Iyono Eghanghanre Vwo Mie Ivie rẹ Izrẹl

1-2. Die yen Baibol na vuẹ avwanre kpahen ivie rẹ Izrẹl evo?

BAIBOL na djunute edẹ rẹ eshare ri bun vrẹ 40 ri sun ru kerẹ ivie vwẹ Izrẹl.a Ọ je vuẹ avwanre kpahen oborẹ evo rayen ruru. Kerẹ udje, ivie re fuevun dede ji ru erọnvwọn evo re brare. Roro oborẹ Jihova ta kpahen Ovie Devid rọ dia odibo rọyen nẹ: Ọ “yọnrọn irhi mẹ, rọ da vwẹ udu rọye ejobi vwo nene uvwe, ro ruẹ obo ri yoma ọvo vwẹ ẹro mẹ.” (1Iv 14:8) Dedena, Devid nene aye rẹ ohwo ọfa gbe ọfanrhiẹn ji hworo ona re vwo hwe ọshare rẹ aye na vwẹ ofovwin.—2Sa 11:4, 14, 15.

² Ẹkẹvuọvo, buebun rẹ ivie re fuevuun ji ru erọnvwọn evo ri yovwirin. Kerẹ udje, Rehoboam “ru emu umwemwu” vwẹ ẹro ri Jihova. (2Ik 12:14) Dedena, Rehoboam nyupho ri Jihova ọke rọ vwọ vuẹ nẹ o nene uvwiẹ ihwe na họnraa, nẹ ọ vwẹ uphẹn kẹ ayen rere ayen reyọ ovie romobọ rayen vwo mu. Irere ro sun ru na je mrẹ erere kidie ọ gbogba riariẹ ayen phiyọ.—1Iv 12:21-24; 2Ik 11:5-12.

3. Onọ ọghanghanre vọ yen vwomaphia, kẹ die yen avwanre cha ta ota kpahen vwẹ uyono nana?

³ Onọ ọghanghanre ọvo vwomaphia. Ọ da dianẹ ivie rẹ Izrẹl ru obo ri yovwinrin kugbe obo re brare, kẹ die yen Jihova nẹ ọ vwọ riẹn ovie rọ fuevun? Ẹkpahọnphiyọ rẹ onọ yena cha cha avwanre uko vwọ riẹn oborẹ Jihova guọnọ mie avwanre. Avwanre cha ta ota kpahen erọnvwọn erha ri Jihova niri ọke rọ vwọ fuẹrẹn ivie rẹ Izrẹl: ubiudu rayen, sẹ ayen vwo ewẹn rẹ okurhẹriẹ, kugbe sẹ ayen che tinkamu ẹga rẹ uyota.

AYEN VWẸ UBIUDU RAYEN EJE NENE JIHOVA

4. Die yen ofẹnẹ ọvo rọ herọ uvwre rẹ ivie re fuevun vẹ e re fuevuun?

⁴ Ivie ri ru obo re vwerhen Jihova oma vwẹ ẹga kẹ vẹ ubiudu ọsoso.b Jehoshafat ọyen omamọ rẹ Ovie “rọ vwẹ udu rọye ejobi guọnọ Ọrovwohwo.” (2Ik 22:9) Vwọ kpahen Josaya, Baibol na da ta: “Vwẹ obaro rọye o vwo ovie ọvuọvo rọ họherọ-ọ, rọ vwẹ udu rọye ejobi vẹ ẹnwẹ rọye ejobi vẹ ẹgba rọye ejobi, hirhe ku Ọrovwohwo.” (2Iv 23:25) Kẹ, Solomọn ro ru obo re brare ọke vwọ yanran na vwo? “Udu rọye ki ghevweghe.” (1Iv 11:4) Vwọ kpahen ovie rẹ Izrẹl ọfa rọ fuevuun re se Abijam, Baibol na da ta: “Udu rọye gbe rha dia ọsoso vẹ uyota kẹ Ọrovwohwo Ọghẹnẹ rọye-e.”—1Iv 15:3.

