Ighene​—⁠Ovwan je Rha Yanphiaro Ovwan de Bromaphiyame Nu

1. Erhọ yen omamọ rẹ erọnvwọn rẹ ighene buebun ru wiẹn re?

KUKPE KUKPE yen ighene re dia Inenikristi uriorin buebun vwo bromaphiyame. Wọ jẹ owọ nana re? Ọ da dia ọtiọyen, gba riẹn nẹ oma wẹn vwerhen iniọvo rẹ ukoko na, ọtiọyen ji te Jihova! (Isẹ 27:11) Ghwọrọ ọmọke vwo roro kpahen erọnvwọn evo ru wo se ru wiẹn re. Wọ nabọ jomaotọ yono Baibol na, ọ sa dianẹ ọ reyọ owẹ ikpe buebun. Obo wo yonori chọn wẹ uko vwọ mrẹvughe nẹ Baibol na ghene Ota rẹ Ọghẹnẹ. Vwọ vrẹ ọyena, wọ rhe riẹn ji vwo ẹguọnọ rẹ ohwo ro vwo Baibol na re. Ẹguọnọ ru wo vwo kpahen Jihova kodo te ẹdia rẹ wọ da vwomakpahotọ kẹ ji bromaphiyame. Omamọ rẹ orhiẹn yen wo bruru na!

2. Die yen a cha ta ota kpahen vwẹ uyono nana?

² Tavwen wo ki bromaphiyame, wo hirharoku egbabọse sansan re nẹrhẹ ọ bẹn kẹ wẹ wọ vwọ fuevun ga Jihova. Wọ vwọ ghwanran tedje na, wo ji che hirharoku edavwini efa. Eshu cha davwẹngba vwọ nẹrhẹ ẹguọnọ ru wo vwo kpahen Jihova djiro je nẹrhẹ wọ dobọ rẹ ẹga ri Jihova ji. (Ẹfe. 4:14) Wọ vwẹ uphẹn kẹ ọyena nẹ ọ phia kẹ wẹ-ẹ. Die yen sa chọn wẹ uko vwọ fuevun kẹ Jihova ọkieje, ji yerin mu ive rẹ omaẹvwọkpahotọ wẹn? Wo se vwo “ru kerẹ omiragua” vwẹ ẹga ri Jihova, ofori nẹ wọ rha yanphiaro ọkieje. (Hib. 6:⁠1) Kẹ, mavọ yen wo se vwo ru ọtiọyen?

MAVỌ YEN WỌ SA VWỌ YANPHIARO KERẸ ONENIKRISTI?

3. Die yen ofori nẹ Inenikristi eje ru siẹrẹ ayen de bromaphiyame nu?

³ Ofori nẹ a reyọ uchebro rẹ ọyinkọn Pọl vwọ kẹ Inenikristi rehẹ Ẹfesọs vwo ruiruo ọke re de bromaphiyame nu. Ọ vuẹ ayen nẹ ayen dia Inenikristi ri yerin te ẹdia rẹ “omiragua.” (Ẹfe. 4:13) Ọyena mudiaphiyọ nẹ, ofori nẹ ayen ‘rha yanphiaro.’ Avwanre se vwo ẹruọ rẹ oborẹ Pọl mudiaphiyọ rọ vwọ vwẹ ẹyan obaro rẹ avwanre vwẹ ukoko na vwo dje omotete rọ ghwanra cha. Esẹ vẹ ini vwo ẹguọnọ rẹ ọmọboba rẹ ayen vwiẹre, oma rẹ ọmọ na vwerhen ayen siẹrẹ ayen da mrẹ. Ẹkẹvuọvo ọmọ na cha sa dia ọmọboba bẹdẹ-ẹ. Ọke vwọ yanran na, o che siobọnẹ “ekuakua rẹ emọ.” (1 Kọr. 13:11) Ọtiọyen ọ je hepha vwọ kẹ Inenikristi. Ofori nẹ a je rha yanphiaro a da tobọ bromaphiyame nu. E je roro kpahen owọẹjẹ evo re cha chọn avwanre uko vwo ru ọtiọyen.

