Obo re se Vwo ru Ewene Siẹrẹ a da Kua Kpo Ukoko Ọfa

Nicolas vẹ Céline vwo egbabọse rọ fẹnẹre. Oghọn rẹ ukoko ri France vuẹ ayen nẹ ayen kpo ukoko ọfa, ayen da ra. Ayen tare nẹ: “Ẹsosuọ oma vwerhen avwanre, jẹ ọke vwọ yanran na, urhuru rẹ igbeyan rẹ avwanre yan jovwo ko siẹ avwanre. Avwanre vẹ iniọvo rehẹ ukoko kpokpọ na je nabọ riẹriomaa.”a Vẹ egbabọse re djunute na, mavọ yen wọ sa vwọ mrẹ omavwerhovwẹn siẹrẹ wọ da kua kpo ukoko kpokpọ? Die yen ihwo efa se ru vwọ vwẹ ukẹcha phia? Mavọ yen wọ sa vwọ mrẹ ọbọngan je vwẹ ọbọngan vwọ kẹ iniọvo rẹ ukoko kpokpọ na?

IROROẸJẸ ẸNE RE SA CHA WẸ UKO VWO RU EWENE

1. Vwẹroso Jihova. (Un 37:5) Oniọvo aye Kazumi rọ dia Japan kua nẹ ukoko rọ hepha vwẹ ẹgbukpe 20 re kpo ukoko ọfa ọke re vwo wene iruo rẹ ọshare rọyen. Mavọ yen o vwo “phi idjerhe [rọyen] phihọ obọ rẹ Ọrovwohwo”? Ọ da ta: “Me da ta ọdavwẹ mẹ eje kẹ Jihova kpahen oshọ, ẹnwan kugbe ẹdia rẹ ọruvwohwo re me hepha. Kọke kọke ri mi de ru ọtiọyen, ọyen ọ vwọ kẹ vwẹ ẹgba re me guọnọre.”

Mavọ yen wọ sa vwọ vwẹroso Jihova vrẹ obo ri jovwo? Kirobo rẹ okankọn guọnọ ame vẹ erọnvwọn efa nẹ otọ na cha rere ọ sa vwọ rho ye, ọtiọyen esegbuyota rẹ avwanre je guọnọ ame vẹ erọnvwọn efa re vwo ru udje na rere ọ sa vwọ ghwotọ. Nicolas re djunute siẹvure na, mrẹvughe nẹ siẹrẹ ọyen de roro kokodo kpahen idje rẹ eshare kerẹ Ebraham, Jesu, kugbe Pọl re reyọ erọnvwọn buebun vwo ze ayen se vwo ru ọhọre rẹ Ọghẹnẹ, ọ nẹrhẹ ẹroẹvwọsuọ ro vwo kpahen Jihova nẹ o che bicha ọyen ganphiyọ. Uyono ri Baibol romobọ rẹ ọkieje cha vwẹ ukẹcha kẹ wẹ vwo yerin ghene ewene sansan vwẹ akpeyeren, wo ji che yono erọnvwọn ru wọ sa reyọ vwo phiuduphiyọ iniọvo na awọ vwẹ ukoko kpokpọ na.

2. Wọ vwẹ ukoko kpokpọ na vwọ vwanvwa ọ ri jovwo naa. (Agh 7:10) Ọke ri Jules vwọ kua nẹ Benin kpo United States, ọ dia ọmọrhiẹ ewene yen o ruru vwo nene ẹkuruemu rẹ asan naa. Ọ da ta: “Kọ ghwa họhọ nẹ kohwo kohwo re me mrẹre kọyen mi gbikun rẹ akpọ mẹ kẹ.” Kidie nẹ ọnana fẹnẹ obo ro ruẹ jovwo, ememerha na ko rhi siomanẹ ohri rẹ iniọvo na. Ọke rọ vẹ iniọvo na vwọ nabọ riẹrioma re, o de rhi wene iroro rọyen. Ọ da ta: “O muvwẹro nẹ ihwo eje abavo, o toro asan rẹ avwanre hepha vwẹ akpọ naa. Oborẹ ayen ta ota wan vẹ oborẹ ayen ruẹ erọnvwọn wan yen de fẹnẹ. Reyọ ayen kirobo rẹ ayen hepha.” Ọtiọyena wọ vwẹ ukoko ru wọ hepha na vwọ vwanvwa ọ ru wọ yan jovwo naa. Oniọvo aye ọvo rọ dia ọkobaro re se Anne-Lise tare nẹ: “Ọ dia me kuare vẹ ẹwẹn nẹ erọnvwọn eje cha dia abavoo. Me kuare rere mi vwo yono erọnvwọn kpokpọ.”

