi na kẹ ayen,” ihwo ri Sameria evo de “rhiabọreyọ ota rẹ Ọghẹnẹ.” (Se Iruo rẹ Iyinkọn Na 8:5, 6, 14.) Dede nẹ ohwo ri Ju yen Filip ruẹ, jẹ ayen kerhọ rọyen. Ọkiọvo ayen karophiyọ ẹkpo evo vwevunrẹ Pentateuch na ri djerephia nẹ Ọghẹnẹ nẹ ohwo ruẹẹ. (Urhi 10:17-19) Vwẹ kẹdia kẹdia eje, ayen “nabọ mu ẹwẹn phiyọ oborẹ Filip ta” kpahen Kristi na, ayen ji vwo imuẹro gbagba nẹ Ọghẹnẹ yehẹ obuko ri Filip. O ji ru eka buebun, sivwin ihwo re muọga je djẹ ẹwẹn rẹ Idẹbono nẹ ihwo oma.—Iruo 8:7.

5. Erhọ yen erọnvwọn evo wo se yono mie ihwo ri Sameria?

⁵ Ihwo ri Sameria yena rha sa tanẹ ayen cha kerhọọ fikirẹ utuoma kugbe erianriẹn rọ kanre ayen. Ẹkẹvuọvo ayen ru ọtiọyeen. Ihwo ri Sameria vwo se oborẹ Filip yono ayen gbuyota nu, ayen rhe hwọke ayen ki bromaphiyamee. Baibol na da ta: “Ọke rẹ ayen vwo se Filip gbuyota, ohwo ro ghwoghwo iyẹnrẹn esiri rẹ Uvie rẹ Ọghẹnẹ kugbe ọ rẹ odẹ ri Jesu Kristi, te eya te eshare ki bromaphiyame.” (Iruo 8:12) Wo vwo imuẹro nẹ Ota rẹ Ọghẹnẹ yen uyota na, nẹ Iseri ri Jihova ji phi utuoma kparobọ je davwan vwo dje ẹguọnọ kẹ ohwohwo rọ dia oka re vwo vughe Inenikristi rẹ uyota? (Jọn 13:35) Ọtiọyena brorhiẹn wo vwo bromaphiyame, ji fiudugberi nẹ Jihova che bruba kẹ wẹ.

6. Erere vọ yen wọ sa mrẹ nẹ udje ri Ruben rhe?

⁶ Orua rẹ Iseri Jihova yen Ruben, ro nẹ Germany rhe dia ghwanre. Jẹ, kerẹ eghene, o vwo ẹwẹn ivivẹ sẹ Jihova ghene herọ. Mavọ yen o se vwo phi ẹwẹn ivivẹ ro rhe re kparobọ? O vwo noso nẹ erianriẹn rọyen te emuọvoo, o de brorhiẹn ro vwo ru orọnvwọn kpahọn. Ọ da ta: “Vwẹ uyono romobọ mẹ, mi de ru ehiahiẹ me sa vwọ mrẹvughe nẹ Jihova ghini herọ. Mi de yono uyovwinrota ro shekpahen erọnvwọn mamarhe abọ buebun.” O se ọbe na Is There a Creator Who Cares About You? Ọbe na nabọ te ẹwẹn ri Ruben mamọ. Ọ da ta kẹ oma rọyen: ‘Hmm! Jihova ghini herọ.’ Ọke o re vwo kin esiri rẹ ukoko, ọdavwaro ri Ruben kpahen igbevwunu rẹ okugbe iniọvo avwanre rehẹ akpọeje da rhe ganphiyọ. Ro vwo rhivwin kpo Germany, Ruben de bromaphiyame ọke rọ vwọ hẹ ẹgbukpe 17. Ọ da dianẹ wo vwo ẹwẹn ivivẹ kpahen obo ru wo yonori, reyọ ẹbe rẹ ukoko na vwo ru ehiahiẹ. A sa vwẹ “erianriẹn ọgbagba” vwo phi ẹwẹn ivivẹ kparobọ. (Ẹfe. 4:13, 14) Wo de nyo kpahen ẹguọnọ kugbe okugbe rọhẹ uvwre rẹ ihwo ri Jihova rehẹ asan sansan vwẹ akpọ na, ji te ukoko ru wọ hepha, ọdavwaro wẹn vwọ kpahen iniọvo avwanre rehẹ akpọeje kọ cha ganphiyọ.