4. Uruemu vọ yen sa chọn wẹ uko vwọ yanphiaro vwẹ ẹga ri Jihova? Djekpahọn. (Filipae 1:⁠9)

⁴ Jẹ ẹguọnọ ru wo vwo kpahen Jihova kodophiyọ. Enẹna, wo vwo ẹguọnọ ri Jihova mamọ re. Ẹkẹvuọvo, ẹguọnọ ru wo vwo kpahọn na ji se kodophiyọ. Vwẹ idjerhe vọ? Ọyinkọn Pọl djunute idjerhe ọvo re se vwo ru ọtiọyen ra niyẹnrẹn rọyen phiyọ Filipae 1:⁠9. (Se.) Pọl nẹrhovwo nẹ e jẹ ẹguọnọ rẹ iniọvo ri Filipae “dje ebuo ebuo.” Ọtiọyena, ẹguọnọ re vwo kpahen Jihova se kodophiyọ. Avwanre se ru ọyena siẹrẹ avwanre de vwo “erianriẹn kugbe ẹmrẹ vughe.” Avwanre vwo yono kpahen Jihova phiyọ ye, ẹguọnọ re vwo kpahọn ko che kodophiyọ, ka je cha vwẹ ẹro ọghanghanre vwo ni iruemu rọyen kugbe obo ro ruẹ erọnvwọn wan. Kidie nẹ avwanre vwo owenvwe ọgangan re vwo ru obo re vwerhọn oma, avwanre rha guọnọ kuophiyotọ-ọ. Avwanre davwẹngba vwo vwo ẹruọ rẹ obo rọ guọnọ mie avwanre rere avwanre se vwo ru nene.

5-6. Mavọ yen ẹguọnọ re vwo kpahen Jihova se vwo kodophiyọ? Djekpahọn.

⁵ Ẹguọnọ re vwo kpahen Jihova che kodophiyọ siẹrẹ e de yono kpahen Ọmọ rọyen rọ nabọ dje uruemu rẹ Ọsẹ rọyen phia gbagba. (Hib. 1:⁠3) Idjerhe ro me yovwin re se vwo vughe Jesu yen a vwọ fuẹrẹn ẹbe ẹne re ghwa Ikuegbe rẹ Akpeyeren ri Jesu na. Ọ da dianẹ wo ji rhi vwo ẹkuruemu ru wo vwo se Baibol na kẹdẹ kẹdẹ-ẹ, kẹ diesorọ wọ rha tuọnphiyọ enẹna-a? Wo vwo se kpahen ikuegbe rẹ akpeyeren ri Jesu na, gba jokaphiyọ iruemu rọyen. Ọyen ohwo ra sa rua, o vwo ẹguọnọ rẹ imitete, o ji si ayen toma. (Mak 10:​13-16) Ọ nẹrhẹ ẹwẹn rẹ idibo rọyen totọ; ọtiọyena kẹ ayen sa ta ẹwẹn rayen vwọ kẹ siẹrẹ ọ vẹ ayen da herọ. (Mat. 16:22) Jesu vwẹrokere Ọsẹ rọyen rọhẹ odjuvwu womarẹ iruemu yena ro djephia na. Jihova ọyen ohwo ra je sa rua. Avwanre sa nẹrhovwo rhe. A sa vuẹ obo rehẹ ẹwẹn rẹ avwanre eje vwẹ ẹrhovwo. O muẹro nẹ ọ cha ghwọku avwanre-e. O vwo ẹguọnọ rẹ avwanre; ọyen je vwẹrote avwanre.​—⁠1 Pita 5:⁠7.