5. Djisẹ rẹ obo ro mudiaphiyọ ra vwọ ga Jihova vẹ ubiudu ọsoso.

⁵ Kẹ, die yen o mudiaphiyọ a vwọ ga Jihova vẹ ubiudu ọsoso? Ohwo ro vwo udu ọsoso, ọ dia ọ de ga Ọghẹnẹ kidie nẹ o niro nẹ ọyen obo ro fori nẹ ọyen ruu. Ukperẹ ọtiọyen, ẹguọnọ okokodo vẹ ọghọ ro vwo kpahen Jihova yen muo vwọ ga. Ọtiọyena vwẹ ẹdẹ rẹ akpọ rọyen eje yen o che vwo ru ọnana.

6. Mavọ yen avwanre sa vwọ ga Jihova vẹ ubiudu ọsoso? (Isẹ 4:23; Matiu 5:29, 30)

⁶ Mavọ yen avwanre sa vwọ vwẹrokere ivie re fuevun ga Jihova vẹ ubiudu ọsoso? Womarẹ a vwọ kẹnoma kẹ erọnvwọn ri se miovwo ohwo. Kerẹ udje, erọnvwọn ra vwọ dia otọ ri shephiyọọ sa nẹrhẹ ubiudu rẹ avwanre jẹ ọsoso ẹdia. Ọtiọyen ji te erharhe rẹ igbeyan, kugbe ekuakua rẹ akpeyeren. Siẹrẹ e de noso nẹ orọnvwọn ọvo nẹrhẹ ẹguọnọ re vwo kpahen Jihova shekpotọ, e jẹ a jowọ kpakpata vwọ rhuẹrẹphiyọ.—Se Isẹ 4:23; Matiu 5:29, 30.

7. Diesorọ ọ vwọ dia obo re ghanre a vwọ kẹnoma kẹ erharhe erọnvwọn ri se miovwo avwanre?

⁷ E jẹ avwanre kẹnoma kẹ kemu kemu rọ sa nẹrhẹ ubiudu rẹ avwanre jẹ ọsoso ẹdia. E rhe nomasoo, a sa phiẹn oma avwanre vwo roro nẹ kidie nẹ avwanre muomaphiyọ ẹga ri Jihova, emu vuọvo herọ ro che miovwo avwanree. E vwo ru udje rọyen, gba vwẹ ẹwẹn roro nẹ wọ yan vwevunrẹ uvo jẹ oheri na pha gangan. Rere oma wẹn se vwo totọ wọ da da ame odjidjiro. Die yen che phia siẹrẹ wo rhe vrẹn nẹ uvo naa? Urhurhu ame cha rhoma si uwe. Ẹkpo na kẹ ọna. E vwo ru erọnvwọn ri che si avwanre kẹrẹ Jihova ọvo terii. Kirobo ra cha dia evunrẹ uvo ọgangan ọke grongron naa, ọtiọyen ọ je hepha nẹ a cha sẹro rẹ oma avwanre vwo nẹ kemu kemu rọ cha nẹrhẹ ẹguọnọ rẹ avwanre kpahen Jihova shekpotọ.—Ẹf 2:2.

AYEN KURHẸRHIẸ NẸ IMWEMWU RAYEN

8-9. Die yen Ovie Devid kugbe Ovie Hẹzikaya ruru ọke ra vwọ ghwọku ayen? (Ni uhoho rọhẹ opharo ọbe na.)

⁸ Kirobo re djunute siẹvure, Devid ru umwemwu ọgangan. Ẹkẹvuọvo, ọke rẹ ọmraro Netan vwo bro ra, je vuẹ kpahen imwemwu rọyen, o de kurhẹriẹ nẹ otọ ubiudu rhe. (2Sa 12:13) Avwanre mrẹvughe nẹ okurhẹriẹ rọyen nẹ otọ rẹ ẹwẹn rhe womarẹ eta rọ tare vwẹ Une rẹ Ejiro 51. Ọ dia Devid me ru nẹ obo ro ruru na darọ rere ọ vwọ phiẹn Netan yẹrẹ e vwo jẹ oja egbe kẹẹ.—Un 51:3, 4, 17.