O ji fo nẹ ekpako reyọ ukoko rẹ ayen hepha vwọ vwanvwa ọ rẹ ayen yan jovwo naa. Kidie nẹ iniovo na reyọ ena sansan vwo ruiruo, ọ dia ọyen o vwo mudiaphiyọ nẹ oborẹ ayen ruẹ chọree. Tavwen wọ ke vwẹ iroroẹjẹ vwọphia, ofori nẹ wọ riẹn obo re ruẹ erọnvwọn wan vwẹ ukoko na. (Agh 3:1, 7b) Davwẹngba vwọ reyọ oma wẹn vwo ru udje vwọ kẹ iniọvo na ukperẹ wọ vwọ gba ayen vwo vwo oka rẹ iroro ro rhe we.—2Kọ 1:24.

3. Vwobọ vwẹ irueru rẹ ukoko kpokpọ na. (Fil 1:27) Dede nẹ owian rẹ okua reyọ ọke vẹ ẹgba, jẹ ọyen obo re ghanre wo vwo kpo uyono siẹrẹ wo de ghwe te oboyin. Ọ da rha dianẹ iniọvo rehẹ ukoko kpokpọ na fobọ mrẹ wẹẹ yẹrẹ nama mrẹ wẹ kakakaa, kẹ mavọ yen ayen sa vwọ vwẹ ukẹcha kẹ wẹ? Oniọvo aye Lucinda, rọ vẹ emetẹ rọyen ive kua kpo orere rode ọvo vwẹ South Africa da ta: “A vwẹ uchebro kẹ vwẹ nẹ mi sikẹre iniọvo rehẹ ukoko na, nene ayen wian kugbe vwẹ iruo rẹ aghwoghwo na, ji vwobọ vwẹ emẹvwa. Avwanre je vwẹ uwevwin rẹ avwanre vwọ kpahotọ nẹ e de ru emẹvwa rẹ aghwoghwo.”

Avwanre vẹ iniọvo rẹ ukoko kpokpọ na da “wian kuẹgbe” vwẹ iruo rẹ ukoko na, ọ cha cha avwanre uko vwọ ‘sẹro rẹ esegbuyota re . . . vwo kpahen iyẹnrẹn esiri na.’ Ekpako rẹ ukoko ri Anne-Lise re djunute siẹvure na vuẹrẹ nẹ, o rhe nene kohwo kohwo kpo aghwoghwo. Die yen nẹ obuko rẹ ọnana rhe? Ọ da ta: “O kri rii, me da rhe mrẹvughe nẹ me nabọ hẹ evunrẹ ukoko na re.” Vwọba, e vwo vwobọ vwẹ orufon vẹ ẹroevwote rẹ Ọguan Ruvie na, ọyen odjephia nẹ wọ reyọ ukoko kpokpọ na kerẹ ukoko wẹn re. Wo vwo vwobọ vwẹ irueru tiọyena, iniọvo na ki che si we te oma, kọ je cha họhọ nẹ ovwan orua ọvo.

4. Mu igbeyan kpokpọ. (2Kọ 6:11-13) Idjerhe ọvo ro me yovwin re vwo mu igbeyan yen e vwo vwo ọdavwẹ rẹ ihwo, ọtiọyena wọ me nabọ nene iniovo ghwọrọ ọke kugbe tavwen uyono ke tonphiyọ kugbe ọke rẹ uyono de kuphiyọ nu rere wo se vwo vughe ayen. Davwẹngba vwọ riẹn edẹ rayen. Wọ da karophiyọ edẹ rẹ ihwo je nabọ nene ayen hwẹ kuẹgbe sasasa je dia ohwo ra sa rua, ọnana kọ cha nẹrhẹ ayen sikẹre owẹ, ovwan ke cha dia uvi rẹ igbeyan.

Ukpe ru wọ vwọ ro ẹnwan sẹ iniọvo na che rhiabọreyọ owẹ, vwẹ uphẹn kẹ ayen rere ayen vwo vughe oka rẹ ohwo ru wọ hepha. Vwẹrokere Lucinda rọ tare nẹ, “Avwanre rhi vwo uvi rẹ oyerinkugbe re kidie avwanre jowọ vwo durhie iniọvo na rhe uwevwin rẹ avwanre.”