⁶ Jesu dje erorokẹ phia vwọ kẹ ihwo. Ọyinkọn Matiu de si: “Ọke rọ vwọ mrẹ otu buebu na, ẹro da dọn, fikiridie ayen da hra ke ro ẹnwan kerẹ igegede ri vwo osu-un.” (Mat. 9:36) Mavọ yen oma ruẹ Jihova? Jesu da ta: “Ọ dia ẹguọnọ rẹ Ọsẹ rẹ ovwan rọ hẹ obo odjuvwu rere ọvo rẹ imitete na ghwru-u.” (Mat. 18:14) Mavọ yen ọ vwerhen oma te ra vwọ riẹn nẹ Jihova vwo ẹguọnọ rẹ avwanre! E vwo vughe Jesu phiyọ ye, ẹguọnọ re vwo kpahen Jihova jo kodophiyọ.

7. Mavọ yen Inenikristi ri tedje vwẹ ukoko na re dia igbeyan wẹn sa vwọ chọn wẹ uko?

⁷ Wo che vwo ẹguọnọ ri Jihova phiyọ je yan obaro siẹrẹ wọ da vwẹ iniọvo ri yerin tedje vwẹ ukoko na vwo mu igbeyan. Vwo oniso rẹ oborẹ oma vwerhen ayen wan. Ayen viẹ idiekpọvwẹ kpahen orhiẹn rẹ ayen bruru rẹ ayen vwọ ga Jihova-a. Nọ ayen kpahen erọnvwọn evo rẹ ayen rhiẹromrẹ vwẹ ẹga ri Jihova re. Wọ sa nokpẹn rẹ uchebro mie ayen ọke wọ da guọnọ brorhiẹn ọghanghanre. Karophiyọ nẹ “asan rẹ evwiroro vẹ ibruche epha ihwo rọye she-e.”​—⁠Isẹ 11:⁠14.

8. Die yen wo se ru ọ da dianẹ wo vwo ẹwẹn ivivẹ kpahen oborẹ Baibol na tare?

⁸ Phi ẹwẹn ivivẹ ro rhe we kparobọ. Kirobo re djunute vwẹ ẹkorota rivẹ, Eshu cha davwẹngba vwọ dobọ rẹ ẹyan obaro wẹn ji vwẹ ẹga ri Jihova. Idjerhe ọvo ro se vwo ru ọyena, ọyen ọ vwọ nẹrhẹ wo vwo ẹwẹn ivivẹ kpahen uyono ri Baibol evo ru wọ riẹnre. Kerẹ udje, vwẹ ọmọke obọ wo che hirharoku uyono rẹ erọnvwọn mama rhe rọ dia uyono ro brọghọphiyọ Ọghẹnẹ oma-a. Ọ sa dianẹ wọ vwọ hẹ omotete, wo ghwe roro kpahen uyono nana-a, ẹkẹvuọvo wọ vwọ ghwanre re na, uyono nana sa dia ẹbẹre ọvo rẹ obo re yono uwe vwẹ isikuru. Ona rẹ iyono wẹn vwo djisẹ rẹ uyono rẹ erọnvwọn mama rhe sa nẹrhẹ wo rhi vwo imuẹro kpahọn. Ẹkẹvuọvo, ọ sa dianẹ ayen je rhe nabọ ghwọrọ ọke vwọ fuẹrẹn erọnvwọn ri djerephia nẹ Ọmemama herọ-ọ. Karophiyọ odjekẹ rọhẹ Isẹ 18:17: “Ohwo ro ke guẹdjọ o ruẹ kerẹ ẹsiẹ ra mrẹ nẹ ọye rease, bẹsiẹ rẹ onẹdjọ rọye cha vwọ nọ orhiẹn.” Ukperẹ wo vwo se kemu kemu ejobi re yono uwe vwẹ isikuru gbuyota, gba nabọ ghwọrọ ọke vwọ fuẹrẹn uyota rehẹ Baibol na. Reyọ ẹbe rẹ ukoko na vwo ru ehiahiẹ. Nene iniọvo ri ke se uyono rẹ erọnvwọn mama rhe gbuyota jovwo ta ota. Nọ ayen kpahen obo re kẹ ayen imuẹro nẹ Ọmemama ọvo herọ ro vwo ẹguọnọ rẹ avwanre. Eta rẹ ọbọngan tiọyena sa chọn wẹ uko vwo vwo imuẹro nẹ Ọmemana ọvo herọ.