⁹ Ovie Hẹzikaya ji ru umwemwu vwọso Jihova. Baibol na da ta: “Eheri da rhe vọn udu rọye. Fiki rẹ ọtiọye na ophu da rhe dia uyovwi rọye kugbe Juda vi Jerusalẹm.” (2Ik 32:25) Die yen nẹrhẹ Hẹzikaya rhi phuoma? Ọ sa dianẹ fikirẹ obo ro vwori, ihwo rẹ Asiria ro phi kparobọ, yẹrẹ igbevwunu rẹ obo re sivwin ọga rọyen wan. O je sa dianẹ omaephuo rọyen na yen muro vwo dje efe rọyen kẹ ihwo ri Babilọn, rọ nẹrhẹ ọmraro Aizaya ghwọ kuo. (2Iv 20:12-18) Ẹkẹvuọvo, kerẹ Devid, Hẹzikaya kurhẹriẹ nẹ otọ ẹwẹn rhe. (2Ik 32:26) Ukuotọ rọyen, Jihova de kere phiyọ ovie rọ fuevun, ro “ru obo ri shehọ.”—2Iv 18:3.

10. Die yen Ovie Amazaya ruru a vwọ kpọvi?

¹⁰ Vwọ fẹnẹ ayen, Ovie Amazaya ri Juda ru obo ri yoma, ẹkẹvuọvo, “ọ dianẹ kẹ abe ghwa kare udu rọye-e.” (2Ik 25:2) Die yen obo rọ chọre ro ruru? Jihova vwọ cha uko vwo phi ihwo rẹ Idọm kparobọ nu, ọ da ga eghẹnẹ rayen.c Ọke rẹ ọmraro ri Jihova vwọ vuẹ kpahọn, ọ rhọnvwe kerhọọ, ọ da vuẹ nẹ ọ yanran.—2Ik 25:14-16.

11. Vwo nene obo rehẹ 2 Kọrẹnt 7:9, 11, die yen ofori nẹ avwanre ru e se vwo ghwovwo avwanre? (Ji ni ihoho na.)

¹¹ Die yen avwanre yono vwo nẹ idje rẹ Ivie nana? Ofori nẹ avwanre kurhẹriẹ nẹ imwemwu avwanre ji ru obo re se ru eje e vwo jẹ ayen ẹvwanriẹn. Kẹ, ọ da rha dianẹ ekpako rẹ ukoko vwẹ uchebro vwọ kẹ avwanre kpahen erọnvwọn rẹ avwanre niri nẹ i fiemuu vwo? E jẹ avwanre no nẹ Jihova yẹrẹ ekpako na vwo ẹguọnọ avwanree. A je tobọ vwẹ uchebro kugbe ọghwọku vwọ kẹ ivie rẹ Izrẹl evo. (Hib 12:6) A da vwẹ ọkpọvi vwọ kẹ avwanre, ofori nẹ (1) a vwomakpotọ rhiabọreyọ, (2) ru ewene ro fori, kugbe (3) je rha ga Jihova vẹ ubiudu ọsoso. E de kurhẹriẹ nẹ imwemwu avwanre, Jihova che vwo ghovwo avwanre.—Se 2 Kọrẹnt 7:9, 11.

AYEN TINKAMU ẸGA RẸ UYOTA

12. Die yen emu ọvo kiriguo rọ nẹrhẹ ivie re fuevun na fẹnẹ?

¹² Ivie ri fuevun vwẹ ẹro ri Jihova tinkamu ẹga rẹ uyota. Ayen ji jiro kẹ ihwo rẹ ayen suẹn nẹ i ru ọtiọyen. Vwọrẹ uyota, o ji vwo asan rẹ ayen de ru chọ kirobo rẹ avwanre yonori. Ẹkẹvuọvo, ayen vwo oruru ọgangan kpahen ẹga rẹ Jihova, je wian gangan vwo si edjọẹgọ vwo nẹ otọ na.d

13. Diesorọ Jihova vwo bru hwe Ehab kerẹ Ovie rọ fuevuun?

¹³ Kẹ, ivie ri Jihova brorhiẹn hwe kidie nẹ ayen fuevuun vwo? Vwọrẹ uyota, ọ dia erọnvwọn eje rẹ ayen ruru yen brare-e. Orharhe Ovie Ehab je vwomakpotọ te ẹdia evo, je viẹ diekpọvwẹ kidie nẹ o vwobọ vwẹ ughwu rẹ Nebọt. (1Iv 21:27-29) Ọ bọn irere ji phi ifovwin rẹ Izrẹl kparobọ. (1Iv 20:21, 29; 22:39) Ẹkẹvuọvo, a riẹn Ehab phiyọ ohwo ro titi ẹga refian fikirẹ oriẹriẹvwe rẹ aye rọyen. Fikirẹ ọtiọyena, o se kurhẹriẹẹ—1Iv 21:25, 26.