SỌL RI TASỌS BROMAPHIYAME

7. Ororochọ vọ yen o fori nẹ Sọl kpọvi?

⁷ Roro kpahen udje ri Sọl ri Tasọs. Ọyen ohwo rọ nabọ riẹn kpahen ẹga rẹ ihwo ri Ju, o ki rhe titi kerẹ ohwo ri Ju. (Gal. 1:13, 14; Fil. 3:5) O vwo ọkiọvo rẹ ihwo ri Ju buebun vwo nẹ Inenikristi kerẹ ihwo ri gbevwọsua, ọnana da nẹrhẹ Pọl mukpahen ayen mamọ. O rorori nẹ ọhọre rẹ Ọghẹnẹ yen ọyen ruẹ jẹ ọyena ororochọ. (Iruo 8:3; 9:1, 2; 26:9-11) O se vwo rhiabọreyọ Jesu ji bromaphiyame kerẹ Onenikristi, Sọl komobọ ko ji che muegbe ro vwo hirharoku omukpahen.

8. (a) Die yen vwẹ ukẹcha kẹ Sọl vwo bromaphiyame? (b) Vwo nene obo rehẹ Iruo rẹ Iyinkọn Na 22:12-16, ukẹcha vọ yen Ananayas vwọ kẹ Sọl? (Ni uhoho na.)

⁸ Die yen vwẹ ukẹcha kẹ Sọl vwo bromaphiyame? Ọke Ọrovwori Jesu vwọ vwomaphia kẹ vwẹ urinrin rọyen, Sọl de rhuẹro. (Iruo 9:3-9) O chiri owẹnvwe vwẹ ẹdẹ erha soso, aphro herọọ nẹ o ji roro kpahen obo re phia vwọ kẹ na. Vwọrẹ uyota, Sọl de rhi vwo imuẹro nẹ Jesu yen Mesaya na nẹ idibo rọyen je ga ẹga rẹ uyota na. Ọ da Sọl mamọ nẹ ọyen vwobọ vwẹ ughwu ri Stivin! (Iruo 22:20) Vwẹ okuphiyọ rẹ ẹdẹ rerha na, odibo ọvo re se Ananayas de bru Sọl ra, o de sivwon je vuẹ nẹ o hwọke o ki bromaphiyamee. (Se Iruo rẹ Iyinkọn Na 22:12-16.) Sọl da vwomakpotọ rhiabọreyọ obo rọ vuẹ rẹ na ji bromaphiyame kerẹ Onenikristi.—Iruo 9:17, 18.

9. Erhọ yen erọnvwọn evo wo se yono mie Sọl?

⁹ O vwo erọnvwọn avwanre se yono mie Sọl. Ọ rha sa vwẹ uphẹn kẹ omaẹkparọ yẹrẹ oshọ rẹ ihworakpọ nẹ ọ dobọ rọyen ji o vwo jẹ omaebrophiyame. Jẹ o ru ọtiọyeen. Sọl vwomakpotọ ru ewene vwẹ akpeyeren rọyen ọke rọ vwọ mrẹ uyota ro shekpahen Kristi na vughe. (Iruo 26:14, 19) Sọl muegbe rọ vwọ dia Onenikristi dede nẹ ọ riẹnre nẹ e che mukpahen ọyen. (Iruo 9:15, 16; 20:22, 23) Ro vwo bromaphiyame nu, ọkieje yen ọ vwẹroso Jihova nẹ ọ cha vwẹ ukẹcha kẹ ọyen vwo chirakon rẹ edavwini. (2 Kọr. 4:7-10) Omaebrophiyame wẹn kerẹ ọvo usun rẹ Iseri ri Jihova sa davwen esegbuyota wẹn ni je ghwa edavwini rhe, ẹkẹvuọvo wọ cha mrẹ ukẹcha. Wo se vwo imuẹro nẹ Ọghẹnẹ kugbe Kristi che bicha wẹ vwọ fuevun chirakon ọkieje.—Fil. 4:13.