9. Die wo yono vwo nẹ ikuegbe ri Melissa rhe?

⁹ Oniọvo aye re se Melissa mrẹ erere gbidiki vwo nẹ ehiahiẹ ro ru vwọ kpahen uyovwinrota ro shekpahen emama.b Ọ da ta: “Obo re djisẹ rẹ uyono rẹ erọnvwọn mama rhe wan vwẹ isikuru sa nẹrhẹ o mu ohwo ẹro. Vwẹ ẹsosuọ, oshọ mu vwe ri mi vwo ru ehiahiẹ, kidie mi roro nẹ me sa rhe mrẹ nẹ uyono rẹ erọnvwọn mama rhe na uyota. Ẹkẹvuọvo mi de rhi brevun kpiroro nẹ Jihova guọnọre nẹ avwanre ga ọyen vẹ imuẹro rọ ghwotọ. Ọtiọyena mi de ru ehiahiẹ. Mi de se ọbe rẹ Is There a Creator Who Cares About You? Kugbe ibroshọ ri Was Life Created? vẹ Ọtonphiyọ rẹ Arhọ​—⁠Enọ Iyorin re Guọnọ Ẹkpahọnphiyọ. Ọnana dẹn yen obo re me ghwa guọnọ. Mane ke me fobọ tuọnphiyọ vwenẹ.”

10-11. Die yen sa chọn wẹ uko vwọ kẹnoma kẹ ọfanrhiẹn? (1 Tẹsalonaika 4:​3, 4)

¹⁰ Sen orharhe rẹ uruemu. Vwẹ ọke rẹ ighene yen urhurusivwe rẹ ehware ma vwọ gan, ọke yena wo ji se hirharoku ukeke ọgangan ru wo vwo gbe ọfanrhiẹn. Idẹbono guọnọre nẹ wo shephiyọ ufi yena. Die yen sa chọn wẹ uko vwọ sen ọdavwini yena? (Se 1 Tẹsalonaika 4:​3, 4.) Wọ da nẹrhovwo, wọ me vuẹ Jihova oborẹ oma ghini ru we dẹn, je rẹ nẹ ọ chọn wẹ uko vwọ yọnregan. (Mat. 6:13) Karophiyọ nẹ ọ dia Jihova guọnọ reyọ owẹ vwo guẹdjọ-ọ, ẹkẹvuọvo ọ guọnọ chọn wẹ uko. (Une 103:​13, 14) Baibol na je sa chọn wẹ uko. Melissa re djunute siẹvure na davwẹngba vwọ sen erharhe iroro. Ọ da ta: “Isese ri Baibol ri kẹdẹ kẹdẹ yen chọn vwẹ uko rẹ oma vwo ju vwe ẹrhọ. Ọ nẹrhẹ me karophiyọ nẹ Jihova yen vwo vwe, nẹ me guọnerọ vwẹ akpeyeren mẹ.”​—⁠Une 119:⁠9.

¹¹ Wẹ ọvo davwẹngba ru wo vwo nenesi rẹ ebẹnbẹn wẹ-ẹn. Nene ọse vẹ oni wẹn ta ota kpahen ebẹnbẹn ru wo vwori. Vwọrẹ uyota, ọ ghwa lọhọ ra vwọ ta ota kpahen ebẹnbẹn ọtiọyena-a, ẹkẹvuọvo ọyen obo re ghanre re vwo ru ọtiọyen. Melissa da ta: “Me nẹrhovwo rhe Jihova nẹ ọ kẹ vwẹ uduefiogbere, ọtiọyena me vẹ ọsẹ mẹ da ta ota kpahen ebẹnbẹn mẹ na. Avwanre vwọ ta ota nu, ẹwẹn mẹ de rhi totọ. Me riẹnre nẹ oma mẹ vwerhen Jihova.”