“WE DEDE OHWOHWO”

Oshọ se mu ihwo evo siẹrẹ ayen da ro Ọguan Ruvie rọ vọnre vẹ ihwo rẹ ayen vugherii. Ọtiọyena mavọ wọ sa vwọ vwẹ ukẹcha kẹ iniọvo kpokpọ re rhe ukoko na? Ọyinkọn Pọl jiriro kẹ avwanre nẹ, “we dede ohwohwo kirobo ri Kristi dede ovwan.” (Ro 15:7) Ekpako sa vwẹrokere Kristi womarẹ ayen vwọ vwẹ ukẹcha kẹ ihwo kpokpọ rere ẹwẹn rayen se vwo totọ. (Ni ekpeti na “Die yen sa nẹrhẹ ẹkua rẹ avwanre dia ọ rẹ omavwerhovwen?”) Ẹkẹvuọvo ihwo eje vwevunrẹ ukoko na, te imitete dede sa vwẹ ukẹcha kẹ ihwo kpokpọ rere ẹwẹn rayen se vwo totọ.

E vwo dede ihwo efa churobọ si e vwo durhie ayen cha uwevwin rẹ avwanre kugbe a vwọ vwẹ ukẹcha kẹ ayen. Kerẹ udje, oniọvo aye ọvo ghwọrọ ọke vwo dje asan sansan vwẹ orere na vwọ kẹ oniọvo aye ọfa rọ kua rhe obọ, o ji dje asan ra da ro imoto vẹ itreni vwọ kẹ. Oma vwerhen oniọvo aye na mamọ, ọ je nẹrhẹ o se ru ewene vwẹ ekogho rọ kua ra na.

UPHẸN RA VWỌ RHOPHIYỌ

Igurube vwọ rhuaphiyọ ye, ayen se wene ohọrọma abọ buebun tavwen ibekpe rayen ke gan te asan rẹ ayen da rhan. Ọtiọyen ọ je hepha nẹ ọke ru wo de wene ukoko, ofori nẹ e phi oshọ kparobọ rere e se vwo muomaphiyọ ẹga ri Jihova vọnvọn. Nicolas vẹ Céline tare nẹ, “Okua sa nẹrhẹ e yono erọnvwọn buebun. Rere e se vwo nene ẹkuruemu rẹ asan kpokpọ na vẹ ihwo yerin kugbe, avwanre ki yono iruemu kpokpọ.” Jean-Charles re djunute siẹvure na vuẹ avwanre erere rẹ orua rọyen mrẹre: “Ewene nana nẹrhẹ emọ rẹ avwanre rho te imiragua ji sikẹrẹ Jihova phiyọ. Emeranvwe evo vwọ wan nu, ọmọtẹ rẹ avwanre de vwo ota vwẹ uyono rẹ uvwre rẹ udughwrẹn na, a da je vwẹ ọmọshare rẹ avwanre vwo mu oghwoghwota ro ji bromaphiyamee.”

Kerẹ udje, kọ da rha dianẹ ẹdia wẹn sa nẹrhẹ wọ kua kpo asan ra da ma guọnọ ukẹchaa vwo? Kẹ diesorọ wọ rha vwẹ ukoko ru wọ hepha enẹna vwọ tuanphiyọọ je davwẹngba vwọ reyọ iroroẹjẹ ra vwọphia vwẹ uyono nana vwo ruiruoo? Vwẹroso Jihova, vwobọ vwẹ irueru rẹ ukoko na vọnvọn womarẹ wo vwo ruẹ ọrhuẹrẹphiyotọ ru wo vwo nene ihwo efa wian kugbe vwẹ iruo rẹ aghwogwo na, mu igbeyan kpokpọ wo ji ru oyerinkugbe wẹn vẹ igbeyan rẹ awanre na ganphiyọ. Wọ sa jowọ wọ vwẹ ukẹcha kẹ ihwo kpokpọ yẹrẹ ihwo re guọnọ ukẹcha? Ọ vwọ dianẹ ẹguọnọ yen e vwo vughẹ Inenikristi rẹ uyota na, aphro herọ nẹ ukẹcha tiọyena se si we kẹrẹ Jihova. (Jọ 13:35) Wo se vwo imuẹro nẹ “oka rẹ izobo ọtiọyena nabọ je Ọghẹnẹ.”—Hib 13:16.

Dede nẹ egbabọse herọ, Inenikristi buebun re kua kpo ukoko kpokpọ mrẹ omavwerhovwen—wọ je sa mrẹ omavwerhovwen! Anne-Lise tare nẹ, “Ikoko sansan re me kua ra na nẹrhẹ me nabọ riẹn iniọvo na phiyọ.” O rhi mu Kazumi ẹro re nẹ ohwo da kua, “ọ sa mrẹ ukẹcha ri Jihova vwẹ idjerhe ro rhẹro rọyeen.” Kẹ Jules vwo? Ọ da ta: “Igbeyan ri mi vwori enẹna nẹrhẹ ẹwẹn mẹ rhi totọ. Ukoko kpokpọ nana rhe riẹnriẹn ovwẹ oma re, ọ cha bẹn ri mi vwo vrẹn no.”