10. Erere vọ yen wọ sa mrẹ nẹ udje rẹ Anna rhe?

¹⁰ Orua ri Kurd vwẹ Eastern Europe yen Anna dia ghwanre. Oni rẹ Anna vwo bromaphiyame nu, ọsẹ rọyen da rhọnvwe kẹ nẹ e yono Baibol na ọke rọ vwọ hẹ ẹgbukpe 9. Ẹkẹvuọvo, ọnana da so ebẹnbẹn vwọ kẹ ihwo rẹ ekrun rọyen eje, ri nene ọsẹ vẹ oni rẹ Anna dia kuẹgbe. Ihwo orua na niro nẹ ọyen ophọphọvwe ohwo vwọ yanjẹ ẹga rẹ esẹ emọ vwo. Ọke rẹ Anna vwọ hẹ ẹgbukpe 12, ọ da vuẹ ọsẹ rọyen sẹ ọ sa rhọnvwe kẹ ọyen ro vwo bromaphiyame. Ọsẹ na guọnọ riẹn sẹ ọnana orhiẹn romobọ rọyen yẹrẹ sẹ ohwo yen gba rọ vwo ru ọtiọyen. Ọ da ta, “Mi vwo ẹguọnọ ri Jihova.” Ọtiọyena, ọsẹ rọyen da rhọnvwe kẹ nẹ o bromaphiyame. Ọyena vwọ wan nu, Anna de hirharoku koka koka rẹ ehwẹjẹ kugbe ojaẹriọ. Ọvo usun ihwo orua na da vuẹ nẹ: “O rhe yovwin ọ da dianẹ wẹwẹ ọvwọfanrhiẹn ro ji phopho isigati ukperẹ wọ vwọ dia Oseri ri Jihova.” Die yen vwẹ ukẹcha kẹ Anna vwo yerin ghene ebẹnbẹn nana eje? Ọ da ta, “Jihova kẹ vwẹ ẹgba, ọsẹ vẹ oni mẹ de rhe bicha vwẹ mamọ.” Anna si ọke sansan rẹ Jihova vwo bicha vwẹ akpeyeren rọyen phiyotọ. Ọtiọyena kọ rionbọ kpo ayen nọke ra ruọke rere ukẹcha ri Jihova vwọ kẹ vwo jẹ ẹro ẹ chọrọ. Siẹrẹ oshọ ẹvwọsuọ de mu we, karophiyọ nẹ Jihova cha vwẹ ukẹcha kẹ wẹ.—Hib. 13:6.

KỌNILIỌS BROMAPHIYAME

11. Ẹdia vọ yen Kọniliọs hepha rọ sa nẹrhẹ o hwọke ro vwo bromaphiyame?

¹¹ Baibol na je vuẹ avwanre kpahen udje ri Kọniliọs. Ọyen “onotu,” kọyen, onotu ro suẹn isodje ujorin rẹ ituofovwin ri Rom. (Iruo 10:1, eta rehẹ obotọ.) Fikirẹ ọnana, ọ sa dia ohwo ra nabọ riẹn odẹ ro ji titi vwẹ iruo rẹ isodje. Ọ “vwẹ okẹ rẹ arodọnvwẹ buebun kẹ ihwo na.” (Iruo 10:2) Jihova de ji ọyinkọn Pita nẹ o re ghwoghwo iyẹnrẹn esiri na vwọ kẹ. Kẹ, ẹdia ri Kọniliọs nẹrhẹ o hwọke ro vwo bromaphiyame?

12. Die yen vwẹ ukẹcha kẹ Kọniliọs vwo bromaphiyame?

¹² Die yen vwẹ ukẹcha kẹ Kọniliọs vwo bromaphiyame? Avwanre seri nẹ ‘ọ vẹ evwruwevwin rọyen eje . . . djoshọ rẹ Ọghẹnẹ.’ Ọkieje yen Kọniliọs vwọ nẹrhovwo rhe Ọghẹnẹ. (Iruo 10:2) Ọke rẹ Pita vwo ghwoghwo iyẹnrẹn esiri na kẹ Kọniliọs, o hwọkee ọ vẹ orua rọyen de rhiabọreyọ Kristi ji bromaphiyame. (Iruo 10:47, 48) Aphro herọọ nẹ, Kọniliọs muegbe ro vwo ru ewene eje ra guọnọ mie rere ọ vẹ orua rọyen sa vwọ ga Jihova kugbe.—Jos. 24:15; Iruo 10:24, 33.

13. Erhọ yen erọnvwọn evo ru wo se yono mie Kọniliọs?

¹³ Kerẹ Sọl, Kọniliọs rha sa vwẹ uphẹn kẹ ẹdia rọ hepha nẹ ọ dobọ rọyen ji o vwo jẹ Ọnenikristi ẹdia. Jẹ o ru ọtiọyeen. O vwo ewene kiriguo ra guọnọre nẹ wo ru vwẹ akpeyeren wo se vwo rhiabọreyọ uyota na? Ọ da dia ọtiọyen, Jihova cha vwẹ ukẹcha kẹ wẹ. O che bruba owenvwe ru wo vwori ru wọ vwọ vwẹ ẹga kẹ vwo nene odjekẹ ri Baibol na.