12. Die yen sa chọn wẹ uko vwo bru omamọ rẹ orhiẹn?

¹² Reyọ odjekẹ ri Baibol vwo ruiruo. Wọ vwọ ghwanran na, ọsẹ vẹ oni wẹn cha vwẹ uphẹn kẹ wẹ nẹ wo brorhiẹn evo komobọ. Ẹkẹvuọvo, wo ghwe rhi vwo ọhọ rẹ akpeyere-en. Ọtiọyena, mavọ yen wọ sa vwọ kẹnoma kẹ orhiẹn-ebro ro che gbowọphiyọ oyerinkugbe wẹn vẹ ọ ri Jihova? (Isẹ 22:⁠3) Oniọvo aye ọvo re se Kari djisẹ rẹ obo re chọn rọ uko ro se vwo bru omamọ rẹ orhiẹn. Ọ mrẹvughe nẹ wọ da dia Onenikristi ro tedje, wọ rha guọnọ urhi ro che sun korhiẹn korhiẹn ru wo che bru-u. Ọ da ta: “Ukperẹ mi vwo nenesi rẹ irhi, odjekẹ ri Baibol kọyen mi vwo ruiruo.” Ọke rẹ wo de se Baibol na, gba nọ oma wẹn: ‘Die yen ẹkpo nana vuẹ vwẹ kpahen ẹro rẹ Jihova vwo nẹ emu? Asan ri mi se na vwo odjekẹ rọ sa chọn vwẹ uko vwo ru obo ri yovwirin? Ọ da dia ọtiọyen, erere vọ yen me cha mrẹ ọke re me da reyọ ayen vwo ruiruo?’ (Une 19:7; Aiz. 48:​17, 18) Siẹrẹ wo de se Baibol na ji roro kokodo kpahen obo ru wo seri, kọ cha lọhọ kẹ wẹ wo vwo brorhiẹn re vwerhen Jihova oma. Wo vwo yerẹn tedje ememerha re na, wọ cha mrẹvughe nẹ ọ dia ẹdia eje wo de che nenesi rẹ urhi tavwen wo ki ru obo ru wo che ru-u, kidie wọ rhe riẹn ẹro rẹ Jihova vwo nẹ erọnvwọn re.

13. Ukẹcha vọ yen omamọ rẹ igbeyan sa vwọ kẹ wẹ? (Isẹ 13:⁠20)

¹³ Reyọ ihwo ri vwo ẹguọnọ ri Jihova vwo mu igbeyan. Kirobo re djunute vwẹ ẹkorota rẹ ighwrẹn, oka rẹ ihwo ru wo vwo mu igbeyan sa chọn wẹ uko vwọ dia Onenikristi ro tedje. (Se Isẹ 13:20.) Aghọghọ rẹ oniọvo aye ọvo re se Sara de rhi shekpotọ. Emu ọvo da phia rọ chọn rọ uko vwọ rhoma vwo aghọghọ. Ọ da ta: “Me da rhe mrẹ omamọ rẹ igbeyan vwẹ ọke ro fori. Mẹ vẹ eghene aye ọvo ki kuomakugbe kudughwrẹn kudughwrẹn vwo muegbe rẹ Uwevwin Orhẹrẹ na. Ugbeyan mẹ ọfa da rha chọn vwẹ uko me sa vwọ kpahenphiyọ enọ vwẹ uyono. Fikirẹ ukẹcha rẹ igbeyan mẹ na, mi de rhi se uyono romobọ vẹ ẹrhovwo ẹnẹ gbẹ ọdavwẹ. Oyerinkugbe mẹ vẹ ọ ri Jihova da rhe ganphiyọ, me da rhoma rhi vwo aghọghọ.”

