Pita vẹ Jọn muegbe rẹ ubruwevwin rọhẹ obenu na vwọ kẹ orẹ rẹ Ọwanvrẹ rẹ 33 C.E.
AKPEYEREN RẸ INENIKRISTI
Wo Muegbe Hẹrhẹ Ẹkarophiyọ Na?
Orẹ rẹ Ọwanvrẹ rọ koba rẹ Jesu che ru cha dia ọ rẹ oghẹresan. Ọ vwọ dianẹ ọke ro che vwo ghwu sikẹrire na, o de ru ọrhuẹrẹphiyotọ ro vwo nene iyinkọn rọyen ru orẹ na je vwẹ orẹ ọkpokpọ ọfa vwo mu rẹ ayen che ru kukpe kukpe, rọ dia Emu Ovwọnvwọn rẹ Orovwori Na. Ọtiọyena, o de ji Pita vẹ Jọn re muegbe rẹ uwevwin na. (Luk 22:7-13; ni uhoho rọhẹ opharo ọbe na.) Ọnana karophiyọ avwanre kpahen ọghanrovwe re vwo muegbe hẹrhẹ Ẹkarophiyọ re che ru vwẹ March 27. Ọkiọvo, ikoko sansan muegbe rẹ ọtota, ibrẹdi vẹ iwaini, vẹ efa. Ẹkẹvuọvo, die yen avwanre ohwo ọvuọvo se ru vwo muegbe hẹrhẹ Ẹkarophiyọ na?
Muegbe rẹ ubiudu wẹn. Se isese ri Baibol rẹ Ẹkarophiyọ na, wo mi ji roro kpahọn. Wọ sa mrẹ ọrhuẹrẹphiyotọ rẹ isese na vwẹ Fuẹrẹn Isiesi Ọfuanfon na Kẹdẹ Kẹdẹ. Wọ sa je mrẹ ọrhuẹrẹphiyotọ rẹ ovuẹ rọyen bunru vwẹ Appendix B12 rọhẹ New World Translation of the Holy Scriptures ra rhoma si na. (Ji ni Ọbe Uyono rẹ Akpeyeren vẹ Iruo Ruvie Na rẹ April 2020. Erua sa mrẹ evuẹ ri shekpahen ọghanrovwẹ rẹ ọtanhirhe na vwẹ Watch Tower Publications Index yẹrẹ Research Guide for Jehovah’s Witnesses rẹ ayen se vwo ru ẹga orua rayen.
Durhie ihwo efa. Vwobọ vwẹ egbada-ẹdjẹ rẹ edurhie na vọnvọn. Roro kpahen ihwo wo se durhie kerẹ irhivwinbrura, ihwo wọ vwẹ Baibol yono jovwo, igbeyan vẹ ihwo rẹ orua. E jẹ ekpako durhie ihwo re dobọ rẹ iruo rẹ ẹga na ji. Karophiyọ nẹ ọ da dianẹ ohwo na dia ekogho wẹ-ẹn, wọ sa mrẹ ọke vẹ asan rẹ Ẹkarophiyọ na vwẹ asan rọ dia siẹrẹ wo de kpo KPAHEN AVWANRE vwẹ jw.org je sane “Ẹkarophiyọ.”
Die ọfa yen e se ru vwo muegbe?