14. Erere vọ yen wọ sa mrẹ nẹ udje ri Tsuyoshi rhe?

¹⁴ Tsuyoshi ro nẹ Japan rhe, ru ewene ọvo vwẹ iruo rọyen rere o se vwo muwan vwọ kẹ omaebrophiyame. Ọyen ohwo rọ vwọ kpahen onini rẹ isikuru ri Ikenobo re de yono obo ra rhuẹrẹ idodo phiyọ. Ọke rẹ onini na rhe se kpo ughworivwiin, Tsuyoshi kọyen mudia kẹ vwẹ irueru ẹga ri Buddha. Ẹkẹvuọvo, Tsuyoshi rhe vwọ riẹn uyota oborẹ ughwu hepha nu, irueru nana da rhe dia eshegberudion vwọ kẹ omaebrophiyame rọyen. Ọtiọyena o de brorhiẹn nẹ ọyen rhe che vwobọ vwẹ irueru rẹ ẹga ri buddha naa. (2 Kọr. 6:15, 16) Tsuyoshi de nene onini rẹ isikuru na ta ota kpahọn. Kẹ, die yen nẹ obuko rọyen rhe? Dede nẹ, Tsuyoshi rhe vwobọ vwẹ irueru tiọyenaa jẹ iruo rọyen va rọ abọọ. Ọ vwọ ton uyono ri Baibol phiyọ omarẹ ẹgbukpe ọvo nu, o de bromaphiyame.a Ọ da dianẹ a guọnọre nẹ wo ru ewene vwẹ iruo wẹn rere wo se vwo ru obo re vwerhen Ọghẹnẹ oma, vwo imuẹro nẹ ọ cha kẹ wẹ obo wẹ vẹ orua wẹn guọnọre.—Une 127:2; Mat. 6:33.

IHWO RI KỌRẸNT BROMAPHIYAME

15. Ebẹnbẹn omaebrophiyame vọ yen ihwo ri Kọrẹnt vwori?

¹⁵ A riẹn ihwo ri Kọrẹnt awanre phiyọ evwọfanrhiẹn kugbe ihwo ri vwo ẹguọnọ rẹ igho. Ihwo buebun re dia etiyin yeren oka rẹ akpọ rẹ Ọghẹnẹ rhọnvwephiyọọ. O phẹnre dẹn nẹ, oka rẹ asan ọtiọyena sa dia obẹnbẹn vwọ kẹ kohwo kohwo rọ guọnọ rhiabọreyọ iyẹnrẹn esiri na. Jẹ, ọke rẹ Pọl vwo te orere na ji ghwoghwo iyẹnrẹn esiri ro shekpahen Kristi na, ‘ihwo ri Kọrẹnt buebun ri nyori ri ji segbuyota e de bru ayen phiyame.’ (Iruo 18:7-11) Ọrovwori Jesu Kristi da vwomaphia kẹ Pọl vwẹ emramrẹ je vuẹ nẹ: “Mi vwo ihwo buebun vwevunrẹ orere nana.” Ọtiọyena Pọl de ghwoghwo vwẹ etiyin ọkieje vwẹ ẹgbukpe ọvo gbe ubro.

16. Die yen vwẹ ukẹcha kẹ itu evo vwẹ Kọrẹnt ayen se vwo phi ebẹnbẹn omaebrophiyame kparobọ? (2 Kọrẹnt 10:4, 5)

¹⁶ Die yen vwẹ ukẹcha kẹ ihwo ri Kọrẹnt vwo bromaphiyame? (Se 2 Kọrẹnt 10:4, 5.) Ota rẹ Ọghẹnẹ vẹ ẹwẹn ọfuanfọn rọyen rọ vọnre vẹ ẹgba na, yen vwẹ ukẹcha kẹ ayen vwo ru ewene ride vwẹ akpeyeren rayen. (Hib. 4:12) Ihwo ri Kọrẹnt rhiabọreyọ iyẹnrẹn esiri ro shekpahen Jesu je sen erharhe iruemu kugbe irueru rẹ ayen ruẹ jovwo kerẹ a vwọ da udi vroma, ujiecho kugbe eshare ri duẹ eshare.—1 Kọr. 6:9-11.b

