A Vwọ Wian Kuẹgbe Vwẹ Ekogho Ra Da Jẹ Ejajẹ Buebun

Ihwo nabọ kerhọ kẹ ovuẹ rẹ Uvie na siẹrẹ ayen de nyo vwẹ ejajẹ rayen. Ọ sa dianẹ ọyen nẹrhẹ Jihova vwo ọrhuẹrẹphiyotọ rẹ “ihwo ri Ju” re dia eyọnrọn irhi, ri nẹ ẹkuotọ sansan rhe vwo nyo iyẹnrẹn esiri na vwẹ “ephẹrẹ re de vwiẹ” ayen vwẹ Pẹntikọst rẹ ukpe rẹ 33 C.E., dede nẹ ayen nyo ejajẹ ra ma jẹ vwẹ ọke yena rọ dia ejajẹ rẹ Hibru vẹ Grik. (Iruo 2:5, 8) Vwẹ asan ra da jẹ ejajẹ buebun nonẹna, ikoko rẹ ejajẹ sansan se vwo ekogho ọvo rẹ ayen wian kuẹgbe. Mavọ yen ighwoghwota vwẹ ikoko tiọyena sa vwọ wian kugbe vwo ghwoghwo kẹ kohwo kohwo, je vwẹ ọke vuọvo na kẹnoma kẹ e vwo dje ekogho na eghweghwoghwo te ẹdia rẹ ofu de rhi dje ihwo rehẹ ekogho na?

• 

  Ovwan jẹ iroro kugbe (Isẹ 15:22): Iniruo re vwẹrote iruo rẹga rẹ ukoko vuọvo vwoma rere ayen jẹ iroro kpahen idjerhe ro me shephiyọ re se vwo ghwoghwo iyẹnrẹn esiri na vwẹ ekogho na. Ọ da dianẹ ekogho rẹ ayen de ghwoghwo rho gan nọ-ọ, ikoko re jẹ ejajẹ efa sa tanẹ wo pho iwevwin rẹ ihwo re jẹ ejajẹ rayen hepha vrẹ vwẹ ekogho na. Jẹ, ọ da dianẹ ayen sa wian ekogho rẹ ayen de ghwoghwo na re-e kidie nẹ iwevwin rẹ ihwo re jẹ ejajẹ rayen na hra nene asan rọ rhoro mamọ, ayen sa tanẹ wo pho iwevwin na wa-an, ẹkẹvuọvo gba vuẹ ayen kpahen ohwo rẹ ejajẹ rayen ro dje omavwerhovwẹn phia. (od 93 ẹko. 37) Yẹrẹ ayen sa tanẹ ukoko wẹn nene ayen guọnọ ihwo rẹ jẹ ejajẹ rayen vwẹ ekogho wo de ghwoghwo na, rere a vwẹ adrẹsi na vwọba ọ rẹ ukoko rayen. (km 7/12 5, ekpeti) Karophiyọ nẹ vwẹ ẹdia evo, ihwo re jẹ ejajẹ sansan sa dia egodo ọvo. E jẹ evuẹ ra cha vwọphia kpahen ihwo tiọyena shephiyọ vẹ irhi rẹ ekuotọ na.

• 

  Nene odjekẹ (Ẹfe. 4:16): Nabọ nene odjekẹ rẹ Oniruo rọvwẹrote iruo rẹga na vwẹ ukoko wẹn vwọphia. Wọ reyọ Baibol na vwo yono ohwo rẹ ejajẹ ro me je dia ọ rẹ ukoko wẹ-ẹn? Ẹyan obaro rọyen sa kpata phiyọ siẹrẹ ohwo rẹ ukoko yẹrẹ ẹko rọ jẹ ejajẹ rọyen de yono.

• 

  Muegbe (Isẹ 15:28; 16:1): Ọ da dianẹ ọrovwuwevwin ọvo jẹ ejajẹ ọfa vwẹ ekogho wo de ghwoghwo, davwẹngba wo ghwoghwo iyẹnrẹn esiri na kẹ ghene. Wo se muegbe womarẹ wọ vwọ vwẹ ẹwẹn roro phiyotọ ejajẹ rẹ ihwo rẹ ekogho na jẹ, vẹ wọ vwọ danlodu rẹ Baibol rẹ ejajẹ rayen phiyọ ifonu wẹn. Wọ je sa reyọ aplikeshọni rẹ JW Language vwo yono obo re yeren ihwo vwẹ ejajẹ evo.