OBO RE SE VWO PHI UTUOMA KPAROBỌ

4 | Ọghẹnẹ Cha Chọn Wẹ Uko Vwo Phi Utuoma Kparobọ

Baibol na da ta:

“Omamọ rẹ ẹwẹn na yen ẹguọnọ, aghọghọ, ufuoma, ako echiro, ẹse-eruo, uyoyovwin, esegbuyota, dẹndẹn, omaẹriẹnsuon.”—GALESHA 5:22, 23, NW.

Obo ro Mudiaphiyọ:

E se phi utuoma kparobọ womarẹ ukẹcha rẹ Ọghẹnẹ. Ẹwẹn ọfuanfon na sa chọn avwanre uko vwo vwo iruemu rẹ avwanre rorori nẹ e se vwo jovwo komobọ-ọ. Ukperẹ a vwọ davwẹngba romobọ rẹ avwanre vwo phi utuoma kparobọ, e jẹ a vwẹroso ukẹcha rẹ Ọghẹnẹ. A da vwẹroso ukẹcha rẹ Ọghẹnẹ, ke se vwo ọkpọ rẹ ẹwẹn ro rhe ọyinkọn Pọl ro vwo si: “Mi se ru emu ejobi vwi Kristi rọ kẹ vwẹ ogangan.” (Filipae 4:13) Vwọba, kẹ avwanre je sa ta; “Ọchuko mẹ nẹ obọ rẹ Ọrovwohwo cha.”—Une Rẹ Ejiro 121:2.

Obo Wo Se Ru:

“Jihova wene uvwe vwo nẹ ohwo ro gbozighi phiyọ ohwo rẹ ufuoma re.”—WALDO

Rhievun nẹrhovwo rhe Jihova vwọ nokpẹn rẹ ukẹcha rẹ ẹwẹn ọfuanfon rọyen. (Luk 11:13) Yare mie nẹ ọ chọn wẹ uko vwo dje iruemu rẹ Inenikristi phia vwẹ akpeyeren wẹn. Yono oborẹ Baibol na ta kpahen ẹguọnọ, ufuoma, ako echiro kugbe omaẹriẹnsuon re dia iruemu re sa chọn wẹn uko vwọ kẹnoma vwọ kẹ utuoma. Guọnọ idjerhe ru wọ se vwo dje iruemu yena phia vwẹ akpeyeren wẹn. Kuomagbe ihwo re je davwẹngba ayen se vwo dje iruemu ọtiọyena phia vwẹ akpeyeren rayen. Ihwo tiọyena sa chọn wẹ uko vwo vwo “ẹguọnọ kugbe iruo esiri.”—Hibru 10:24.

Oborerhiẹromrẹ Vwẹ Akpeyeren—WALDO

Phi Utuoma Kparobọ

Oka rẹ akpọ rẹ ọshare ọvo re se Waldo yerin ọke rọ vwọ ghwanra cha nẹrhẹ o vwo ẹwẹn rẹ utuoma ọgangan mamọ. Ọ da ta: “Ọkieje yen me vẹ ihwo re shẹ ihuvwun egangan vwọ họnra vwẹ evunrẹ irhuvwun . . . O vwo ọke ọvo, ihwo ri mi nene họnra na vwọ hwosa vwọ kẹ onogbozighi ọvo rọ nabọ tẹn ona rẹ ihwo ehwe dẹn nẹ ọ tenye ovwẹ hwe, ẹkẹvuọvo me djẹ vabọ vẹ ora rẹ asan ro de duvwun uvwe.”

Oma vwerhen Waldo ọke rẹ aye rọyen vwọ tuẹn uyono ri Baibol phiyọ-ọ. Ọ da ta: “Mi vwo utuoma kpahen Iseri ri Jihova, ọke buebun yen mi vwo dje ayen ekan. Jẹ, o vwo ọke vuọvo rẹ ayen vwọ kpahen kẹ vwẹ rhivwin vẹ ophu-u.”

Ọkiọvo rhi vwo te, Waldo da rhe ton uyono ri Baibol phiyọ. Ọ da ta: “Ọ lọhọ kẹ vwẹ me vwọ reyọ obo ri mi yono na vwo ruiruo-o. Mi rorori nẹ mi che se sun ophu mẹ-ẹ.” Ẹkẹvuọvo, emuọvo ro yono vwo nẹ Baibol na rhe da rhe chọn uko vwo wene iroro rọyen na.

Waldo da ta: “Ẹdẹ ọvo, Alejandro rọ dia ohwo re me vẹ ọyen gbe yono Baibol na da vuẹ vwẹ nẹ mi se Galesha 5:22, 23. . . . Alejandro da vuẹ vwẹ nẹ ọ dia ẹgba romobọ mẹ yen mi se vwo vwo iruemu re djunute vwẹ etiyin na-a, ẹkẹvuọvo womarẹ ukẹcha rẹ ẹwẹn ọfuanfon rẹ Ọghẹnẹ. Uyota nana re me rhe mrẹvughe na ghwe wene iroro ri mi vwori jovwo.”

Kidie nẹ Waldo vwẹroso ukẹcha rẹ Ọghẹnẹ, kọ sa kẹnoma vwọ kẹ uruemu rẹ utuoma vwẹ akpeyeren rọyen. Ọ da ta: “Ewene ri mi ru vwẹ akpeyeren re gbe igbeyan mẹ ri jovwo vẹ ihwo rẹ orua mẹ unu.” Ọ da je ta: “Jihova wene uvwe vwo nẹ ohwo ro gbozighi phiyọ ohwo rẹ ufuoma re.”