17. Die yen wo se yono mie ihwo ri Kọrẹnt?

¹⁷ Noso nẹ, dede nẹ ihwo ri Kọrẹnt vwo ẹkuruemu re vwẹ awọ muotọ ro fori nẹ ayen gbobọnyẹ, ayen tare nẹ ọ cha bẹn ayen vwọ dia Inenikristii. Ayen davwẹngba mamọ ayen sa vwọ yan vwẹ idjerhe ro kekeri ro sun ohwo kpo arhọ ri bẹdẹ na. (Mat. 7:13, 14) Wọ davwẹngba wọ vwọ yanjẹ ẹkuruemu ọbrabra yẹrẹ uruemu ọvo rọ chọre rere wo se vwo bromaphiyame? Wo jẹ oma rhọ wẹẹ! Rẹ Jihova nẹ ọ kẹ wẹ ẹwẹn ọfuanfon rọyen wọ sa vwọ sen urhurusivwe rẹ obo re brare.

18. Erere vọ yen wọ sa mrẹ nẹ udje ri Monika rhe?

¹⁸ Monika ro nẹ Georgia rhe, davwẹngba mamọ ro se vwo gbobọnyẹ erharhe rẹ eta kugbe erọnvwọn ra vwọ diotọ ri forii rere o se vwo bromaphiyame. Ọ da ta: “Ọke me vwọ hẹ eghene, ẹrhovwo yen ẹgba mẹ. Jihova riẹnre nẹ me guọnọ ru obo ri yovwinrin, ọtiọyena ọkieje yen ọ vwọ vwẹ ukẹcha kẹ vwẹ ji sun uvwe.” Monika bromaphiyame ọke rọ vwọ hẹ ẹgbukpe 16. O vwo erọnvwọn evo ro fori nẹ wọ yan jovwo rere Jihova se vwo rhiabọreyọ ẹga wẹn? Nẹrhovwo rhe ọkieje nẹ ọ kẹ wẹ ẹgba wo se vwo ru ewene. Jihova siobọnẹ ẹwẹn ọfuanfon rọyen kẹ avwanre ghwologhwolo.—Jọn 3:34.

ESEGBUYOTA WẸN SA NẸRHẸ IGBENU VRẸN

19. Die yen sa vwẹ ukẹcha kẹ wẹ vwo phi ebẹnbẹn re họhọ igbenu kparobọ? (Ni uhoho na.)

¹⁹ Vwo imuẹro nẹ Jihova vwo ẹguọnọ wẹn ọ je guọnọ nẹ wọ dia ọvo usun ihwo rẹ orua rọyen. Ọyena uyota, o toro ebẹnbẹn ru wo hirharokuẹ rọ nẹrhẹ ọ bẹn wo vwo bromaphiyamee. Jesu ta kẹ ẹko rẹ idibo rọyen rẹ ẹgbukpe ujorin rẹsosuọ nẹ: ‘Ovwan de vwo esegbuyota rọ pha kerẹ ubi rẹ imọstadi, ovwan cha ta kẹ ugbenu nana nẹ, “Vrẹn nẹ etinẹ kpo oboyin,” ko che vrẹn, o vwo emu vuọvo rọ cha bẹn ovwan eruoo.’ (Mat. 17:20) Ihwo ri nyo eta ri Jesu nana vẹ ọyen herọ vwẹ ikpe evo rhire, jẹ esegbuyota rayen je rhe ghwotọọ. Ẹkẹvuọvo Jesu da vwẹ imuẹro kẹ ayen nẹ ayen de vwo uvi rẹ esegbuyota, Jihova cha vwẹ ukẹcha kẹ ayen vwo phi ebẹnbẹn re họhọ igbenu kparobọ. Jihova je cha vwẹ ukẹcha kẹ wẹ vwo ru ọtiọyen!

20. Die yen idje rẹ Inenikristi ẹgbukpe ujorin rẹsosuọ vẹ e rẹ ọke avwanre na re djunute vwẹ uyono nana che mu we vwo ru?

²⁰ Ọ da dianẹ wo vwo oniso rẹ ebẹnbẹn re sa djẹ wẹ omaebrophiyame, jowọ kpakpata wo vwo si ayen no. Idje rẹ Inenikristi ẹgbukpe ujorin rẹsosuọ vẹ e rẹ ọke avwanre na sa vwẹ uchebro vẹ ọbọngan vwọ kẹ wẹ. E jẹ udje rayen phiuduphiyọ owẹ awọ ji mu we vwọ vwomakpahotọ kẹ Jihova ji bromaphiyame. Ọnana yen orhiẹn ro me yovwin kparobọ ru wo se bru!