14. (a) Diesorọ Jihova vwo brorhiẹn hwe Ovie Rehoboam nẹ ọ fuevuun? (b) Die yen emu ọvo kiriguọ rẹ ivie ri jẹ evun-ẹfuọn na ruru ọke rẹ ayen vwo suẹn?

¹⁴ Jẹ e roro kpahen ovie ọfa ro jẹ evun-ẹfuọn—Rehoboam. Kirobo re djunute vwẹ obenu, o ji ru erọnvwọn iyoyovwin evo ọke ro vwo suẹn. Ẹkẹvuọvo, ọke rẹ usuon rọyen vwọ ghwotọ re, o de gbobọnyẹ Urhi ri Jihova ra ga eghẹnẹ efian. (2Ik 12:1) Ọke vwọ yanran na, kọ ga Jihova vẹ edjọ kuẹgbe. (1Iv 14:21-24) Ọ dia Rehoboam vẹ Ehab ọvo yen ivie ri gbobọnyẹ ẹga rẹ uyotaa. Vwọrẹ uyota, ivie ri jẹ evun-ẹfuọn ri bicha ẹga rẹ efian vwẹ idjerhe ọvo yẹrẹ ọfa yen me bun. O phẹnre dẹn nẹ vwọkẹ Jihova, e vwo tinkamu ẹga rẹ uyota yen emu ọvo kiriguo ro nẹ vwo brorhiẹn sẹ ovie fuevun yẹrẹ ọ fuevuun.

15. Diesorọ ọ vwọ ghanre kẹ Jihova e vwo tinkamu ẹga rẹ uyota?

¹⁵ Diesorọ ẹga vwọ dia obo re ghanre vwọ kẹ Jihova mamọ? Emu ọvo rọ sorọ yen, ivie na yen i fori nẹ e kobaro vwọ vwẹ ukẹcha kẹ ihwo rẹ Ọghẹnẹ vwẹ ẹga re uyota. Emu ọfa, ẹga rẹ efian je nẹrhẹ e shenyẹ ihwo ji ru imwemwu egangan. (Ho 4:1, 2) Vwọba, ivie na vẹ ihwo rẹ ayen suẹn ayen ihwo re vwomakpahotọ kẹ Jihova. Ọtiọyena, ayen de vwobọ vwẹ edjọẹgọ, ayen rha fuevun kẹ Jihovaa, Baibol na kọ reyọ ayen vwo dje igberadja. (Jer 3:8, 9) Ohwo ro gbe igberadja ru umwemwu vwọso ọrivẹ rẹ orọnvwe rọyen. Vwẹ idjerhe vuọvo na, odibo ri Jihova rọ vwomakpahotọ re, de vwobọ vwẹ ẹga rẹ efian jẹ o ru umwemwu vwọsọ Jihova.e—Urh 4:23, 24.

16. Die yen Jihova nẹ vwo brorhiẹn sẹ ohwo omamọ rẹ ohwo yẹrẹ orhare rẹ ohwo?

¹⁶ Die yen e se yono norhe? O fori avwanre vwọ kẹnoma kẹ ẹga rẹ efian. Ẹkẹvuọvo, o ji fo e vwo tinkamu ẹga rẹ uyota je dia evun rọyen ọkieje. Ọmraro Malakae djere phephẹn oborẹ Jihova nẹ o ki brorhiẹn sẹ ohwo na omamọ rẹ ohwo yẹrẹ orharhe rẹ ohwo. O de si: “Kẹ ovwan cha vughe ofẹnẹ rọ hẹ ohri rẹ ọvwata vẹ oruimwemwu, vwẹ uvwre rẹ ohwo rọ ga Ọghẹnẹ vẹ ọ ro jẹ ẹga.” (Mal 3:18) Ọtiọyena, e jẹ avwanre vwẹ uphẹn kẹ orọnvwọn vuọvo, owenẹ jẹgba yẹrẹ oruchọ rẹ avwanre nẹ e so ofudjevwe kẹ avwanre te ẹdia ra da dobọ rẹ ẹga ri Jihova jii. Kidie ọyen umwemwu ọgangan komobọ siẹrẹ a da dobọ rẹ ẹga ri Jihova ji.

