Ayen Mrẹ Ẹguọnọ rẹ Iniọvo na Djephia

ỌMỌKO ọvo vwẹ Guatemala ọyen Yomara vẹ iniọvo rọyen emeshare​—Marcelo kugbe Hiver dia. Iseri ri Jihova da ton uyono ri Baibol phiyọ vẹ Yomara ọke vwọ yanran na, iniọvo rọyen da je vwomaba uyono na. Ẹkẹvuọvo egbabọse ọvo herọ. Iniọvo erha nana irhuẹro, ayen ji se se ọbe rẹ braille re ru kẹ irhuẹro-o. Ọtiọyena, oniọvo ọshare rọ reyọ Baibol vwo yono ayen ko se ọbe uyono na vẹ ẹkpo ri Baibol rehẹ evun rọyen vwọ kẹ ayen.

Uyono ẹra ọyen obẹnbẹn ọfa rẹ ayen vwori. Ayen ọvo, cha sa yan oyan ro te ibrẹro 40 vwo kpo Ọguan Ruvie rọ kẹrẹ raye-en. Iniọvo rẹ ukoko na ru ọrhuẹrẹphiyotọ ra vwọ chon ayen uko vwo kpo emẹvwa na eje re ayen ruẹ. Ọke rẹ iniọvo erha nana de vwo ota vwẹ uyono re ruẹ vwẹ uvwre rẹ udughwrẹn na, iniọvo ukoko na ke chọn ayen uko vwo muegbe rẹ ota na kuyovwin.

Vwẹ May 2019, a da ton uyono eruo phiyọ vwẹ ọko rayen. Ọke yena, jẹ aye gbẹ ọshare re dia ekobaro ọkieje kua kpo ọko na re. Dede nẹ ayen riẹn obo re se ji siẹ ọbe re ru kẹ irhuẹro re se braille na-a, ayen bru ẹkẹn kẹ oma nẹ ayen che yono iniọvo erha nana obo re se. Ayen de kpo asan ra da sẹro rẹ ẹbe de re yono obo re se braille je tẹn ona rẹ obo rẹ ayen sa vwọ reyọ vwo yono ayen.

Emeranvwe evo vwọ wan nu, iniọvo erha na da nabo riẹn obo re se braille, ọnana de rhi toroba ẹyan obaro rayen vwẹ ẹga ri Jihova.a Enẹna Yomara, Marcelo, kugbe Hiver ga kerẹ ekobaro ọkieje. Marcelo odibo rowian. Ọkieje yen ayen vwo vwobọ vwẹ iruo rẹ ẹga na. Ihwo efa da mrẹ oruru rẹ ayen djephia, kọ nẹrhẹ ayen vwo owenvwe rẹ ayen vwo vwobọ vwẹ iruo rẹ ẹga na.

Iniọvo erha na vwo ọdavwaro kpahen ẹguọnọ vẹ obicha iniọvo rẹ ukoko na dje vwọ kẹ ayen. Yomara da ta: “Ghwe vwo nẹ ọke rẹsosuọ ayen vwo bru avwanre rhe, yen Iseri na vwo dje ẹguọnọ rẹ Inenikristi rẹ uyota kẹ avwanre. Marcelo da vwọba, “Avwanre vwo igbeyan iyoyovwin ra mrẹ vwo dje-e vwẹ ukoko avwanre, avwanre jehẹ ẹbẹre ọvo rẹ iniọvo rẹ akpọeje ri yerẹn kuẹgbe vwọrẹ ẹguọnọ. Yomara kugbe iniọvo rọyen rhẹro ọke rẹ ayen cha vwọ mrẹ obo re che vwo ru akpọ na phiyọ iparadaisi.​—Un 37:​10, 11; Aiz 35:5.