AKPEYEREN RẸ INENIKRISTI
Eghwoghwo vẹ Eyono Pha Ghanghanre Vwọ kẹ Idibo Egbe
Jesu vwẹ iji kẹ idibo rọyen nẹ ayen re gbe idibo. (Mat. 28:19) Ọnana churobọ si eghwoghwo vẹ eyono. Nọke ra ruọkẹ, avwanre eje nọ oma rẹ avwanre nẹ, ‘Mavọ mi se vwo ru yovwinphiyọ vwẹ ẹbẹre ọghanghanre nana rẹ owian rẹ idibo egbe na?’
GHWOGHWO
Ukperẹ avwanre vwọ hẹrhẹ ihwo nẹ ayen yan bru avwanre rhe, avwanre cha nabọ guọnọ otu ri “fori.” (Mat. 10:11) Avwanre da hẹ iruo aghwoghwo na, avwanre nẹ otọ sua kpahen uphẹn ri rhiephiyọ a vwọ ta ota kẹ ihwo ‘rẹ avwanre mrẹre’? (Iruo 17:17) Lydia rhe dia odibo kiridie ọyinkọn Pọl nabọ gbẹrophiyotọ vwẹ aghwoghwo rọyen.—Iruo 16:13-15.
“Kọn ekankọn vwẹ irhiọke, kugbe ọke rẹ ovwọnvwọn wọ kẹkẹ obọ-ọ” (Aghwo. 11:6)
NI IVIDIO NA GHWOGHWO ỌKIEJE, WO JẸ OMA RHỌ WẸ-Ẹ—AGHWOGHWO RẸ KPREGEDE KUGBE AGHWOGHWO RẸ NẸ UWEVWIN KPO UWEVWIN, RERE WỌ KPAHENPHIYỌ ENỌ NANA:
Vwẹ akpeyeren rọyen kẹdẹ kẹdẹ, mavọ yen Samuel djerephia nẹ ọ guọnọ davwẹngba vwọ kọn okankọn rẹ uyota na?
Diesorọ avwanre vwo muomaphiyọ koka koka rẹ aghwoghwo?
Amono yen wo se ghwoghwo ovuẹ rẹ Uvie na kẹ vwẹ akpeyeren rẹ kẹdẹ kẹdẹ wẹn?
YONO
E vwo gbe idibo vrẹ a vwọ yan jẹ ẹbe vwọ kẹ ihwo. A vwọ chọn ayen uko vwọ yan obaro vwẹ ẹga rẹ Jihova, ofori nẹ avwanre kpo orhivwinbrura, ji ru uyono Baibol. (1 Kọr. 3:6-9) Ẹkẹvuọvo, ọ da rha dianẹ ẹgbaẹdavwọn rẹ avwanre e vwo yono ihwo uyota rẹ Uvie na rhe vwo erhuvwu-u vwo? (Mat. 13:19-22) Avwanre ji muomaphiyọ owian ra vwọ guọnọ ihwo rẹ udu rayen họhọ “otọ rẹ esiri na.”—Mat. 13:23; Iruo 13:48.
“Me kọmre, Apolọs ku ame ku, ẹkẹvuọvo Ọghẹnẹ kọye nẹrhẹ ayen djẹ” (1 Kọr. 3:6)
NI IVIDIO NA GHWOGHWO ỌKIEJE, WO JẸ OMA RHỌ WẸ-Ẹ—AGHWOGHWO RẸ AZAGBA KUGBE IDIBO EGBE, RERE WỌ KPAHENPHIYỌ ENỌ NANA:
Mavọ yen Solomon vẹ Mary ku ame ku okankọn rẹ uyota na vwẹ udu rẹ Ezekiel vẹ Abigail?
Die yen dia ọdavwẹ rẹ avwanre vwẹ koka koka rẹ iruo rẹ aghwoghwo re ruẹ?
Mavọ yen avwanre sa vwọ tẹnrovi obo re se vwo yono ihwo efa uyota na?