14. Die yen chọn Julien uko vwo mu omamọ igbeyan?

¹⁴ Mavọ yen wo se vwo mu omamọ rẹ igbeyan re cha vwẹ ukẹcha kẹ wẹ? Julien rọ ga kerẹ ọkpako da ta: “Ọke re me vwọ hẹ eghene, mi mu omamọ igbeyan vwẹ iruo aghwoghwo na. Igbeyan nana vwo oruru dẹn, ayen chọn vwẹ uko vwọ mrẹ omavwerhovwẹn rọhẹ iruo rẹ aghwoghwo na. Ọnana da nẹrhẹ mi vwo owenvwe re me vwọ tuẹn ẹga rẹ ọkieje phiyọ. Me da je rhe mrẹvughe nẹ emu ọvo rọ djẹ vwẹ omamọ igbeyan buebun evwo yen kidie igbeyan rẹ edjedje mẹ ọvo yen me guọnọ. Ukuko na, mi ji rhi mu omamọ igbeyan vwẹ Bẹtẹl. Udje rayen chọn vwẹ uko vwo ru yovwinphiyọ vwẹ ẹsanọ rẹ erọnvwọn ra vwọ diotọ, ọnana da nẹrhẹ mi sikẹrẹ Jihova phiyọ.”

15. Oka rẹ igbeyan vọ yen Pọl si Timoti orhọn kpahen? (2 Timoti 2:​20-22)

¹⁵ Ọ da dianẹ wo vwo oniso rẹ oniọvo ọvo vwevunrẹ ukoko na ro fo ohwo ru wo vwo mu ugbeya-an vwo? Pọl riẹnre nẹ o vwo iniọvo evo vwevunrẹ ukoko rẹ ẹgbukpe ujorin ẹsosuọ ri ruẹ kerẹ Inenikristi-i, ọtiọyena o de siẹ Timoti orhọn nẹ ọ kẹnoma kẹ ayen. (Se 2 Timoti 2:​20-22.) Ọ dia ọmọrhiẹ owian yen avwanre wianre avwanre vẹ Jihova ki se vwo oyerinkugbe ọkpẹkpẹkpẹ-ẹ. Ọtiọyena, e ja vwẹ uphẹn kẹ ohwo vuọvo rere ọ guọghọ-ọ.​—⁠Une 26:⁠4.

MAVỌ YEN E VWO VWO OBORATẸNROVI SA VWỌ CHỌN WẸ UKO VWỌ YANPHIARO VWẸ ẸGA RI JIHOVA?

16. Ọrhọ yen oboratẹnrovi ro fori nẹ wo vwo?

¹⁶ Vwo oboratẹnrovi ro che fierere kẹ wẹ. Vwo oboratẹnrovi rọ sa bọn esegbuyota wẹn gan je nẹrhẹ wọ dia Onenikristi ro tedje. (Ẹfe. 3:16) Kerẹ udje, wo se brorhiẹn ru wo vwo ru uyono romobọ ji se Baibol na kẹdẹ kẹdẹ. (Une 1:​2, 3) Yẹrẹ wọ sa davwẹngba vwọ nẹrhovwo nẹ ubiudu rhe ọkieje. Wọ je sa jomaotọ kpahen erọnvwọn ra vwọ diotọ kugbe obo ru wọ ghwọrọ ọke wẹn wan. (Ẹfe. 5:​15, 16) Oma cha vwerhen Jihova siẹrẹ ọ da mrẹ nẹ wọ davwẹngba wọ vwọ yanphiaro.