17. Diesorọ avwanre vwọ jomaotọ sane ọrivẹ rẹ oronvwe?

¹⁷ Ọ da dianẹ wẹwẹ hẹ ẹdia ri kpogono je jẹ iroro ru wọ vwọ rọvwọn, wọ mrẹ oborẹ eta ri Malakae sa vwẹ ukẹcha kẹ wẹ vwo vughe oka rẹ ohwo ru wọ cha rọvwọn? Ohwo se vwo omamọ rẹ iruemu evo, ẹkẹvuọvo ọ da dianẹ ọ ga Ọghẹnẹ rẹ uyota naa, kẹ a sa tanẹ ohwo ọtiọyen ọvwata vwẹ ẹro rẹ Jihova? (2Kọ 6:14) Wọ da rọvwọn ọka rẹ ohwo ọtiọyen, ọ sa nẹrhẹ wo sikẹre Jihova phiyọ? Roro kpahen eya ri Solomọn, ọ sa dianẹ ayen ji vwo omamọ rẹ iruemu evo. Jẹ, kidie nẹ ayen ga Jihovaa, ememerha na ayen da riẹriẹ Solomọn vwọ ga eghẹnẹ efian.—1Iv 11:1, 4.

18. Die yen ofori nẹ emiọvwọn yono emọ rayen?

¹⁸ Emiọvwọn, ovwan sa reyọ idje rẹ ivie rehẹ Baibol na vwọ kọn oruru rẹ ẹga ri Jihova phiyọ ubiudu rẹ emọ rẹ ovwan. Vwẹ ukẹcha kẹ ayen vwọ riẹn nẹ oborẹ oviẹ titi ẹga rẹ uyota wan yen Ọghẹnẹ nẹ sẹ omamọ rẹ ovie yẹrẹ orharhe rẹ ovie. Vwẹ eta vẹ uruemu wẹn vwo yono emọ wẹn nẹ erọnvwọn re sa nẹrhẹ ayen vẹ Jihova vwo uvi rẹ oyerinkugbe kerẹ re vwo yono Baibol na, kpo uyono, ji vwobọ vwẹ iruo rẹ aghwoghwo na yen ma ghanre vwẹ akpeyeren. (Mt 6:33) Ọ rha dia ọtiọyeen, ayen rhe che vwo uvi rẹ oyerinkugbe rọ kpẹkpẹre vẹ Jihovaa, ayen se no nẹ kidie ọsẹ vẹ oni rayen Iseri ri Jihova, ayen jẹ Iseri ri Jihova. Ukuotọ rọyen, ayen se phi ẹga rẹ uyota phiyọ ẹdia rivẹ vwẹ akpeyeren yẹrẹ tobọ gbobọnyẹ karekare.

19. Die yen kohwo kohwo rọ dọbọ ẹga ri Jihova ji se rhẹro rọyen? (Ni ekpeti na “Wo Se Rhivwin Bru Jihova Rhe!”)

¹⁹ Siẹrẹ ohwo da dobọ rẹ ẹga ri Jihova ji, kẹ o mudiaphiyọ nẹ ọ vẹ ọyen rhe che se vwo uvi rẹ oyerinkugbe ọfaa? Ọ dia ọtiọyeen kidie o se kurhẹriẹ je rhoma ton ẹga rẹ uyota phiyọ. O se vwo ru ọtiọyen, ofori nẹ ọ vwomakpotọ ji rhiabọreyọ ukẹcha rẹ ekpako ukoko na. (Jem 5:14) Ọ guọnọ ẹgbaẹdavwọn mamọ ọ sa vwọ rhoma mrẹ aroesiri ri Jihova!

20. A da vwẹrokere ivie re fuevun na, ẹro vọ yen Jihova che vwo ni avwanre?

²⁰ Kẹ die yen avwanre yono vwo mie ivie rẹ Izrẹl? Avwanre sa dia kerẹ ivie re fuevun siẹrẹ a da vwẹ ubiudu avwanre eje nene Jihova. E jẹ avwanre yono nẹ oruchọ rẹ avwanre, kurhẹriẹ, ji ru ewene ri fori. E jẹ avwanre karophiyọ ọghanrovwẹ re vwo tinkamu ẹga rẹ Ọghẹnẹ rẹ uyota ọvuọvo na. Wo de ru ọtiọyen, Jihova ko che ni we kerẹ ohwo ro ru obo ri shephiyọ.