17. Erere vọ yen che te we obọ siẹrẹ wọ da vwẹ ukẹcha kẹ ihwo efa?

¹⁷ Wọ cha dia Onenikristi ro tedje wọ da vwẹ ukẹcha kẹ ihwo efa. Jesu da ta: “Ẹrhovwo herọ kẹ ọkokẹ nọ ohwo ra kẹ.” (Iruo 20:35) Oma cha vwerhen owẹ siẹrẹ wọ da reyọ ọke wẹn kugbe ẹgba wẹn vwọ chọn ihwo efa uko. Kerẹ udje, wọ sa vwẹ ukẹcha vwọ kẹ iniọvo re ghwanre re kugbe e rẹ oma rayen ganre-e vwẹ ukoko wẹn. Ọkiọvo wọ sa yan uwevwin vwọ kẹ ayen je cha ayen uko vwọ nabọ riẹn obo ra reyọ ifonu rayen vwo ruiruo. Wọ da dia oniọvo ọshare, davwẹngba wo vwo yerin te ẹdia rẹ odibo rowian, rere wọ sa vwọ vwẹ ukẹcha vwọ kẹ iniọvo wẹn. (Fil. 2:⁠4) Wo ji se dje ẹguọnọ vwọ kẹ ihwo rehẹ ukoko na-a, womarẹ wo vwo ghwoghwo iyẹnrẹn esiri na vwọ kẹ ayen. (Mat. 9:​36, 37) Ọ da dia oborẹ wo se ru, jẹ ẹga rẹ ọkieje dia orọnvwọn ọvo ru wọ tẹnrovi.

18. Mavọ yen ẹga rẹ ọkieje sa vwọ chọn wẹ uko vwo sikẹrẹ Jihova phiyọ?

¹⁸ Ẹga rẹ ọkieje se rhie uphẹn buebun phiyọ kẹ wẹ vwọ yanphiaro vwẹ ẹga ri Jihova. Wọ da dia ọkobaro ọkieje, wo se vwo uphẹn ru wo vwo kpo Isikuru rẹ Ihwo ri Ghwoghwo Uvie Na. Wọ je sa ga vwẹ Bẹtẹl yẹrẹ vwobọ vwẹ iruo rẹ ebanbọn rẹ ukoko na. Eghene aye ọvo re se Kaitlyn da ta: “Ọke re me vẹ iniọvo ri tedje ghwọrọ kugbe vwẹ iruo rẹ aghwoghwo na yen emu ọvo kiriguo rọ chọn vwẹ uko vwo sikẹrẹ Jihova mi vwo bromaphiyame nu. Udje rayen nẹrhẹ mi vwo owenvwe ri mi vwo yono Baibol na kodophiyọ, ji ru ona rẹ aghwoghwo mẹ yovwinphiyọ.”

19. Erhọ yen ebruphiyọ wọ cha riavwerhen rọyen ru wọ vwọ yanphiaro vwẹ ẹga ri Jihova na?

¹⁹ Wọ vwọ yan-obaro phiyọ na, wọ cha mrẹ ebruphiyọ buebun. Wọ rha cha ghwọrọ ẹgba wẹn phiyọ erọnvwọn ri fiemu-u. (1 Jọn 2:17) Ọnana cha nẹrhẹ wọ vrabọ rẹ ọmiaovwẹ ro nẹ orharhe rẹ ojẹ cha. Ukperẹ ọyena, ku wo che yerin uvi rẹ akpọ ji vwo omavwerhovwẹn. (Isẹ 16:⁠3) Omamọ udje wẹn cha vwẹ ọbọngan vwọ kẹ iniọvo na, te imitete te ekpako. (1 Tim. 4:12) Emu ọfa rọ ma ghanre yen ufuoma vẹ evunvọvwẹn ro nocha siẹrẹ a vẹ Jihova de vwo uvi rẹ oyerinkugbe, e de ji ruẹ obo re vwerhọn oma.​—⁠Isẹ 23:​15, 16.